1, 2. Xiñee naquiiñeʼ guidúʼyanu oración ca casi ti privilegiu, ne xiñee naquiiñeʼ gánnanu xi caníʼ Biblia de laani.

PA NUCHAAGANU Guidxilayú stinu né guidubi naca guibáʼ guizáʼ nahuiiniʼ nihuinni ni. Ne para Jiobá, «ni bizáʼ guibáʼ ne guidxilayú» riʼ la? ca guidxi roʼ ca zeeda gaca cani casi ti gota nisa nuu ndaaniʼ ti cubeta (Salmo 115:15; Isaías 40:15). Peru Biblia na: «Jiobá nuu gaxha de guiráʼ cani rinabaʼ gacanebe laacaʼ, de guiráʼ cani dxandíʼ rinabaʼ ruaa laabe» ne laabe «zudiibe guiráʼ ni gacalaʼdxiʼ cani ridxibi laabe; zucaadiágabe ora guinábacaʼ gacanebe laacaʼ» (Salmo 145:18, 19). Guníʼ ique xiná ca diidxaʼ riʼ. Dios ni bizáʼ guiráʼ ni nuu ne ni jma nandxóʼ nuu gaxha de laanu ne zucaadiaga laanu pa dxandíʼ guinabaʼ ruaanu laa. ¡Ti privilegiu naroʼbaʼ nga nápanu purtiʼ randa runi orarnu Dios!

² Peru pa racaláʼdxinu gucaadiaga Jiobá oración stinu la? naquiiñeʼ gúninu ni modo riuuláʼdxibe. Yanna, ximodo zanda gúninu ni pa qué gánnanu xi cusiidiʼ Biblia modo gaca ni yaʼ. Naquiiñeʼ gánnanu ximodo gaca ni purtiʼ ora runi orarnu ridxíñanu gaxha de Jiobá.

3. Guníʼ tobi de ca razón jma risaca nápanu para guni orarnu Jiobá.

³ Tobi de ca razón jma risaca nápanu para guni orarnu Jiobá nga purtiʼ cayábibe laanu gúninu ni. Stiidxabe na: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa. Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si» (Filipenses 4:6, 7). Nin qué zucáʼnanu invitación cudii Xaíque ni jma dxiʼbaʼ lu guidubi naca guibáʼ ne Guidxilayú ca laanu.

4. Xiñee zanda guiniʼluʼ ziuʼnu jma gaxha de Jiobá pa guni orarnu laa guiráʼ dxi.

⁴ Sti razón nuu para guni orarnu guiráʼ dxi nga purtiʼ ziuʼnu jma gaxha de Jiobá. Ora tuuxa napa ti xhamigu ne nabé rizaláʼdxisaacaʼ riniʼcaʼ ora tiica ne cadi ora si caquiiñecaʼ xiixa. Ne jma zannaxhiisaacaʼ ora güicaʼ diidxaʼ ne guiniʼcaʼ xi caníʼ íquecaʼ, xi cuchiiñaʼ laacaʼ ne xi cayuni sentircaʼ. Zacagá nga laanu né Jiobá. Libru riʼ, maʼ gucané  ni lii gánnaluʼ xi caníʼ Biblia de Jiobá, ximodo laabe ne xi racaláʼdxibe gúnibe. Yanna maʼ ruuyaluʼ Dios casi ti binni. Lu oración stiluʼ zanda gábiluʼ Bixhózeluʼ ni nuu guibáʼ xi riníʼ íqueluʼ ne xi runi sentirluʼ. Ne zacá zanda guidxíñaluʼ jma gaxha de laabe (Santiago 4:8).

5. Ximodo nánnanu qué rucaadiaga Jiobá guiráʼ oración.

⁵ Ñee rucaadiaga Jiobá guiráʼ oración la? Biiyaʼ xi gúdxibe ca israelita bibani ca dxi stiʼ profeta Isaías: «Neca gúnitu stale oración, qué zucaadiagaʼ laatu; maʼ dxaʼ natu de rini» (Isaías 1:15). Pa gúninu xiixa ni qué riuuláʼdxibe, qué zucaadiágabe oración stinu. Nga runi, para gucaadiágabe cani, naquiiñeʼ gúninu cani canábabe laanu.

