1. Xiñee naquiiñeʼ guiduʼyaʼ chaahuinu xi tiempu ndiʼ nabáninu ne xi guiráʼ cazaaca lu Guidxilayú. Bizeeteʼ ti ejemplu (biiyaʼ foto ni zeeda ra ruzulú tema riʼ).

GUXUÍʼLUNU mayaca guzulú ti asamblea. Maʼ gudxiʼbaʼ presidente que lu plataforma ne cayábibe ca binni nuu raqué galanpeʼ maʼ bedandacaʼ. Maʼ chiguzulú xhidxi caadxi saa stiʼ ca diidxaʼ riuundaʼ. Nanna cani nuu raqué maʼ naquiiñeʼ cuicaʼ. Racaláʼdxicabe gucaadiágacabe ca saa sicarú que ne rápacabe gana gucaadiágacabe ca discursu chitiidiʼ. Peru nuu tu cadi cucaadiaga ni caníʼ presidente que o cadi cudiicaʼ cuenta pa maʼ bizulú caxidxi saa stiʼ ca diidxaʼ riuundaʼ. Cumu cadi cucaadiágacabe la? cadi cudiicabe cuenta pa maʼ bizulú asamblea que, nga runi, canazarúcabe ne cayuíʼrucabe diidxaʼ né ca xhamígucabe. Ejemplu riʼ cusihuinni xi zanda guizaacanu pa qué gudiʼnu cuenta xi tiempu ndiʼ nabézanu o xi guiráʼ cazaaca lu Guidxilayú. Nabé risaca ni rusiidiʼ ni laanu, purtiʼ mayaca chigaca sti cosa ni jma naroʼbaʼ, ne naquiiñeʼ chuʼnu listu. Xii ndiʼ chigaca yaʼ.

2. Xiñee gudixhená Jesús ca discípulo stiʼ.

² Jesucristu gudixhená ca discípulo stiʼ ne gudxi laacabe chúʼcabe listu dxi mayaca «iluxe guidx[i]layú riʼ». Gúdxibe laacaʼ: «Lachuu listu ne lagataná. Lainíʼ né Dios purti qué ganna tu padxí ganda ora guendaʼ». Ne óraque bibiguetaʼ gúdxibe  laacaʼ stale biaje: «chuʼ[caʼ] listu» (Mateo 24:3; biindaʼ Marcos 13:32-37). Lu libru stiʼ Mateo laaca rusihuinni chupa chonna biaje gúdxibe ca discípulo stibe zacá. Gúdxibe laacaʼ: «Lagataná purti qué ganna tu pora gueeda Señor stitu». Óraque guniʼbe: «Naquiiñe gataná tu. Pacaa mala zuhuaa Hombre Biseenda Dios guʼya tu». Ne guniʼbe sti biaje: «Naquiiñe gataná tu purti qué ganna tu padxí nin pora ibigueta Hombre Biseenda Dios» (Mateo 24:42-44; 25:13).

3. Xiñee naquiiñeʼ gucaʼdiáganu ni cayabi Jesús laanu para gatananu.

³ Ca testigu stiʼ Jiobá cayúninu cani guníʼ Jesús para gatananu. Xiñee yaʼ. Purtiʼ nánnanu nabézanu «lu ca últimu dxi» ne maʼ gastiʼ cayaadxaʼ para guzulú ca dxi «nabé naná» que, o gran tribulación (Daniel 12:4; Mateo 24:21). Casi maca guníʼ Jesús que, lu guidubi Guidxilayú cucheeche xquidxi Jiobá stiidxaʼ Reinu. Ne casi maca guníʼ Jesús, zeʼ dxi jma nuu guerra, guendahuará, xu, guendarindaana, cayaca cosa malu ndaaniʼ stale guidxi ne cadinde binni. Ne ca dxi riʼ, ca xaíque yuʼduʼ nabé riguítecaʼ binni (Mateo 24:7, 11, 12, 14; Lucas 21:11). Guizáʼ maʼ racaláʼdxinu gueeda Jesús ne guni guiráʼ ni naguixhe Bixhoze gaca (Marcos 13:26, 27).

