Bixuiʼlú cayaca ni chiguzéʼtenu riʼ ti miércoles huadxí. Geoff, ti jovenhuiiniʼ de 17 iza. Maʼ bilúxebe tariá stibe ne maʼ caquiiñeʼ guiziiláʼdxibe. ¡Ne dxandíʼ caquiiñebe ni! Bicaaguibe tele ne gúʼtabe lu sillón ni jma riuuláʼdxibe.

Málasi guleelú bixhózebe, peru cadxiichihuiiniʼ.

Pa ñácaluʼ Geoff, xi ñuʼnuʼ para cadi nizaaca ndiʼ yaʼ.

Pa ñaca zigusaluʼ ti carru ne nindaluʼ ti lugar ra daʼguʼ neza, cadi dxandíʼ nuyúbiluʼ sti neza la? Ngaca nga ni zanda guʼnuʼ ti ganda guiníʼneluʼ bixhoʼzoʼ ne jñoouʼ, zanda guyubuʼ xcaadxi modo gaca ni.

 GUZÉʼTENU TI EJEMPLU:

Leah cayabi laanu: «Raca nagana para naa guinieniáʼ bixhozeʼ. Nuu tiru, ora maʼ napa ratu de canieniáʼ laabe, rinabadiidxabe naa: “Caniʼluʼ la?”».

NÁPABE CHONNA OPCIÓN

1. Gucaabe ridxi bixhózebe.

   Ñanda nucaa Leah ridxi: «¡Canieniáʼ lii, bicaadiaga naa! ¡Risaca ni!».

2. Maʼ qué guiníʼrube de laani.

   Ni ñuni si Leah nga maʼ qué nuzeeteʼ lu bixhoze xi guendanagana napa.

3. Guyubi sti hora para guiníʼ.

   Nibeza Leah nidiʼdiʼ tiempu para niniʼné bixhoze o nucaa ti carta para nusiene laabe guendanagana napa.

Xi opción raʼbuʼ nicaa Leah.

GUNÍʼ IQUE NDIʼ: Gadxé ni caníʼ ique bixhoze Leah ne caʼruʼ gudii cuenta pa caníʼnebe laa. Pa guni Leah ni ná opción A ca la? zándaca qué ziene bixhózebe xiñee cadxiichibe. Ne qué zucaadiaga bixhózebe laabe. Laaca zusihuinni Leah qué runi respetar bixhoze (Efesios 6:2). Cadi galán diʼ opción riʼ para Leah ne para bixhoze.

Dxandíʼ, jma fácil guni Leah ni zeeda lu opción B, peru zusihuinni huaxiéʼ nuu xpiaaniʼ. Xiñee yaʼ. Purtiʼ pa racaláʼdxibe guni chaahuibe ca problema stibe la? naquiiñeʼ guiníʼnebe bixhózebe. Ne caquiiñeʼ ganna bixhózebe xi cayácabe ti gacané laabe. Pa qué guiníʼ Leah xi cayaca la? qué zanda gacané bixhoze laa.

Peru, pa guni Leah ni ná opción C ca la? qué zudii lugar chuʼ xiixa ni gucueeza laa de guiniʼné bixhoze. Zacané ni laabe guyúbibe sti hora jma galán para guiníʼnebe bixhózebe de problema nápabe. Ne pa gucaa Leah ti carta la? zuni sentir jma galán.

Carta ni gucaa Leah riʼ zacané ni laa gusiene chaahuiʼ bixhoze xii nga ni racalaʼdxiʼ. Ora guʼndaʼ bixhózebe carta stibe, ziene chaahuiʼ xipeʼ nga cayácabe. Galán opción C riʼ para Leah ne para bixhoze. Pa guiniʼné Leah bixhoze o gucaa ti carta ra nuube la? ni gúnibe riʼ zusihuinni ni zinándabe conseju stiʼ Biblia riʼ: «Sa nanda nu ni guni laanu tobi si» (Romanos 14:19).

Xi opción ruʼ napa Leah.

Pa guidxeʼluʼ sti opción para laabe la? bicaa ni raríʼ. Laaca bicaa xi resultadu stini.

Bietenalaʼdxiʼ: cadi guiráʼ diʼ ni gábiluʼ bixhoʼzoʼ ne jñoouʼ nga ziénecabe ni modo rábiluʼ.

GUZÉʼTENU TI EJEMPLU:

Bixhoʼzoʼ ne jñoouʼ canabadiidxacaʼ lii xiñee cadxiichiluʼ. Peru lii ricábiluʼ laacaʼ: «Cadi guiníʼnetu naa».

Peru zándaca ndiʼ nga ni guiénecabe: «Maʼ huaxiéʼ confianza napaʼ laatu. Ca xhamíguasiaʼ nga rabeʼ ca problema stinneʼ».

Bixuiʼlú napuʼ ti problema nabé naroʼbaʼ ne racalaʼdxiʼ bixhoʼzoʼ o jñoouʼ gacané lii, peru lii raʼbuʼ laabe: «Cadi guizaalaʼdxuʼ, zanda guneʼ chaahueʼ ni stúbesiaʼ».

• Zándaca ndiʼ nga ni guiene bixhoʼzoʼ ne jñoouʼ.

• Xii nga ni jma galán niniʼluʼ.