LECCIÓN 22
¿Ximodo guni predicarluʼ ca noticia galán?
Ora biziidiluʼ ca ni dxandíʼ rusiidiʼ Biblia, zándaca guníʼ íqueluʼ: «¡Caquiiñeʼ ganna guiráʼ binni ndiʼ!». Ne dxandíʼ, guiráʼ binni caquiiñeʼ ganna ni. Peru zándaca guidxíbiluʼ guiníʼneluʼ xcaadxi binni de ni caziidiluʼ. Guidúʼyanu xi zanda gúniluʼ para cadi guidxíbiluʼ ne chuʼluʼ nayecheʼ ora guiníʼneluʼ xcaadxi binni de ca noticia galán zeeda lu Biblia.
1. ¿Ximodo zanda guiníʼneluʼ ca binni ni runibiaʼluʼ de ni caziidiluʼ?
Ca discípulo stiʼ Jesús guniʼcaʼ: «Qué zusaanadu de guinidu de ca cosa ni maʼ bidúʼyadu ne ni maʼ binadiágadu» (Hechos 4:20). Ne cumu risaca para laacabe guiráʼ ni caziidicabe la? pa ñanda si guiráʼ binni ñábicabe ni. ¿Ñee zacaca runi sentirluʼ la? Pa zacá ni la? biyubi modo guiníʼneluʼ ca familia stiluʼ ne ca xhamíguluʼ de ni caziidiluʼ (biindaʼ Colosenses 4:6).
Ni zacané lii para guzululuʼ
-
Para guzulú guiníʼneluʼ ti familia stiluʼ de ni zeeda lu Biblia, zanda guiniʼluʼ: «Semana riʼ biziideʼ xiixa ni nabé guyuuladxeʼ».
-
Ora gúʼyaluʼ huará ti xhamíguluʼ o nuu xizaa, biluíʼ laabe ti textu zeeda lu Biblia ni zanda cuʼ gana laabe.
-
Ora guinabadiidxaʼ ca ni runineluʼ dxiiñaʼ xi bíʼniluʼ fin de semana, zanda gábiluʼ laacabe xiixa ni biziidiluʼ ora gucuaaluʼ estudiu o xiixa ni biziidiluʼ lu reunión.
-
Biluíʼ ca xhamíguluʼ sitiu ni nuu lu internet jw.org.
-
Biʼniʼ invitar tuuxa ora guicaaluʼ estudiu o biluíʼ laacabe ximodo guinábacabe guʼndané tuuxa laacabe de lu Biblia lu jw.org.
2. ¿Xiñee galán quixhe íqueluʼ guni predicarneluʼ ca hermanu de congregación?
Cadi ca ni runibiáʼ si ca discípulo stiʼ Jesús que nga biʼniʼ predicarcaʼ ca noticia galán que. Biseendaʼ Jesús laacabe «de chupa chupa ndaaniʼ guiráʼ guidxi» para guni predicárcabe (Lucas 10:1). Pur modo biʼniʼ predicárcabe riʼ gunda guniʼnécabe jma binni de ca noticia galán ne laaca nabé guyuucabe nayecheʼ ra biʼniʼ predicárcabe juntu (Lucas 10:17). ¿Laga pa quixhe íqueluʼ guni predicarneluʼ ca hermanu de congregación yaʼ?
GUIZÍʼDIRUNU JMA
Guidúʼyanu xi zacané lii para cadi guidxíbiluʼ ne chuʼluʼ nayecheʼ ora guni predicarluʼ ca noticia galán.
3. Qué zusaana Jehová lii
Nuu tu laa ridxibi xi guiníʼ ique binni de laa ora gúʼyacabe cayuni predicar.
-
¿Lii yaʼ? ¿Ñee ridxíbiluʼ guiníʼneluʼ xcaadxi de ni caziidiluʼ la? ¿Xiñee yaʼ?
Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
-
¿Xi gucané ca joven ni bihuinni lu videu riʼ para cadi guidxíbicaʼ guni predicarcaʼ?
Laguundaʼ Isaías 41:10 ne laiquiiñeʼ pregunta riʼ para güitu diidxaʼ:
-
Pa ridxíbiluʼ guni predicarluʼ, ¿xiñee risaca guni orarluʼ?
¿Ñee nannuʼ ndiʼ la?
Stale testigu stiʼ Jehová guníʼ íquecaʼ qué ñuu dxi ñuni predicarcaʼ. Guzéʼtenu ejemplu stiʼ ti hombre láʼ Sergey, laabe biʼniʼ sentirbe qué risácabe ne guca nagana para laabe guiníʼnebe xcaadxi binni. Peru ti dxi gudixhe íquebe guni estudiarbe Biblia. Laabe guniʼbe: «Neca peʼ cadxibeʼ peru gunda gunieniaʼ xcaadxi de ni caziideʼ. Nabé bidxagayaaʼ purtiʼ gucané ni naa chuaaʼ galán ne gucané ni naa chindá guiráʼ ni rusiidiʼ Biblia ndaaniʼ ladxiduáʼ».
