Nabé rié bixhozeʼ ne jñaaʼ yuʼduʼ ne mixaʼ, peru ora biziidicabe lu Biblia lá Dios nga Jehová, gúcacabe testigu stiʼ Jehová. Bisaana bixhozeʼ de guni bidóʼhuiiniʼ de yaga stiʼ Jesús ne biquiiñebe ni nánnabe de carpintería para gúnibe xagueteʼ lídxidu ti Yoo stiʼ Reinu. Ne laani nga primé Yoo stiʼ Reinu ni guyuu San Juan del Monte, ti guidxihuiiniʼ stiʼ Manila, capital stiʼ Filipinas.

Guleʼ lu iza 1952 ne bisiidiʼ bixhozeʼ ne jñaaʼ naa de Jehová, cásica bisiidicabe guidapaʼ bicheʼ ne guionnaʼ bizanaʼ ni jma huaniisi que naa. Ra maʼ ziniiseʼ, guluu bixhozeʼ gana naa guundaʼ ti capítulo stiʼ Biblia guiráʼ dxi. Ne laaca runi estudiarnebe naa caadxi de ca publicación stinu. Gatigá riguiaana ca superintendente de circuito ne ca betelita ra lidxi bixhozeʼ ne jñaaʼ. Guizáʼ guluu ca experiencia ni ruzeeteʼ ca hermanu que gana laadu. Ne ngue bicaa laadu quixhe íquedu gúnidu ni ná Jehová primé lu xquendanabánidu.

Ndiʼ nga herencia ni jma risaca bisaanané bixhozeʼ ne jñaaʼ naa. Lu iza 1971, guti si jñaaʼ de ti guendahuará, naa ne bixhozeʼ gúcadu precursor. Peru lu iza 1973, guti bixhozeʼ, dxi napaʼ gande iza. Bineʼ sentir nuaaʼ stubeʼ purtiʼ maʼ gúticabe. Peru «naaze dxiichiʼ esperanza» ni zeeda lu Biblia naa casi rinaaze dxiichiʼ ti ancla barcu ne gucaneni naa cadi chuaaʼ triste ne chuaaʼ gaxha de Jehová (Heb. 6:19). Qué nindaa de guti bixhozeʼ, biʼniʼ nombrárcabe naa precursor especial lu ti isla nuu zitu láʼ Coron, ni riaana ndaaniʼ guidxihuiiniʼ stiʼ Palawan.

Yendayaʼ lu isla Coron dxi napaʼ 21 iza. Cumu ndaaniʼ guidxi biniiseʼ la? guca nagana para naa chindezaʼ lu ti isla ra nabé rié biaaniʼ, ra huaxiéʼ nuu nisa, carru ne moto. Neca nuu chupa chonna hermanu raqué peru qué ñapaʼ compañeru precursor, ngue runi guyuu biaje stubeʼ yeguneʼ predicar. Primé beeu que, guizáʼ nagana gúcani para naa purtiʼ nabé bibanaʼ familia stinneʼ  ne ca xhamiguaʼ. Guiráʼ gueelaʼ maʼ daʼ nisa luáʼ ne ruuyadxieʼ ca beleguí nuu guibáʼ. Rudii gana naa gusaanaʼ asignación stinneʼ que ne guibiguetaʼ ra lidxeʼ.

Ora runeʼ sentir nuaaʼ stubeʼ, ruxheleʼ ladxiduáʼ nezalú Jehová. Rietenalaʼdxeʼ caadxi diidxaʼ sicarú ni biindaʼ lu Biblia ne lu ca publicación stinu. Nabé guníʼ iqueʼ ni ná lu Salmo 19:​14, ne bidieeʼ cuenta pa guiníʼ iqueʼ lu ca cosa ni riuulaʼdxiʼ Jehová, casi ca ni bizaʼbe ne ca cualidad stibe zeeda gácabe «Guié stinneʼ» ne «ni Rulá naa». Nabé gucané ti artículo ni biree lu revista La Atalaya naa, lani «Usted nunca está solo». a Biindaʼ ni chupa chonna biaje. Zanda peʼ guinieeʼ gucaneni naa guneʼ sentir casi ora naa ne Jehová si cayuidu diidxaʼ, risaca guiráʼ ni bizeeteʼ ca purtiʼ gucanécani naa guneʼ orar, guneʼ estudiar ne guiníʼ iqueʼ de laacani.

