1, 2. a) Xi zándaca guinabadiidxaʼ cani nahuiiniʼ ni runi ni na Jiobá. b) Xi conseju cudii Stiidxaʼ Dios laanu.

SICARÍʼ gudxi ti compañera stiʼ ti hermana huiiniʼ laa ndaaniʼ guidxi Gran Bretaña: «Cadi lii diʼ ñuni creluʼ Dios, purtiʼ lii nabé nuu xpiaaniluʼ». Ndaaniʼ guidxi Alemania bicaa ti hermanu sicaríʼ: «Ca maestru stinneʼ nacaʼ ti cuentu si nga guni crenu guyuu tu bizáʼ ca cosa ca ne para laacabe guiráʼ estudiante runi cré evolución». Ne ndaaniʼ guidxi Francia, guníʼ ti hermana sicaríʼ: «Nabé ridxagayaa ca maestru de scuela stinneʼ nuuruʼ estudiante ni runi cré Biblia».

² Yanna riʼ stale binni qué runi cré pa Dios bizáʼ laanu. Pa nahuiiniluʼ ne cayuʼnu ni na Jiobá o caziiduʼ de laabe, zándaca guinabadiidxuʼ ximodo guluiʼluʼ dxandíʼ laabe bizaʼbe laanu. Racané Biblia laanu guiníʼ ique chaahuinu ni ridúʼndanu ne runadiáganu, ne racané ni laanu guidúʼyanu xi rusiidiʼ cani laanu. Stiidxaʼ Dios na: «Gánnaluʼ guiníʼ íqueluʼ zapa ni lii». Ximodo zapa ni lii yaʼ. Zacané ni lii gucaa naluʼ cani cadi jneza riníʼ ique binni ne jma zapuʼ fe Jiobá. Biblia na: «Ora chuʼ guendanuuxpiaaniʼ ndaaniʼ ladxidoʼloʼ ne chuuláʼdxiluʼ guendananna, gánnaluʼ guiníʼ íqueluʼ zapa ni lii, ne zapa guendariene lii, para guilaluʼ de lu neza stiʼ hombre ni riníʼ diidxaʼ qué iquiiñeʼ» (Proverbios 2:10-12).

3. Xi zadúʼyanu lu tema riʼ.

 ³ Para gápanu jma fe Jiobá la? naquiiñeʼ gunibiáʼ chaahuinu laabe (1 Timoteo 2:4). Nga runi ora gúʼndaluʼ Biblia ne ca publicación stinu, nabé risaca cuézaluʼ ti ratu para guiníʼ íqueluʼ. Biʼniʼ stipa guiéneluʼ ni cayuundaluʼ (Mateo 13:23). Lu tema riʼ zadúʼyanu pa guʼnuʼ stipa pur guni estudiarluʼ casi guninu riʼ la? zadxeʼluʼ stale prueba ni rusihuinni Jiobá nga bizáʼ guiráʼ xixé ni nuu ne laabe nga guniʼbe guiráʼ ni cá lu Biblia (Hebreos 11:1).

4. a) Xiñee zanda guininu ora runi cré binni evolución zeeda gaca ni casi ora runi cré binni guyuu tu bizáʼ ca cosa ca. b) Xi naquiiñeʼ guni guiranu.

⁴ Zándaca chuʼ tu gabi lii: «Naa runeʼ cré evolución purtiʼ ca científicu nacaʼ dxandíʼ ni. Ximodo zanda guni creluʼ Dios pa guirutiʼ huayuuyaʼ laa». Stale binni riníʼ ique zacá. Dxandíʼ guirutiʼ huayuuyaʼ Dios ninca huadúʼyanu ora guzaʼbe xiixa (Juan 1:18). Peru cani runi cré evolución laaca runi crecaʼ xiixa ni qué huayuuyacaʼ. Xiñee rininu zacá yaʼ. Purtiʼ nin ti científicu nin sti binni qué huayuuyaʼ gaca evolucionar xiixa ni nabani ne gaca ni sti tipu. Casi ti beendaʼ la? guirutiʼ huayuuyaʼ gácame sti maniʼ casi ti yuze (Job 38:1, 4). Naquiiñeʼ guidúʼyanu guiráʼ prueba riʼ, guiníʼ ique chaahuinu cani ne guidúʼyanu xi culuíʼ cani laanu. Stale binni ora gúʼyacaʼ naturaleza ca rudiicaʼ cuenta nuu Dios. Casi ruzeeteʼ Biblia, ruuyaʼ dxíchicabe Dios biʼniʼ guiráʼ cosa ne nápabe stale poder ne stale cualidad sicarú (Romanos 1:20).