4. a) Xiñee runi crenu maʼ nanna Jesús pora gueeda Armagedón. b) Neca qué gánnanu pora guzulú gran tribulación, xi nanna dxíchinu zaca.

⁴ Laanu nánnanu pora chiguzulú asamblea. Peru ni qué gánnanu nga pora guzulú gran tribulación. Jesús guníʼ: «Peru padxí ne pora la? iruti ganna, nin ca ángel ni nuu ibáʼ, dede nin naa qué gannaʼ sínuque Bixhoze siaʼ nga nanna» (Mateo 24:36). Cumu Jesús nga ni zaniruʼ lu Armagedón que la? zanda guni crenu maʼ nánnabe padxí guzulú guerra ca (Apocalipsis 19:11-16). Peru laanu dede yanna qué gánnanu padxí nin pora gueeda fin. Nga runi nabé risaca nga gatananu. Jiobá maʼ naguixhe pora nga guzulú gran tribulación. Ne zeʼ dxi jma gaxha nuu ni, qué zandaa ni. Biblia na: «Caʼruʼ diʼ guidxiña dxi nexheʼ gaca ni bihuinni lu visión que, peru cahuinni pabiáʼ nagueenda zedadxiña dxi gaca ni, ne dxandíʼ zaca ni. Neca guindaa ni la? ¡gulézaruʼ ni! Purtiʼ dxandíʼ zedandá dxi gaca ni. ¡Qué zandaa ni!» (Habacuc 2:3). Xiñee nanna dxíchinu zacá ni yaʼ.

5. Bidii ti ejemplu ni cusihuinni raca cumplir ca profecía stiʼ Jiobá dxi maʼ gudíxhebe gaca cani.

⁵ Guiráʼ profecía ni riníʼ Jiobá raca cumplir cani órapeʼ naquiiñeʼ gaca cani. Guiníʼ íquenu de dxi biree ca israelita de Egipto. Bizaaca ni 14 de beeu nisán iza 1513 ante de ca dxi stiʼ Jesús. Despué, bicaa Moisés bilá Jiobá laacaʼ «dxi que» ra bizaa «tapa gayuaa treinta iza» (Éxodo 12:40-42). Bizulú bigabaʼ 430 iza riʼ lu 14 de nisán iza 1943 ante de ca dxi stiʼ Jesús, dxi ca nga bizulú guca cumplir promesa biʼniʼ Jiobá Abrahán para cuʼ ndaayaʼ descendencia stibe (Gálatas 3:17, 18). Gudiʼdiʼ si tiempu, gudxi Jiobá Abrahán zabeza ca descendencia stibe ndaaniʼ xcaadxi guidxi, zácacabe esclavu ne zuniná binni laacabe «tapa gayuaa iza» (Génesis 15:13; Hechos 7:6). Tapa gayuaa iza ca bizulú cani lu iza 1913 ante de ca dxi stiʼ Jesús, dxi bizulú Ismael biʼniʼ burla Isaac. Ne bizaa ca dxi ca dxi gulee Jiobá ca israelita de esclavu Egipto (Génesis 21:8-10; Gálatas 4:22-29). Lu ejemplu ca ridúʼyanu gayuaa iza ante maca gudixhe Jiobá xi dxipeʼ nga cuee xquidxi de esclavu.

6. Xiñee nanna dxíchinu zulá Jiobá xquidxi.

 ⁶ Josué nga tobi de ca binni ni biree de Egipto. Gudiʼdiʼ stale iza para bisietenaláʼdxibe ca israelita ca diidxaʼ riʼ: «Laatu nanna dxíchitu de guidubi ladxidoʼto ne guidubi xhiálmatu huayaca cumplir guiráʼ promesa huayuni Jiobá, Dios stitu, laatu. Maʼ guca guiráʼ cani para laatu. Nin tobi de laacani qué huayaana sin gaca cumplir» (Josué 23:2, 14). Maʼ bidii stiidxaʼ Jiobá zulá ca xpinni lu gran tribulación ne zudii laacabe ti guendanabani ni qué zaluxe ndaaniʼ guidxilayú cubi. Nanna dxíchinu zanda guni cumplirbe promesa cayúnibe laanu. Nga runi, pa racaláʼdxinu cuézanu ndaaniʼ guidxilayú cubi la? naquiiñeʼ gatananu.

