1, 2. 1) Pora nga jma rusisácaluʼ ti cosa huasigáʼdecabe lii. 2) Xiñee ni gudixe Jiobá pur laanu ca nga ni jma risaca huasigáʼdecabe laanu.

XII nga ni jma galán huasigáʼdecabe lii. Cadi caquiiñepeʼ gaca ni caru para guisaca ni. Risaca ni cadi purtiʼ si caru gucuaacabe ni, sínuque pur rusiecheʼ ni lii o caquiiñeluʼ ni.

² Lade guiráʼ ni huasigáʼdecabe lii, nuu tobi ni jma risaca que xcaadxi ca. Nga nga ni bisigaʼdeʼ Dios guiráʼ binni. Ya, nánnanu huadii Jiobá laanu stale cosa, peru ni jma risaca bidiibe laanu nga guti Xiiñibe, Jesucristu, para gulá laanu (biindaʼ Mateo 20:28). Casi chiguizíʼdinu lu capítulo riʼ ni gudíxebe pur laanu nga ni jma risaca bisigaʼdeʼ Jiobá laanu, purtiʼ zacané ni laanu chuʼnu nayéchepeʼ ne ugaandanu ni caquiiñenu. Dxandipeʼ, laani nga ni jma rusihuinni nadxii Jiobá cada tobi de laanu.

3. Xii nga ni biaxa pur laanu, ne xi naquiiñeʼ guiénenu ti gánnanu pabiáʼ nga risaca ni bisigáʼdecabe laanu.

³ Ni biaxa pur laanu ca nga ni biquiiñeʼ Jiobá para gulá binni de donda ne de guendaguti (Efesios 1:7). Para guiénenu ni cusiidiʼ Biblia de laani naquiiñeʼ gánnanu xi guca ndaaniʼ Jardín stiʼ Edén. Pa guiénenu xi biniti Adán ra bichee que la? zánnanu pabiáʼ risaca nga ni gudixe Dios pur laanu.

4. Para Adán, xii ngue ti guendanabani sicarú.

⁴ Dxi bizáʼ Jiobá Adán, bidiibe laa xiixa ni risácapeʼ: ti guendanabani sin donda. Guníʼ ique si xi riníʼ nga. Cumu jnézapeʼ modo guyaʼbe, cásica ládibe ne zaqueca xquendabiaanibe la? qué ñuu dxi ñaca huarabe, ñóʼxhobe nin ñátibe. Ne guyuunebe Jiobá tobi si. Biblia na guca Adán «xiiñi Dios» (Lucas 3:38). Ngue runi, nabé guyuunú Dios ne Adán cásica riuu binni ne bixhoze. Ya, ni bizáʼ laanu ca guníʼnebe xiiñibe ni guyuu lu Guidxilayú riʼ ne bidiibe laa dxiiñaʼ ni gusiecheʼ laa ne bisiénebe xi ribézabe guni (Génesis 1:28-30; 2:16, 17).

5. Xi riníʼ Biblia ora na guyáʼ Adán «casi Dios».

⁵ Guyáʼ Adán «casi Dios» (Génesis 1:27). Ndiʼ qué riníʼ diʼ rihuínnibe cásipeʼ Dios. Casi bizíʼdinu lu primé capítulo stiʼ libru riʼ, Jiobá ti Espíritu laa (Juan 4:24). Cadi de beela laabe nin de dxita. Nga runi, Biblia na guyáʼ Adán casi Dios purtiʼ nápabe ca guenda ni napa Dios, casi guendarannaxhii, guendananna stálepeʼ, guendaruni jneza ne poder. Ne nuu stobi ra yendeebe Bixhózebe, ne nabé risaca ni: zanda gúnibe ni gacaláʼdxibe. Cadi ti máquina laabe ni maca nexheʼ xi guni. Coʼ, sínuque zanda gúnibe ni gacaláʼdxibe ne zanda  gaca ni jneza o cadi jneza. Pa ñaca nibibe nuzuubabe stiidxaʼ Dios la? qué ñuu dxi ñátibe ne nibánibe lu Guidxilayú riʼ ndaaniʼ Paraísu.

