Bixuiʼlú ndiʼ: maʼ gudiʼdiʼ chii minutu de nuu Karen ra cayaca ti saa, málasi binadiágabe ridxi stiʼ tuuxa ni maca runibiaʼbe caniʼné laabe:

Ora bidxiguetalube, biiyabe zedané Jessica, xhamígabe, chupa cerveza. Rudii laabe tobi ne na: «Maʼ cadi ti xcuidi lii. Zanda gaca divertirluʼ ti ratu, o coʼ la?».

Qué naʼ Karen gueʼ ni purtiʼ nahuiiniruʼ, peru laaca qué nádibe guiníʼ ique xhamígabe aburrida laabe. Laaca nánnabe runi Jessica stale cosa galán. Pa gueʼ Karen tobi la? cadi málupeʼ ni. «Ti cerveza si nga —na Karen—. Cadi casi ora ñaca drogar binni».

Pa ñácaluʼ Karen, xi ñuʼnuʼ.

Para guicaaluʼ ti decisión galán ora tiiduʼ lu ti guendanagana la? caquiiñeʼ gannuʼ tupeʼ nga lii. Diidxastiá rábicabe ni identidad, laani nga ti sentimientu ni rabi lii gunáʼ nga ca valor moral stiuʼ. Pa nannuʼ cani la? zapa cani lii ne zudii cani stipa lii para gannuʼ xi gunineluʼ xpídaluʼ, lugar de chuʼ stobi ni gabi lii xi guʼnuʼ (1 Corintios 9:26, 27).

Yanna, xi zanda guʼnuʼ yaʼ. Primé la? biiyaʼ xiná ca pregunta zeeda raríʼ.

Pa nannuʼ gunáʼ nga ca puntu fuerte stiuʼ, o gunáʼ nga ca habilidad ne ca cualidad napuʼ la? zapuʼ confianza laca lii.

EJEMPLU ZEEDA LU BIBLIA. Apóstol Pablu bicaa: «Huaxiéʼ naa para iniéʼ, peru riene chaahue ni rusiideʼ» (2 Corintios 11:6). Cumu runibiaʼbe Stiidxaʼ Dios la? qué nidxíbibe ora guníʼcabe mal de laabe. Qué nudiibe lugar nirá confianza stibe pur cani biʼniʼ binni laabe (2 Corintios 10:10; 11:5).

BINIBIÁʼ LACA LII. Bicaa ti habilidad napuʼ o xiixa ni randa ruʼnuʼ.

Yanna bicaa gunáʼ nga tobi de ca cualidad jma galán napuʼ (casi, pa nacháʼhuiluʼ, pa riuuláʼdxiluʼ gudiiluʼ ni napuʼ, pa confiable o pa puntual lii).

Iquiiñenu ti cadena para guiénenu ni. Cadi dxandíʼ jma nagueenda riruuguʼ ti cadena ora débil ti eslabón o ti argolla stiʼ la? Zacaca nga zusiaandaluʼ tu lii, pa gudiiluʼ lugar ca puntu débil stiuʼ guni controlar lii.

EJEMPLU ZEEDA LU BIBLIA. Gunna Pablu xi debilidad napa. Ngue runi bicaa ca diidxaʼ riʼ: «Lu xquenda biaane rieche nia ley sti Dios, peru ruuya ma adxé ley nuu luguiaʼyaʼ ne nuu dinde né ni ley ni maca cá lu xquenda biaaneʼ, ne laani nga rucaa ni naa yaga lu ná pecadu ni runi mandar naa» (Romanos 7:22, 23).

BINIBIÁʼ LACA LII. Gunáʼ nga ca puntu débil napuʼ ni caquiiñeʼ

Ñee niguíʼbaluʼ ndaaniʼ ti taxi ne ñábiluʼ chofer stini nudiiné lii vuelta cuadra que dede nirá gasolina stiʼ la? Cadi dxandíʼ guendahuati ni la? Ne nunitisiouʼ xpuéltuluʼ.

Xi riziiduʼ yaʼ. Pa gapuʼ ti meta lu xpídaluʼ la? qué zúniluʼ casi runi tuuxa ni canagudii si vuelta. Zánnaluʼ paraa zeluʼ ne ximodo chindaluʼ ra cá íqueluʼ.

EJEMPLU ZEEDA LU BIBLIA. Pablu bicaa: «Ruxooñe casi tobi ni cá ique guni ganar» (1 Corintios 9:26). Lugar de nibí Pablu, niguiidxináʼ la? gudixe ique ugaanda ca meta stiʼ ne biquiiñebe xquendanabánibe para ugaandabe cani (Filipenses 3:12-14).

BINIBIÁʼ LACA LII. Bicaa chonna meta ni ñuuláʼdxiluʼ nugaandaluʼ iza riʼ.

Pa cadi nuuluʼ seguru de cani runi creluʼ la? zácaluʼ ti binni ni qué ganna guicaa decisión. Zuchaaluʼ modo lii para gácaluʼ casi ca xhamíguluʼ, cásica ruchaa ti camaleón de color para guihuinni casi ca cosa nuu gaxha de laa. Ti binni runi zacá la? qué ganna tupeʼ nga laa.

Peru, pa qué guchaaluʼ cani runi creluʼ, neca chuʼ tu gabi lii guʼnuʼ ni la? qué zunítiluʼ identidad stiuʼ.

EJEMPLU ZEEDA LU BIBLIA. Zándaca nahuiiniruʼ Daniel, dxi bixhélecabe laa de xfamilia. Neca zaqué, «gudixhe ique cadi gucheené ley stiʼ Dios» (Daniel 1:8). Qué ninabe nuchaabe modo nácabe ne qué nixélebe de ca cosa ni runi crebe.

BINIBIÁʼ LACA LII. Xi runi creluʼ. Guzéʼtenu ti ejemplu: Runi creluʼ Dios la? Xiñee runi creluʼ laabe. Xiñee nuuluʼ seguru dxandíʼ nuube.

Riníʼ íqueluʼ dxandíʼ zacané ca norma moral stiʼ Dios lii la? Xiñee.

Yanna, ñuuláʼdxiluʼ ñácaluʼ casi ti bandaga ni riné bi la? o casi ti yaga nadipaʼ ni qué raca gastiʼ neca guiaba ti tormenta naroʼbaʼ luguiáʼ. Pa racaláʼdxiluʼ gácaluʼ casi yaga ca la? biʼniʼ stipa cadi gunítiluʼ identidad stiuʼ. Zacané ndiʼ lii guicábiluʼ pregunta riʼ: Tupeʼ nga naa.