1, 2. Xiñee nabé risaca uguʼnu gana xcaadxi binni.

CRISTINA, ti baʼdudxaapaʼ de 18 iza guníʼ: «Huaxiéʼ si biaje riguu bixhozeʼ ne jñaaʼ gana naa, gatigá riniʼcaʼ mal de naa. Nabé runiná stiidxacabe naa. Nácabe nahuateʼ, qué ziuu dxi guiziideʼ ne guizáʼ gorda naa. Nisi maʼ cayuunaʼ, qué racalaʼdxeʼ guinieniáʼ laacabe. Runeʼ sentir qué risacaʼ». ^[1] Ejemplu riʼ rusihuinni nabé nagana ribani binni ora qué riguucabe gana laa.

² Peru pa uguʼnu gana sti binni la? zacanenu laa. Ti hermanu láʼ Rubén guníʼ: «Ti dxi cucheecheniáʼ ti binnigola diidxaʼ, bidiibe cuenta cadi galán diʼ nuaaʼ dxi que. Gudxeʼ laabe xi cayuneʼ sentir, ne bihuinni rizaaláʼdxibe naa purtiʼ bicaadiágabe naa. Gúdxibe naa xi guiráʼ cosa galán maʼ huayuneʼ. Laaca bisietenaláʼdxibe naa guníʼ Jesús jma risácanu que stale gorrión. Rietenalaʼdxeʼ textu ca gatigá, ne rindaruʼ ni ndaaniʼ ladxiduáʼ. Nabé gucané ca diidxaʼ gudxi binnigola que naa» (Mateo 10:31).

3. a) Xii nga bisiene apóstol Pablo ora bizeeteʼ uguʼnu gana sti binni. b) Xi guendarinabadiidxaʼ zacábinu lu tema riʼ.

³ Biblia na naquiiñeʼ ugúʼsaanu gana laanu gatigá. Apóstol Pablo bicaa ca diidxaʼ riʼ ra nuu ca xpinni Cristu ni naca hebreu: «Yanna hermanu caʼ, laguuya gá laatu, cadi laca aca ladxidóʼ to  nadxabaʼ ne qué guni cre tu Dios ni nabani, pacaa zaxele tu de laa. Ni guni tu la? cada tobi ulidxe [o uguu gana] stobi irá dxi laga zanda». Pablo bisiene naquiiñeʼ uguusaanu gana laanu ti cadi gucheʼnu ne guni nga gaca ladxidoʼno naguidxi (Hebreos 3:12, 13). Pa guiníʼ íquenu pabiáʼ galán runi sentirnu ora uguu tuuxa gana laanu la? zánnanu nabé risaca nga uguʼnu gana xcaadxi binni. Lu tema riʼ zacábinu ca guendarinabadiidxaʼ zeeda raríʼ: Xi razón nápanu para uguʼnu gana xcaadxi binni. Ximodo zanda chinándanu ejemplu stiʼ Jiobá, Jesús ne Pablo ora uguʼnu gana ca binni ni nuu gaxha de laanu. Ne ximodo zanda uguʼnu gana xcaadxi binni.

4. a) Tuu nga cani caquiiñeʼ uguucabe gana laacaʼ. b) Xiñee jma stale binni qué riguu gana stobi.

⁴ Guiranu caquiiñeʼ chuʼ tu uguu gana laanu. Peru ca xcuidi nga cani jma caquiiñeʼ uguu bixhózecaʼ ne jñaacaʼ gana laacaʼ. Ti profesor bisiene «caquiiñeʼ chuʼ tu uguu gana [ca baʼduhuiiniʼ] cásica riquiiñeʼ guidaa nisa ñee ti yagahuiiniʼ». Laaca guniʼbe: «Ca baʼduhuiiniʼ ni riguucabe gana laacaʼ runi sentircaʼ risácacaʼ ne nadxiicabe laacaʼ». Peru cumu nabáninu ra «mayaca izaa xhi guidxilayú» riʼ la? stale binni ruyubi puru si para laa ne «qué [r]anaxhii ca binni» (2 Timoteo 3:1-5). Nga runi, stale binni qué riguu gana stobi. Nuu de cani napa xiiñiʼ qué riguucaʼ gana xiiñicaʼ purtiʼ qué ñuu dxi niguu bixhózecaʼ gana laacaʼ. Neca laaca caquiiñeʼ cani huaniisi uguucabe gana laacaʼ, guirutiʼ tu runi ni. Nga runi, stale tu riníʼ guirutiʼ riguu gana laa ra runi dxiiñaʼ.

