Bixuiʼlú ndiʼ: caguite Tim né ca xhamigu, peru qué nudii cuenta bichenda ti pelota lu parabrisa carru stiʼ xpecinu ne gulaa ni.

Pa ñácaluʼ Tim, xi ñuʼnuʼ.

NAPUʼ CHONNA OPCIÓN:

1. Guiree guxooñeluʼ.

2. Ugaaniluʼ donda ique stobi.

3. Gábiluʼ xpecínuluʼ xi guca ne guiniʼluʼ zaguiʼxu ni.

Zándaca jma fácil guʼnuʼ ni ná opción A. Peru ni jma jneza nga guni reconocerluʼ napuʼ donda.

1. Nga nga ni jneza.

   Biblia cayabi laanu: «Ni racalaʼdxi du nga irá ni guni du, guni du jneza» (Hebreos 13:18).

2. Pa guni reconocerluʼ donda stiuʼ la? jma nagueenda zuni perdonárcabe lii.

   Biblia ná: «Tu rucaachiʼ ca donda stiʼ qué zabeendú gastiʼ, peru tu guiníʼ cani ne gusaana cani la? zalaseláʼdxicabe laa» (Proverbios 28:13).

3. Ne ni jma risaca: zusiécheluʼ Jiobá.

   Biblia ná: «Nanalaʼdxiʼ Jiobá binni ni rucaachiʼ tu naca, peru cani runi ni jneza nga xhamígube» (Proverbios 3:32).

Karina, ti baʼdudxaapaʼ de 20 iza. Bicaacabe multa laabe ti biaje purtiʼ nabé reciu zigusabe carru, gucaláʼdxibe nucaachibe ni, peru qué ñanda diʼ. Laabe guniʼbe: «Gudiʼdiʼ biaʼ ti iza, biiyaʼ bixhozeʼ multa bicaacabe naa purtiʼ guizáʼ reciu rusayaʼ carru. ¡Guyuaaʼ lu ti problema naroʼbaʼ!».

Xi rizíʼdinu yaʼ. Karina ná: «Pa gacaláʼdxiluʼ gucaachiluʼ xtóndaluʼ la? zusiroobasiouʼ problema stiuʼ. Zadxiña dxi quiʼxuʼ cani biʼnuʼ».

Biblia ná: «lrá nu ruchéʼ nu» (Santiago 3:2). Ne casi maʼ bidúʼyanu, pa guni reconocernu donda stinu nagueenda la? zusihuínninu nácanu ti binni humilde ne ti binni nuu xpiaaniʼ.

Sti cosa caquiiñeʼ guʼnuʼ nga guiziidiluʼ de laacani. Sicaríʼ guníʼ ti baʼdudxaapaʼ láʼ Vera: «Ruuyaʼ xi zanda guiziideʼ de ca cosa ni qué ñuneʼ jneza. Cada tobi de laacani rusiidiʼ cani naa gapaʼ cualidad galán. Ne ora guidxagaluáʼ ngueca problema la? jma jneza runeʼ ca cosa ca». Xi ñuʼnuʼ lu ca ejemplu chiguzéʼtenu riʼ.

Xi ñuʼnuʼ pa ñuni feuluʼ bicicleta bitiiñeʼ bixhoʼzoʼ lii.

• Qué ñabeʼ laabe gastiʼ; zándaca qué zudiibe cuenta.

• Ñabeʼ laabe xipeʼ nga guca.

• Ñabeʼ laabe, peru nugaaneʼ donda ique stobi.

Xi ñuʼnuʼ pa biʼniʼ reprobarluʼ ti examen purtiʼ qué ñuni estudiarluʼ yaʼ.

• Ninieeʼ guizáʼ nagana examen que.

• Ninieeʼ napaʼ donda purtiʼ qué ñuneʼ estudiar.

• Ninieeʼ ranináʼ profe que naa.

 Biindaʼ guiropaʼ ejemplu riʼ ne guyuu lugar stiʼ  1) bixhoʼzoʼ ne 2) profesor stiuʼ. Xi niníʼ íquecabe pa nagueendaca ñuni reconocerluʼ napuʼ donda. Xi niníʼ íquecabe de lii pa nucaachiluʼ ni.

Yanna, bietenalaʼdxiʼ xiixa ni cadi jneza biʼnuʼ lu últimu iza riʼ ne bicabi ca pregunta riʼ:

Xiñee bicheeluʼ. Xi biʼnuʼ óraque.

• Gucalaʼdxeʼ nucaacheʼ ni.

• Bigaaneʼ donda stobi.

• Oraqueca gunieeʼ.

Pa qué ñuni reconocerluʼ ni, ximodo biʼniʼ sentirluʼ despué.

• ¡Guizáʼ galán! Bireeniáʼ xtemaʼ.

• Guizáʼ feu. Jma galán ñabeʼ laacabe xi guca.

Xii nga ni jma jneza ñuʼnuʼ.

Xi biziidiluʼ de laani.

Xiñee nuu tiru raca nagana guni reconocer binni bichee.

Xi zaníʼ binni de lii pa nisi rucaachiluʼ ca donda stiuʼ. Peru, xi zaníʼ íquecabe de lii pa guni reconocerluʼ bicheeluʼ (Lucas 16:10).