6. Xi biniti Adán ra qué nuzuubaʼ stiidxaʼ Dios, ne xi guca ca xiiñicabe pur nga yaʼ.

⁶ Cumu qué nuzuubaʼ Adán stiidxaʼ Dios la? naná modo gudíxebe ni ne pur ngue gupa xidé gútibe. Ra bicheebe binítibe guendanabani sicarú sin donda que ne guiráʼ cani ribeendú ni (Génesis 3:17-19). Peru cadi laasibe binítibe ni; laaca biniti ca xiiñibe ni. Stiidxaʼ Dios na: «Pur tobi hombre [Adán] biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Romanos 5:12). Ya, guiranu biaananenu guendaruchee stiʼ Adán. Nga runi, Biblia na casi ñaca cánenu laabe «yaga», purtiʼ maʼ esclavu stiʼ guendaruchee ne guendaguti laanu (Romanos 7:14). Adán ne Eva maʼ qué nibézacaʼ nicaacaʼ xiixa ni galán purtiʼ laapecaʼ qué ninacaʼ nuzuubacaʼ stiidxaʼ Dios. Peru, xi zaca né guiráʼ xiiñicabe dede né laanu yaʼ.

7, 8. Xi chupa modo riaxa pur tuuxa o pur xiixa.

⁷ Gudixhe ique Jiobá gulá binni guidxilayú, nga runi gudixhe íquebe quíxebe xiixa pur laacaʼ. Peru, ximodo nga guiaxa pur tuuxa o xiixa yaʼ. Nuu chupa cosa. Primé la? nga nga ni riaxa ti ganda gudxiguétacabe laanu ni biaaxhanu o ti ganda guilaa tuuxa ni nápacabe. Guiropa la? ora rieeteʼ lu Biblia guiaxa pur tuuxa o xiixa nga nga ni riguíxecabe biaʼ saca ti cosa o ni riguíxecabe pur bininácabe tuuxa. Casi pa guniná ti binni tuuxa, napa xidé quixe biaʼ saca ni biʼniʼ que.

⁸ Casi maʼ bizíʼdinu, binítinu stale pur Adán. Ximodo zanda guiaxa pur cani binítinu ne ganda guilanu de donda ne guendaguti ra canu yaga yaʼ. Guidúʼyanu  ximodo gudixe Jiobá pur laanu ne ximodo zanda gacané ni laanu.

9. Xi caquiiñeʼ ti ganda guiaxa ne guibiguetaʼ guendanabani sicarú sin donda que.

⁹ Biniti Adán ti guendanabani sin donda ra bichee. Nga runi, para ganda guibiguetaʼ ni naquiiñeʼ gudii tuuxa guendanabani stiʼ, peru cadi stiʼ ti binni ruchee (Salmo 49:7, 8). Caquiiñeʼ guiaxané ni xiixa ni risácapeʼ casi ni biniti Adán que. Zacá nga zaca ni jneza casi zeeda lu Biblia. Ley que na naquiiñeʼ gudiicabe «guendanabani pur guendanabani» (Deuteronomio 19:21). Nga runi, para ganda guiaxa guendanabani sin donda biniti Adán que, xi caquiiñeʼ yaʼ. Caquiiñeʼ guiaxa ni né sti guendanabani sin donda casi gúpabe que (1 Timoteo 2:6).

