LECCIÓN 55
Gucané ndaaniʼ congregación
Lu guidubi naca Guidxilayú, ndaaniʼ stale congregación millón de binni runi adorar Jehová né stale guendanayecheʼ. Nabé rusisaca ca xpinni Cristu riʼ guiráʼ ni riziidicaʼ ne racanecaʼ ndaaniʼ congregación sticaʼ né stale guendanayecheʼ. ¿Ñee zaqueca runi sentirluʼ ndaaniʼ congregación stiluʼ la?
1. ¿Ximodo zanda iquiiñeluʼ tiempu ne stipa stiluʼ para gacaneluʼ ndaaniʼ congregación?
Guiranu zanda gacanenu ndaaniʼ congregación. Guníʼ ique ndiʼ, ¿ñee nuu tuuxa ni huará o ni maʼ nagola ndaaniʼ congregación stiluʼ la? ¿Zanda gacaneluʼ laacabe para chécabe reunión la? ¿O zanda gacaneluʼ laacabe chisiluʼ o gúniluʼ xiixa buelta stícabe? (Biindaʼ Santiago 1:27). Laaca zanda gacanenu para guiá Yoo stiʼ Reinu ne guicaa ni mantenimientu. Guirutiʼ runi obligar laanu gúninu ca cosa riʼ. Cumu nadxiinu Dios ne ca hermanu stinu la? riale de ndaaniʼ ladxidoʼno gacanenu laacabe (Salmo 110:3).
Ca Testigu ni maʼ guyuunisa laaca zanda gacanecaʼ ndaaniʼ congregación de xcaadxi modo. Casi pa runi cumplir tuuxa hermanu caadxi requisitu ni rinabaʼ Biblia la? zanda gaca siervu ministerial, ne despué zanda gaca ancianu. Ne guiráʼ hermanu ne hermana zanda gaca precursor para guni predicar jma. Ne zaqueca nuu xcaadxi Testigu ni rigacané ra cabí Yoo stiʼ Reinu. Ne nuu tu laa rindeza sti ladu para chigacané sti congregación ra nuu necesidad.
2. ¿Ximodo zanda iquiiñenu bueltu stinu ne ni nápanu para gacanenu ndaaniʼ congregación?
Biblia ná: «Bisisaca Jehová né ca cosa risaca stiluʼ» (Proverbios 3:9). Ti privilegiu nga iquiiñenu bueltu ne ca cosa stinu para gacanenu congregación ne para gaca predicar lu guidubi naca Guidxilayú (biindaʼ 2 Corintios 9:7). Ne ora rudiʼnu xiixa donación la? cayacanenu lu ca dxiiñaʼ ni raca para gacanécabe ca hermanu ora guizaaca xiixa desastre. Stale tu laa ribeechú ti ndaa bueltu para gudii ti donación (biindaʼ 1 Corintios 16:2). Zanda gusábaluʼ donación stiluʼ ndaaniʼ ca cajahuiiniʼ ni nuu ndaaniʼ ca lugar ra runi adorarnu Jehová o zanda gúniluʼ ni dede lu página donate.pr418.com. Rudii Jehová lugar iquiiñenu ca cosa risaca stinu para gusihuínninu pabiáʼ nadxiinu laa.
GUIZÍʼDIRUNU JMA
Guidúʼyanu caadxi modo zanda gacanenu ndaaniʼ congregación.
3. Zanda gudiiluʼ ca cosa risaca nápaluʼ
Nadxii Jehová ne Jesús guiráʼ ca ni rudii de guidubi ladxidóʼ. Ti biaje, bisisaca Jesús stipa ni biʼniʼ ti viuda pobre para gudii de ni napa. Laguundaʼ Lucas 21:1-4 ne laiquiiñeʼ ca pregunta riʼ para güitu diidxaʼ:
-
¿Ñee caquiiñeʼ peʼ gudiʼnu stale bueltu para gusiéchenu ladxidóʼ Jehová la?
-
¿Xi runi sentir Jehová ne Jesús ora rudiʼnu ni nápanu de guidubi ladxidoʼno?
Para gánnatu ximodo riquiiñeʼ ca donación rudiʼnu, laguuyaʼ VIDEU riʼ. Despué, laiquiiñeʼ pregunta riʼ para güitu diidxaʼ:
-
¿Ximodo racanenu ca congregación ni nuu lu guidubi Guidxilayú pur ca donación ni rudiʼnu?
