LECCIÓN 08
Zanda gaca xhamíguluʼ Jehová
Racalaʼdxiʼ Jehová gunibiaʼluʼ laa jma. ¿Xiñee yaʼ? Purtiʼ nánnabe pa gunibiaʼluʼ laabe, modo runi tratarbe binni ne ni racaláʼdxibe para laacaʼ, jma ziuuláʼdxiluʼ gaca xhamíguluʼ laabe. Peru ¿ñee dxandíʼ peʼ zanda gaca xhamíguluʼ Dios la? (Biindaʼ Salmo 25:14). ¿Xi caquiiñeʼ gúniluʼ para gaca xhamíguluʼ laabe yaʼ? Ricabi Biblia guiropaʼ pregunta riʼ ne cayabi ni laanu xiñee risaca nga gaca xhamíguluʼ Jehová.
1. ¿Xi invitación cayuni Jehová lii?
«Laguidxiña ra nuu Dios ne laa zadxiña laatu» (Santiago 4:8). ¿Xii nga ni ná ca diidxaʼ riʼ yaʼ? Canabaʼ Jehová gaca xhamíguluʼ laa. Nuu tu laa riníʼ ique nagana nga gaca xhamíguluʼ tuuxa pa qué ruuyaluʼ laa, ne Dios la? qué ridúʼyanu laa. Peru maʼ bisaananebe laanu Stiidxabe, Biblia, laani nga ni riquiiñenu para gunibiaʼnu ne guidxíñanu laabe. Ne ora ridúʼndanu Stiidxabe Biblia la? ránnanu xi racaláʼdxibe gábibe laanu ne raca xhamígunu laabe jma neca qué ridúʼyanu laabe.
2. ¿Xiñee gástiruʼ sti amigu casi Jehová?
Guirútiruʼ nadxii lii casi nadxii Jehová lii. Racaláʼdxibe guibániluʼ nayecheʼ ne guyúbiluʼ laabe para gacanebe lii ora caquiiñeluʼ ni. Laaca cayábibe lii zanda gulaaluʼ «guiráʼ ni riguu xizaa» lii luguiabe purtiʼ rizaaláʼdxibe lii (1 Pedro 5:7). Siempre nuu Jehová listu para gacané, gucaadiaga ne quixhedxí ladxidóʼ ca xhamigu (biindaʼ Salmo 94:18, 19).
3. ¿Xi ribeza Jehová guni ca xhamigu?
Nadxii Jehová guiráʼ binni «peru raca xhamígube ca ni runi ni jneza» (Proverbios 3:32). Ribeza Jehová guni ca xhamigu cosa galán ne gucaanacaʼ ca cosa ni qué riuuláʼdxibe. Nuu tu laa riníʼ ique nagana nga guni guiráʼ ni rinabaʼ Jehová laa. Peru riénebe laanu ne rudiibe lugar guidxiña ca binni ni nadxii laabe ne ni cayuni stipa pur guni ni nabe (Salmo 147:11; Hechos 10:34, 35).
GUIZÍʼDIRUNU JMA
Guidúʼyanu xi caquiiñeʼ gúninu para gaca xhamígunu Jehová ne xiñee gástiruʼ sti amigu casi Jehová.
4. Guca xhamigu Jehová Abrahán
Relatu ni zeeda lu Biblia stiʼ Abrahán (ni laaca láʼ Abrán) zacaneni laanu gánnanu xi caquiiñeʼ gúninu para gaca xhamígunu Dios. Laguundaʼ relatu stiʼ Abrahán ni zeeda lu Génesis 12:1-4 ne laiquiiñeʼ ca pregunta riʼ para güitu diidxaʼ:
-
¿Xi gunabaʼ Jehová Abrahán?
-
¿Xi promesa biʼniʼ Jehová Abrahán?
-
¿Xi biʼniʼ Abrahán despué de gudxi Jehová laa xi caquiiñeʼ guni?
5. Ni ribeza Jehová guni ca xhamigu
Guiranu ribézanu guni ca xhamígunu xiixa pur laanu.
-
¿Xi ribézaluʼ guni ca xhamíguluʼ?
Laguundaʼ 1 Juan 5:3 ne laiquiiñeʼ pregunta riʼ para güitu diidxaʼ:
-
¿Xi ribeza Jehová guni ca xhamigu?
Para gúninu ni ná Jehová, caquiiñeʼ guchaʼnu modo laanu. Laguundaʼ Isaías 48:17, 18 ne laiquiiñeʼ pregunta riʼ para güitu diidxaʼ:
-
¿Xiñee rinabaʼ Jehová ca xhamigu guchaacaʼ modo laacaʼ?
6. Ni runi Jehová pur ca xhamigu
Racané Jehová ca xhamigu gudxiilucaʼ ca guendanagana ni rápacaʼ. Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
-
¿Ximodo gucané Jehová gunaa bihuinni lu videu riʼ para bidxiilú ca ni riguu laa triste?
Laguundaʼ Isaías 41:10, 13 ne laiquiiñeʼ ca pregunta riʼ para güitu diidxaʼ:
-
¿Xi promesa runi Jehová guiráʼ ca xhamigu?
-
¿Rábiluʼ zanda gueeda gaca Jehová ti buen amigu para lii la? ¿Xiñee riníʼ íqueluʼ zacá yaʼ?
7. Para ganda gaca xhamígunu Jehová caquiiñeʼ gucaʼdiáganu ne guinínenu laa
Jma raca xhamígunu tuuxa ora nabé rinínenu laa. Laguundaʼ Salmo 86:6, 11 ne laiquiiñeʼ ca pregunta riʼ para güitu diidxaʼ:
-
¿Ximodo zanda guinínenu Jehová?
-
¿Ximodo riniʼné Jehová laanu?
NUU TU NÁ: «Qué zanda gaca xhamígunu Dios».
-
¿Xi textu zeeda lu Biblia zanda iquiiñeluʼ para guluiʼluʼ binni zanda gaca xhamigu Jehová?
XI BIZÍʼDINU
Racalaʼdxiʼ Jehová gaca xhamíguluʼ laa ne zacanebe lii para gunibiaʼluʼ laabe.
Xi biziidiluʼ
-
¿Ximodo racané Jehová ca xhamigu?
-
¿Xiñee rinabaʼ Jehová ca xhamigu gúnicaʼ ni jneza?
-
¿Ñee nagana nga ni rinabaʼ Jehová guni ca xhamigu la? ¿Xiñee riníʼ íqueluʼ zacá yaʼ?
BIIYAʼ XIRUʼ ZANDA GUIZIIDILUʼ
¿Xiñee zabániluʼ jma galán pa gaca xhamíguluʼ Dios?
«Jehová, ti Dios ni naquiiñeʼ gunibiaʼluʼ» (Torre stiʼ ni rapa, 15 de febrero de 2003)
Biiyaʼ ximodo zanda gaca xhamíguluʼ Dios.
Biiyaʼ xiñee guníʼ ti gunaa bilá purtiʼ guca xhamigu Jehová.
Biiyaʼ xi riníʼ ique caadxi joven de Jehová.