7, 8. a) Xi guiráʼ naquiiñeʼ guni ca hombre ni gupa xquidxi dxiqué, ne xi rusiidiʼ ejemplu stícabe laanu. b) Xi zándaca guizaaca pa gasi ca hombre ni cayapa que. Bidii ti ejemplu.

⁷ Guidúʼyanu xi rizíʼdinu de ejemplu stiʼ ca hombre ni gupa ca guidxi que tiempu que. Casi guidxi Jerusalén ne xcaadxi guidxi gúpacaʼ barda nasoo ti cadi chuʼ ca xhenemígucaʼ ndaaniʼ cani. Ca hombre ni rapa que ruzuhuaacaʼ lu barda que, para ganda gúʼyacaʼ guiráʼ ladu. Ne nuu xcaadxi hombre cayápacaʼ ra puertaʼ stiʼ guidxi que. Guirácabe naquiiñeʼ gatanácabe ridxíʼ ne huaxhinni. Ne ora gúʼyacabe zeeda ca xhenemígucabe, napa xidé quixhenácabe ca binni xquídxicabe (Isaías 62:6). Nánnacabe naquiiñeʼ gatanácabe ti gúʼyacabe xi cayaca. Purtiʼ pa qué gúnicabe ni la? zanda gatiʼ stale binni (Ezequiel 33:6).

⁸ Lu iza 70 despué de ca dxi stiʼ Jesús, gunda guyuu ca soldadu romanu ndaaniʼ guidxi Jerusalén. Ximodo bíʼnicabe yaʼ. Josefo, ti historiador judíu, na gunda guyuu ca soldadu que purtiʼ gusi caadxi de ca hombre ni cayapa tobi de ca puertaʼ stini. Ngue runi bicaa guí ca romanu yuʼduʼ que ne binduuxecaʼ guidxi que. Dxi ca nga biluxe tribulación o guendanagana jma naroʼbaʼ gupa ca judíu.

9. Xi qué ganna stale binni.

⁹ Yanna riʼ, stale gobiernu ruseendaʼ soldadu ra dxaaga xquidxi né sti guidxi ne riquiiñecaʼ tecnología ni jma nacubi para gápacaʼ xquídxicaʼ. Zacá rúnicabe ti cadi chuʼ tuuxa o xiixa ni guniná laacabe. Peru ca gobiernu riʼ que rudiicaʼ cuenta nuu ti gobiernu guibáʼ ni jma napa poder ne ni chiguni mandar lu ni nga Jesucristu. Maʼ cadi candaa, zadindené gobiernu riʼ guiráʼ ca gobiernu ni nuu lu Guidxilayú (Isaías 9:6, 7; 56:10; Daniel 2:44). Racaláʼdxinu guedandá dxi ca ne racaláʼdxinu chuʼnu listu ora guedandá ni. Nga runi cadúʼyanu ximodo cayaca cumplir ca profecía zeeda lu Biblia ne cadi cusaana de gúninu ni na Jiobá (Salmo 130:6).

10, 11. a) Xidé naquiiñeʼ chuʼnu cuidadu, ne xiñee. b) Xiñee runi crenu Binidxabaʼ nga cadi cudii lugar gulabi binni ca profecía ni zeeda lu Biblia.

¹⁰ Guxuíʼlunu ti hombre ni gutaná guidubi gueelaʼ purtiʼ gupa xquidxi. Ante guirá gueelaʼ, ra maʼ zilúxebe turnu stibe, guizáʼ maʼ bidxágabe, óraca nga jma nagana para laabe gatanabe. Zacaca nga nuunu, purtiʼ nabáninu lu ca últimu dxi stiʼ guidxilayú malu riʼ. Nga runi naquiiñeʼ chuʼnu cuidadu ti ganda gatananu. Purtiʼ laga jma zedadxiña fin ca, jma nagana zaca para laanu gatananu. Guizáʼ triste ñaca pa yánnapeʼ nicá bacaandaʼ laanu. Guidúʼyanu chonna cosa ni zanda gucaa laanu gusaana de gatananu.