6. Para gucaadiaga Dios oración stinu, xi naquiiñeʼ gápanu ne ximodo gusihuínninu nápanu ni.

⁶ Tobi de cani naquiiñeʼ gúninu nga gápanu fe (biindaʼ Marcos 11:24). Apóstol Pablu bicaa: «Peru qué zanda guni binni ni riulaʼdxi Dios pa qué runi cre [o qué gapa fe]. Purti para idxiña cabe laabe la? napa cabe xidé guni cre cabe nuu be ne rulabi be cani uyubi laabe» (Hebreos 11:6). Peru gápanu fe qué riníʼ diʼ nga gánnasinu nuu Dios, rucaadiaga ne ricabi oración stinu. Fe ca rihuinni ni lu cani rúninu. Modo guibáninu naquiiñeʼ gusihuinni dxandipeʼ nápanu fe (Santiago 2:26).

7. 1) Xiñee naquiiñeʼ guinínenu Jiobá né respetu. 2) Ximodo rusihuínninu qué runi crenu laanu ora runi orarnu de guidubi ladxidoʼno.

⁷ Para gucaadiaga Jiobá laanu ora guni orarnu la? cadi guni crenu laanu ne naquiiñeʼ gúninu ni de guidubi ladxidoʼno. Cadi dxandíʼ nuu stale razón para cadi guni crenu laanu ora guinínenu Dios la? Ora guiniʼné binni presidente, runi ni né stale respetu purtiʼ nanna risaca binni ca. Pa zacá rúninu né binni, laaca naquiiñeʼ guinínenu  Jiobá né stale respetu (Salmo 138:6). Purtiʼ laabe nga «Dios ni jma nandxóʼ» (Génesis 17:1). Modo guinínenu laabe naquiiñeʼ gusihuínninu cadi cayuni crenu laanu. Pa gúninu zacá ora guinínenu laabe zúninu ni de guidubi ladxidoʼno ne zaníʼ íquenu xi gábinu laabe ne qué zaninu ngueca ca ngueca (Mateo 6:7, 8).

8. Ximodo zanda gúninu ni rinábanu lu oración stinu.

⁸ Sti cosa ni riquiiñeʼ gúninu ti gucaadiaga Dios laanu nga naquiiñeʼ gúninu stipa para gúninu ni rinábanu lu oración stinu. Casi pa guinábanu Jiobá gudii laanu «endaró tidi né [nu] dxi» la? naquiiñeʼ gúninu intiica dxiiñaʼ guidxélanu ni zanda gúninu ti gápanu ni guidoʼno (Mateo 6:11; 2 Tesalonicenses 3:10). Zaqueca, pa guinábanu laabe gacanebe laanu gudxíʼlunu cani ruquiinde beela ládinu laanu gúninu, napa xidé gucáʼnanu cani zándaca gucaa laanu gúninu cani (Colosenses 3:5). Peru cadi gánnasinu xi riquiiñeʼ gúninu para guni orarnu Dios, sínuque laaca naquiiñeʼ gánnanu xi riníʼ cani rinabadiidxaʼ binni de oración.

9. Tuu nga naquiiñeʼ guinínenu ora guni orarnu, ne tu lu lá naquiiñeʼ gúninu ni.

⁹ Tuu nga naquiiñeʼ guni orarnu. Sicaríʼ bisiidiʼ Jesús ca discípulo stiʼ guni orarcaʼ: «Bixhoze du ni nuu ibáʼ» (Mateo 6:9). Nga runi, Jiobá si nga naquiiñeʼ guinínenu, guirútiruʼ. Peru laabe racaláʼdxibe gánnanu xi puestu napa tobi lucha Xiiñibe, Jesucristu. Casi bizíʼdinu lu capítulo 5, biseendaʼ Jiobá Jesús lu Guidxilayú riʼ ti gueeda gulá laanu de donda ne de guendaguti (Juan 3:16; Romanos 5:12). Jiobá laaca biʼniʼ laabe Xaíque stiʼ cani ruzaaquiʼ guʼxhuʼ ne Juez (Juan 5:22; Hebreos 6:20). Nga runi, Stiidxaʼ Dios na naquiiñeʼ guni orarnu lu lá Jesús. Ne Jesús nga guníʼ: «Naa nga neza ca, ne rusiide ni dxandíʼ ne rudiee enda nabani  ni qué zaluxe. Iruti zie ra nuu Bixhoze pa cadi pur naa» (Juan 14:6). Para gucaadiaga Jiobá oración stinu, naquiiñeʼ guni orarnu laasibe ne gúninu ni lu lá Xiiñibe.