5. Xii nga cani zacané laanu guizíʼdinu de ca cosa ni guyáʼ.

⁵ Ora guidúʼyanu naturaleza ne guiníʼ ique chaahuinu cani ridúʼyanu, nabé ridxagayaanu modo guyáʼ cani. Pur fe stinu «runi cre nu» nuu tu bizáʼ ca cosa ca, neca qué rihuínnibe. Rudiʼnu cuenta nabé nuu xpiaanibe ne nabé sicarú modo laabe, o ca cualidad stibe (Hebreos 11:3, 27). Zanda guizíʼdinu jma de ca cosa ni bizaʼbe ora guidúʼndanu ni huadxela ca científicu de laacani. Zadxélanu caadxi información ca lu videu ni láʼ Las maravillas de la creación, lu folletu Obra de un Creador ne El origen de la vida, ne folletu Chii cosa ni rinabadiidxaʼ ca joven. Stale biaje, reeda lu revista ¡Despertad! entrevista ni rúnicabe ca científicu ne xcaadxi binni ni ruzeeteʼ xiñee maʼ runi crecaʼ Dios yanna. Ndaa ra na «¿Casualidad  o diseño?» rusiene ni de ca maniʼ ca ne de naturaleza, ne rusiene ni ximodo racalaʼdxiʼ ca científicu gúnicaʼ xiixa ni guni dxiiñaʼ casi laacani.

6. Ximodo zanda gacané ca publicación stinu lii.

⁶ Ndaaniʼ guidxi Estados Unidos, ti hermanu de 19 iza guníʼ de ca folletu ni bizéʼtenu lu párrafo gudídinu ca: «Nabé maʼ gucané cani naa. Maʼ stale biaje bineʼ estudiar cani». Ndaaniʼ guidxi Francia, bicaa ti hermana: «Guizáʼ ridxagayaaʼ ca tema ni láʼ: “¿Casualidad o Diseño?” Ruzeeteʼ cani ruyubi ca ingenieru ni jma nanna modo guzaʼcaʼ xiixa casi guyáʼ naturaleza, peru qué ziuu dxi gúnicabe cásipeʼ laacani purtiʼ nagana cani». Ne ndaaniʼ guidxi Sudáfrica, bixhoze ne jñaa ti dxaapahuiiniʼ de 15 iza guniʼcaʼ sicaríʼ: «Primeca ni ruundaʼ dxaapahuiiniʼ stidu lu revista ¡Despertad! nga ndaa ni láʼ “Entrevista”». Laaca zanda gacané ca publicación ca lii. Ximodo yaʼ. Lu cani zeeda prueba ni rusihuinni nuu tu bizáʼ guiráʼ ni nuu ne zacané cani lii gannuʼ xii nga ni cadi jneza rusiidicabe ne para cadi guni creluʼ cani. Laaca zacané ni lii gapuʼ jma fe ne zeeda gácaluʼ casi ti yaga ni rindá xcu dede gueteʼ ni qué zusaba bi laa purtiʼ dxiichiʼ zuhuaa (Jeremías 17:5-8).

7. Xiñee racalaʼdxiʼ Dios iquiiñenu xquendabiaaninu.

⁷ Cadi malu diʼ nga guinabadiidxuʼ: «Xiñee naquiiñeʼ guneʼ cré Biblia». Qué racalaʼdxiʼ Jiobá guni creluʼ xiixa purtiʼ si runi cré xcaadxi binni cani. Racaláʼdxibe iquiiñeluʼ xquendabiaaniluʼ para gunibiaʼluʼ Biblia ne guʼyuʼ ca prueba ni rusihuinni laabe nga guniʼbe xi guicá luni. Xiñee racaláʼdxibe guʼnuʼ zacá yaʼ. Purtiʼ ra jma gunibiaʼluʼ Biblia, jma zapuʼ fe ni (biindaʼ Romanos 12:1, 2 ne 1 Timoteo 2:4). Ti modo para gunibiáʼ chaahuinu Biblia ca nga guni estudiarnu ca tema ni riuuláʼdxinu gánnanu jma de laa.

8, 9. a) Xi riuulaʼdxiʼ caadxi binni guni estudiar. b) Xi huabeendú caadxi binni ora guiníʼ ique chaahuicaʼ ni gúʼndacaʼ.

