1-3. 1) Xiñee rizaalaʼdxiʼ jñaa binni chuʼ xiiñiʼ nayá. 2) Xiñee rinabaʼ Jiobá gaca ca xpinni nayá, ne xiñee naquiiñeʼ gácanu nayá.

ANTE guiree ti hombrehuiiniʼ de ra lidxi, jñaabe ruuyaʼ pa maʼ gúzebe ne pa nayá lari ni nácube. Xiñee runi jñaabe ndiʼ yaʼ. Purtiʼ nanna jñaabe zacá qué zaca huarabe. Laaca nanna jñaabe pa guʼyaʼ binni nabiidiʼ rizá xiiñiʼ zaníʼ íquecaʼ zacaca bixhózebe ne jñaabe.

² Bixhózenu Jiobá, laaca racalaʼdxiʼ gaca ca xpinni nayá. Biblia na: «Né binni nayá lii zácaluʼ nayá» (Salmo 18:26). Xiñee rinabaʼ Jiobá gácanu nayá. Primé, purtiʼ nadxiibe laanu ne nánnabe pa chuʼnu nayá ziuʼnu galán. Guiropa, pur modo laanu zanna binni ximodo laabe. Qué racaláʼdxinu guiníʼ binni mal de Dios stinu ne de labe; ni racaláʼdxinu nga gusisaca binni laabe. Nga runi, caquiiñeʼ gácanu binni nayá, cásica modo rácunu lari zaqueca modo gaca xpiaʼnu (Ezequiel 36:22; 1 Pedro 2:12).

 ³ Xi pur naquiiñeʼ gácanu nayá. Primé la? purtiʼ nánnanu nadxii Dios binni nayá. Guiropa, laanu laaca nadxiinu Jiobá ne racaláʼdxinu gusisácanu laabe pur modo nabáninu. Ne guionna, qué racaláʼdxinu guixélenu de Dios ni nadxii laanu. Yanna, guidúʼyanu xiñee naquiiñeʼ gácanu nayá, xi guiráʼ naquiiñeʼ gúninu para chuʼnu nayá ne xiñee cadi naquiiñeʼ gusaana de gácanu nayá. Ora maʼ bidúʼyanu cani, zudiʼnu cuenta pa nuuruʼ ra cayaadxaʼ gácanu nayá.

4, 5. 1) Xi razón jma risaca nápanu para gácanu nayá. 2) Ximodo rihuinni lu guiráʼ ni bizáʼ Jiobá riuuláʼdxibe chuʼ cani nayá.

⁴ Jiobá rusiidiʼ laanu de stale modo. Tobi de laacani nga riguíxhebe ejemplu chinándanu. Biblia cayabi laanu galán gácanu casi laabe (Efesios 5:1). Yanna, xi razón jma risaca nápanu para guixélenu de guiráʼ ni zanda guni biidiʼ laanu yaʼ. Caquiiñeʼ gúninu ni purtiʼ runi adorarnu ti Dios nayaguieʼ. Biblia na: «Purtiʼ naa nga Jiobá ni cabee laatu de guidxi Egipto para gueeda gacaʼ Dios stitu; ne laatu naquiiñeʼ gácatu nayá, purtiʼ naa nacaʼ nayá» (Levítico 11:45).

⁵ Jiobá naca ti Dios nayá, cásica modo laabe zaqueca lú cani rúnibe ne zacá rihuinni ni lu guiráʼ cani bizaʼbe (Romanos 1:20). Guzéʼtenu modo bizaʼbe Guidxilayú ra nabáninu riʼ. Dxi bizáʼ Jiobá ni, bizaʼbe ni né guiráʼ ni iquiiñeʼ ni para guiá ni stubi ni. Nga runi, gudíxhebe modo guiá bi ni ricaanu ne nisa ni rideʼnu. Laaca bíʼnibe stale microbio para cuee o gó guiráʼ ni zanda guni huará laanu. Dede né ca científicu ca huaquiiñecaʼ ca microbio riʼ para gusiacaʼ nisadóʼ ora guixii petróleo ne ora guni biidiʼ ca hombre ca Guidxilayú riʼ ne bi ni ricaanu, purtiʼ racaláʼdxicaʼ gápacaʼ stale bidxichi ne racaláʼdxicaʼ para laasicaʼ. Rihuinni nabé rizaalaʼdxiʼ Dios gaca Guidxilayú ni bíʼnibe riʼ nayá (Jeremías 10:12). Ñee cadi raʼbuʼ naquiiñeʼ gácanu zacaca la? Naquiiñeʼ pue.

