ZÁNDACA runibiaʼluʼ tuuxa hermanu o hermana ni huayé sti guidxi ra jma caquiiñeʼ tu gucheeche stiidxaʼ Reinu, ne zándaca gunabadiidxaluʼ: «Xiñee rúnicabe ni yaʼ. Ximodo riuucabe listu para chécabe sti guidxi yaʼ. Ñee ñanda ñuneʼ ni la?». Para gánnanu cani la? naquiiñeʼ guinabadiidxanu laacabe. Guidúʼyanu xi gábicabe laanu.

Xiñee gudixhe íquecabe chécabe sti guidxi ra jma caquiiñeʼ tu gucheeche diidxaʼ yaʼ. Amy, ti hermana de Estados Unidos ni napa biaʼ 35 iza, guníʼ: «Maʼ napa iza nga de guníʼ iqueʼ chaaʼ sti guidxi, peru raqueca nuaaʼ rabeʼ qué zanda guneʼ ni». Xiñee bichaabe modo riníʼ íquebe yaʼ. «Lu iza 2004, biʼniʼ invitar ti guendaxheelaʼ naa chigannaʼ laacaʼ ti beeu ne guneniáʼ laacaʼ dxiiñaʼ de precursor. Bineʼ ni ne guizáʼ guyuuladxeʼ modo bicheechedu diidxaʼ. Despué de ti iza guyaaʼ de precursora ndaaniʼ guidxi Ghana».

Stephanie, ti baʼdudxaapaʼ de 30 iza, laaca de Estados Unidos laa, guníʼ íquebe ximodo nuube ne guniʼbe: «Cadi huarayadiáʼ ne qué gapaʼ familia para guneʼ tender. Ni dxandíʼ nga zanda guneʼ jma lu xhiiñaʼ Jiobá». Cumu biiyabe zanda chebe la? gudixhe íquebe gúnibe jma lu xhiiñaʼ Jiobá ndaaniʼ guidxi Ghana. Ida ne Filip ti guendaxheelaʼ danés de 60 iza. Nabé gúpacaʼ gana checaʼ ti lugar ra jma caquiiñeʼ tu gucheeche diidxaʼ, ne biyúbicabe modo gúnicabe ni. Filip na: «Ora guyuu ti lugar para chuudu, casi ora Jiobá ngue cayabi laadu: “¡Maʼ zanda chetu!”. Lu iza 2008, guyécabe Ghana, ne jma de chonna iza guyuucabe raqué.

Hans ne Brook nga ti guendaxheelaʼ ni napa jma de 30 iza de nácacaʼ precursor Estados Unidos. Lu iza 2005, gucanécabe ra gudiʼdiʼ huracán  Katrina. Despué bichácabe solicitud stícabe para chécabe de voluntariu lu construcción internacional, peru qué ñuni invitárcabe laacaʼ. Hans na: «Ti hermanu ni cudii libana lu ti asamblea guníʼ, ora gúdxicabe rey David cadi laa gucuí yuʼduʼ que, biyubi ca sti cosa ni zanda guni. Ni guníʼ hermanu que gucané ni laadu gánnadu jma galán nga guyúbidu xiruʼ zanda gúnidu lu xhiiñaʼ Jiobá» (1 Crónicas 17:1-4, 11, 12; 22:5-11). Brook na: «Jiobá racalaʼdxiʼ quixhe íquedu gúnidu sti dxiiñaʼ».

Ora binadiágacabe ca experiencia galán stiʼ chupa chonna de ca xhamígucabe ni cayacané sti guidxi la? guluu ni gana laacabe chécabe de precursor sti guidxi. Lu iza 2012, yendézacabe Ghana guyuucabe raqué tapa beeu ndaaniʼ ti congregación de seña. Neca bibiguétacabe Estados Unidos, experiencia ni gúpacabe raqué bicaa ni laacabe quíxhecabe Reinu stiʼ Dios primé lu xquendanabánicabe. Despué yegacanécabe ra cabí ti sucursal ndaaniʼ guidxi Micronesia.

Ximodo guyuucabe listu para chigacanécabe ra jma caquiiñeʼ tu gucheeche diidxaʼ yaʼ. Stephanie guníʼ: «Ndaaniʼ ca torre stiʼ ni rapa biyubeʼ tema ni caníʼ de laani. * Ne laaca gudxeʼ ca ancianu de congregación stinneʼ ne superintendente de circuito ne xheelaʼ xi cá iqueʼ guneʼ. Peru ni jma gucané naa nga bizeeteʼ ni lu ca oración stinneʼ». Laaca gúnnabe gápabe ni guibaninésibe, gucané ndiʼ laabe cuʼ chaahuibe ti ndaa bueltu para gacané laabe ora chebe sti guidxi.