⁸ Nuu binni riuulaʼdxiʼ guni estudiar ca profecía zeeda lu Biblia. Nuu xcaadxi ni riuulaʼdxiʼ guchaaga ca relatu ni zeeda lu Biblia ne ni na cani runi estudiar de historia, ciencia o arqueología. Guníʼ ique ni zeeda lu Génesis 3:15. Guníʼ Jiobá profecía nabé risaca riʼ despué de bidxiideche Adán ne Eva laa ne modo runi mandar. Lade guiráʼ profecía ni caníʼ de Reinu stiʼ Dios, laani nga primé ni racané laanu guiénenu ximodo zuni mandar Reinu riʼ casi racalaʼdxiʼ Dios gaca ni ne zunduuxeʼ ni cani cayuniná laanu. Ximodo guni estudiarluʼ profecía ni zeeda lu Génesis 3:15 yaʼ. Para guzululuʼ biʼniʼ ti lista stiʼ ca versículo ni jma cusiene ximodo guca ni na ni. Despué biiyaʼ padxí gucuá ca versículo riʼ ne gudixhe chaahuiʼ cani. Chaahuigá zudiiluʼ cuenta gadxé gadxé tiempu bibani cani bicaa ni, peru cada tobi gucané para biene binni profecía riʼ chaahuiʼ chaahuiʼ. Zacané ndiʼ lii para gusihuínniluʼ dxandíʼ biquiiñeʼ Jiobá espíritu santu stiʼ para biluíʼ ca hombre que xi gucaacaʼ lu Biblia (2 Pedro 1:21).

⁹ Ti hermanu nabeza Alemania bidii cuenta cada libru stiʼ Biblia ruzeeteʼ xiixa de Reinu stiʼ Dios nécaxa 40 hombre bicaa ni. Ne gadxé gadxé tiempu bibánicabe ne qué ñuu dxi ñunibiáʼcabe. Ti biaje laga cayuni estudiar ti hermana de Australia ti tema stiʼ Torre stiʼ ni rapa biiyabe ni raca lu Pascua, ni na Génesis 3:15 ne Mesías que tobi si ni cusihuinni cani zazaaca. Laabe bicaabe: «Ora bineʼ estudiar tema que biiyaʼ pabiáʼ sicarú modo naca Jiobá. Bidxagayaaʼ xiñee gunábabe guni ca israelita que Pascua que ne ximodo guca cumplir ni luguiáʼ Jesús. Gupa xidé gulezaʼ ti ratu ne  guníʼ iqueʼ ximodo cusihuinni Pascua que xi chiguizaaca despué». Xiñee biʼniʼ sentirbe zacá yaʼ. Purtiʼ guníʼ ique chaahuibe ni cayuundabe ne zaqué nga gunda biénebe ni. Gucané ndiʼ laabe para gápabe jma fe ne chuʼbe jma gaxha de Jiobá (Mateo 13:23).

10. Xiruʼ zacané lii para gápaluʼ jma fe lu Biblia.

¹⁰ Xiruʼ zacané lii para gápaluʼ jma fe lu Biblia yaʼ. Guiníʼ íqueluʼ pabiáʼ nadxibalú guca cani bicaa ni ra guniʼcaʼ ni dxandíʼ guiráʼ ora. Dxiqué, stale escritor rucaacaʼ ni galán si de xquídxicaʼ ne de ca gobernante sticaʼ. Peru ca profeta stiʼ Jiobá bicaacaʼ ca cosa malu biʼniʼ ca israelita ne ca rey sticaʼ. Cadi puru si ra galán nucaacaʼ (2 Crónicas 16:9, 10; 24:18-22). Laacaʼ bizeetecabe ra bicheecabe ne ra bichee xcaadxi xpinni Dios (2 Samuel 12:1-14; Marcos 14:50). Ti hermanu huiiniʼ de Gran Bretaña guníʼ: «Huaxiéʼ si nga cani riníʼ ni dxandíʼ casi [cani bicaa Biblia]. Nga racané laanu gápanu jma confianza dxandíʼ zeeda Biblia ca de Jiobá».