6, 7. Ximodo bisihuinni Ley ni gucuaa Moisés que caquiiñeʼ gaca ca xpinni Jiobá nayá.

⁶ Xi sti razón nápanu para gácanu nayá. Stobi nga purtiʼ  Jiobá, ni jma nandxóʼ, qué rusaana de guinábabe ca xpínnibe gácacaʼ nayá. Ley ni bidiibe ca binni de Israel que na naquiiñeʼ chúʼcabe nayá ti ganda guni adorárcabe laabe. Ngue runi, gunábabe gaze xaíque stiʼ cani ruzaaquiʼ guʼxhuʼ que chupa biaje ante guni dxiiñaʼ Dxi rixá donda stiʼ binni (Levítico 16:4, 23, 24). Zaqueca gudíxhebe guiaʼriʼ náʼ ne ñee ca sacerdote ante guzaaquicaʼ xiixa para laabe (Éxodo 30:17-21; 2 Crónicas 4:6). Lu Ley que laaca zeeda setenta modo raca biidiʼ ti israelita. Ora nabiidibe qué zanda diʼ chuʼbe lade ca israelita que para guni adorarnebe laacaʼ Dios, purtiʼ pa gúnibe ni zándaca gátibe (Levítico 15:31). Ley que na guiráʼ binni gaca biidiʼ nuu modo para ganda guiacaʼ ne tobi de laacani nga gaze binni que ne quiʼbiʼ xhaba; pa qué gúnibe ni zándaca gátibe (Números 19:17-20).

⁷ Neca maʼ qué rúninu ni na Ley ni bidii Dios Moisés que, peru racané ni laanu gánnanu xi racalaʼdxiʼ Dios gúninu. Lu Ley ca rihuinni dxichi rinabaʼ Jiobá chuʼ ti binni nayá ti ganda guni adorar laabe. Qué huachaa diʼ Jiobá modo ruuyaʼ ca cosa ca (Malaquías 3:6). Cásica dxiqué, ca dxi stinu riʼ, laaca caquiiñeʼ chuʼnu nayá nezalú Jiobá ti ganda chuuláʼdxibe modo guni adorarnu laabe (Santiago 1:27). Nga runi, caquiiñeʼ guidúʼyanu xii nga canabaʼ Dios laanu ca dxi stinu riʼ.

8. Xi tapa modo racalaʼdxiʼ Jiobá gácanu nayá.

⁸ Lu Biblia cadi cayeeteʼ si gaca ladi binni nayá, sínuque laaca cuzeeteʼ ni caquiiñeʼ gaca guidubi naca xquendanabáninu nayá nezalú Dios. Nuu tapa modo racalaʼdxiʼ Jiobá gácanu nayá: gácanu nayá ora guni adorarnu laa, gaca xquendanabáninu nayá, gaca xconciéncianu nayá ne gaca ládinu nayá. Guidúʼyanu xi caquiiñeʼ gúninu lu cada tobi de laacani.

9, 10. Ximodo nga gácanu nayá ora guni adorarnu Dios, ne xi qué runi cani dxandíʼ xpinni Cristu.

⁹ Gácanu nayá ora guni adorarnu Dios. Ca binni ni nuu ndaaniʼ religión ni rusiidiʼ ni dxandíʼ cadi naquiiñeʼ gúnicabe  ni runi religión ni qué rusiidiʼ ni dxandíʼ. Guietenaláʼdxinu de ca israelita ni guyuu de esclavu ndaaniʼ guidxi Babilonia. Dxi chiguireecabe ndaaniʼ guidxi que para chécabe Jerusalén, gupa xidé bíʼnicabe ni gudxi Dios laacabe: «[¡]Laguiree de racá, cadi cánatu gastiʼ ni nabiidiʼ! [...] Lagaca nayá» (Isaías 52:11). Ca israelita que chiguibiguétacaʼ para guni adorarcaʼ Jiobá sti biaje ndaaniʼ xquídxicaʼ. Para ganda guni adorárcabe laabe modo riuuláʼdxibe la? cadi naquiiñeʼ gusiidicabe guiráʼ ni bisiidiʼ religión ni guyuu Babilonia que nin chinándacabe ca costumbre gupa ca binni que.

