1, 2. ¿Xiñee zanda guininu cásica bizaaca joven ni bizéʼtenu lu primé párrafo que nga ni bizaaca binni guidxilayú?

 GUNÍʼ ique ti joven ni nabé ricu bixhoze ne jñaa. Peru ti dxi málasi gúdxicabe laabe guti bixhózebe ne jñaabe lu ti accidente. Ne laaca gúnnabe maʼ qué gapa bixhózebe ne jñaabe bueltu purtiʼ gudxite cani, ne pur ngue guizáʼ nápacaʼ deuda. Pur ni bizaaca riʼ qué ñaananebe bueltu casi herencia, sínuque deuda nga biaananebe. Canabaʼ ca ni nuzaabiʼ bixhózebe ne jñaabe quíxebe laacaʼ, peru guizáʼ naroʼbaʼ deuda que dede qué zanda quíxebe ni.

² Zacá ga nga nuu binni guidxilayú. Bixhózenu ne jñaanu, Adán ne Eva, gúcacaʼ binni sin donda ne gulézacaʼ ndaaniʼ ti paraísu guizáʼ sicarú (Gén. 1:27; 2:​7-9). Ñanda nibánicaʼ sin qué ñuu dxi ñáticaʼ, nibánicaʼ nayecheʼ ne qué ñaadxaʼ gastiʼ laacaʼ. Peru málasi bidxaa guiráʼ ni. Bireecabe de ndaaniʼ paraísu que ne pur ngue maʼ qué nibánicabe sin qué ñuu dxi ñáticabe. ¿Xi herencia bisaananécabe ca xiiñicabe yaʼ? Biblia ná: «Pur ti hombre si [Adán] biuu pecadu ndaaniʼ guidxilayú, ne pur pecadu ca biuu guendaguti, ne zacá gucuá guendaguti que guiráʼ binni, purtiʼ maʼ biʼniʼ pecar guiracaʼ» (Rom. 5:12). Herencia ni bisaanané Adán laanu nga, pecadu ni riné laanu lu guendaguti. Pecadu ni biʼniʼ heredarnu riʼ zeeda gácani ti deuda guizáʼ naroʼbaʼ ne nin tobi de laanu qué zanda quixe ni (Sal. 49:8).

 3. ¿Xiñee ruchaaga Biblia ca pecadu stinu né ti deuda?

³ Bichaaga Jesús ca pecadu stinu casi «deuda» (Mat. 6:​12, nota; Luc. 11:4). Zanda guininu sicaríʼ: ora rucheʼnu o runi pecarnu, riaananenu ti deuda ni naquiiñeʼ quíxenu nezalú Jehová. Pa qué ñúnibe xiixa para nuxhiabe deuda riʼ  ñátinu ne qué ñápanu esperanza de nibáninu para siempre (Rom. 6:​7, 23).

 4. a) Pa qué ñuu tu ñacané laanu, ¿xi nizaaca de laanu yaʼ? (Salmo 49:​7-9). b) ¿Xi riníʼ diidxaʼ pecadu lu Biblia? (Laaca zanda gúʼyaluʼ cuadru ni láʼ « Pecadu»).

⁴ Laasinu qué zanda gúninu xiixa para guibiguetaʼ gápanu guiráʼ ni biniti Adán ne Eva (biindaʼ Salmo 49:​7-9). Pa qué ñuu tu ñacané laanu la? qué ñápanu esperanza de nibáninu sin qué chuʼ dxi gátinu ne de guiásanu de lade gueʼtuʼ. Ñátinu ne qué ñuu dxi nibáninu sti biaje, cásica rizaaca né ca manihuiiniʼ ca (Ecl. 3:19; 2 Ped. 2:12).

 5. ¿Xi maʼ biʼniʼ Jehová para gacané laanu guiaxa deuda ni bisaanané pecadu laanu? (Laaca zanda gúʼyaluʼ imagen ca).