 ¹¹ Riguite Binidxabaʼ binni. Caadxi dxi ante gatiʼ Jesús, chonna biaje bisietenaláʼdxibe ca discípulo stibe Binidxabaʼ nga «xaíque sti guidxilayú riʼ» (Juan 12:31; 14:30; 16:11). Binidxabaʼ riquiiñeʼ ca religión ni qué rusiidiʼ ni dxandíʼ ca para quite binni. Nga runi stale binni qué rulabi ca profecía zeeda lu Biblia ni cusihuinni maʼ cadi candaa zanitilú guidxilayú malu riʼ (Sofonías 1:14). Rihuinni dxíchica «rusicahui binidxaba xquenda biaani» ca binni ca (2 Corintios 4:3-6). Nga runi, stale binni qué riná gucaadiaga laanu ora racaláʼdxinu gábinu laacaʼ maʼ gaxha nuu fin ne maʼ cayuni mandar Cristu. Stale biaje rábicabe laanu qué gápacabe tiempu.

12. Xiñee cadi naquiiñeʼ gudiʼnu lugar quite Binidxabaʼ laanu.

¹² Stale binni qué rizaalaʼdxiʼ ganna de ca profecía zeeda lu Biblia. Peru cadi gudiʼnu lugar cueecabe gana laanu. Purtiʼ nánnanu xiñee nga naquiiñeʼ gatananu. Apóstol Pablu gudxi ca hermanu stiʼ: «Maca nanna dxichi tu dxi gueeda be la? mala guiuu be, casi riuu gubaana huaxhinni» (biindaʼ 1 Tesalonicenses 5:1-6). Jesús gudixhená ca discípulo stiʼ né ca diidxaʼ riʼ: «Lagataná, purti nin ganna tu mala ibigueta Hombre Biseenda Dios» (Lucas 12:39, 40). Maʼ cadi candaa, maʼ gadxé modo zaguite Binidxabaʼ binni. Zucaabe laacaʼ guni crecaʼ «gasti chi gaca, nuu dxí guidxi». Óraca nga málasi gueeda dxi sti Jiobá. Ne zadxibi daataʼ binni. Yanna laanu yaʼ. Para racaláʼdxinu chuʼnu listu para dxi ca la? cadi gudiʼnu lugar quite Binidxabaʼ laanu casi cayúnibe xcaadxi binni. Nga runi, yanna nga naquiiñeʼ gúninu ni guníʼ Pablu: «Gataná nu ne cuʼ xpiaani nu». Para nga naquiiñeʼ guidúʼndanu Biblia guiráʼ dxi ne guiníʼ íquenu ni cayabi Jiobá laanu.

13. a) Xi zanda gucaa binni guidxilayú laanu gúninu. b) Xi zanda gúninu ti cadi guicá modo riníʼ ique ca binni ca laanu.

¹³ Ricá modo riníʼ ique binni guidxilayú. Yanna riʼ, stale binni na cadi caquiiñeʼ gunibiaʼcaʼ Dios (Mateo 5:3). Lugar de nga, jma riquiiñecabe tiempu ne stipa stícabe para gápacabe ca cosa ni nuu lu guidxilayú riʼ (1 Juan 2:16). Ne yanna nuu stale modo para gaca divertir binni. Guiráʼ ndiʼ rucaa laacabe gúnicabe ni gápacabe  gana ne gúnicabe ni chuuláʼdxicabe (2 Timoteo 3:4). Pur nga riaandaʼ laacabe xii nga ni jma risaca ne qué riníʼ íquecabe gaca xhamígucabe Dios. Xi zanda gúninu ti cadi guicá modo riníʼ ique binni guidxilayú laanu. Pablu bisietenalaʼdxiʼ ca xpinni Cristu «ma ora ireeche bacaandaʼ» ne para nga cadi naquiiñeʼ guicá íquecaʼ gúnicaʼ ni rinabaʼ beela ládicaʼ laacaʼ (Romanos 13:11-14).