10. Xiñee cadi naquiiñepeʼ guzuxíbinu o cuinu para guni orarnu.

¹⁰ Ñee naquiiñepeʼ guzuhuaʼnu o cuinu para guni orarnu la? Coʼ. Cadi cayabi diʼ Jiobá laanu ximódopeʼ chuʼ nanu o ximodo guzuhuaʼnu. Biblia rusiidiʼ nuu stale modo zanda guni orarnu. Zanda cuinu, guindete íquenu, guzuxíbinu o guzuhuaʼnu (1 Crónicas 17:16; Nehemías 8:6; Daniel 6:10; Marcos 11:25). Ni jma risaca nga xi pur cayuni orarnu ne cadi pur modo chuʼnu. Dede zanda guinínenu Dios ndaaniʼ ladxidoʼno ra tiica nuunu, cásica ora cayúninu xhiiñanu zaqueca ora málasi guizaaca xiixa. Zándaca guirutiʼ tu gudii cuenta cayuni orarnu, peru cucaadiaga Jiobá laanu (Nehemías 2:1-6).

11. Xi zanda guininu lu oración stinu.

¹¹ Xi zanda guininu lu oración stinu yaʼ. Biblia cayabi laanu: «Nanna dxichi nu pa inaba nu ni riulaʼdxi Dios gaca la? zucaa diaga laanu» (1 Juan 5:14). Nga runi, zanda guinábanu intiica si ni riuulaʼdxiʼ Dios. Ñee raʼbuʼ qué riuuláʼdxibe gábinu laabe xi riguu xizaa laanu la? ¡Riuuláʼdxibe pue! Ora guni orarnu Jiobá casi ñaca ninínenu ti binni ni jma xhamígunu. Zanda gábinu laabe guiráʼ ni nuu ndaaniʼ ladxidoʼno (Salmo 62:8). Laaca galán guinábanu gacanebe laanu né espíritu santu stibe ti gúninu ni jneza (Lucas 11:13). Ne laaca rinábanu gacanebe laanu gánnanu xi gúninu ora chigúninu xiixa ne gudiibe stipa laanu ti guni huantarnu ca guendanagana (Santiago 1:5). Ora gucheʼnu, naquiiñeʼ guinábanu laabe gutiidiláʼdxibe donda stinu, peru naquiiñeʼ gúninu ni pur fe nápanu lu guendaguti stiʼ Cristu (Efesios 1:3, 7). Peru cadi guinábanu para laasinu, sínuque zanda gúninu ni pur xcaadxi binni casi ca binnilídxinu, ca bíʼchinu o ca bizáʼnanu  nuu ndaaniʼ xquidxi Dios (Hechos 12:5; Colosenses 4:12).

12. Ximodo jma zusisácanu Jiobá lu oración stinu.

¹² Lu oración stinu naquiiñeʼ gusisácanu Jiobá Dios ne gudiʼnu xquíxepeʼ laa pur guiráʼ guendanachaʼhuiʼ stiʼ (1 Crónicas 29:10-13). Lu Mateo 6:9-13 (biindaʼ ni) ridxélanu oración gudixhe Jesús chinándanu. Oración riʼ rusiidiʼ ni laanu guinábanu guisaca lá Dios. Despué rinábanu gueeda Reinu stiʼ Dios o guidxiña dxi guni mandarbe ne gaca ni nabe lu Guidxilayú riʼ cásica raca ni guibáʼ. Ridúʼyanu guníʼ Jesús primeru cani jma risaca casi ra bizeetebe de Jiobá ne despué guniʼbe cani racalaʼdxiʼ binni. Laanu pa laaca guzéʼtenu Jiobá primé lu oración stinu la? zusihuínninu cadi canábanu ni racaláʼdxinu para laasinu.