⁵ Guiníʼ íquenu sti biaje joven ni bizéʼtenu lu primé párrafo que. ¿Ximodo ñuni sentirbe pa ñabi ti hombre ricu laabe laa quixe ca deuda ni nápabe yaʼ? Zándaca dede qué nidxélabe ximodo nudiibe xquixe peʼ laa ne ninabe ñacané hombre que laabe. Zaqueca nga zanda guininu biʼniʼ Jehová, Bixhózenu ni guizáʼ nadxii laanu, maʼ bidiibe laanu ti regalu ni riguixe deuda stiʼ pecadu ni bisaanané Adán laanu. Sicaríʼ bisiene Jesús xii nga regalu ca: «Purtiʼ nabé gunnaxhii Dios guidxilayú, nga runi bidii tobi lucha Xiiñiʼ, ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:16). Laaca racané regalu riʼ laanu ganda gaca xhamígunu Jehová.

 6. ¿Gunáʼ nga ca diidxaʼ ni zeeda lu Biblia ni chiguidúʼyanu lu artículo riʼ, ne xiñee?

⁶ ¿Ximodo zanda guicaanu ndaayaʼ pur regalu sicarú riʼ ti ganda gaca perdonar ca pecadu stinu yaʼ? Para guicábinu pregunta riʼ, lu artículo riʼ zadúʼyanu caadxi diidxaʼ ni zeeda lu Biblia, laacani nga: chuʼnu tobi si né Dios sti biaje, guixiá donda stinu, chúʼnenu Dios tobi si, ni biaxa pur laanu, guilanu ne gácanu nachaʼhuiʼ nezalú Dios. Ra guiníʼ íquenu lu ca diidxaʼ riʼ, zacaneni laanu cadi gusaana de gudiʼnu xquixe peʼ Jehová pur guiráʼ ni maʼ biʼniʼ para ganda gutiidilaʼdxiʼ stóndanu.

NI RACALAʼDXIʼ DIOS: CHUʼNU TOBI SI NÉ LAA STI BIAJE

 7. a) ¿Xiruʼ biniti Adán ne Eva? b) ¿Xi caquiiñeʼ gúninu laanu ca ni zaa de Adán ne Eva? (Romanos 5:​10, 11).

⁷ Qué nuniti si Adán ne Eva oportunidad de nibánicaʼ sin qué ñuu dxi ñáticaʼ lu guidxilayú riʼ, sínuque laaca biníticabe amistad sicarú ni gupanécabe Bixhózecabe, Jehová. Ante gucheecabe nuucabe ndaaniʼ familia stiʼ Dios (Luc. 3:38). Peru ra maʼ qué nuzuubacabe stiidxaʼ Jehová, bireecabe de ndaaniʼ familia  stiʼ. Ne bizaacani ante gápacabe xiiñicabe (Gén. 3:​23, 24; 4:1). Nga runi laanu, ca ni zanu de laacabe, caquiiñeʼ chuʼnu tobi si né Jehová stiʼ biaje (biindaʼ Romanos 5:​10, 11). Ni nuunu guininu nga, caquiiñeʼ guyúbinu gaca xhamígunu Jehová. Ti libru ná, lu diidxaʼ griegu, guibiguetaʼ chuʼnu tobi si né tuuxa riniʼni «gúninu stipa gaca xhamígunu ti enemigu stinu». Guizáʼ ridxagayaanu purtiʼ Jehová peʼ nga biyubi chuʼnu tobi si né laa sti biaje. ¿Ximodo bíʼnibe ni yaʼ?

MODO NEXHEʼ GÁCANI: GUIXIÁ STÓNDANU

 8. a) ¿Xi riníʼ guixiá stóndanu? b) ¿Xi riníʼ chuʼnu tobi si né Dios?

⁸ Guixiá stóndanu. Laani nga modo gudixhe Jehová para guibiguetaʼ gaca xhamígunu laa sti biaje. Ne para gácani naquiiñeʼ guidxaa ti cosa pur sti cosa ni biáʼqueca risaca. Zacá zanda guibiguetaʼ xiixa o chuʼ ti cosa lugar stiʼ sti cosa ni maʼ biniti o maʼ gucadé. Lu Stiidxaʼ Dios ni gucuá lu griegu riete diidxaʼ chúʼnenu Dios tobi si, casi ngueca ni né diidxaʼ guixiá stóndanu (Rom. 3:​25, nota). Para ganda gápanu paz né Dios ne gaca xhamígunu laa, caquiiñeʼ guyúbinu chuʼnu tobi si né laabe.

