1, 2. a) Xiñee gadxepeʼ nga ni cabézanu laanu ca xpinni Dios de ni cabeza binni guidxilayú. b) Xi zadúʼyanu lu tema riʼ.

MAʼ BIDII stiidxaʼ Jiobá laanu stale cosa sicarú. Maʼ guniʼbe zusiabe labe ne zúnibe xiixa para gaca ni nabe guibáʼ ne lu Guidxilayú (Mateo 6:9, 10). Nga nga ca cosa jma risaca ni cabézanu gaca. Laaca maʼ bidii stiidxaʼ Jiobá laanu zudii laanu ti guendanabani ni qué zaluxe, nuu tu zacaa ni para cheʼ guibáʼ ne nuu tu zacaa ni para guibani lu Guidxilayú (Juan 10:16; 2 Pedro 3:13). Peru cadi ngasi, laanu ca xpinni Dios cabézanu guidúʼyanu modo gábiruʼ Dios laanu ximodo guibáninu ne modo gacanérube laanu lu ca últimu dxi riʼ.

² Biblia na fe ca nga «chuʼnu seguru» de ca cosa ni cabézanu. Nga riníʼ laanu cani nápanu fe la? nuunu seguru dxandíʼ zuni Dios cani maʼ bidii stiidxaʼ laanu (Hebreos 11:1). Peru nuu stale binni lu Guidxilayú riʼ ni ribeza ne racalaʼdxiʼ guizaaca caadxi cosa, peru qué randa riuucaʼ seguru pa ziuu dxi guizaaca cani. Casi cani riguite loteriá la? racaláʼdxicaʼ guni ganarcaʼ ni. Peru qué zanda chuʼcaʼ seguru zuni ganarcaʼ. Lu tema riʼ zadúʼyanu ximodo zanda guquídxinu fe stinu lu cani maʼ bidii stiidxaʼ Dios laanu. Laaca zadúʼyanu ximodo zanda gacané fe stinu laanu ca dxi riʼ pa naguidxi ni.

3. Xiñee nápanu fe dxandíʼ zaca guiráʼ ni maʼ bidii stiidxaʼ Jiobá.

 ³ Guirutiʼ rale maca napa fe. Pa racaláʼdxinu gápanu fe la? naquiiñeʼ gudiʼnu lugar gabi espíritu stiʼ Dios laanu xi gúninu (Gálatas 5:22). Zanda gacané espíritu santu stiʼ Dios laanu para gunibiaʼnu Jiobá. Ora guiénenu laabe nga ni jma napa poder ne ni jma nuu xpiaaniʼ la? zápanu confianza zanda gúnibe guiráʼ ni maʼ bidii stiidxabe. Cumu nuu Jiobá seguru zuni cani maʼ bidii stiidxaʼ la? nga runi riniʼbe cani casi ora maʼ guca cani. Nga runi laabe nabe: «Ma uca irá ni nexhe acaʼ» (biindaʼ Apocalipsis 21:3-6). Jiobá nga Dios ni qué ruchee purtiʼ runi guiráʼ ni gudii stiidxaʼ. Pur nga runi crenu guiráʼ ni rábibe laanu chiguizaaca despué (Deuteronomio 7:9).

4. Xi nga gupa ca xpinni Dios fe dxiqué.

⁴ Capítulo 11 stiʼ Hebreos ruzeeteʼ lá 16 hombre ne gunaa de dxiqué ni gupa fe naguidxi lu cani maʼ bidii stiidxaʼ Jiobá. Laaca riniʼni de xcaadxi xpinni Jiobá ni bisiéchecaʼ laabe pur fe ni gúpacaʼ (Hebreos 11:39). Guirácabe gulézacabe «descendencia» ni guníʼ Jiobá gueeda. Gúnnacabe zunduuxeʼ descendencia riʼ guiráʼ ca enemigu stiʼ Dios ne zuni ni Guidxilayú riʼ ti paraísu casi guca ni dxiqué (Génesis 3:15). Gupa ca xpinni Dios riʼ fe zudxiguetaʼ Jiobá xquendanabánicaʼ pa gáticaʼ. Peru qué nibézacabe nibánicabe guibáʼ, purtiʼ caʼruʼ guiníʼ Jesús de esperanza riʼ tiempu que (Gálatas 3:16). Laacabe gulézacabe nibánicabe sin ñáticabe lu Guidxilayú riʼ dxi maʼ gaca ni ti paraísu sicarú (Salmo 37:11; Isaías 26:19; Oseas 13:14).