¹⁰ Ca dxi nabáninu riʼ, cani dxandíʼ xpinni Cristu laaca caquiiñeʼ gápanu laanu ti cadi gúninu guiráʼ ni runi religión ni qué rusiidiʼ ni dxandíʼ (biindaʼ 1 Corintios 10:21). Maʼ guiráʼ ladu runi cré binni cani rusiidiʼ religión ni qué rusiidiʼ ni dxandíʼ, nga runi caquiiñeʼ gápanu laanu para cadi gúninu ni rúnicaʼ. Ndaaniʼ stale guidxi rusiidicabe ni cadi zeeda lu Biblia. Rusiidicabe napa binni ti alma ni qué rati ne lu guiráʼ ca costumbre ni nápacabe ca rihuinni runi crécabe ni (Eclesiastés 9:5, 6, 10). Peru cani dxandíʼ xpinni Cristu qué racaláʼdxinu gúninu ca costumbre ni runi religión ni qué rusiidiʼ ni dxandíʼ. * Nga runi, cadi naquiiñeʼ gudiʼnu lugar guxheleʼ guiráʼ ni runi binni laanu de guni adorarnu Dios casi riuulaʼdxiʼ (Hechos 5:29).

11. Xi rinabaʼ Dios laanu para gaca xquendanabáninu nayá.

¹¹ Gaca xquendanabáninu nayá. Para cadi guixélenu de Dios ni nadxii laanu ne ganda guibáninu nayá casi modo nabe la? cadi naquiiñeʼ gápanu jnadxiinu ne cadi gúninu xcaadxi cosa dxabaʼ (biindaʼ Efesios 5:5). Casi zazíʼdinu lu sti capítulo ca, guiráʼ ca xpinni Cristu cadi naquiiñeʼ gatanecaʼ ni cadi xheelacaʼ. Peru, pa ti binni guni ca guendaquéiquiiñeʼ riʼ ne qué gaca arrepentir la? nin «qué ziuu ra runi mandar Dios» (1 Corintios 6:9, 10, 18). Jiobá ruuyaʼ laacabe casi ti binni ni  nabiidiʼ ne pa qué gusaanacabe guiráʼ ni runi biidiʼ laacabe záticabe ne maʼ qué ziuu dxi guiásacabe (Apocalipsis 21:8).

12, 13. Xi zándaca gucaa xquendabiaaninu laanu gúninu, ne xi zacané laanu para guiníʼ íquenu ni jneza si.

¹² Guendabiaaniʼ nayá. Cumu de lu xquendabiaaninu reeda guiráʼ ni rúninu la? caquiiñeʼ gápanu laanu ti cadi gudiʼnu lugar guicaa xcu ni nadxabaʼ ndaaniʼ íquenu ne ndaaniʼ ladxidoʼno pacaa nin qué zandaa zúninu cani (Mateo 5:28; 15:18-20). Peru pa guiníʼ íquenu ni jneza, qué zúninu guendaquéiquiiñeʼ (biindaʼ Filipenses 4:8). Yanna, xi zacané laanu para guiníʼ íquenu ni jneza si yaʼ. Primé la? caquiiñeʼ gucáʼnanu guiráʼ ni zándaca guni biidiʼ xquendabiaaninu. * Ne guiropa, cadi naquiiñeʼ gusaana de gúʼndanu Stiidxaʼ Dios (Salmo 19:8, 9).

¹³ Casi maʼ bidúʼyanu, para cadi guixélenu de Dios ni nadxii laanu, caquiiñeʼ guni adorarnu Dios jneza, guibáninu nayá casi modo nabe ne gaca xquendabiaaninu nayá. Lu xcaadxi capítulo stiʼ libru riʼ cayeeteʼ de ni caninu riʼ. Yanna guidúʼyanu guidapa cosa ni canabaʼ Jiobá laanu: gaca ládinu nayá.