5. Xi zanda gúninu para uguʼnu gana stobi.

⁵ Zanda gúninu stale cosa para uguʼnu gana xcaadxi binni. Casi gábinu laacabe galán bíʼnicabe xiixa o riuuláʼdxinu ca cualidad sicarú nápacabe. Laaca zanda quixhedxinu ladxidóʼcabe ora nuucabe triste ne ora maʼ qué gápacabe gana (1 Tesalonicenses 5:14). Cumu gatigá nga ridxaaganu ca hermanu stinu la? nápanu tiempu para uguʼnu gana laacaʼ né ca diidxaʼ ni guininu. Biblia ná: «Jma galán chuʼ chupa binni que tobi, purtiʼ ra gúnicabe dxiiñaʼ jma stale ni ribeendúcabe. Purtiʼ pa guiaba tobi de laacabe, stobi ca zanda guindisaʼ laabe. Peru, ximodo zie ni tuuxa ora nuu stubi ne guiaba yaʼ. Guirutiʼ tu zandisaʼ laa» (Eclesiastés 4:9, 10). Nga runi, guinabadiidxanu laca laanu: «Ñee rabeʼ stobi xiñee nadxieeʼ laa ne rusisacaʼ laa la? Ñee runeʼ ni cada biaje ganda guneʼ ni la?». Guietenaláʼdxinu ni ná Biblia: «Ti diidxaʼ ni guiníʼ tuuxa órapeʼ caquiiñeʼ ni, ¡nabé sicarú ni!» (Proverbios 15:23).

6. Xiñee racalaʼdxiʼ Binidxabaʼ cuee gana ca xpinni Dios. Bizeeteʼ ti ejemplu de modo bíʼnibe ni dxiqué.

⁶ Racalaʼdxiʼ Binidxabaʼ cuee gana cani cayuni ni ná Dios purtiʼ nánnabe zacá maʼ qué ziúʼpenu gaxha de Jiobá. Proverbios 24:10 ná pa qué gapuʼ gana ora nuuluʼ ra nagana la? «gastiʼ qué zanda guʼnuʼ». Gucalaʼdxiʼ Binidxabaʼ nibee gana Job dxi bininabe laa stale. Peru qué ñaca diʼ ni gudixhe íquebe purtiʼ Job qué nucheené Jiobá (Job 2:3; 22:3; 27:5). Laanu laaca zanda gudxíʼlunu Binidxabaʼ para cadi cueebe gana laanu. Pa qué gusaana de uguʼnu gana familia stinu ne ca hermanu de congregación, guiranu ziuʼnu nayecheʼ ne qué zusaana de gaca xhamígunu Jiobá.

7, 8. a) Ximodo huaguu Jiobá gana xcaadxi binni. b) Ximodo zanda chinanda cani napa xiiñiʼ ejemplu stiʼ Jiobá. (Biiyaʼ dibuju ni zeeda ra ruzulú tema riʼ).

⁷ Riuulaʼdxiʼ Jiobá uguu gana stobi. Ti hombre ni bicaa Biblia guníʼ: «Jiobá nuu gaxha de cani maʼ gucadé ladxidóʼ; ne rulabe cani maʼ biree gana» (Salmo 34:18). Dxi bidxibi profeta Jeremías ne maʼ qué ñapa gana, bidii stiidxaʼ Jiobá zacané laa (Jeremías 1:6-10). Laaca guluu Jiobá gana  profeta Daniel dxi maʼ nagola ora biseendaʼ ti ángel ra nuube. Ángel riʼ gudxi laabe nácabe ti hombre nabé risaca para Dios (Daniel 10:8, 11, 18, 19). Ñee zanda chinándanu ejemplu stiʼ Jiobá ne uguʼnu gana ca hermanu, dede né ca precursor ne ca hermanu ni maʼ huaniisi ni maʼ qué ganda guni biaʼ biʼniʼ dxiqué la?