 9. ¿Xi gudixhe ique Jehová guni ti tiempu si para ganda guixiá stonda ca israelita?

⁹ Tiempu stiʼ ca israelita, gudixhe Jehová ti modo para ganda guixiá stóndacabe ti tiempu si, ne zaqué ganda gaca xhamígucaʼ laabe. Dxi Rixiá Pecadu, rácani ti biaje cada iza, rudii sumo sacerdote que maniʼ casi sacrificiu pur ca pecadu stiʼ guidxi que, ca sacrificiu riʼ qué ruxhiácani tobi si tiru ca pecadu stiʼ ca israelita. ¿Xiñee yaʼ? Purtiʼ jma huaxiéʼ risaca ti maniʼ que ti binni. Neca zaqué guná Jehová guni perdonar ca pecadu stiʼ ca israelita, peru naquiiñeʼ gusihuínnicaʼ dxandíʼ cayaca arrepentircaʼ ne gudiicaʼ ofrenda ne sacrificiu ni rinábabe (Heb. 10:​1-4). Ca ofrenda ni rudiicabe casi sacrificiu Dxi Rixiá Pecadu ne zaqueca xcaadxi sacrificiu ni rúnicabe rusietenaláʼdxini laacabe nácacabe binni ruchee ne caquiiñecabe ti modo para ganda guixiá stóndacabe, peru maʼ cadi ti tiempu si, sínuque gácani para siempre.

10. ¿Xi biʼniʼ Jehová para ganda guixiá pecadu stiʼ binni para siempre?

¹⁰ Yanna, ¿xi biʼniʼ Jehová para ganda guixiá ca pecadu stiʼ binni para siempre yaʼ? Bidiibe Xiiñibe ni jma nadxiibe para gudii «xpida ti biaje si para guáʼ pecadu stiʼ stale binni» (Heb. 9:28). Bidii Jesús «xquendanabani para guilá stale binni» (Mat. 20:28). Yanna, guidúʼyanu xii nga ni biaxa pur laanu.

NI BIAXA PUR LAANU

11. a) ¿Xi riníʼ diidxaʼ ni biaxa pur laanu? b) ¿Xii nga ni caquiiñeʼ para ganda guiaxa pur laanu ne ganda guilanu?

¹¹ Lu Biblia riete diidxaʼ ni biaxa pur laanu ne laani nga preciu ni riaxa para ganda chuʼnu tobi si né Dios ne guixiá stóndanu. a Para Jehová, laani nga caquiiñeʼ para ganda guibiguetaʼ ni biniti. Guietenaláʼdxinu biniti Adán ne Eva guendanabani sin donda sticaʼ ne laaca maʼ qué nibánicaʼ sin qué chuʼ dxi gáticaʼ lu guidxilayú riʼ. Nga runi, napa xidé guisaca ni biaxa ca biaʼca risaca ni biniti que (1 Tim. 2:6). Tuuxa si ni napa guionnaʼ cosa riʼ nga zanda quixe ni: gácabe ti binni sin donda, ganda guibánibe sin qué chuʼ dxi gátibe lu guidxilayú riʼ ne chuʼbe listu para gudiibe xquendanabánibe  pur laanu. Nga runi hombre ni napa guionnaʼ cosa riʼ zanda chuʼ lugar stiʼ hombre ni bichee que, gudii xquendanabani ne zacá guixiá stóndanu.

12. ¿Xiñee gunda gudixe Jesús pur laanu?