Cadi xadxí de yendayaʼ Coron biʼniʼ nombrárcabe naa ancianu, ne cumu naa si nga ancianu de raqué la? naa nga bitiideʼ Scuela stiʼ cani Rucheeche diidxaʼ, Guendaridagulisaa stiʼ Dxiiñaʼ stinu, Guendaridagulisaa ra riuundaʼ Biblia ne Estudiu stiʼ Torre stiʼ ni rapa. Ne laaca naa nga rutiideʼ discursu públicu guiráʼ semana. Nabé gucané ngue naa, purtiʼ maʼ qué ñapaʼ tiempu para guneʼ sentir nuaaʼ stubeʼ.

Guizáʼ galán raca predicar Coron, ne ra gudiʼdiʼ tiempu guyuunisa caadxi de ca estudiante stinneʼ. Peru laaca bidxieeluáʼ guendanagana raqué. Tobi de laacani nga guca nagana para naa chindayaʼ lu territorio stinneʼ, nuu biaje caquiiñeʼ sayaʼ interu galaa dxi sin gannaʼ paraa tideʼ gueelaʼ. Laaca napa congregación que stale islahuiiniʼ para chiguni predicar. Ne para chindayaʼ lúcani, runeʼ viajar lu lancha neca cundubi bi lu nisadóʼ que. ¡Peru ni jma feu nga qué gannaʼ xhuubaʼ! Neca zaqué qué nusaana Jehová de ñapa ne ñacané naa. Despué bidieeʼ cuenta caguu Jehová naa listu para sti asignación ni chiguicaaʼ, ra chigudxieeluáʼ guendanagana jma naroʼbaʼ.

Lu iza 1978 biseendacabe naa Papúa Nueva Guinea, ni riaana ladu guiáʼ de guidxi Australia. Naca Papúa Nueva Guinea ti guidxi ra nabé nuu stale dani ne naroʼbaʼ ni biaʼ naroʼbaʼ guidxi España. Neca ndaaniʼ guidxi que nabeza biaʼ chonna millón de binni, peru riníʼcabe jma de xhono gayuaa idioma raqué. Ni galán nga stale de ca binni que riniʼcaʼ diidxaʼ pidgin de Nueva Guinea, ne laca laani nga ni láʼ tok pisin.

Primé biseendacabe naa ti congregación lu diidxaʼ inglés ni nuu Port Moresby, capital stiʼ guidxi que. Peru cadi xadxí guyuaaʼ raqué purtiʼ despué maʼ guyaaʼ ti congregación ra riníʼcabe diidxaʼ tok pisin ne bizulú biziideʼ diidxaʼ que. Riquiiñeʼ guiráʼ ni rusiidicabe naa de diidxaʼ que ora maʼ cayuneʼ predicar, ne ngue gucané naa guiziideʼ ni jma nagueenda. Qué nindaa, maʼ randa rudieeʼ discursu lu diidxaʼ tok pisin. Ne caʼruʼ lica gusaaʼ ti iza de yendayaʼ Papúa Nueva Guinea, málasi bizaaca xiixa ni cadi cabezaʼ: biʼniʼ nombrárcabe naa superintendente de circuito ne bidiicabe naa chigannaʼ caadxi congregación lu diidxaʼ tok pisin ni nuu ndaaniʼ stale lugar stiʼ guidxi que.