13. Ximodo ruluíʼ Biblia pabiáʼ zanda guindaa oración stinu.

¹³ Pabiáʼ naquiiñeʼ guindaa oración stinu. Lu Biblia cadi zeeda pabiáʼ guindaa ti oración, neca gúninu ni ora nuunu stúbinu o gaca ni nezalú stale binni. Zanda gúninu ni ti ratuhuiiniʼ si, casi ni rúninu ora guidoʼno, o xadxí, casi ni rúninu ora nuunu stúbinu para gábinu Jiobá ni nuu ndaaniʼ ladxidoʼno (1 Samuel 1:12, 15). Peru Jesús guníʼ naná ziabanáʼ cani nabé rúnicaʼ laacaʼ nachaʼhuiʼ ne rúnicaʼ oración sticaʼ xadxí ti guʼyaʼ binni laacaʼ (Lucas 20:46, 47). Qué ridxagayaa Jiobá nga. Ni jma risaca nga guni orarnu de guidubi ladxidoʼno. Nga runi, zanda guindaa oración stinu biaʼ racaláʼdxinu para gábinu laabe ni caquiiñenu ne purtiʼ gadxé gadxé ra nuunu ora rúninu ni.

14. Bisiene xi riníʼ ca diidxaʼ laguiniʼné «Dios sin iree [tu] gana» ne xi ndaayaʼ nápanu.

¹⁴ Panda biaje zanda guni orarnu Dios. Biblia cayabi laanu: Laguiniʼné «Dios sin iree [tu] gana» ne «cadi guiaana dxí tu de iníʼ né tu Dios» (Lucas 18:1; Efesios 6:18; 1 Tesalonicenses 5:17). Peru qué riníʼ nga naquiiñeʼ guni orarnu  guidubi dxi ne guidubi gueelaʼ. Ni cayabi ni laanu nga naquiiñeʼ guni orarnu Jiobá guiráʼ dxi para gudiʼnu xquíxepeʼ laa pur guendanachaʼhuiʼ stiʼ ne para guinábanu laa gacané laanu gánnanu xi gúninu, quixhedxí ladxidoʼno ne gudii stipa laanu. ¡Naroʼbaʼ ndaayaʼ ca njaʼ! Jiobá riná guinínenu laa guiráʼ ora gacaláʼdxinu ne biaʼ gacaláʼdxinu guindaʼnu. Pa rusisácanu privilegiu nápanu de guinínenu Bixhózenu ni nuu guibáʼ la? ora tiica si zanínenu laa.

15. Xiñee naquiiñeʼ guininu «amén» ora guilúxenu oración stinu ne ora gúninu ni nezalú xcaadxi binni.

¹⁵ Xiñee naquiiñeʼ guininu «amén» ora guiluxe guni orarnu. Diidxaʼ ca riníʼ ni «zacá gaca ni», «dxandipeʼ». Nuu ejemplu ndaaniʼ Biblia ni ruluíʼ galán nga guininu «amén» ora guilúxenu oración stinu ne ora gúninu oración nezalú xcaadxi binni (1 Crónicas 16:36; Salmo 41:13). Ora guni orarnu stúbinu ne guininu «amén» la? cusihuínninu biree ca diidxaʼ ca de ndaaniʼ ladxidoʼno. Ne ora guininu ni nezalú xcaadxi binni (pa ndaaniʼ íquesinu o nadipaʼ) la? culuinu laaca tobi si nuunu né ni bieeteʼ lu oración guca ca (1 Corintios 14:16).

16. Ora runi orarnu Dios, xi runi crenu zúnibe.

¹⁶ Ñee dxandíʼ ricabi Jiobá oración stinu la? ¡Dxandíʼ pue! Nápanu stale razón para guni crenu zacabi «ni rucaadiaga oración» ca guiráʼ xixé binni ni riniʼné laa de guidubi ladxidóʼ (Salmo 65:2). Ne gadxé gadxé nga modo ricábibe laanu.