5, 6. a) Xi guleza Abrahán ne familia stiʼ. b) Xi bíʼnicabe para guca fe stícabe naguidxi. (Biiyaʼ dibuju ni zeeda ra ruzulú tema riʼ).

⁵ Sicaríʼ caníʼ Hebreos 11:13 de ca xpinni Jiobá ni bizuubaʼ diidxaʼ: «Irá cabe guti cabe runi cre ru cabe Dios. Neca caʼru icaa cabe ni bidii stiidxa Dios zudii laacabe, peru casi ñaca biiya cabe ni de zitu ne bieche né cabe ni». Zanda guininu gulézacabe nibánicabe lu guidxilayú cubi stiʼ Dios ne bixuiʼlúcabe maʼ nuucabe luni. Tobi de ca xpinni Dios riʼ nga Abrahán. Jesús guníʼ biecheʼ Abrahán stale purtiʼ guleza guʼyaʼ dxi que (Juan 8:56). Sara, Isaac, Jacob ne xcaadxi xpinni Dios laaca gulézacaʼ ñedandá dxi ñuni mandar Reinu stiʼ Dios guidubi naca Guidxilayú (Hebreos 11:8-11).

⁶ Xi biʼniʼ Abrahán ne familia stiʼ para guca fe sticaʼ naguidxi yaʼ. Qué ñuu dxi nusaanacabe de niziidicabe de Jiobá. Nuu biaje biquiiñeʼ Dios ca ángel, visión o bacaandaʼ para gusiidiʼ laacabe. Zándaca laaca biziidicabe de ca xpinni Dios ni jma huaniisi que laacabe ni qué nuchee o pur biindacabe ca guiʼchiʼ yooxhoʼ de tiempu que. Qué ñuu dxi nusiaandaʼ Abrahán ne familia stiʼ cani bidii stiidxaʼ Dios. Nabé guyuuláʼdxicabe guiníʼ íquecabe de laacani. Ngue runi qué ñuu dxi niníʼ íquecabe pa dxandíʼ zuni Jiobá cani maʼ bidii stiidxaʼ. Confianza ni gúpacabe riʼ gucaneni laacabe para cadi nucheenécabe Dios neca gúpacabe guendanagana ne guzananda binni laacabe.

7. Xi maʼ bidii Jiobá laanu para gacané laanu gaca fe stinu jma naguidxi, ne xi naquiiñeʼ gúninu.

⁷ Xi zacané laanu para gaca fe stinu naguidxi yaʼ. Maʼ bidii Jiobá laanu Biblia. Luni rusiidibe laanu xii nga cani maʼ bidii stiidxabe chigúnibe ne xi caquiiñeʼ gúninu para chuʼnu nayecheʼ. Nga runi galán guidúʼndanu Biblia guiráʼ dxi ne chinándanu ca conseju stini (Salmo 1:1-3; biindaʼ Hechos 17:11). Riquiiñeʼ Jiobá «ti mozo ni nuu xpiaani ne ni runi jneza» para gudii laanu ni caquiiñenu (Mateo 24:45). Cásica biʼniʼ ca xpinni Dios de dxiqué, naquiiñeʼ guidúʼndanu de cani maʼ bidii stiidxaʼ Jiobá gatigá ne guiníʼ íquenu de laacani. Nga zacané laanu cadi guchéʼnenu Dios ne  cadi guireʼnu gana de cuézanu dxi guni mandar Reinu stibe guidubi Guidxilayú riʼ.