14. Bisiene xiñee cadi jneza guiníʼ íquenu maʼ de laanu riaana pa gácanu nayá o coʼ.

¹⁴ Caquiiñeʼ chuʼ ládinu nayá ne zaqueca ra nuunu. Nuu tu laa na lu ca cosa riʼ maʼ de laa riaana xi guni ne cadi naquiiñeʼ cuʼ ruaa binni lu xquendanabani. Peru cani runi adorar Jiobá cadi naquiiñeʼ guiníʼ íquecaʼ zacá. Casi bidúʼyanu ra bizulunu capítulo riʼ, cadi canabaʼ si Jiobá gácanu nayá para chuʼnu nazaaca, sínuque ra guʼyaʼ binni modo laanu zahuinni ximódopeʼ nga laabe. Guietenaláʼdxinu hombrehuiiniʼ ni bizéʼtenu lu primé párrafo que: pa cada guidúʼyanu laabe nabiidiʼ ládibe o cadi nácube lari jneza, ñee cadi zaníʼ íquenu zacaca bixhózebe ne jñaabe la? Yanna guníʼ ique, pa qué ruzuchaahuinu  jneza ne rúninu guendaquéiquiiñeʼ, ñee cadi raʼbuʼ zaníʼ binni mal de Bixhózenu ni nuu guibáʼ ne maʼ qué zucaadiágacaʼ laanu ora maʼ zigucheechenu diidxaʼ la? Galán gúninu pa qué gusiáʼndanu ca diidxaʼ ni guníʼ Pablu riʼ: «Runi du xhiiña du jneza sin uchéʼ né du irutiʼ, ti qué gapa ca xi pur iníʼ ca laadu nin ni canayuí du. Laga irá modo racalaʼdxi du usihuinni du xhiiña Dios cayuni du» (2 Corintios 6:3, 4). Nga runi, guidúʼyanu ximodo naquiiñeʼ gusihuínninu nácanu binni nayá.

15, 16. Bizeeteʼ caadxi cosa ni zanda gúninu para gusianu laanu ne ximodo naquiiñeʼ chuʼ xhábanu.

¹⁵ Gusianu laanu ne guzuchaahuinu jneza. Modo tiica biniisi ca binni nabeza neza ra lídxinu ne modo tiica nabánicabe, peru laanu cadi naquiiñeʼ gusaana de gázenu. Ra tiica nabáninu, zanda guidxélanu nisa ne xabú para gázenu ne ugázenu xiiñinu. Laaca riquiiñeʼ quíʼbinu nanu ante guidoʼno gueta o ante gúninu guendaró ne despué de chuunu bañu o despué  de guchaʼnu pañal stiʼ ti baʼduhuiiniʼ. Pa gúninu ca nga la? qué zucaʼnu ne qué zucaacabe xiixa virus o microbio ni guni huará laanu, casi ti yuubaʼ ndaaniʼ ne ziuʼnu nazaaca. Pa gastiʼ drenaje neza ra nabézanu ne racaláʼdxinu chuunu ti ra guiʼxhiʼ la? galán gucáʼchinu ni cuinu ca cásica bíʼnicabe ndaaniʼ guidxi Israel (Deuteronomio 23:12, 13).

¹⁶ Laaca cadi gusaana de quíʼbinu xhábanu. Cadi caquiiñeʼ diʼ gaca ni ti lari caru o de cani nacubi caree; caquiiñeʼ si guiaʼriʼ ni ne cadi gaca ni lari casi racu cani qué runibiáʼ Dios (biindaʼ 1 Timoteo 2:9, 10). Guiráʼ ora ne ra tiica nuunu, racaláʼdxinu «guʼya irá binni [cayúninu ni na] stiidxa Dios» pur modo rusianu laanu ne modo ruzuchaahuinu (Tito 2:10).