17. Xiñee zanda guininu riquiiñeʼ Dios ca ángel stiʼ ne binni para guicabi oración stinu.

¹⁷ Para guicábibe oración stinu la? riquiiñebe ca ángel stibe ne ca binni cayuni ni nabe (Hebreos 1:13, 14). Stale binni huayuni oración ra canabaʼ gacané tuuxa laa guiene Biblia la? cadi xadxí de biʼniʼ ni mápeca zeeda ti  xpinni Dios para gacané laa. Cani huayaca ca rusihuinni cani cayuuyaʼ ca ángel guireeche stiidxaʼ Reinu (Apocalipsis 14:6). Ne sti cosa runi Jiobá ora caquiiñenu gacanebe laanu nga rucaabe tuuxa xpínnibe gacané laanu (Proverbios 12:25; Santiago 2:16).

18. Ximodo riquiiñeʼ Jiobá espíritu santu stiʼ ne Biblia para guicabi oración runi ca xpinni.

¹⁸ Laaca riquiiñeʼ Jiobá Dios espíritu santu stiʼ ne Stiidxaʼ para guicabi ca xpinni. Ora guinábanu laabe gacanebe  laanu lu xiixa guendanagana la? zanda guluiʼbe laanu xi gúninu ne zudiibe stipa laanu ra iquiiñebe espíritu santu stibe (2 Corintios 4:7). Ora runi orarnu laabe para gacanebe laanu gánnanu xi gúninu la? stale biaje ricábibe laanu né Biblia. Zándaca ora maʼ cadúʼndanu Biblia guidxélanu xiixa versículo ni gacané laanu o málasi cadúʼndanu ca publicación ribee ca xpinni Cristu, casi libru riʼ. Laaca zanda gusietenaláʼdxicabe laanu xiixa conseju stiʼ Biblia ni caquiiñeʼ gánnanu. Casi ora chuunu ti guendaridagulisaa o tuuxa binnigola ni nuu ra ridagulisaanu ni rizaalaʼdxiʼ laanu guidxiña para gudii conseju laanu (Gálatas 6:1).

19. Xi naquiiñeʼ gánnanu pa nuu biaje ruluíʼ casi ora cadi cacabi Jiobá laanu.

¹⁹ Nuu biaje zándaca ruluíʼ casi ora candaa Jiobá para guicabi laanu, peru qué riníʼ diʼ nga qué zanda guicábibe laanu. Naquiiñeʼ guietenaláʼdxinu modo na Jiobá nga guicabi ne ora guʼyaʼ maʼ zanda. Nánnabe xii nga ni caquiiñenu ne laabe jma galán modo zudiibe cani laanu. Stale biaje rudiibe lugar guinábanu, guyúbinu ne guxhidxi nanu (Lucas 11:5-10). Pa qué gusaana de guinábanu laabe la? zuluinu laabe dxandipeʼ racaláʼdxinu ni ne dxandíʼ fe stinu. Ne zándaca qué zuuyaʼ chaahuinu ximódopeʼ guicábibe  laanu. Casi pa cadídinu lu xiixa guendanagana zándaca cadi cueebe ni, peru zudiibe stipa laanu ti guni huantarnu ni (biindaʼ Filipenses 4:13).

20. Xiñee cadi naquiiñeʼ gusaana de guni orarnu Jiobá, privilegiu naroʼbaʼ nápanu.

²⁰ Rudiʼnu xquíxepeʼ Dios ni bizáʼ guidubi naca guibáʼ ne Guidxilayú riʼ, purtiʼ nuube gaxha de guiranu ora guinabaʼ ruaanu laabe modo racaláʼdxibe. Biblia na: «Jiobá nuu gaxha de guiráʼ cani rinabaʼ gacanebe laacaʼ, de guiráʼ cani dxandíʼ rinabaʼ ruaa laabe» (Salmo 145:18). Cadi gusaana de guni orarnu Jiobá purtiʼ guizáʼ naroʼbaʼ privilegiu nápanu de guinínenu laa. Pa gúninu zacá la? ziuʼnu nayecheʼ purtiʼ nánnanu zeʼ dxi jma zadxíñanu gaxha de Jiobá, ni rucaadiaga oración.