Hans guníʼ: «Gunábadu gacané Jiobá laadu purtiʼ racaláʼdxidu chuudu ti lugar ra jma zanda iquiiñebe laadu. Laaca gúdxidu laabe padxí cá íquedu chuudu». Biseendaʼ guendaxheelaʼ riʼ carta ra nuu tapa sucursal. Ne bicabi sucursal ni nuu ndaaniʼ  guidxi Ghana laacabe. Ngue runi, guyécabe raqué para guiaanacabe chupa beeu. Hans na: «Nabé galán guyuʼdu ndaaniʼ congregación que, ngue runi biaanadu jma tiempu raqué».

George ne Adria, ti guendaxheelaʼ de Canadá nápacaʼ biaʼ 40 iza, nánnacabe riguu ndaayaʼ Jiobá ca cosa galán quixhe ique binni guni, ne cadi ora riníʼ si xi racalaʼdxiʼ guni. Ngue runi bizulú bíʼnicabe xiixa para ugaandacabe ni gudixhe íquecabe. Guniʼnécabe ti hermana ni maca nuu raqué ne gunabadiidxacabe laa stale cosa. Ne laaca bicaacabe carta ra nuu sucursal ni nuu Canadá ne Ghana. Adria guníʼ: «Laaca biiyadu ximodo gápadu ni iquiiñesidu lu xquendanabánidu». Guiráʼ ndiʼ gucané laacabe chindézacabe Ghana lu iza 2004.

Xi guendanagana bidxaagalube dxi guyebe sti guidxi, ne ximodo bidxiilube ni yaʼ. Primé guendanagana gupa Amy nga bibanaʼ binnilidxi. Laabe nabe: «Guizáʼ maʼ gadxé guiráʼ cosa raqué». Xi gucané laabe yaʼ. «Riniʼné familia stinneʼ naa ne rábicaʼ naa nabé rusisácacaʼ ni cayuneʼ que. Ngue rusietenalaʼdxiʼ naa xiñee nuaaʼ raqué. Despué, maʼ gunda gunieniáʼ laacabe lu videoconferencia. Cumu maʼ randa ruuyaʼ laacabe la? runeʼ sentir nuaaʼ gaxha de laacabe». Guca xhamiga Amy ti hermana ni maʼ huaniisi de raqué, ne laa gucané laabe guiénebe ca costumbre ni napa ca binni que. «Ra nuu hermana que nga riaaʼ ora qué guieneʼ xiiñeʼ runi ca binni que xiixa  cosa. Pur hermana riʼ biziideʼ xi naquiiñeʼ guneʼ ne xi cadi naquiiñeʼ guneʼ. Ngue gucané naa guneʼ ni na Jiobá ne guendanayecheʼ».

George ne Adria nacaʼ ora guyecaʼ Ghana primé biaje biʼniʼ sentircaʼ casi ora nibiguetaʼ nibánicaʼ tiempu yooxhoʼ. Adria na: «Cumu qué gápadu lavadora la? ndaaniʼ ti cubeta riguiibidu lari. Ora rúnidu guendaró nabé rindaadu. Peru ra zidiʼdiʼ tiempu, biiyadu guiráʼ cani guca nagana para laadu que casi ti experiencia nacubi lu xquendanabánidu». Brook na: «Neca riuu guendanagana, peru gaca binni precursor la? aque rusiecheʼ ni tobi. Guiráʼ ca experiencia galán ni gúpadu zeeda gaca cani casi ti álbum sicarú ni naguu chaahuidu né stale guendarannaxhii».

Xiñee galán gúninu ni na Jiobá zacá yaʼ. Stephanie na: «Nabé riecheʼ gucheecheʼ diidxaʼ lu ti territorio ra nuu binni ni napa gana guiziidiʼ ni dxandíʼ de Dios ne guʼndanécabe laacaʼ Biblia guiráʼ dxi. Chaaʼ ra jma caquiiñeʼ tu gucheeche diidxaʼ nga nga tobi de cosa ni jma galán gudixheʼ iqueʼ guneʼ lu xquendanabaneʼ». Bichaganabe Aaron lu iza 2014, ne yanna cayúnicabe dxiiñaʼ ndaaniʼ sucursal ni nuu Ghana.

