Naca Jehová ti Dios de orden (1 Corintios 14:​33). Nga runi, nexheʼ chaahuiʼ guiráʼ dxiiñaʼ raca ndaaniʼ xquídxibe. ¿Ximodo nexheʼ chaahuiʼ ni yaʼ? ¿Ximodo zanda gacanenu para gaca ca dxiiñaʼ riʼ jneza yaʼ?

1. ¿Tuu nga xaíque stiʼ congregación?

Biblia ná: «Naca Cristu xaíque stiʼ ca xpinni» (Efesios 5:​23). Dede guibáʼ ruuyaʼ Jesús guiráʼ dxiiñaʼ raca ndaaniʼ xquidxi Jehová lu Guidxilayú. Maʼ gulí Jesús ti grupuhuiiniʼ de ancianu ni napa experiencia, laacabe nga «mozo ni nuu xpiaaniʼ ne ni runi jneza» ne laaca runibiaʼdu laacabe casi Grupu ni Zániru (biindaʼ Mateo 24:​45-​47). Cásica biʼniʼ ca apóstol ne ca ancianu ni guyuu Jerusalén lu primé siglu que, Grupu ni Zániru riʼ nga ruuyaʼ ca dxiiñaʼ raca ndaaniʼ xquidxi Jehová lu guidubi Guidxilayú (Hechos 15:2). Peru cadi laadícabe nga xaíque stiʼ xquidxi Dios, sínuque ruyúbicabe gacané Stiidxaʼ Dios laacabe ne ruzuubacabe stiidxaʼ Jesús.

2. ¿Tuu nga ca ancianu ne xi dxiiñaʼ rúnicabe?

Laacabe nga ca hermanu ni maʼ ziné stale iza de qué huaxeleʼ de Jehová, riquiiñecabe Biblia para gusiidicabe, gacanécabe ne cúʼcabe gana congregación. Ne qué runi cobrárcabe nin ti degaayuʼ pur dxiiñaʼ rúnicabe, sínuque rúnicabe ni né stale gana, casi riuulaʼdxiʼ Dios, rinanda ca ancianu conseju riʼ: «Cadi gúnitu ni para guni ganartu bueltu, sínuque laguni ni de guidubi ladxidoʼto» (1 Pedro 5:​1, 2). Ndaaniʼ congregación laaca nuu hermanu ni runibiáʼcabe casi siervu ministerial. Laacabe nga racanécabe ca ancianu né ca dxiiñaʼ raca ndaaniʼ congregación, ne despué laaca zanda gaca ca hermanu riʼ ancianu pa guni cumplircaʼ né caadxi requisitu rinabaʼ Biblia.

Ribí Grupu ni Zániru caadxi ancianu para gaca superintendente de circuito. ¿Xi dxiiñaʼ runi ca hermanu riʼ yaʼ? Rigánnacabe ca congregación ca para cúʼcabe gana ca hermanu ne ca hermana, riguixhedxícabe ladxidoʼcaʼ ne racanécabe laacaʼ gaca fe sticaʼ nadipaʼ. Sti dxiiñaʼ rúnicabe nga ruuyacabe tu zanda gaca ancianu ne siervu ministerial. Ne para cuícabe ca hermanu riʼ, ruuyacabe pa maʼ runi cumplircaʼ ca requisitu rinabaʼ Biblia guni ca ni racalaʼdxiʼ gaca ancianu ne siervu ministerial (1 Timoteo 3:​1-​10, 12; Tito 1:​5-9).

3. ¿Xi runi ti testigu stiʼ Jehová?

Guiradu rusisácadu lá Jehová pur ni rúnidu lu ca reunión ni rápadu, ne cada tobi de laadu runi stipa pur guni predicar biaʼ gándatiʼ (biindaʼ Salmo 148:​12, 13).

 GUIZÍʼDIRUNU JMA

4. Naca Jesús ti xaíque nabé nachaʼhuiʼ

Guizáʼ galán ni canabaʼ Jesús laanu gúninu. Laguundaʼ Mateo 11:​28-​30 ne laiquiiñeʼ ca pregunta riʼ para güitu diidxaʼ:

• ¿Ximodo naca Jesús? ¿Ne ximodo racaláʼdxibe guni sentirnu?

5. Runi ca ancianu stipa para gúnicaʼ ni rusiidicaʼ

1. Runi ca ancianu stipa pur chuʼcaʼ gaxha de Jehová peru laaca racanecaʼ familia sticaʼ para guni ni.

2. Rizaalaʼdxiʼ ca ancianu ca hermanu de congregación.

3.   Nabé runi predicar ca ancianu de congregación.

4. Nanna ca ancianu gusiidicaʼ ne laaca racanecaʼ para guiá ne para gaca xcaadxi dxiiñaʼ.

6. Zanda gacanenu ca ancianu

Biblia cayabi laanu ximodo zanda gacanenu ca ancianu. Laguundaʼ Hebreos 13:​17 ne laiquiiñeʼ ca pregunta riʼ para güitu diidxaʼ:

• ¿Xiñee ruzeeteʼ Biblia caquiiñeʼ guzúʼbanu stiidxaʼ ca ni runi dirigir laanu? ¿Ñee rábiluʼ jneza gúninu nga la? ¿Xiñee rábiluʼ zacá ni yaʼ?

Laguundaʼ Lucas 16:​10 ne laiquiiñeʼ pregunta riʼ para güitu diidxaʼ:

• ¿Xiñee risaca gacanenu ca ancianu ne guzúʼbanu stiidxacabe dede lu ca cosa ni ruluíʼ huaxiéʼ risaca?

 XI BIZÍʼDINU

Jesús nga xaíque stiʼ congregación ne ca ancianu ruzuubacaʼ stiidxaʼ Jesús, caquiiñeʼ gacanenu ca ancianu ne guzúʼbanu stiidxacaʼ purtiʼ rápacaʼ ne rusiidicaʼ laanu ne laaca riguíxhecaʼ ti ejemplu galán para laanu.

Xi biziidiluʼ

• ¿Tuu nga xaíque stiʼ congregación?

• ¿Ximodo racané ca ancianu ca hermanu ni nuu ndaaniʼ congregación?

• ¿Xi dxiiñaʼ runi cada testigu stiʼ Jehová ndaaniʼ congregación?