Ca diidxaʼ ni cá ra zeeda versículo ca rusihuinni cani caníʼ apóstol Pablu de ni gudixhe Dios guni casi zeeda ni lu Biblia.

Stale biaje reeda Hebreos 4:12 lu ca publicación stinu para gusiene cani napa Biblia poder para guchaa xquendanabani binni. Ne dxandíʼ ni. Peru naquiiñeʼ guiene chaahuinu ca diidxaʼ cá ra zeeda versículo ca. Ni cayabi Pablu ca xpinni Cristu ni riníʼ diidxaʼ hebreu que nga guiráʼ ni gúnicaʼ gaca ni casi naguixhe Dios. Stale de laacani maca zeeda lu xquiʼchiʼ Dios tiempu que. Bizeeteʼ Pablu ejemplu stiʼ ca israelita ni biree de Egipto dxiqué. Gúpacabe esperanza ziuucabe lu layú bidii stiidxaʼ Dios laacabe guicaacabe, ti layú ra ridá «leche ne dxiña yaga». Raqué nga zadxélacabe ti lugar ra dxandipeʼ zaziiláʼdxicabe (Éxodo 3:8; Deuteronomio 12:9, 10).

Ngue nga ni guníʼ Dios naguixhe guni. Peru despué biquidxi ca israelita que ladxidoʼcaʼ ne qué ñápacaʼ fe. Ngue runi, stale de laacaʼ maʼ qué ñanda ñuucaʼ lugar ra niziiláʼdxicaʼ (Números 14:30; Josué 14:6-10). Peru Pablu bizeeteʼ laaca maʼ bidii stiidxaʼ Dios chuʼnu ti lugar ra guiziiláʼdxinu (Hebreos 3:16-19; 4:1). Rihuinni dxíchica zeeda ni bidii stiidxaʼ Dios riʼ lade cani maʼ guníʼ chiguni. Cásica ca xpinni Cristu ni riníʼ diidxaʼ hebreu que, zanda guizíʼdinu de ni naguixhe Dios chiguni ne guiráʼ ni gúninu gaca cani casi naguixhe Dios. Para guluíʼ Pablu lu Stiidxaʼ Dios nga zeeda ca diidxaʼ que la? bizeetebe ni na Génesis 2:2 ne Salmo 95:11.

Nabé riguixhedxí ni guníʼ Pablu ca ladxidoʼno: laaca maʼ bizabiruaa Dios chuʼnu ti lugar ra guiziiláʼdxinu. Nuunu seguru zanda chuʼnu lugar ra guiziiláʼdxinu ne cayúninu stipa pur guiuʼnu lugar ca. Cayúninu ni cadi purtiʼ nuunu chinándanu Ley gucuaa Moisés o purtiʼ racaláʼdxinu chuulaʼdxiʼ Jiobá ni rúninu. Pur fe ni nápanu nga huayúninu casi naguixhe ique Dios ne qué zusaananu de gúninu ni né gana. Ne casi bizéʼtenu ora bizulunu que, lu guidubi Guidxilayú, mil binni maʼ bizulú cayuni estudiar Biblia ne maʼ caziidicaʼ xi naguixhe ique Dios guni. Stale de laacabe maʼ cuchaa modo nabani, cayápacaʼ fe ne maʼ cayuunísacaʼ. Ndiʼ rusihuinni dxandíʼ nabani Stiidxaʼ Dios ne napa ni poder. Mensaje stiʼ Dios ni zeeda lu Biblia, maʼ huayacané cani laanu ne zacaneruʼ cani laanu.