4. Guníʼ né respetu
Ante guni predicarluʼ tuuxa, risaca guiníʼ íqueluʼ xi chitídxiluʼ laabe ne ximodo gábiluʼ ni laabe. Laguundaʼ 2 Timoteo 2:24 ne 1 Pedro 3:15, ne laiquiiñeʼ ca pregunta riʼ para güitu diidxaʼ:
-
¿Ximodo zanda gúniluʼ ni ná ca versículo riʼ ora guiníʼneluʼ tuuxa de lu Biblia?
-
Pa cadi cayuulaʼdxiʼ familia stiluʼ ne ca xhamíguluʼ ca ni runi creluʼ, ¿xi zanda gúniluʼ? Ne ¿xi cadi naquiiñeʼ gúniluʼ?
-
¿Xiñee jma galán guyúbiluʼ modo guiniʼluʼ sin guchiichiluʼ laacabe qué gábiluʼ laacabe xi naquiiñeʼ guni crécabe?
5. Riuʼnu nayecheʼ ora guni predicarnu ca noticia galán
Bidii Jehová ti dxiiñaʼ Jesús ne laani nga guni predicar ca noticia galán. ¿Ximodo biiyaʼ Jesús dxiiñaʼ riʼ yaʼ? Laguundaʼ Juan 4:34 ne laiquiiñeʼ ca pregunta riʼ para güitu diidxaʼ:
-
Para ganda guibáninu ne chuʼnu nayecheʼ naquiiñeʼ guidoʼno guendaró ni napa vitamina. ¿Xiñee guníʼ Jesús guni ni ná Dios, casi guni predicar ca noticia galán, zeeda gácani casi guendaró para laa?
-
¿Ñee rábiluʼ zanda chuʼluʼ nayecheʼ pa guni predicarluʼ ca noticia galán la? ¿Xiñee riníʼ íqueluʼ zacá ni yaʼ?
Ni zacané lii para guzululuʼ
-
Ora cheluʼ ti reunión ni raca ndaaniʼ semana, biiyaʼ ximodo rúnicabe para guzulú guiniʼnécabe binni de lu Biblia.
-
Gunabadiidxaʼ maestru stiluʼ xi zanda gúniluʼ para gutiidiluʼ ti presentación lu reunión raca ndaaniʼ semana. Zacané ca presentación riʼ lii gánnaluʼ ximodo gusiidiluʼ binni de lu Biblia.
-
Laaca zanda iquiiñeluʼ sección ni láʼ «Nuu tu ná» ne «Nuu tu rinabadiidxaʼ» ni zeeda lu libru riʼ, zacané ndiʼ lii gánnaluʼ ximodo guicábiluʼ xiixa pregunta ne xi zanda gúniluʼ ora qué naʼ tuuxa gucaadiaga lii.
NUU TU RINABADIIDXAʼ: «¿Xi tal xa? ¿Ximodo nuuluʼ?».
-
¿Ximodo zanda iquiiñeluʼ ca pregunta riʼ para ganda guiníʼneluʼ tuuxa de ni caziidiluʼ de lu Biblia?
XI BIZÍʼDINU
Guizáʼ nayecheʼ ziuuluʼ ora guni predicarluʼ ca noticia galán ne cadi tan nagana diʼ ni casi modo riníʼ íqueluʼ.
Xi biziidiluʼ
-
¿Xi zucaa lii guni predicarluʼ ca noticia galán?
-
¿Xi zanda gúniluʼ para guiniʼluʼ né respetu?
-
¿Xi zanda gúniluʼ para cadi guidxíbiluʼ ora guni predicarluʼ?
BIIYAʼ XIRUʼ ZANDA GUIZIIDILUʼ
Biiyaʼ tapa modo zanda gusaanaluʼ tarjeta de contactu stiʼ jw.org.
Biiyaʼ tapa cualidad ni zanda gacané lii guni predicarluʼ ca noticia galán.
«¿Ñee nuuluʼ dispuestu gácaluʼ pescador de binni la?» (Torre stiʼ ni rapa, septiembre de 2020)
Biiyaʼ ti relatu zeeda lu Biblia ni zacané laanu para cadi guidxíbinu ora guni predicarnu neca nahuiinirunu.
¿Ñee caʼruʼ gunibiáʼ ca familia stiluʼ Jehová la? Biiyaʼ ximodo zanda guiníʼneluʼ laacabe de lu Biblia.
«Ximodo ucuudxinu binnilídxinu ni cadi naca xpinni Cristu» (Torre stiʼ ni rapa, 15 de marzo de 2014)
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