11. Xi zacané laanu guni crenu zeeda Biblia de Dios.

¹¹ Ora gudiʼnu lugar gusiidiʼ Biblia laanu modo guibáninu la? zabeendunu ni galán. Nga rucaa laanu guni crenu zeeda Biblia de Dios. Biblia na: «Qué ruchee diʼ ley stiʼ Jiobá, riguixhedxí ni ladxidóʼ binni. Jneza ni rusietenalaʼdxiʼ Jiobá laanu, ne riguu ni xpiaaniʼ binni ni qué ganna. Laaca maʼ gudixhená cani siervu stiluʼ; ne zacaa stale ndaayaʼ pa chinanda ni na cani» (Salmo 19:7, 11). Ti hermana joven de Japón guníʼ: «Yanna nga dxandíʼ nabánidu nayecheʼ purtiʼ yenanda familia stinneʼ ni rusiidiʼ Biblia. Qué ridíndedu, nuudu tobi si ne nadxiisaadu». Huayacané Biblia stale binni gudii cuenta cadi dxandíʼ caadxi cosa ni biʼniʼ crecaʼ (Salmo 115:3-8). Ne huayacané ni laacabe gápacabe confianza Dios ni jma napa poder. Peru nuu binni ni qué runi cré Dios ruuyacaʼ naturaleza ca casi ñaca ni ti dios. Xcaadxi na binni guidxilayú nga zanda gacané laanu guibáninu jma galán despué. Peru ora guidúʼyanu ni huayúnicabe la? rudiʼnu cuenta qué huayanda guni chaahuicabe ca guendanagana ni nuu lu guidubi Guidxilayú. Biblia si nga zanda gabi laanu nabé sicarú nga ni cabeza laanu despué (Salmo 146:3, 4).

12, 13. Ximodo zanda guiníʼneluʼ binni de ca cosa ni guyáʼ o de Biblia.

¹² Ora guiníʼneluʼ sti binni de ca cosa ni guyáʼ o de Biblia la? biiyaʼ primeru xi runi crebe. Nuu binni runi cré evolución ne laaca runi cré Dios. Laacabe nácabe biquiiñeʼ Dios evolución para guzáʼ guiráʼ xixé ni nabani. Xcaadxi na dxandíʼ evolución purtiʼ rusiidicabe ni ra scuela. Ne xcaadxi maʼ qué runi crecaʼ Dios purtiʼ ruuyacaʼ cadi jneza runi ca religión ca. Nga runi, ora guiníʼneluʼ tuuxa, gunabadiidxaʼ laabe primé xi runi crebe ne xiñee runi crebe ni. Pa gucaadiaga chaahuiluʼ laabe la? zándaca jma zucaadiágabe lii (Tito 3:2).

¹³ Pa tuuxa guni burla lii purtiʼ runi creluʼ Dios, ximodo zanda guicábiluʼ. Guniʼné laabe né respetu ne gunabaʼ laabe gusiénebe lii ximodo rábibe bizulú guendanabani. Zanda gaʼbuʼ laabe pa dxandíʼ ñuu evolución, primé cosa ni bibani ñanda nutale ni xcaadxi casi laani. Ne ti profesor de química guníʼ laaca niquiiñeʼ ni stale cosa casi ti guidi nuchii ladi ni, nuyubi ni ñapa ni stipa ne niquiiñeʼ ni stipa ca, ñapa ni caadxi instrucción para cadi nuchaa ni modo laani ne para niniisi ni (casi runi ADN), ne ñuni ni ti copia stiʼ ca instrucción ca. Ne laaca guníʼ profesor que: «Nabé ridxagayaaʼ ora guʼyaʼ pabiáʼ nagana nga modo guyáʼ dede ca cosa ni jma nahuiiniʼ».

14. Xi ejemplu zanda iquiiñeluʼ para gusiéneluʼ guyuu tu bizáʼ ca cosa ca.

 ¹⁴ Ora guiníʼneluʼ tuuxa de ca cosa ni guyáʼ, zanda iquiiñeluʼ ni guníʼ apóstol Pablu para gusiéneluʼ ni laabe. Laabe bicaabe: «Dxandíʼ, guiráʼ yoo nuu tu bizáʼ laa, peru ni bizáʼ guiráʼ xixé ni nuu nga Dios» (Hebreos 3:4, TNM). Nanna dxíchinu qué ziáʼ diʼ ti yoo stubi. Nuu tu gudixhe ximodo gaca ni ne nuu tu bizáʼ ni. Guiráʼ ni nabani jma nagana cani que ti yoo. Nga runi guyuu tu gudixhe modo gaca cani ne guyuu tu bizáʼ cani. Laaca zanda iquiiñeluʼ cani zeeda lu ca publicación stinu ora guiniʼluʼ guyuu tu bizáʼ ca cosa ca. Ti hermana ni guniʼné ti hombrehuiiniʼ ni qué runi cré Dios bidiibe laa guiropaʼ folletu ni bizéʼtenu lu párrafo gaayuʼ que. Ti semana despué, gudxi hombrehuiiniʼ que laabe: «Maʼ runeʼ cré Dios yanna». Bizulú biindanécabe laabe de Biblia ne despué guyuunísabe.

