GUNÍʼ ique canagucheecheluʼ diidxaʼ de yoo pur yoo, ne cayunadiágaluʼ caxidxi ti sirena ne zeʼ ora jma reciu caxidxi. Bizulú cayuíʼneluʼ binni diidxaʼ, peru málasi bitiixhilú xcompañéruluʼ ne biiyaʼ mápeca zuhuaa ti carru puliciá ra nuutu. De raqué biete ti puliciá ne gunabadiidxaʼ laatu: «Ñee laatu nga caníʼnetu binni de Biblia yoo pur yoo la? Chupa chonna binni maʼ guluu xquéjatu». Né respetu bicábitu laabe nácatu testigu stiʼ Jiobá. Xi zazaaca yanna yaʼ.

Ndaaniʼ cada guidxi gadxé gadxé ni rizaaca. Lu ca iza huadiʼdiʼ ca, ñee huayacané gobiernu ca testigu stiʼ Jiobá la? o huaquichináʼ laacabe. Ñee libre laanu gápanu religión stinu la? Pa zacá ni, zándaca purtiʼ ca xpinni Cristu gupa xidé guyecaʼ stale iza nezalú justicia para guinábacaʼ gucheechecaʼ diidxaʼ sin chuʼ tu gucueeza laacaʼ (Filip. 1:7). Ra tiica nabézanu, ora guidúʼndanu ca juiciu biʼniʼ ganar ca testigu stiʼ Jiobá zacanécani laanu iguidxi fe stinu. Lu ndaa riʼ zadúʼyanu caadxi juiciu ra biʼniʼ ganar xquidxi Dios. Ca juiciu guca ganar ca rusihuínnicani dxandíʼ cayuni mandar Reinu stiʼ Dios, purtiʼ pa ñaca nisi laanu la? qué ñaca ganar cani.