¹² Bidii Jesús xquendanabani para gunda gudixe pur laanu. Nga runi guidúʼyanu chonna razón ni rabi laanu xiñee bíʼnibe ni: primé, nácabe binni sin donda ne «qué nucheebe», guiropa, pur nga zanda guibánibe sin qué chuʼ dxi gátibe ne guionna, gunabe bisaanabe guibáʼ ne beeda gátibe pur laanu (1 Ped. 2:22; Heb. 10:​9, 10). Naca Jesús ti hombre perfectu, cásica guca Adán, ante guchee (1 Cor. 15:45). Pur gútibe gunda bixhiabe pecadu stiʼ Adán, ndiʼ riníʼ gunda gudíxebe ni biniti Adán (Rom. 5:19). Zacá nga beeda gaca Jesús «últimu Adán». Ne maʼ cadi caquiiñeʼ quixe sti hombre perfectu ni biniti Adán. Maʼ guti Jesús «ti biaje si ne maʼ que ziuu dxi gúnibe ni» (Heb. 7:27; 10:12).

13. ¿Xiñee maʼ gadxé modo rixiá stonda binni ne ni riaxa pur tuuxa yaʼ?

¹³ Yanna, ¿xiñee maʼ gadxé modo rixiá stonda binni ne ni riaxa pur tuuxa yaʼ? Randa rixiá stonda binni purtiʼ Dios nga runi xiixa para ganda guibiguetaʼ gaca xhamígunu laa. Ne ora caninu ni biaxa pur laanu la? laani nga ni guca para ganda guixiá stonda binni guidxilayú. Ne ni biquiiñeʼ para guiaxa pur laanu nga rini risaca stiʼ Jesús ni bixhii pur laanu (Efes. 1:7; Heb. 9:14).

NI RIBEENDUNU: GUILANU NE GÁCANU NACHAʼHUIʼ NEZALÚ DIOS

14. ¿Xi chiguidúʼyanu, ne xiñee?

¹⁴ ¿Xi ribeendunu pur rixiá stóndanu? Gadxé gadxé diidxaʼ riquiiñeʼ Biblia para guiníʼ de laacani. Neca ruluíʼ ngueca nga riníʼ ca diidxaʼ riʼ la? peru cada tobi de laacani rusihuinni xiixa ni maʼ gudixhe Jehová gaca para ganda guni perdonar laanu. Yanna, guidúʼyanu xii nga ca diidxaʼ ni caninu riʼ. Ra gánnanu xi riníʼcani zacanécani laanu guiénenu xi ribeendunu ora guni perdonar Jehová laanu.

15, 16. a) ¿Xi riníʼ diidxaʼ guilanu? b) ¿Xi runi sentirnu ra guiníʼ íquenu zanda guilanu lu náʼ pecadu ne guendaguti?

¹⁵ Lu Biblia diidxaʼ guilanu riniʼni cadi guzáʼbinu o guiaananu libre purtiʼ maʼ biaxa pur laanu. Sicaríʼ bisiene apóstol Pedro ni: «Maʼ bilá Dios laatu de guiráʼ guendaquéiquiiñeʼ ni bisaanané ca bixhozebiidatu laatu, ne bíʼnibe ni ra gudíxebe saca bilatu [literal, «guca rescatartu»]. Peru qué niguíxebe ni né xiixa ni rinitilú casi oro o plata, sínuque gudíxebe ni né rini stiʼ Cristu ni jma sicarú, ni zeeda gaca casi rini stiʼ ti dendxuhuiiniʼ ni nazaaca ne nayá» (1 Ped. 1:​18, 19; nota).

¹⁶ Cumu maʼ biaxa pur laanu, zanda guilanu de lu náʼ pecadu ne guendaguti ni nabe runiná laanu (Rom. 5:21). Guizáʼ rudiʼnu xquixe peʼ Jehová ne Jesús pur bilacaʼ laanu né rini risaca stiʼ Jesús (1 Cor. 15:22).

17, 18. a) ¿Xi riníʼ gácanu nachaʼhuiʼ nezalú Dios? b) ¿Xi ndaayaʼ ricaanu pur laani?