4. Zanda gaca ofrecerluʼ para gacaneluʼ
Neca bidii ca xpinni Jehová ni bibani dxiqué de ni nápacaʼ para gaca chaahuiʼ ca lugar ra raca adorar Dios, laaca guca ofrecércabe para gacanécabe. Laguundaʼ 2 Crónicas 34:9-11 ne laiquiiñeʼ pregunta riʼ para güitu diidxaʼ:
-
¿Xi biʼniʼ ca israelita que para gúpacaʼ «lidxi Jehová» o lugar ra runi adorarcaʼ laabe?
Para gúʼyatu ximodo zinanda ca testigu stiʼ Jehová ejemplu stiʼ ca xpinni Dios ni bibani dxiqué, laguuyaʼ VIDEU riʼ. Despué laiquiiñeʼ ca pregunta riʼ para güitu diidxaʼ:
-
¿Xiñee nabé risaca gusianu Yoo stiʼ Reinu ne gudiʼnu ni mantenimientu?
-
¿Ximodo rábiluʼ zanda gacaneluʼ?
5. Zanda guni ca hermanu stipa para gacanecaʼ jma ndaaniʼ congregación
Biblia caguu gana ca hombre ni naca xpinni Cristu para guni progresarcaʼ ne gacanecaʼ jma ndaaniʼ congregación. Para gunibiaʼtu ti hermanu ni gudixhe ique guni progresar la? laguuyaʼ VIDEU riʼ. Despué zanda iquiiñetu pregunta riʼ para güitu diidxaʼ:
-
¿Xi biʼniʼ Ryan para guni progresar ti ganda gacané jma ndaaniʼ congregación?
Lu Biblia zeeda caadxi requisitu ni caquiiñeʼ guni cumplir ca hermanu ni racalaʼdxiʼ gaca siervu ministerial ne ancianu. Laguundaʼ 1 Timoteo 3:1-13 ne laiquiiñeʼ ca pregunta riʼ para güitu diidxaʼ:
-
¿Ximodo naquiiñeʼ gaca ca hermanu ni racalaʼdxiʼ gaca siervu ministerial ne ancianu?
-
¿Ximodo caquiiñeʼ gaca familia stícabe? (Laguuyaʼ versículo 4 ne 11).
-
¿Xi zabeendú congregación pa guni ca hermanu stipa guni cumplircaʼ ca requisitu riʼ?
NUU TU RINABADIIDXAʼ: «¿Paraa ribee organización stiʼ ca testigu stiʼ Jehová bueltu para gúnicaʼ dxiiñaʼ sticaʼ?».
-
¿Xi nicábiluʼ yaʼ?
XI BIZÍʼDINU
Nabé rusisaca Jehová ca sacrificiu ni rúninu ora riquiiñenu tiempu, stipa ne ca cosa risaca stinu para gacanenu congregación.
Xi biziidiluʼ
-
¿Ximodo zanda iquiiñenu stipa ne tiempu stinu para gacanenu congregación?
-
¿Ximodo zanda iquiiñenu ca cosa risaca stinu para gacanenu congregación?
-
¿Ximodo ñuuláʼdxiluʼ ñacaneluʼ congregación?
BIIYAʼ XIRUʼ ZANDA GUIZIIDILUʼ
Biiyaʼ xiñee maʼ qué rinabaʼ Dios ca xpinni gudiicaʼ diezmu.
Lu Biblia riete zanda guicaa ca hombre ni ma’ guyuunisa xiixa dxiiña’ ndaani’ congregación. ¿Peru xi rizaaca pa caquiiñe’ guni ti gunaa tobi de ca dxiiña’ ni runi ca hombre ca ya’?
«Autoridad ni maʼ gudixhe Jehová ndaaniʼ congregación» (Torre sti’ ni rapa, febrero de 2021)
Biiyaʼ xi cayuni caadxi Testigu para ganda guicaa ca hermanu de xquídxicaʼ publicación.
Biiyaʼ xiñee maʼ gadxé modo riquiiñeʼ organización stiʼ ca Testigu bueltu stiʼ.
«¿Ximodo riaxa dxiiñaʼ runi ca testigu stiʼ Jehová?» (Tema ni zeeda lu jw.org)
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