8. Ximodo racané oración laanu para gaca fe stinu jma naguidxi.

⁸ Xiruʼ gucané ca xpinni Jiobá de dxiqué para gaca fe sticaʼ naguidxi yaʼ. Gunábacaʼ Jiobá gacané laacaʼ ne biiyacaʼ ricábibe ca oración sticaʼ (Nehemías 1:4, 11; Salmo 34:4, 15, 17; Daniel 9:19-21). Cásica laacabe, zaca fe stinu jma naguidxi pa guinábanu Jiobá gacané laanu ne guidúʼyanu rucaadiágabe laanu ne rudiibe nipeʼ caquiiñenu ne órapeʼ caquiiñenu ni (biindaʼ 1 Juan 5:14, 15). Cadi gusaananu de guinábanu Jiobá espíritu santu para ganda gápanu jma fe (Lucas 11:9, 13).

9. Bizeeteʼ caadxi de cani zanda guinábanu lu ca oración stinu.

⁹ Ora runi orarnu Jiobá, cadi gúninu ni para si guinábanu laabe gudiibe laanu ni caquiiñenu. Laaca naquiiñeʼ gúninu ni para gudiʼnu xquíxepeʼ laabe ne para gusisácanu laabe guiráʼ dxi, purtiʼ maʼ bíʼnibe stale cosa sicarú (Salmo 40:5). Laaca naquiiñeʼ guni orarnu pur ca hermanu stinu ni nuu lu guidubi Guidxilayú, casi cani deguyoo. Laaca naquiiñeʼ guni orarnu pur ca hermanu ni zaniru ndaaniʼ congregación stinu. Ora gúʼyanu ricabi Jiobá ca oración stinu runi sentirnu jma gaxha de laabe ne raca fe stinu jma naguidxi (Hebreos 13:3, 7).

10. Xiñee stale de ca xpinni Dios gúcacaʼ nadxibalú ne qué nucheenecaʼ laabe.

¹⁰ Lu capítulo 11 stiʼ Hebreos, guníʼ Pablu ca diidxaʼ riʼ: «Laca uyuu caadxi gunaa runi cre Dios, guti binni lidxi ne bibani. Ne laca uyuu xcaadxi xpinni Dios guti ra bininá cabe laa purti runi cre Dios, ne qué niná ca nilá caʼ, purti nanna ca jma galán gati ca» ne zabánicaʼ sti biaje (Hebreos 11:35). Stale xpinni Dios qué nucheenecaʼ laa neca gudíʼdicaʼ lu guendanagana purtiʼ gúpacaʼ fe dxandíʼ zandisaʼ Dios laacaʼ de lade gueʼtuʼ casi maca bidii stiidxaʼ. Gúnnacabe zudxiguetaʼ Jiobá xquendanabánicabe despué ne zabánicabe sin gáticabe lu Guidxilayú. Guiníʼ íquenu ni bizaaca Nabot ne Zacarías. Bichá binni guié laacabe dede ra gúticabe purtiʼ bizuubacabe stiidxaʼ Dios (1 Reyes 21:3, 15; 2 Crónicas 24:20, 21). Bisábacabe Daniel ndaaniʼ ti bizé ra nuu caadxi lión ni candaana, ne chonna xhamígube guluucabe laacaʼ ndaaniʼ ti horno ni caguí. Guyuucabe dispuestu gáticabe para cadi gucheenécabe Dios. Gupa ca hombre riʼ fe zudii Jiobá laacaʼ espíritu ne zacané laacaʼ guni huantarcaʼ intiica yuubaʼ tiidicaʼ (Daniel 3:16-18, 20, 28; 6:13, 16, 21-23; Hebreos 11:33, 34).

11. Xi guiráʼ biʼniʼ huantar caadxi profeta pur fe sticaʼ.

¹¹ Stale profeta biʼniʼ búrlacabe laacaʼ o biseguyoocabe laacaʼ, casi Micaya ne Jeremías, peru biʼniʼ huantárcabe cani. Ne xcaadxi profeta casi Elías, «uzá ca guiʼxhi ne lade dani ne ndaani cueva ne ndaani bizé». Guirácabe guyuucabe seguru de ca cosa ni cabézacabe ne pur ngue qué nucheenécabe Dios neca gudíʼdicabe lu stale guendanagana (Hebreos 11:1, 36-38; 1 Reyes 18:13; 22:24-27; Jeremías 20:1, 2; 28:10, 11; 32:2).