⁸ Guyuu Jiobá ne Jesús guibáʼ stale iza juntu. Neca zaqué, gunna Jiobá zaquiiñeruʼ Xiiñiʼ chuʼ tu uguu gana laa laga nuu lu Guidxilayú. Ngue runi, chupa biaje guníʼ Jiobá dede guibáʼ: «Ndi nga Xiiñe ni nadxiee ne ni rusieche naa» (Mateo 3:17; 17:5). Guníʼ Jiobá ca diidxaʼ riʼ dxi bizulú Jesús bicheeche diidxaʼ ne últimu iza guyuu lu Guidxilayú. Nánnanu nabé guyuu Jesús gana ora binadiaga guníʼ Bixhoze nadxii laa ne ridxá tipa ladxidóʼ pur laabe. Ne gueelaʼ ante gátibe que laaca guluu Jiobá gana laabe. Cumu nabé nuu Jesús xizaa la? biseendaʼ Jiobá ti ángel para uguu gana laabe ne quixhedxí ladxidoʼbe (Lucas 22:43). Zanda chinanda cani napa xiiñiʼ ejemplu stiʼ Jiobá ora uguucaʼ gana xiiñicaʼ gatigá ne gábicaʼ laacabe galán bíʼnicabe xiixa cosa. Ne ora guidxaagalú xiiñicabe xiixa prueba ra scuela, rúnicabe stale stipa pur gacanécabe laacaʼ gaca fe sticaʼ naguidxi ne guni huantarcaʼ.

9. Xi rizíʼdinu pur modo biʼniʼ tratar Jesús ca apóstol stiʼ.

⁹ Laaca bisaanané Jesús laanu ti ejemplu galán ni zanda chinándanu. Gueelaʼ ante gátibe gudiibibe ñee ca apóstol stibe ne gúdxibe laacaʼ ni jma risaca nga cadi gudxiibaʼ binni laca laa. Peru cumu nabé rudxiibacaʼ laacaʼ la? gudinde diidxacaʼ purtiʼ nuucaʼ gánnacaʼ tu jma risaca ládecaʼ. Ne Pedro dede guníʼ qué ziuu dxi gusaana Jesús (Lucas 22:24, 33, 34). Neca zacá, qué ñuuyabe paraa cuchee ca apóstol que, sínuque biechenebe laacaʼ purtiʼ qué nusaanacaʼ laabe. Ne laaca bidii stiidxabe jma naroʼbaʼ dxiiñaʼ zúnicaʼ que ni bíʼnibe ne gúdxibe laacaʼ nadxii Jiobá laacaʼ (Lucas 22:28; Juan 14:12; 16:27). Guinabadiidxanu laca laanu: «Ñee zinandaʼ ejemplu stiʼ Jesús ne riguaaʼ gana binni pur ca cualidad sicarú sticaʼ la? o nisi cayuuyaʼ paraa cucheecaʼ.».

10, 11. Xi guiráʼ biʼniʼ Pablo para guluu gana ca hermanu.

¹⁰ Apóstol Pablo laaca gupa costumbre guiníʼ cosa galán de ca hermanu. Stale iza guzanebe chupa chonna de laacaʼ ne gunda binibiáʼ chaahuibe laacaʼ. Neca zacá, qué nucaabe paraa bicheecaʼ, sínuque guniʼbe ni galán de laacaʼ. Casi Timoteo la? gúdxibe laa: «Xiiñe ni nadxiee ni nabani casi na Señor», ne gúpabe confianza zapa ca hermanu que (1 Corintios 4:17; Filipenses 2:19, 20). Gudxi Pablo ca xpinni Cristu de guidxi Corinto Tito nga xcompañérube ni runinebe dxiiñaʼ para gacanécabe laacaʼ (2 Corintios 8:23). Nánnanu nabé guyuu Timoteo ne Tito gana ora gúnnacaʼ xi riníʼ ique Pablo de laacaʼ.

¹¹ Dede guyuu Pablo ne Bernabé dispuestu uguucaʼ xquendanabánicaʼ ra naxoo pur uguucaʼ gana ca hermanu. Guzéʼtenu ti ejemplu, nánnacabe nuu stale binni de Listra guuti laacabe. Neca zaqué, biguétacabe raqué para uguucabe gana cani nacubi guca discípulo ne gacanécabe laacaʼ cadi gusaanacaʼ Jiobá (Hechos 14:19-22). Despué, laaca guyuu xquendanabani Pablo ra naxoo ndaaniʼ guidxi Éfeso dxi guzananda ti grupu de binni ni cadxiichi laa, peru biaanabe raqué biaʼ tiempu ni caquiiñeʼ para uguube gana ca hermanu que. Biblia ná: «Yanna, guyuudxí si ca binni que, biseendacaa Pablo ca discípulo que, guluube gana laacaʼ ne gúdxibe laacaʼ maʼ chebe, oraqueruʼ zebe Macedonia. Despué de gudíʼdibe guiráʼ guidxi nuu nezaqué, ne de guluube gana né stale diidxaʼ ca binni de raqué, yendabe Grecia» (Hechos 20:1, 2, TNM).