17. Xiñee naquiiñeʼ gusianu lídxinu ne guiráʼ cani nápanu.

¹⁷ Lídxinu ne cani nápanu. Galán gúninu stipa biaʼ gándatiʼ pur gápanu lídxinu nayá, neca qué gápanu xiixa cosa de luju ndaaniʼ ni. Laaca naquiiñeʼ gusianu xcárrunu, cásica ndaaniʼ ni zaqueca fuera, jmaruʼ si pa riquiiñenu ni para chuunu guendaridagulisaa o chigucheechenu diidxaʼ. Peru cadi ca ngasi naquiiñeʼ gusianu; laaca naquiiñeʼ gápanu guiráʼ ca cosa stinu galán ne nayá. Pa gúninu zacá, zusisaca binni Dios ni runi adorarnu. Laanu rusíʼdinu binni Jiobá naca ti Dios nayá, pur nga zunitilube cani cunitilú Guidxilayú riʼ ne zaquiiñebe Reinu stibe para gúnibe ni ti paraísu (Apocalipsis 11:18; Lucas 23:43). Nga runi, modo gusianu lídxinu ne guiráʼ cani nápanu naquiiñeʼ gusihuinni cani cazíʼdinu gácanu binni nayá ti ganda guibáninu ndaaniʼ guidxilayú cubi stiʼ Dios.

18. Ximodo rusihuínninu runi respetarnu lugar ra runi adorarnu Dios.

¹⁸ Yoo stiʼ Reinu. Nabé runi respetarnu lugar riʼ purtiʼ racá runi adorarnu Dios. Naquiiñeʼ gúninu stipa pur chuʼ ni nayá ti guʼyaʼ ca binni ni chiganna laanu pabiáʼ nayá ra runi adorarnu Dios. Para ganda chuʼ ni nayá ne guihuinni ni galán, caquiiñeʼ gataʼ padxí guiá ndaaniʼ ni ne gaca chaahuiʼ ni. Ora racanenu para gaca ca dxiiñaʼ riʼ, rusihuínninu rusisácanu lugar  ra runi adorarnu Dios. Ti ndaayaʼ nga iquiiñenu tiempu stinu para gusianu ne guni chaahuinu Yoo stiʼ Reinu (2 Crónicas 34:10). Laaca naquiiñeʼ chinándanu ca conseju riʼ ora guinábacabe laanu chigusianu o chiguni chaahuinu lugar ra rápanu asamblea.

19. Xi caquiiñeʼ gúninu para cadi gaca biidiʼ xcuérpunu, ne xi cayabi Biblia laanu de laacani.

¹⁹ Xiruʼ caquiiñeʼ gúninu para chuʼnu nayá. Caquiiñeʼ gucáʼnanu intiica cosa ni guni biidiʼ xcuérpunu. Nga runi, qué rigúbanu gueza, qué reʼ xhaatanu nisa dxuʼniʼ, qué rigúbanu ne qué rábinu xiixa ni gucaa laanu gápanu xiixa viciu ne guniná laanu. Dxandíʼ, lu Biblia cadi cá lá guiráʼ ca viciu ni nuu yanna, peru nuu caadxi principiu ni zanda gacané laanu gánnanu xiñee nanalaʼdxiʼ Jiobá cani. Guidúʼyanu gaayuʼ principiu ni naquiiñeʼ gúninu pur nadxiinu Dios ne zacané cani chuulaʼdxiʼ Dios ni gúninu.

20, 21. Xi racalaʼdxiʼ Jiobá gucáʼnanu, ne xi razón cudiibe laanu para gúninu ni.

²⁰ «Yáquexa ma bidii stiidxa be laanu la? usiá nu laanu de irá ni runi dxaba xcuerpu nu ne espíritu stinu, ti sa nu modo pe naquiiñe sa ca xpinni be, cani ridxibi laabe.» (2 Corintios 7:1.) Jiobá racalaʼdxiʼ gucáʼnanu intiica cosa ni guni «dxaba xuerpu nu» ne ni gucaa «espíritu stinu» gúninu xiixa ni cadi jneza («espíritu» riʼ nga ti stipa, o modo riníʼ íquenu, ni rucaa laanu gúninu xiixa). Nga runi, rucáʼnanu intiica cosa ni zándaca gucaa laanu gápanu xiixa viciu, ni zuniná laanu ne zuniná xquendabiaaninu.