Cumu nabé zitu nuu ti congregación de stobi la? bineʼ organizar stale asamblea de circuito ne siempre cayuneʼ viajar. Nacubi ga que, cumu  qué runebiaʼyaʼ guidxi que, nin idioma ne nin costumbre stiʼ ca binni que la? bineʼ sentir nuaaʼ stubeʼ. Ne cumu puru dani lugar que la? nagana para chaaʼ stiʼ congregación lu carretera. Ngue runi casi guiráʼ semana runeʼ viajar lu avión. Nuu biaje stubeʼ maʼ ziaaʼ lu ti avioneta ni maʼ caxidxilaa. Nabé bidxibeʼ guneʼ viajar lu avión cásica ridxibeʼ guneʼ viajar lu lancha.

Huaxiéʼ si binni napa teléfono. Ngue runi puru carta nga bicaaʼ ra nuu ca congregación que. Stale biaje rindayaʼ ca congregación que ante chindá ca carta stinneʼ, ngue runi rinabadiidxaʼ ca binni de raqué paraa nabeza ca hermanu. Ne ora ruuyaʼ laacabe, ridxaagalúcabe naa né stale cariñu ne ngue rusietenaláʼdxini naa xiñee cayuneʼ guiráʼ ca sacrificiu que. Stale biaje biiyaʼ modo gucané Jehová naa ne ngue gucané naa guneʼ sentir nuaaʼ gaxha de laabe.

Primé reunión guyaaʼ lu isla Bougainville, bidxiña ti guendaxheelaʼ nabé nayecheʼ ra nuaaʼ. Gunabadiidxacabe naa: «¿Rietenalaʼdxuʼ laadu la?». Rietenalaʼdxeʼ bineʼ predicar laacabe dxi nacubi yendayaʼ Port Moresby, ne bidieeʼ laacabe estudiu ti tiempu. Despué, maʼ ti hermanu de lugar que bidii laacabe estudiu. ¡Ne maʼ guyuunísacabe! Nga nga tobi de ca ndaayaʼ ni gucuaaʼ lu chonna iza guyuaaʼ Papúa Nueva Guinea.

Bireeʼ de isla stiʼ Coron lu iza 1978, peru ante guireeʼ de raqué binebiaʼyaʼ ti hermana láʼ Adel, nabé nayéchebe, rúnibe dxiiñaʼ ne rápabe familia stibe. Stúbibe cusiniisibe chupa xiiñibe —Samuel ne Shirley—, laaca rápabe jñaabe ne nácabe precursora regular. Lu beeu mayo de iza 1981, bibiguetaʼ Filipinas para guichaganaʼyaʼ Adel. Guirópadu bínidu xhiiñaʼ Jehová casi precursor regular ne gúpadu familia stidu.

Maʼ napaʼ ndaʼ familia, peru lu iza 1983 biguetaʼ biʼniʼ nombrárcabe naa precursor especial. Ne biʼniʼ asignárcabe naa isla Linapacan, ni nuu ndaaniʼ guidxi stiʼ Palawan. Neca nabé zitu lugar que, ne gastiʼ nin ti Testigu, guiradu yendézadu raqué. Dxi maʼ zinedu biaʼ ti iza raqué, guti jñaa Adel. Ti cosa ni gucané laadu cadi chúʼpedu triste nga guni predicardu. Gúpadu stale estudiu ni biʼniʼ progresar, ne qué nindaa bidúʼyadu caquiiñeʼ ti Yoo stiʼ Reinu raqué, ngue runi bicuidu tobi nahuiiniʼ. ¡Guizáʼ biéchedu ora bidúʼyadu deruʼ chonna iza de nuudu raqué, guyé ti gayuaa chii binni Conmemoración! Ne stale de laacaʼ guyuunísacaʼ despué de bireʼdu de raqué.