10. Xi biʼniʼ Jiobá para gudixe donda stiʼ binni.

¹⁰ Xi biʼniʼ Jiobá para gudixe donda stiʼ binni. Biseendabe lu Guidxilayú riʼ tobi de ca xiiñibe ni naca espíritu ni qué gapa donda. Peru qué nuseendabe tutiica de laacaʼ, sínuque biseendabe ni jma nadxiibe: tobi lucha Xiiñibe ni bíʼnibe laapebe (biindaʼ 1 Juan 4:9, 10). Laabe gunabe bisaanabe lídxibe guibáʼ (Filipenses 2:7). Casi bizíʼdinu lu capítulo 4, bitiidiʼ Jiobá xquendanabani Xiiñiʼ ndaaniʼ María pur ti milagru ne pur espíritu santu gule Jesús casi ti binni ni qué gapa donda, ne cumu qué gápabe donda la? qué lica nucheebe (Lucas 1:35).

11. Ximodo nga gunda gudixe ti hombre si ni nuzaabiʼ guiráʼ binni.

¹¹ Ximodo zanda gulá ti hombre si guiráʼ xixenu yaʼ. Guníʼ ique si ximodo beeda gácanu binni ruchee. Bietenalaʼdxiʼ dxi bichee Adán biniti ni jma risaca gupa:  ti guendanabani sicarú sin donda ne maʼ qué ñanda nutiidibe ni ca xiiñibe. Ni bitiidibe laacaʼ nga guendaruchee ne guendaguti. Biblia na «Cristu nga rairopa Adán», purtiʼ gúpabe ti guendanabani sin donda ne qué ñuu dxi nucheebe (1 Corintios 15:45). Nga runi, casi ora ñuube lugar stiʼ Adán para gulabe laanu. Bíʼnibe cásipeʼ gudxi Bixhózebe laabe dede bidiibe guendanabani sin donda stibe. Zacá nga gudíxebe biaʼ naquiiñeʼ para guchiabe guendaruchee stiʼ Adán ne ganda cueza ca xiiñiʼ Adán xiixa ni galán para laacaʼ (Romanos 5:19; 1 Corintios 15:21, 22).

12. Xi bisihuinni Jesús né guiráʼ yuubaʼ gudiʼdiʼ.

¹² Biblia cuzeeteʼ guiráʼ yuubaʼ gudiʼdiʼ Jesús ante gatiʼ. Naná modo gudíñecabe laabe ne gucuabe lu ti yaga ra biiticabe laabe (Juan 19:1, 16-18, 30; biiyaʼ apéndice «Ñee napa ca xpinni Cristu xidé iquiiñecaʼ cruz la?»). Xiñee gudíʼdibe guiráʼ yuubaʼ ca yaʼ. Binidxabaʼ guníʼ pa tiidiʼ ti binni ra nagana la? zucheené Dios casi chiguizíʼdinu despué. Ra biʼniʼ huantarbe ne qué nucheebe neca bininácabe laabe, bisihuínnibe cadi dxandíʼ ni guníʼ Binidxabaʼ. Ne bisihuínnibe ndiʼ: ti hombre ni qué gapa donda ni zanda cuiʼ xi guni la? zanda guzuubaʼ stiidxaʼ Dios neca gutiidiʼ Binidxabaʼ laa ra nagana. ¡Pabiáʼ bisiecheʼ ndiʼ ladxidóʼ Jiobá ra biʼyaʼ qué nucheené Xiiñiʼ laa! (Proverbios 27:11.)

13. Ximodo gudixe Jiobá pur laanu.

¹³ Ximodo gudixe Dios pur laanu yaʼ. Lu beeu nisán, 14 stiʼ beeu judíu iza 33 despué de Jesús, bidii Dios lugar guuticabe Xiiñiʼ ni qué ñalené donda. Zacá bidii Jesús «xpida para guiaxa stonda nu tobi si tiru» (Hebreos 10:10). Ra guionna gubidxa de gútibe, gundisaʼ Jiobá laabe casi espíritu. Ora bibiguétabe guibáʼ bidiibe xquendanabánibe sin donda Bixhózebe ti iquiiñeʼ ni para guilá ca xiiñiʼ Adán (Hebreos 9:24). Gucuaa  Jiobá ni bidiibe laa, ne zaqué pur rini bixii que biaxa stóndanu ne maʼ zanda guilanu de guendaguti (biindaʼ Romanos 3:23, 24).

