Guizáʼ risaca rini para laanu, purtiʼ sin laani qué zanda diʼ guibáninu. Cumu Dios nga bizáʼ laanu la? laasibe nga zanda gábibe laanu ximodo iquiiñenu ni. ¿Xi maʼ bisiene Dios de rini yaʼ? ¿Zanda guidoʼno o guicanu rini la? ¿Xi zacané lii gánnaluʼ xi gúniluʼ?

1. ¿Pabiáʼ rusisaca Jehová rini?

Tiempu gucuá Biblia gudxi Jehová ca xpinni: «Rini ca nga guendanabani stiʼ guiráʼ clase beela» (Levítico 17:​14). Para Jehová la? biaʼca risaca guendanabani stiʼ ti binni nga risaca rini. Ne cumu ti regalu guizáʼ risaca bidii Dios laanu nga guendanabani la? rini ca laaca guizáʼ risaca ni para laabe.

2. ¿Xi qué racalaʼdxiʼ Dios guninenu rini?

Ante chuʼ congregación stiʼ ca xpinni Cristu, maca gudxi Jehová ca xpinni cadi gocaʼ rini (biindaʼ Génesis 9:4 ne Levítico 17:​10). Ne maʼ lu primé siglu que bisietenalaʼdxiʼ Jehová ni ca xpinni sti biaje. Ca apóstol ne ca ancianu ni zániru ndaaniʼ congregación gúdxicaʼ laacabe: «Caquiiñeʼ [...] guni rechazartu rini» (biindaʼ Hechos 15:​28, 29).

¿Xi riníʼ guni rechazarnu rini yaʼ? Pa ñabi ti doctor lii cadi gueluʼ xiixa ni napa alcohol, ¿ñee tisi gúdxibe lii cadi gueluʼ ni zaníʼ íqueluʼ zanda goloʼ xiixa ni napa alcohol o guicaluʼ ni lu vena la? Coʼ, ¿njaʼ? Ngaca nga rizaaca né rini. Nga runi, para ganda gúninu ni ná Dios la? cadi naquiiñeʼ guidoʼno o guideʼnu rini nin guidoʼno xpeela ti maniʼ ni biucharini. Laaca cadi naquiiñeʼ guidoʼno xiixa guendaró ni napa rini.

Yanna, ¿ñee jneza nga iquiiñeʼ binni rini para guianda de xiixa guendahuará la? Nuu caadxi tratamientu ni rudii ca doctor ca cadi jneza ruuyaʼ Dios ca ni, casi guicá binni rini o guicá tobi de guidapaʼ cosa ni zeeda lu rini casi: glóbulo rojo, glóbulo blanco, plaqueta ne plasma. Peru nuu biaje nagana nga gánnanu pa cuchéʼnenu xiixa ley stiʼ Dios. Guzéʼtenu caadxi ejemplu, lu caadxi tratamientu rudii ca doctor ca nuu tiru riquiiñecabe xcaadxi cosa jma nahuiiniʼ zeeda lu glóbulo rojo, glóbulo blanco, plaqueta ne plasma. Ne nuu biaje la? riquiiñecabe laaca rini stiʼ binni lu xiixa tratamientu. Despué de guiduʼyaʼ chaahuinu guiráʼ opción ni nuu, cada tobi de laanu nga naquiiñeʼ guni decidir xi tratamientu jma jneza naquiiñeʼ guicaa (Gálatas 6:5). a

 GUIZÍʼDIRUNU JMA

3. Guicaanu decisión ni chuulaʼdxiʼ Dios

¿Ximodo zanda guicaanu decisión jneza ne ni chuulaʼdxiʼ Dios yaʼ? Laguuyaʼ VIDEU riʼ ne despué laguiníʼ pabiáʼ risaca gúninu ca cosa zeeda raríʼ.

• Guni orarnu Dios para gacané laanu (Santiago 1:5).

• Guyúbinu ca principiu zeeda lu Biblia ni caníʼ de tema riʼ ne gúninu stipa chinándanu ca ni (Proverbios 13:​16).

• Guidúʼyanu xi xcaadxi tratamientu nuu neza ra nabézanu.

• Guidúʼyanu gunáʼ nga ca tratamientu ni qué lica zanda guicaanu.

• Guidúʼyanu cadi guchiiñaʼ conciencia stinu laanu pur decisión ni guicaanu (Hechos 24:​16). b

• Cadi guiaandaʼ laanu, guirutiʼ zanda gabi laanu xi decisión guicaanu, nin xheelanu, nin ti ancianu o binni ni bisiidiʼ laanu de lu Biblia (Romanos 14:​12).

• Gucaʼnu decisión stinu lu ti guiʼchiʼ.

4. Ruyubi ca testigu stiʼ Jehová tratamientu jma galán para laacaʼ

Neca ruzúʼbanu stiidxaʼ Dios ne qué ricanu rini, ruyúbinu tratamientu jma galán para laanu. Laguuyaʼ VIDEU riʼ.

Laguundaʼ Tito 3:2 ne laiquiiñeʼ pregunta riʼ para güitu diidxaʼ:

• ¿Xiñee caquiiñeʼ guininu né respetu ora gusiénenu ca doctor ni runi crenu?

 5. Ca cosa ni zeeda lu rini

Zeeda tapa cosa lu rini: glóbulo rojo, glóbulo blanco, plaqueta ne plasma. Ne cada tobi de laacani nápacani xcaadxi cosa jma nahuiiniʼ. c Nuu biaje riquiiñeʼ ca doctor ca ni para gusiándacaʼ xiixa guendahuará o para gucueezacaʼ ti hemorragia.

Cada xpinni Cristu nga naquiiñeʼ guni decidir pa zacá ca cosa jma nahuiiniʼ zeeda lu rini pur ni maʼ biziidiʼ de lu Biblia. Zándaca nuu tu laa qué zaná guicaa ti tratamientu ni né ca cosa jma nahuiiniʼ zeeda lu rini, peru nuu tu laa zándaca qué zuchiiñaʼ conciencia stiʼ pa guicá ca ni.

Ante guicaaluʼ ti decisión, guníʼ ique ndiʼ:

• ¿Ximodo nusieneʼ ti doctor xiñee chiguicayaʼ o xiñee qué zacayaʼ xiixa cosa ni jma nahuiiniʼ zeeda lu rini?

 XI BIZÍʼDINU

Racalaʼdxiʼ Jehová gusisácanu rini.

Xi biziidiluʼ

• ¿Xiñee rusisaca Jehová rini?

• ¿Xiñee nánnanu dede né cadi guicanu rini nga rugaanda mandatu ni ná naquiiñeʼ guni rechazartu rini?

• ¿Xi zacané laanu guicaanu ti decisión jneza?