¹⁷ Gácanu nachaʼhuiʼ nezalú Dios riniʼni cadi guinábacabe laapenu quíxenu pur ca pecadu stinu ne guixiá guiráʼ ra maʼ bicheʼnu. ¿Ñee riníʼ nga qué rinanda Jehová ca ley stiʼ la? Coʼ. Ruuyaʼ Jehová laanu casi binni nachaʼhuiʼ, peru cadi caníʼ diʼ nga laapenu bíninu xiixa para guni merecernu ni o rudiibe lugar guchéʼnenu laabe. Racalaʼdxiʼ Jehová guni perdonar ca pecadu stinu purtiʼ rusihuínninu nápanu fe lu ni bíʼnibe ne ni biʼniʼ Jesús para ganda guixiá ca pecadu stinu ne zacá guilanu (Rom. 3:24; Gál. 2:16).

 ¹⁸ ¿Xi ndaayaʼ ricaanu purtiʼ ruuyaʼ Jehová laanu casi ti binni nachaʼhuiʼ? Maʼ bibí caadxi xpinni Cristu para guni mandárnecaʼ Jesús guibáʼ ne maʼ nácacaʼ xiiñiʼ Dios (Tito 3:7; 1 Juan 3:1). Maʼ guca perdonar ca pecadu sticaʼ; zeeda gácani casi ñaca qué nucheecabe. Nga runi, zanda guni mandárcabe lu Reinu stiʼ Dios (Rom. 8:​1, 2, 30). Xcaadxi xpinni Cristu nápacaʼ esperanza de guibánicaʼ sin qué chuʼ dxi gáticaʼ lu Guidxilayú riʼ ne maʼ beeda gácacabe xhamigu Dios. Ne laaca maʼ guca perdonar ca pecadu stícabe (Sant. 2:​21-23). Stale binni o gran muchedumbre ni guilá lu Armagedón, zápacaʼ esperanza de guibánicaʼ sin qué chuʼ dxi gáticaʼ (Juan 11:26). Ca binni ni «biʼniʼ ni jneza» ne «ca ni qué ñuni ni jneza» ziásacaʼ de lade gueʼtuʼ (Hech. 24:15; Juan 5:​28, 29). Ne despué guiráʼ xixé ca xpinni Jehová ni qué gucheené laa ni guibani lu Guidxilayú riʼ zácacaʼ «libre cásica ca xiiñiʼ Dios» (Rom. 8:21). Casi maʼ bidúʼyanu, racané modo gudixhe Jehová guixiá donda stinu para chuʼnu tobi si né Bixhózenu, Jehová. ¡Aque sicarú ndaayaʼ riʼ!

19. ¿Ximodo nuunu yanna pur ni biʼniʼ Jehová ne Jesús pur laanu? (Laaca zanda gúʼyaluʼ cuadru ni láʼ « Runi perdonar Jehová laanu»).

¹⁹ Dxandíʼ, laaca bizaacanu ni bizaaca joven ni biniti guiráʼ ni napa ne biaanané ti deuda guizáʼ naroʼbaʼ ni qué lica zanda quixe. Peru yanna maʼ gadxé si modo nuunu purtiʼ maʼ gucané Jehová laanu, pur modo gudíxhebe para guixiá donda stinu ne ni gudíxebe para guilanu. Racané fe ni nápanu Jesucristu ganda guilanu de lu náʼ pecadu ne guendaguti. Laaca zanda guixiá ca pecadu stinu, casi ñaca qué ñuu dxi ñúninu cani. Peru ni jma risaca nga zanda gaca xhamígunu Bixhózenu ni guizáʼ nadxii laanu ni nuu guibáʼ, Jehová.

20. ¿Xi zadúʼyanu lu sti artículo ca?

²⁰ Ora guiníʼ íquenu guiráʼ ni maʼ biʼniʼ Jehová ne Jesús pur laanu, guizáʼ rudiʼnu xquixe peʼ laacaʼ (2 Cor. 5:15). Pa qué ñacanécabe laanu qué ñápanu esperanza. Lu sti artículo ca, zadúʼyanu caadxi ejemplu ni zeeda lu Biblia ni zacané laanu guidúʼyanu ximodo peʼ nga runi perdonar Jehová laanu.