12. Xiñee galán chuunu guiráʼ guendaridagulisaa.

¹² Jiobá racalaʼdxiʼ ni jma galán para laanu. Nga runi, rábibe laanu cadi guiáʼdxanu ca guendaridagulisaa ca. Lúcani rizíʼdinu de Dios ne rigúʼsaanu gana laanu (1 Corintios 14:31; biindaʼ Hebreos 10:24, 25). Guidúʼyanu xi guníʼ Cristina, baʼdudxaapaʼ ni bizéʼtenu lu primé párrafo que: «Ni jma riuuladxeʼ ora riaaʼ ca guendaridagulisaa ca nga modo nadxii ca hermanu naa ne modo riguucaʼ gana naa. Nuu biaje, nabé triste rindayaʼ ra Yoo stiʼ Reinu. Óraque ridxiña ca hermana naa, riguiidxicaʼ naa ne rábicaʼ naa galán modo rihuinneʼ. Laaca rábicabe naa nadxiicabe naa ne nayecheʼ nuucabe purtiʼ cayuuyacabe pabiáʼ caziideʼ de stiidxaʼ Dios. Pur guiráʼ ni rábicabe naa guizáʼ galán runeʼ sentir». ¡Nabé risaca nga ugúʼsaanu gana laanu! (Romanos 1:11, 12).

13. Xiñee caquiiñeʼ ca hermanu ni maʼ xadxí de cayuni ni ná Jiobá uguucabe gana laacaʼ.

¹³ Ca hermanu ni maʼ xadxí cayúnicaʼ ni ná Jiobá laaca caquiiñeʼ uguucabe gana laacaʼ. Guiníʼ íquenu ni bizaaca Josué. Gulí Jiobá laabe para sanírube nezalú ca israelita dxi mayaca chúʼcabe lu layú bidii stiidxaʼ Dios gudii laacabe. Neca maʼ xadxí de cayuni Josué ni ná Jiobá, gudxi Jiobá Moisés: «Biʼniʼ mandar Josué ne guluu gana laa ne bidii stipa laa, purtiʼ laa nga zazaniruʼ lu guidxi riʼ ne laa nga ni zacané laacabe chúʼcabe lu layú ni chiguuyaluʼ» (Deuteronomio 3:27, 28). Biquiiñeʼ Josué uguucabe gana laa purtiʼ stale biaje zadinde guidxi Israel ne ziuu biaje zuníticabe neca tobi (Josué 7:1-9). Ca dxi riʼ, laaca caquiiñeʼ ca binnigola ne ca superintendente de circuito uguʼnu gana laacaʼ. Xiñee yaʼ. Purtiʼ laacabe rúnicabe stale stipa pur gápacabe xquidxi Dios (biindaʼ 1 Tesalonicenses 5:12, 13). Ti superintendente de circuito guníʼ: «Nuu biaje, rudii ca hermanu laadu ti carta ra cudiicaʼ xquíxepeʼ laadu ne nacaʼ guizáʼ guyuuláʼdxicaʼ visita stidu. Naguu chaahuidu ca carta riʼ, ne ora maʼ nuudu triste ridúʼndadu cani. Nabé riguucani gana laadu».

14. Xi ejemplu rusihuinni galán uguʼnu gana xcaadxi binni ora gudiʼnu conseju laacaʼ.

¹⁴ Ti biaje, bidii apóstol Pablo conseju ca xpinni Cristu de guidxi Corinto. Ora yenándacabe ni ná ca conseju que, gudxi Pablo laacabe galán ni bíʼnicabe (2 Corintios 7:8-11). Nánnanu guluu ca diidxaʼ guníʼ Pablo que gana laacabe para cadi gusaana de gúnicabe ni jneza. Yanna riʼ, ca binnigola ne cani napa xiiñiʼ zanda chinándacaʼ ejemplu stiʼ Pablo. Ti hombre láʼ Andreas ni napa chupa xiiñiʼ, guníʼ xiñee galán uguu binni gana stobi. Laabe nabe: «Uguʼnu gana ca xiiñinu racané ni laacabe guiniisicabe en sentidu espiritual ne chúʼcabe nayecheʼ, ne racané ni laacabe cadi gusiaandacabe ca conseju ni guicaacabe. Neca nánnacabe xii nga ni  jneza, ziaacabe gúnicabe ni pa gatigá gábinu laacabe galán rúnicabe ni».