15, 16. a) Xi naquiiñeʼ guʼnuʼ ante gusiéneluʼ binni de Dios nga zeeda Biblia. b) Xi cadi naquiiñeʼ guiaandaʼ lii.

¹⁵ Pa tuuxa cadi nuu seguru zeeda Biblia ca de Dios, ximodo zanda gacaneluʼ laabe guiénebe zacá ni yaʼ. Casi guninu que, zanda guinabadiidxaluʼ laabe primé xi runi crebe ne biiyaʼ xi tema jma riuuláʼdxibe gánnabe (Proverbios 18:13). Pa riuuláʼdxibe gánnabe de ciencia, zanda guluiʼluʼ laabe ca ejemplu ni zeeda lu Biblia ni rusihuinni qué ruchee diʼ ni ora riníʼ ni de ciencia. Pa riuuláʼdxibe gánnabe de historia la? zanda gaʼbuʼ laabe de xiixa relatu ni zeeda lu ca libru de historia ne ximodo maca bizeeteʼ Biblia de laacani stale iza ante. Zándaca xcaadxi binni jma riuulaʼdxiʼ gucaadiaga ora gusiiduʼ laacaʼ ximodo zanda gacané Biblia laacaʼ guibánicaʼ jma galán. Zanda gusiidiluʼ laacabe caadxi de ca conseju bizeeteʼ Jesús lu discursu ni bidii lu dani que.

¹⁶ Cadi guiaandaʼ lii, qué racaláʼdxinu tinde diidxanenu binni ora guinínenu laa. Ni racaláʼdxinu nga chuuláʼdxibe güínebe laanu diidxaʼ ne guiziidibe de Biblia. Nga runi, gunabadiidxaʼ laabe xiixa né respetu ne bicaadiaga chaahuiʼ laabe. Bisiene laabe ni runi creluʼ né diidxaʼ nadóʼ. Nabé risaca guʼnuʼ zacá jmaruʼ si pa jma huaniisibe para lii. Zacá qué zaca nagana para laabe guni respetarbe lii. Laaca zadxagayaabe gúʼyabe neca nahuiiniluʼ cadi guendariguite diʼ ruuyuʼ cani runi creluʼ. Peru pa guʼyuʼ racalaʼdxiʼ tuuxa tinde diidxaʼ o guni burla si lii la? cadi caquiiñeʼ diʼ guicábiluʼ laabe (Proverbios 26:4).

17, 18. a) Xi zacané lii ti gápaluʼ jma fe Biblia. b) Xi zadúʼyanu lu sti tema ca.

¹⁷ Neca maʼ nannuʼ xii nga cani naquiiñeʼ guiziidiʼ binni lu Biblia primé, nuu sti cosa ni naquiiñeʼ guʼnuʼ ti gaca fe stiluʼ jma naguidxi. Naquiiñeʼ guʼndaʼ chaahuiluʼ cani jma nagana rusiidiʼ Biblia, casi ñaca cagaañeluʼ para guidxélaluʼ tesoro ni gaʼchiʼ (Proverbios 2:3-6). Tobi de cani zacané lii jma gapuʼ fe nga gúʼndaluʼ guidubi naca Biblia. Zanda gúʼndaluʼ guidubi ni lu ti iza. Zacá biʼniʼ ti superintendente de circuito para gunda bidxíñabe jma gaxha de Jiobá dxi nahuiinibe. Sicaríʼ guniʼbe: «Ora biindaʼ guidubi Biblia nga bidieeʼ cuenta Stiidxaʼ Dios ni. Óraque nga bieneʼ ca historia zeeda lu Biblia ni biziideʼ dxi xcuidi naa». Xiruʼ zanda guʼnuʼ. Zanda iquiiñuʼ ca herramienta ni nuu lu stiidxaluʼ ti jma guiéneluʼ cani gúʼndaluʼ. Casi programa Watchtower Library lu DVD, BIBLIOTECA NI NUU LU INTERNET Watchtower o folletu Ca tema ni huabee ca testigu stiʼ Jiobá.

¹⁸ Laatu cani napa xiiñiʼ, lu natu nga nuu gusiiditu xiiñitu de Jiobá. Nga runi, lu sti tema ca zadúʼyanu xcaadxi modo zanda gacanetu xiiñitu gápacaʼ jma fe Jiobá.