14, 15. Xi naquiiñeʼ gúninu ti guixiá stóndanu.

¹⁴ Pur ni biaxa pur laanu ca zanda guicaanu stale ndaayaʼ sicarú neca binni ruchee laanu. Guidúʼyanu chupa chonna modo racané ni bisigaʼdeʼ Dios laanu ca yanna riʼ ne ximodo zacané ni laanu despué.

¹⁵ Rixiá stóndanu. Cumu ralenenu guendaruchee la? nabé nagana raca para laanu gúninu ni jneza. Guiranu rucheʼnu, nuu biaje ora rininu o lu cani rúninu. Peru pur guendaguti stiʼ Jesús zanda guixiá stóndanu (Colosenses 1:13, 14). Para ganda gaca nga la? naquiiñeʼ gusihuínninu dxandíʼ cayuubaʼ ladxidoʼno pur ni bíninu. Laaca naquiiñeʼ guindete íquenu nezalú Jiobá para guinábanu gutiidilaʼdxiʼ stóndanu pur fe ni nápanu lu guendaguti stiʼ Xiiñiʼ (biindaʼ 1 Juan 1:8, 9).

16. Xiñee zanda guni adorarnu Dios né ti conciencia nayá, ne ximodo riuʼnu ora nayá conciencia stinu.

¹⁶ Ti conciencia nayá nezalú Dios. Ora cuchiiñaʼ conciencia stinu laanu pur stóndanu la? riuʼnu casi ora maʼ gastiʼ zanda cuézanu ne riníʼ íquenu qué risácanu. Peru né ni biaxa pur laanu ca, rutiidilaʼdxiʼ Jiobá stóndanu ne nachaʼhuiʼ né laanu purtiʼ cudii lugar guni adorarnu laa né ti conciencia nayá neca rucheʼnu (Hebreos 9:13, 14). Nga runi, qué ridxíbinu guinínenu laabe (Hebreos 4:14-16). Ne ora nayá conciencia stinu la? maʼ gastiʼ ruchiiñaʼ laanu, riuʼnu galán né laca laanu ne jma nayecheʼ riuʼnu.

17. Gunáʼ nga ca ndaayaʼ chichuu purtiʼ guti Jesús pur laanu.

¹⁷ Cabézanu guibáninu ndaaniʼ ti paraísu lu Guidxilayú  riʼ sin qué chuʼ dxi gátinu. «Ni riaxa pecadu nga enda guti», na Romanos 6:23. Ne sti ndaa versículo ca na: «Peru ni rudii Dios nga enda nabani ni qué zaluxe, pur Cristu Jesús Señor stinu». Lu capítulo 3 stiʼ libru riʼ bidúʼyanu xii nga ca ndaayaʼ chichuu ndaaniʼ Paraísu ni mayaca chuʼ lu guidxilayú riʼ (Apocalipsis 21:3, 4). Guiráʼ ndaayaʼ ca ne guendanabani ni qué ziuu dxi guiluxe sin guendahuará, dxandíʼ zaca cani purtiʼ guti Jesús pur laanu. Para guicaanu cani la? naquiiñeʼ guluinu rudiʼnu xquíxepeʼ Jiobá pur ni gudíxebe pur laanu.

