Ora richaganáʼ chupa binni riaʼ ti familia. Neca qué ziuu dxi gusaana de gannaxhiiluʼ ne guni respetarluʼ bixhoʼzoʼ ne jñoouʼ, peru naquiiñeʼ gannuʼ jma risaca xheeluʼ que laacabe yanna. Zándaca nuu de ca binniliʼdxuʼ zaca nagana para laa guiene nga. Peru zacané ca principiu zeeda lu Biblia lii para cadi gápaluʼ guendanagana né laacabe ne zacanécani chuʼ xquendaxheelaluʼ naguidxi.

NI RUSIIDIʼ BIBLIA: «Bisisaca bixhoʼzoʼ ne jñoouʼ» (Efesios 6:2, TNM). Biaʼ tiica iza napuʼ, naquiiñeʼ gusisácaluʼ ne guni respetarluʼ bixhoʼzoʼ ne jñoouʼ. Peru cadi guiaandaʼ lii, laaca naquiiñeʼ cuee xheeluʼ tiempu chiguuya bixhoze ne jñaa. Pa nadxiiluʼ xheeluʼ la? qué ziuuluʼ celoso o celosa ne qué zaníʼ íqueluʼ jma nadxiibe familia stibe que lii (1 Corintios 13:4; Gálatas 5:26).

NI ZANDA GUʼNUʼ:

• Cadi nisi maʼ caniʼluʼ: «Puru si ra cucheeʼ maʼ cayuuyaʼ familia stiuʼ» o «Nin qué riuulaʼdxiʼ jñoouʼ guiráʼ ni runeʼ»

• Biʼniʼ stipa chuʼluʼ lugar stiʼ xheeluʼ

NI RUSIIDIʼ BIBLIA: «Zusaana hombre bixhoze ne jñaa, ne naquiiñeʼ guicanú xheelaʼ, ne gueeda gácacabe ti beela si» (Génesis 2:24). Zándaca guiníʼ ique bixhoʼzoʼ ne jñoouʼ naquiiñeruʼ gápacaʼ lii neca maʼ bichaganaluʼ ne pur nga gacaláʼdxicaʼ chuʼcaʼ lu xquendaxheelaluʼ dede ra maʼ qué zanda.

Guirópatu naquiiñeʼ gúʼyatu pabiaʼtiʼ zanda chúʼcabe lu xquendaxheelatu ne gábitu ni laacabe né diidxaʼ nadóʼ. Lagabi laacabe xi cadi naquiiñeʼ gúnicabe peru sin guninatu laacabe (Proverbios 15:1). Pa qué gudxiibaluʼ laca lii, pa gácaluʼ nadóʼ ne pa qué guidxiichiluʼ nagueenda la? zabanineluʼ familia gaxha stiuʼ galán ne qué zusaana de gannaxhiisaatu (Efesios 4:2).

NI ZANDA GUʼNUʼ:

• Pa riuuluʼ xizaa purtiʼ nabé riuu binnilídxitu lu cani chigúnitu la? byuiʼné ni xheeluʼ ora maʼ nuudxitu

• Guirópatu laguuyaʼ ximodo guni chaahuitu ca guendanagana riʼ