Lu iza 1986, biʼniʼ asignárcabe naa Culion, ti isla ra nuu ti colonia ra nabeza stale binni ni huará de lepra. Cadi xadxí de nuudu raqué, laaca biʼniʼ nombrárcabe Adel precursora especial. Nacubi ga que nabé bidxíbidu guni predicardu ca binni ni nabé maʼ bininá lepra laacaʼ. Ca publicador ni nabeza raqué gúdxicaʼ laadu stale de ca binni ni nabeza raqué maʼ gucuaacaʼ tratamientu ne nagana guicá guendahuará que laadu. Nuu de ca binni que maʼ riecaʼ reunión ra lidxi ti hermana. Qué nindaa, biaʼdu guibánidu raqué, ne nabé ratadxí ladxidoʼdo gusíʼdidu binni de esperanza ni zeeda lu Biblia. Ne laaca ratadxí ladxidoʼdo gusíʼdidu  ca binni ni napa guendahuará que purtiʼ runi sentircaʼ rucaanáʼ Dios laacaʼ ne rucaanáʼ binni laacaʼ. Guizáʼ galán runi sentirdu ora guidúʼyadu riecheʼ ca binni que gánnacaʼ zedandá dxi ziándacaʼ (Luc. 5:​12, 13).

¿Ximodo gunda biaa ca xiiñidu guibánicaʼ Culion yaʼ? Naa ne Adel biʼniʼ invitardu chupa hermana joven de isla stiʼ Coron guninecaʼ laadu xhiiñaʼ Jehová ti ganda gapa ca xiiñidu xhamígacaʼ. Guizáʼ nayecheʼ riuu Samuel, Shirley ne guiropaʼ hermana que ora racanecaʼ binni guiziidiʼ ni dxandíʼ. Rudiicabe estudiu stale xcuidi, naa ne Adel rusíʼdidu jñaa ne bixhoze ca xcuidi que. Guyuu biaje bidiʼdu estudiu biaʼ 11 familia. Qué nindaa stale binni biʼniʼ progresar ne gunda guca ti congregación nacubi.

Naa siaʼ ancianu lugar que. Ngue runi gunaba sucursal naa guneʼ ca reunión que guiráʼ semana, ra nuu xhono publicador ni nabeza Culion, ne laaca gunábacabe naa guneʼ ca reunión que ndaaniʼ ti guidxihuiiniʼ ni láʼ Marily ra nuu gaʼ publicador. Para chindadu ndaaniʼ guidxihuiiniʼ que caquiiñeʼ guni viajardu chonna hora lu nisadóʼ. Ne guiluxe si ca reunión que, guiráʼ ca familia que rizadu stale hora lu dani para chigudiʼdu estudiu ndaaniʼ ti guidxihuiiniʼ láʼ Halsey.

Ra gudiʼdiʼ tiempu stale binni beeda gaca Testigu lu isla stiʼ Marily ne Halsey, ngue runi bicuidu ti Yoo stiʼ Reinu lu cada tobi de ca isla que. Cásica bizaaca lu isla stiʼ Linapacan, ca hermanu ne ca binni ni riuulaʼdxiʼ guiziidiʼ bidiicaʼ stale material ne gucanecaʼ para cuini. Yoo stiʼ Reinu ni gurí lu isla stiʼ Marily gúcani para chupa gayuaa binni ne randa riroobani para gaca asamblea raqué.

Lu iza 1993, dxi maʼ huaniisi ca xiiñidu, naa ne Adel gúcadu superintendente de circuito ndaaniʼ guidxi Filipinas. Ne lu iza 2000, biʼniʼ invitárcabe naa chaaʼ Escuela de Entrenamiento Ministerial para guiziideʼ gacaʼ instructor lu scuela que. Bineʼ sentir qué zanda guneʼ dxiiñaʼ que, peru siempre guluu Adel gana naa ne bisietenaláʼdxibe naa zudii Jehová stipa naa para guneʼ ni (Filip. 4:13). Ne biaʼsi ngue ni ná Adel, purtiʼ neca huarabe cayuni cumplirbe asignación stibe.