14. Ximodo caguixhená Lucas 21:34, 35 laanu.

¹⁴ Racaláʼdxinu guicá modo riníʼ ique Dios laanu ne cadi modo riníʼ ique binni guidxilayú. Jiobá huaquiiñeʼ espíritu stiʼ para gacané laanu guiene chaahuinu xi maʼ cadi candaa chigaca (1 Corintios 2:12). ^[1] Peru naquiiñeʼ gápanu cuidadu. Dede ca cosa ni maca rúninu zanda cuee chuʼcaʼ laanu de gúninu ni na Jiobá sin gudiʼnu cuenta (biindaʼ Lucas 21:34, 35). Nuu tu riníʼ ique nahuátinu purtiʼ runi crenu nabáninu lu ca últimu dxi stiʼ guidxilayú malu riʼ (2 Pedro 3:3-7). Peru cadi gudiʼnu lugar cueecabe gana laanu. Nuu stale prueba ni culuíʼ mápeca gaxha nuu fin. Pa racaláʼdxinu gacané espíritu stiʼ Dios laanu la? cadi guiaadxanu ca reunión.

15. Xi bizaaca Pedru, Santiago ne Juan, ne ximodo zanda guizaacanu zacá.

¹⁵ Nagana raca para laanu gatananu pur cani rinabaʼ beela ládinu laanu gúninu. Nanna Jesús imperfectu laanu ne gadxé ni rinabaʼ beela ládinu laanu gúninu. Guiníʼ íquenu xi bizaaca gueelaʼ ante gatiʼ Jesús. Neca perfectu laabe, peru gúnnabe naquiiñeʼ guinábabe Jiobá gacané laabe cadi gusaanabe laa. Jesús gunabaʼ ca apóstol stiʼ, Pedru, Santiagu ne Juan, cadi gásicaʼ laga cayuni orarbe. Peru laacaʼ qué nudiicaʼ cuenta pabiáʼ nga naquiiñeʼ gatanacaʼ óraque. Xi gúcacabe yaʼ. Cumu guizáʼ maʼ bidxágacabe la? gúsicabe. Jesús laaca maʼ bidxaga, peru gutanabe cayuni orarbe Bixhózebe. Ngaca nga naquiiñeʼ ñuni ca apóstol que (Marcos 14:32-41).

16. Casi na Lucas 21:36, xi guníʼ Jesús zanda gúninu para gatananu.

¹⁶ Xi zacané laanu gatananu ne chuʼnu listu dxi gueeda dxi stiʼ Jiobá yaʼ. Naquiiñeʼ guinabaʼ ladxidoʼno laanu gúninu ni jneza. Peru cadi nga si nga naquiiñeʼ gúninu. Caadxi dxi ante gatiʼ Jesús, gúdxibe ca discípulo stibe cadi gusaanacaʼ de guinábacaʼ Jiobá gacané laacaʼ (biindaʼ Lucas 21:36). Para gatananu ca dxi mayaca gueeda fin, laaca naquiiñeʼ guni orarnu guiráʼ ora (1 Pedro 4:7).

17. Xi naquiiñeʼ gúninu para gánnanu pa nuunu listu para dxi ni gueeda ca.

¹⁷ Jesús gudxi ca discípulo stiʼ ca diidxaʼ riʼ: «Pacaa mala zuhuaa Hombre Biseenda Dios guʼya tu», o málasi gueeda fin (Mateo 24:44). Nga runi naquiiñeʼ chuʼnu listu guiráʼ ora. Cadi yanna diʼ nga guyúbinu ca cosa ni nuu lu guidxilayú stiʼ Binidxabaʼ. Binni riníʼ zabáninu nayecheʼ pa gápanu cani. Peru laanu nánnanu cadi dxandíʼ diʼ ni. Jiobá ne Jesús cayábicaʼ laanu lu Biblia xi naquiiñeʼ gúninu para gatananu. Nga runi, guiduʼyaʼ chaahuinu gunáʼ nga ca profecía zeeda lu Biblia ne ximodo cayaca ni ná cani. Cadi gusaananu de guyúbinu chuʼnu jma gaxha de Jiobá ne gúninu ni na Reinu stibe primé lu xquendanabáninu. Zacá ziuʼnu listu ora gueeda fin (Apocalipsis 22:20). Naquiiñeʼ gánnanu zacatiʼ nga zalanu.