15. Bizeeteʼ ti modo zanda uguʼnu gana ca hermanu.

¹⁵ Gábinu ca hermanu rusisácanu stipa ni rúnicaʼ ne ca cualidad sicarú nápacaʼ (2 Crónicas 16:9; Job 1:8). Pa gúninu zacá, zinándanu ejemplu stiʼ Jiobá ne Jesús. Laacaʼ rusisácacaʼ guiráʼ ni rúninu pur laacaʼ, neca qué zanda gúninu guiráʼ ni ñacaláʼdxinu (biindaʼ Lucas 21:1-4 ne 2 Corintios 8:12). Casi ca hermanu ni maʼ nagola rúnicaʼ stale stipa pur checaʼ guendaridagulisaa ne chigucheechecaʼ diidxaʼ gatigá. Ñee riguʼnu gana laacabe ne rábinu laacabe galán guiráʼ ni rúnicabe la?

16. Pora nga zanda uguʼnu gana xcaadxi binni.

¹⁶ Uguʼnu gana xcaadxi binni cada ganda gúninu ni. Pa guidúʼyanu guni tuuxa xiixa cosa galán, gábinu laabe biaʼsi modo bíʼnibe ni. Dxi guyuu Pablo ne Bernabé Antioquía de Pisidia, ca xaíque yuʼduʼ ni nuu guidxi que guniʼcaʼ: «Bíchecaʼ, pa nápatu xiixa diidxaʼ ni uguu gana guidxi ca la? laguiníʼ ni» (Hechos 13:15, TNM). Bizuluca Pablo guluu gana cani nuu raqué (Hechos 13:13-16, 42-44). Pa uguʼnu gana xcaadxi binni la? zándaca laaca zaguucabe gana laanu (Lucas 6:38).

17. Ximodo nga jma galán uguʼnu gana xcaadxi binni.

¹⁷ Gábinu laabe xi pur caguʼnu gana laabe. Ora guluu Jesús gana ca xpinni Cristu de Tiatira, bizeetebe xipeʼ nga ca cosa galán cayúnicaʼ (biindaʼ Apocalipsis 2:18, 19). Ximodo zanda chinándanu ejemplu stiʼ Jesús yaʼ. Zúninu ni ora gábinu ti hermana ni cusiniisi ca xiiñiʼ stubi rusisácanu stipa ni cayuni. O pa nápanu xiiñinu zanda gusisácanu laacaʼ pur guiráʼ ni cayúnicaʼ lu xhiiñaʼ Jiobá. Ne cadi guiaandaʼ laanu gábinu laacabe ca cosa galán ni ridúʼyanu de laacabe. Pa guininu nipeʼ caquiiñeʼ para uguʼnu gana laacabe la? zudiicabe cuenta cayúninu ni de guidubi ladxidoʼno.

18, 19. Ximodo zanda gacanenu sti binni para cadi gusaana de gaca xhamigu Jiobá.

¹⁸ Gudxi Jiobá Moisés uguu gana Josué ne gudii stipa laabe. Dxandíʼ, ca dxi riʼ qué zaniʼné Jiobá laanu para gabi laanu uguʼnu gana tuuxa. Peru riéchebe ora gúʼyabe rúninu stipa pur gúninu ni (Proverbios 19:17; Hebreos 12:12). Casi ora gudii ti hermanu ti libana ndaaniʼ congregación, zanda gábinu laabe xiñee guyuuláʼdxinu libana stibe. Zándaca gucané ni guniʼbe que laanu gánnanu ximodo gudxíʼlunu xiixa guendanagana. O zándaca gucané ni laanu guiénenu ti versículo stiʼ Biblia. Guidúʼyanu xi biʼniʼ ti hermana. Bicaadiágasibe discursu stiʼ ti hermanu, bidiibe xquíxepeʼ laa ne despué bicaabe ti nota para laa. Luni bidii hermana riʼ xquíxepeʼ laabe purtiʼ biʼniʼ sentir casi ora biiyabe yuubaʼ nuu ndaaniʼ ladxidóʼ ne pur guluube gana laa ne biquídxibe fe stiʼ, neca ti ratu si guniʼné laabe. Laaca bidii hermana que xquíxepeʼ laabe pur bidiibe libana stibe né stale guendarannaxhii ne pur guníʼnebe laa né diidxaʼ nadóʼ. Gudxi hermana que laabe beeda gaca ca diidxaʼ stibe casi ti regalu ni beeda de Jiobá.

¹⁹ Guiranu zanda gacanenu xcaadxi binni para cadi gusaana de gaca xhamígucaʼ Jiobá. Ximodo yaʼ. Ra chinándanu conseju stiʼ Pablo: «Laquixhedxisaa ladxidoʼto cásica cayúnitu ni ne cada tobi guyubi guzuhuaa chaahuiʼ stobi» (1 Tesalonicenses 5:11). Pa guiráʼ dxi ugúʼsaanu gana laanu la? nabé zusiéchenu Jiobá.