12. Tu ejemplu stiʼ zanda chinándanu, ne xi gucané laabe para biʼniʼ huantarbe ca guendanagana gúpabe.

¹² Ejemplu stiʼ Jesucristu nga ni jma naroʼbaʼ nápanu. Ora bicaacabe laabe lu yaga que para gátibe, bisituícabe lube ne bininácabe laabe stale. Ngue nga ca cosa ni jma triste gudíʼdibe lu xquendanabánibe. Xi gucané laabe para biʼniʼ huantarbe yaʼ. Pablu guníʼ biʼniʼ huantarbe «purti nanna be nabé zieche be ora ma udiʼdi be ni. Ne zaqué uca ni, udiʼdi si irá enda naná stibe que la? ze be ibáʼ, ne ma zuba be cueʼ Dios ni nandxóʼ» (Hebreos 12:2). Nga runi, guluu Pablu gana ca xpinni Cristu  chinándacaʼ ejemplu stiʼ Jesús (biindaʼ Hebreos 12:3). Cásica Jesús, stale de ca primé xpinni Cristu que gúticaʼ purtiʼ qué nucheenecaʼ Jiobá. Tobi de laacabe nga Antipas (Apocalipsis 2:13). Ca xpinni Cristu riʼ maʼ gucuaacaʼ premiu sticaʼ, peru nuu xcaadxi xpinni Dios ni bibani ante de laacabe cabézacaʼ guedandá dxi guibánicaʼ lu Guidxilayú riʼ (Hebreos 11:35). Gudiʼdiʼ si ti tiempu de guca Jesús rey guibáʼ lu iza 1914, bibani ca xpinni Cristu ni bibí sti biaje para checaʼ guibáʼ ne raqué gucuaacaʼ ti guendanabani ni qué ziuu dxi guiluxe. Zuni mandarnécabe Jesús ca binni ni guibani lu Guidxilayú (Apocalipsis 20:4).

13, 14. a) Xi guiráʼ guendanagana gudiʼdiʼ Rudolf Graichen. b) Xi gucané laabe para cadi nucheenebe Jiobá.

¹³ Tiempu riʼ, millón de testigu stiʼ Jiobá zinándacaʼ ejemplu stiʼ Jesús. Riníʼ íquecaʼ cani maʼ bidii stiidxaʼ Dios ne qué rucheenecaʼ laabe neca cadíʼdicaʼ lu guendanagana. Guzéʼtenu ejemplu stiʼ Rudolf Graichen, gúlebe guidxi Alemania lu iza 1925. Rietenaláʼdxibe dxi gúcabe xcuidi, biiyabe cá caadxi cuadru ra dieʼ caadxi dibuju de cani rusiidiʼ Biblia cueʼ lídxibe. Laabe nabe: «Lu tobi de laacani dieʼ ti gueuʼ ne ti dendxuhuiiniʼ, ti chivuhuiiniʼ ne ti  leopardo, ti yuzehuiiniʼ ne ti lión: guirácame nuucame tobi si ne ti xcuidihuiiniʼ cayapa laacame» (Isaías 11:6-9). Gucané ca ndiʼ Rudolf cadi gusaana de guiníʼ ique Paraísu cabézanu ne jma gúpabe fe dxandíʼ zaca cani maʼ bidii stiidxaʼ Dios. Pur guiráʼ ngue, qué nucheenebe Jiobá neca xadxí guzananda caadxi de cani rábicabe puliciá secreta stiʼ Alemania nazi laabe ne despué ca puliciá secreta stiʼ Alemania comunista ne nabé bininacaʼ laabe.

¹⁴ Gudíʼdiruʼ Rudolf lu xcaadxi guendanagana. Guti jñaabe de ti guendahuará láʼ tifus lu ti campu de concentración nazi. Ne bixhózebe biʼniʼ firmar ti guiʼchiʼ ra na cusaana de gaca testigu stiʼ Jiobá. Peru Rudolf qué nusaana fe stiʼ ne guca ni jma naguidxi. Bireesibe de cárcel, gúcabe superintendente de circuito. Despué guyebe Scuela stiʼ Galaad ne biseendacabe laabe Chile. Raqué gúcabe superintendente de circuito sti biaje ne bichaganabe ti misionera láʼ Patsy. Gúpacabe ti dxaapahuiiniʼ, peru guti baʼduhuiiniʼ que ti iza si de bichaganácabe. Gudiʼdiʼ si ti tiempuhuiiniʼ, Patsy laaca guti. Nápabe 43 si iza dxi gútibe. Neca gudiʼdiʼ Rudolf lu guiráʼ guendanagana riʼ, qué nusaanabe de ñúnibe ni na Jiobá. Dede dxi maʼ huaniisibe ne maʼ huarabe, nácarube precursor regular ne ancianu ndaaniʼ congregación. Zanda guidúʼndanu historia stibe lu revista La Atalaya 1 de agosto 1997, yaza 20 dede 25 ^[1] .