²¹ Textu riʼ laaca cayabi ni laanu xiñee caquiiñeʼ «usiá nu laanu». Biiyaʼ modo ruzulú textu stiʼ 2 Corintios 7:1, ra na: «Yáquexa ma bidii stiidxa be laanu». Xi bidii stiidxaʼ Jiobá laanu yaʼ. Nga nga ni guniʼbe lu ca versículo ni cá ante: «Ti icaa laatu, ne gaca Bixhoze tu» (2 Corintios 6:17, 18). ¡Guizáʼ galán nga xa! Jiobá na zapa ne zannaxhii laanu cásica runi  bixhoze binni né xiiñiʼ. Peru cayábibe laanu xi naquiiñeʼ gúninu: gucáʼnanu «irá ni runi dxaba xcuerpu nu ne espíritu stinu». Aque nahuátinu pa gunítinu ndaayaʼ de chuʼnu gaxha de Jiobá pur xiixa viciu ni qué nanu gusaananu.

22-25. Xi conseju zeeda lu Biblia zanda gacané laanu cadi gápanu xiixa viciu.

²² «Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ.» (Mateo 22:37.) Jesús bisiene ndiʼ nga mandamientu ni jma risaca (Mateo 22:38). Jiobá si nga naquiiñeʼ gannaxhiinu de guidubi ladxidoʼno, xhiálmanu ne xquendabiaaninu. Para ganda gúninu nga la? naquiiñeʼ gusaana de gúninu xiixa ni guuti laanu nagueenda o ni guquidxi guendabiaaniʼ bidii Dios laanu.

²³ «[Jiobá] rudii laanu enda nabani [bi ni ricaanu] ne irá ni caquiʼñe nu.» (Hechos 17:24, 25.) Cumu Dios nga bisigaʼdeʼ laanu guendanabani la? ca xpinni Cristu rúninu stipa pur iquiiñenu ni né stale respetu. Nga runi, rucáʼnanu intiica cosa ni guni huará laanu. Pa qué gúninu zacá, zusihuínninu qué runi respetarnu Dios, ni cudii laanu guendanabani (Salmo 36:9).

²⁴ «Gunaxhii stobi cásica nadxii lu lii.» (Mateo 22:39.) Ora ti binni napa xiixa viciu cadi laa si racaná, sínuque laaca runiná cani nuu gaxha de laa. Zacá rizaaca ne binni ni riguʼbaʼ gueza, purtiʼ guʼxhuʼ ni ribeebe ca runiná o runi huará ni cani nuu gaxha de laabe. Cani runi zacá qué ruzuubacaʼ diidxaʼ de gannaxhiicaʼ cani nuu gaxha de laacaʼ ne rusihuínnicaʼ cadi nadxiicaʼ Dios (1 Juan 4:20, 21).

²⁵ «[Laguzuubaʼ] stiidxa presidente ne cani runi mandar ndaani xquidxi[tu].» (Tito 3:1.) Cumu ndaaniʼ stale guidxi cadi jneza cubaʼ binni guixi nin gapa ni la? cani dxandíʼ xpinni Cristu qué rápanu ne qué rigúbanu cani (Romanos 13:1).

26. 1) Xi naquiiñeʼ gúninu para cadi guixélenu de Dios ni nadxii laanu. 2) Xiñee zanda guininu gástiruʼ sti cosa jma galán que gúninu stipa pur guibáninu nayá.

²⁶ Para cadi guixélenu de Dios ni nadxii laanu la? cadi  caquiiñeʼ gácanu nayá lu chupa chonna cosa si, sínuque lu guidubi naca xquendanabáninu. Dxandíʼ, nagana nga guiaana ti viciu ne gaca stipa cadi guiábanu luni sti biaje; peru zanda gusaananu ni. * Gástiruʼ sti cosa jma galán que gúninu stipa pur guibáninu nayá. Nanna dxíchinu Jiobá racalaʼdxiʼ guibáninu galán, nga runi canábabe laanu gácanu nayá. Biblia na: «Ndiʼ nga ni maʼ guníʼ Jiobá, Dios ni guzíʼ lii sti biaje, Dios ni nayá stiʼ Israel: “Naa, Jiobá, naa nga Dios stiluʼ, ni cusiidiʼ lii para cueenduluʼ ni galán. Ni cayabi lii gunáʼ nga neza ra naquiiñeʼ saluʼ”» (Isaías 48:17). Ne laaca riuʼnu nayecheʼ purtiʼ rusihuínninu ximódopeʼ nga Dios ni nabé nadxiinu ne ni guizáʼ nadxii laanu.