Christine, ti precursora de Alemania ni napa jma de 30 iza guníʼ: «Nabé sicarú experiencia riʼ». Bolivia nga guyuube ante chebe Ghana. Laabe nabe: «Ora maʼ nuaaʼ zitu de familia stinneʼ jma ruyubeʼ gacané Jiobá naa. Runeʼ sentir nuaaʼ jma gaxha de laabe. Nabé ridxagayaaʼ modo tobi si nuu xquidxi Jiobá ne nadxiisaacaʼ. Guneʼ ni na Jiobá zacá rusiecheʼ ni xquendanabaneʼ». Cadi xadxí, bichaganáʼ Christine Gideon, ne guirópacabe nuurúcabe ndaaniʼ guidxi Ghana.

Ida ne Filip guniʼcaʼ xi bíʼnicaʼ para gunda gucanecaʼ ca binni ni rusiidicaʼ de Biblia para guiniisicaʼ lu stiidxaʼ Dios: «Dxiqué rusíʼdidu jma de 15 binni de Biblia, peru despué maʼ gúpadu 10 si. Zaqué jma jneza modo bisíʼdidu laacabe». Ñee huabeendú ca binni ni ruundanécabe de Biblia riʼ xiixa ni galán la? Filip na: «Rigannaʼ ti hombrehuiiniʼ láʼ Michael. Ruundaniáʼ laabe Biblia guiráʼ dxi. Nabé galán modo raca prepararbe, ngue runi lu ti beeu si bilúxedu libru Xipeʼ ndiʼ cusiidiʼ Biblia. Despué beeda gácabe tobi de cani rucheeche diidxaʼ ni caʼruʼ chúʼnisa. Primé dxi yegucheechebe diidxaʼ la? gunabadiidxabe naa: “Ñee zanda gacaneluʼ naa né ca estudiante stinneʼ la?”. De bidxagayaa biiyadxiéʼ laabe. Gúdxibe naa maʼ bizulú cayuundanebe chonna binni de Biblia ne caquiiñeʼ gacaniáʼ laabe para gaca cani». Caquiiñeʼ stale hermanu para guʼndané binni de Biblia, nga runi dede ca estudiante ca mápeca ruundanecaʼ binni.

Nagueenda bidii Amy cuenta pabiáʼ caquiiñeʼ tu gucheeche diidxaʼ ndaaniʼ guidxi que. Laabe guniʼbe: «Cadi xadxí de yendadu Ghana, bicheechedu diidxaʼ ndaaniʼ ti guidxihuiiniʼ ne biyúbidu binni ni qué runadiaga. Ndaaniʼ guidxihuiiniʼ que bidxéladu xhono de laacabe». Ca dxi que bichaganáʼ Amy Eric. Guirópacabe nácacabe precursor especial ndaaniʼ ti congregación de seña. Ndaaniʼ guidxi Ghana, nuu jma de chonna gayuaa binni qué runadiaga ni riuulaʼdxiʼ guiziidiʼ de Jiobá ne nuu de laacaʼ maʼ nácacaʼ publicador. Pur nuu George ne Adria raqué maʼ nánnacaʼ ximodo nga xhiiñaʼ ti misioneru. Nga runi, nabé biéchecabe ora gucuaacabe ti invitación para chécabe clase 126 stiʼ Escuela de Galaad. Yanna riʼ, nácacabe misioneru ndaaniʼ guidxi Mozambique.

Ora gúʼyanu stale hermanu maʼ zecaʼ sti guidxi para gucheechecaʼ diidxaʼ né ca hermanu de raqué la? nabé rusiecheʼ ni laanu (Juan 4:35). Biaʼ 120 binni riuunisa cada semana ndaaniʼ guidxi Ghana. Cásica ca 17 hermanu ni guyé guidxi que para gucheechecaʼ diidxaʼ, guyecaʼ purtiʼ nadxiicaʼ Jiobá. Ngaca nga ni rucaa mil de cani rucheeche diidxaʼ ni nuu lu guidubi Guidxilayú checaʼ sti guidxi ra jma caquiiñeʼ tu gucheeche stiidxaʼ Reinu para gacanecaʼ ne rúnicaʼ ni de guidubi ladxidoʼcaʼ. Guizáʼ rusiéchecabe ladxidóʼ Jiobá (Salmo 110:3; Proverbios 27:11).