15. Bizeeteʼ lá caadxi hermanu ni cayuni xhiiñaʼ Jiobá né stale guendanayecheʼ neca canazanándacabe laacaʼ.

¹⁵ Tiempu riʼ, stale de ca hermanu stinu cayúnicaʼ xhiiñaʼ Jiobá né stale guendanayecheʼ neca canazanándacabe laacaʼ, peru cayuni huantarcaʼ. Gayuaa de laacabe deguyoo guidxi Eritrea, Singapur ne Corea del Sur. Xiñee yaʼ. Purtiʼ qué nácabe guinaazecabe guiibaʼ (Mateo 26:52). Casi ca hermanu Isaac, Negede ne Paulos maʼ zinecaʼ jma de gande iza ndaaniʼ ti cárcel guidxi Eritrea. Ne nabé huayuninácabe ca hermanu riʼ racá. Biaʼ tiempu riʼ qué huachaganácabe nin gápacabe bixhózecabe ne jñaacabe. Neca zacá, qué huacheenécabe Jiobá ne nápacabe ti fe naguidxi. Dede cani rapa ra cárcel ca runi respetarcaʼ laacabe. Lu jw.org zanda gúʼyanu foto stícabe, ra rihuinni cuxídxicabe neca cayacanácabe.

16. Xi zanda gúninu pa naguidxi nuu fe stinu.

¹⁶ Stale de ca Testigu cadi deguyoocaʼ ninca cadi cayuninácabe laacaʼ casi ca hermanu ni bizéʼtenu riʼ. Peru stale de laacaʼ cadíʼdicaʼ lu guendapobre, o cayacanacaʼ pur xiixa desastre natural o pur cayaca guerra. Xcaadxi rinándacaʼ ejemplu stiʼ Abrahán, Isaac, Jacob ne Moisés ne riguixhe íquecaʼ gúnicaʼ jma lu xhiiñaʼ Jiobá que gunibiáʼ binni laacaʼ o gápacaʼ cosa risaca. Xi racané ca hermanu riʼ gúnicaʼ xhiiñaʼ Jiobá ne guendanayecheʼ yaʼ. Guendarannaxhii ni nápacabe laabe ne fe naguidxi ni nápacabe lu guiráʼ ni maʼ bidii stiidxabe chigúnibe. Nánnacabe zudii Jiobá ti guendanabani ni qué zaluxe ca xpinni ni qué gusaana laa lu guidxilayú cubi stiʼ. Racá zaca puru si ni jneza. Biblia na: «Bidii lugar gabi Jiobá lii modo saluʼ lu neza stiluʼ, ne gupa confianza laabe, ne laabe zacanebe lii. Purtiʼ zanitilú ca binni malu, peru cani cabeza gulá Jiobá laacaʼ zacaacaʼ guidxilayú» (Salmo 37:5, 9).

17. a) Xi naquiiñeʼ gúninu pa racaláʼdxinu gápanu ti fe naguidxi. b) Xi zazíʼdinu lu sti tema ca.

¹⁷ Lu tema riʼ maʼ bíʼyanu fe nga chuʼnu seguru de ca cosa ni cabézanu. Pa racaláʼdxinu gápanu ti fe naguidxi la? naquiiñeʼ guni orarnu Jiobá ne cadi gusaananu de guiníʼ íquenu cani maʼ bidii stiidxabe. Zacá zanda guni huantarnu intiica guendanagana sin guchéʼnenu laabe. Lu sti tema ca zazíʼdinu xiruʼ riníʼ gápanu fe.