 Lu iza 2006, dxi nacaʼ instructor, biiyacabe napa Adel ti guendahuará ni láʼ párkinson. Cadi cabézadu guizaaca ngue. Gudxeʼ laabe gusaanadu asignación que ti ganda gapaʼ laabe ne gaca tender guendahuará ni nápabe que. Peru laabe gúdxibe naa: «Biyubi ti doctor para gacané naa né guendahuará riʼ, ne nannaʼ zacané Jehová laanu para cadi gusaananu asignación riʼ». Xhoopaʼ iza bíʼniruʼ Adel xhiiñaʼ Jehová sin niníʼ cayuubaʼ. Qué nusaanabe de ñuni predicarbe neca zúbabe lu silla de rueda ne ra maʼ qué randa riniʼbe rudiibe comentariu nachucu, ti diidxaʼ o chupa diidxaʼ si, lu ca reunión que. Nabé biseendaʼ ca hermanu que mensaje para cuʼcaʼ gana laabe pur ejemplu galán stibe ra cayuni huantarbe ne bíʼnicabe ni dede dxi gútibe lu iza 2013. Jma de 30 iza bibaneniáʼ Adel juntu, ne gúcabe ti gunaa nabé nachaʼhuiʼ ne compañera stinneʼ. Peru ra gútibe, nabé guyuaaʼ triste ne bineʼ sentir nuaaʼ stubeʼ sti biaje.

Gudixhe iqueʼ cadi gusaanaʼ asignación ni napaʼ que purtiʼ ngue nga siempre ñuulaʼdxiʼ Adel ñuneʼ. Gudixhe iqueʼ guneʼ xhiiñaʼ Jehová ne ngue gucané naa para cadi guneʼ sentir nuaaʼ stubeʼ. Dede lu iza 2014 hasta lu iza 2017 bidiicabe naa chigannaʼ caadxi congregación lu idioma tagalo ni nuu ndaaniʼ ca guidxi ra rucueeza gobiernu dxiiñaʼ stinu. Ne despué, yegannaʼ xcaadxi congregación ra riníʼcabe idioma tagalo, ndaaniʼ guidxi Taiwán, Estados Unidos ne Canadá. Lu iza 2019, gucaʼ instructor stiʼ Escuela para Evangelizadores del Reino ni guca lu diidxaʼ inglés ndaaniʼ guidxi India ne Tailandia. Guizáʼ bisiecheʼ ca asignación que naa. Ora jma guneʼ xhiiñaʼ Jehová jma nayecheʼ riuaaʼ.

Guiráʼ lugar ra huayuneʼ servir guizáʼ riaaʼ ca hermanu ca. Nga runi raca nagana para naa gusaanaʼ laacabe. Peru maʼ biziideʼ gapaʼ confianza qué zusaana Jehová naa stubeʼ ora naquiiñeʼ gusaanaʼ ca hermanu ca. Stale biaje huayuuyaʼ modo racané Jehová naa, ne huayacaneni naa guzuubaʼ diidxaʼ ora guidxaa xiixa lu xquendanabaneʼ. Yanna nacaʼ precursor especial ndaaniʼ guidxi Filipinas. Guizáʼ nayecheʼ nuaaʼ ndaaniʼ congregación nacubi riʼ, nácacabe familia stinneʼ ni rapa naa né stale cariñu. Ne guizáʼ riecheʼ ora guuyaʼ zinanda Samuel ne Shirley ejemplu galán ni bisaana jñaacaʼ (3 Juan 4).

Maʼ gudideʼ stale guendanagana lu xquendanabaneʼ, biiyaʼ modo bininá guendahuará que xheelaʼ ne chaahuidugá bisirani stipa stibe. Ne ora guchaa xiixa lu xquendanabaneʼ la? runeʼ stipa chuaaʼ nayecheʼ. Maʼ bidieeʼ cuenta cadi zitu diʼ nuu Jehová «de cada tobi de laanu» (Hech. 17:27). Ne «lácaxa nachucu náʼ Jehová para cadi gulá» ne gudii stipa ca xpinni neca nuucaʼ ti lugar zitu (Is. 59:1). Guizáʼ rudieeʼ xquixe peʼ Jehová purtiʼ nácabe Guié stinneʼ ne siempre nuube gaxha de naa. Qué ñuu dxi ñuaaʼ stubeʼ.