18. Xiñee naquiiñeʼ gudiʼnu xquíxepeʼ Jiobá pur ni gudixe pur laanu.

¹⁸ Xiñee naquiiñeʼ gudiʼnu xquíxepeʼ Jiobá pur ni gudixe pur laanu yaʼ. Guníʼ ique: ora gusigáʼdecabe laanu xiixa la? rusisácanu ni purtiʼ biníticabe tiempu, stipa o bueltu. Ne rusiecheʼ ni laanu purtiʼ zacá rihuinni dxandíʼ nadxiicabe laanu. Nga runi, ni biaxa pur laanu ca nga ni jma naroʼbaʼ bisigaʼdeʼ Dios laanu purtiʼ laabe  jma binítibe. Juan 3:16 na: «Purti nadxii xhaata Dios binni guidxilayú ngue runi bidii tobi lucha Xiiñiʼ». Ra gudixe Jiobá pur laanu ca nga jma bihuinni guendarannaxhii nápabe laanu. Laaca rusihuinni ni pabiáʼ nadxii Jesús laanu, purtiʼ guná bidii xquendanabani pur laanu (biindaʼ Juan 15:13). Ya, biluíʼ Jiobá ne Jesús pabiáʼ nadxiicaʼ cada tobi de laanu ra gudíxecaʼ pur laanu (Gálatas 2:20).

19, 20. Ximodo zanda gusihuínniluʼ rudiiluʼ xquíxepeʼ Dios pur ni gudixe pur lii.

¹⁹ Yanna, ximodo guluiʼluʼ rudiiluʼ xquíxepeʼ Dios pur ni gudixe ca yaʼ. Primé la? binibiáʼ Jiobá, ni bidii ni ca (Juan 17:3). Zanda gunibiaʼluʼ laabe pa gúʼndaluʼ Biblia né libru riʼ. Ra gunibiáʼ chaahuiluʼ Jiobá la? jma zannaxhiiluʼ laa. Ne ra jma gannaxhiiluʼ laabe, jma zuyúbiluʼ gúniluʼ ni riuuláʼdxibe (1 Juan 5:3).

²⁰ Gupa fe lu ni biaxa pur laanu. Jesús guníʼ: «Tu runi cre Xiiñi be la? napa enda nabani ni qué zaluxe» (Juan 3:36). Ximodo zanda guluinu nápanu fe Jesús. Cadi né diidxaʼ si. Casi na Santiago 2:26, «qué iquiiñe modo runi cre nu pa qué guni nu jneza». Ya, ora dxandíʼ nápanu fe la? rihuinni ni lu cani rúninu. Ti modo gusihuínninu nápanu fe Jesús nga gúninu stipa pur gúninu casi biʼniʼ, lu cani rininu ne lu cani rúninu (Juan 13:15).

21, 22. 1) Xiñee naquiiñeʼ chuunu Guendaroxhi stiʼ Señor ni raca guiráʼ iza. 2) Xi chiguidúʼndanu lu capítulo 6 ne 7.

²¹ Guyé Guendaroxhi stiʼ Señor ni raca guiráʼ iza. Huaxhinni 14 stiʼ nisán iza 33, gudixhestí Jesús ti cosa risaca ni naquiiñeʼ gúninu ne lu Biblia lani Guendaroxhi stiʼ Señor (1 Corintios 11:20; Mateo 26:26-28). Laaca rábicabe ni Guendarietenalaʼdxiʼ Guendaguti stiʼ Cristu. Gudixhestí Jesús ni para gacané ca apóstol stiʼ  ne guiráʼ cani dxandíʼ zinanda laa ti guietenaláʼdxicaʼ ti cosa risaca: ora gútibe bidiibe guendanabani sin donda stibe para quíxebe pur laanu. Laani nga bizeeteʼ Jesús ora guníʼ: «Laguni casi cayuni nu riʼ para guietenaladxi tu naa» (Lucas 22:19). Ora guietenaláʼdxinu guendaguti stiʼ Cristu racané ni laanu gánnanu pabiáʼ nadxii Jiobá ne Jesús guiranu pur ni gudíxecaʼ pur laanu. Ora chuunu ra rietenaláʼdxinu guendaguti stiʼ Cristu guiráʼ iza, laaca rusihuínninu rudiʼnu xquíxepeʼ Jiobá saca gudixe pur laanu. *

²² Gastiʼ qué zanda guchaaganu ni bisigaʼdeʼ Jiobá ora gudixe pur laanu (2 Corintios 9:14, 15). Dede zacané ni cani maʼ guti, casi chiguidúʼndanu lu capítulo 6 ne 7.