ARTÍCULO DE ESTUDIU 8
CANCIÓN 130 Guizíʼdinu gutiidiláʼdxinu
Ximodo zanda guni perdonarnu cásica runi Jehová
«Cásica biʼniʼ perdonar Jehová laatu, laatu laaca naquiiñeʼ gúnitu zacá» (COL. 3:13).
TEMA
Xi caquiiñeʼ gúninu para guni perdonarnu tuuxa ni bininá laanu.
1, 2. a) ¿Pora nga zándaca gaca nagana para laanu guni perdonarnu? b) ¿Ximodo bisihuinni Denise maʼ biʼniʼ perdonar?
¿ÑEE raca nagana para lii guni perdonarluʼ la? Para stale de laanu raca ni nagana ne jmaruʼ si pa guiníʼ o guni tuuxa laanu xiixa ni guniná laanu. Peru nuu xiixa ni zanda gúninu para maʼ cadi guidaʼnu xiana ne guni perdonarnu. Guzéʼtenu ni bizaaca ti hermana láʼ Denise. a Laa dxandíʼ peʼ biʼniʼ perdonar. Lu iza 2017 yeganna Denise ne familia stiʼ central mundial stiʼ ca testigu stiʼ Jehová. Laga zibíʼcabe bidxelasaa ti carru laacabe, biniti Denise guendabiaaniʼ ti ratu ne ora bibiguetaʼ ni gúnnabe nabé grave nuu ca xiiñibe ne guti Brian, xheelabe. Denise guníʼ: «Guizáʼ gucaná ladxiduáʼ dede qué nidxelaʼ xi ñuneʼ». Despué gunna Denise cadi naxudxi hombre ni gulá laacabe que ne cadi nuu drogadu. Ngue runi gunábabe Jehová gacané laabe gatadxí ladxidoʼbe ne cadi guidxiichinebe hombre que.
2 Hombre ni gulá laacabe que biʼniʼ acusárcabe laa casi tuuxa ni biiti ti binni neca cadi laa peʼ biyubi gúnini, ne pa guihuinni nápabe donda zuseguyoocabe laabe. Gudxi ti policía Denise pur ni guiniʼbe zahuinni pa ziuu hombre que carcel o pa coʼ. Laabe guniʼbe: «Gupa xidé bietenaladxeʼ ni bizaaca que ne raqué bineʼ sentir casi ñaca nuxhélecabe herida stinneʼ sti biaje ne nuchácabe ti sacu zidi luni». Chupa chonna semana despué maʼ zuhuaa Denise nezalú justicia ne maʼ nuu lista para guiníʼ nezalú hombre ni nabé bininá familia stiʼ. ¿Xi guniʼbe yaʼ? Gunábabe juez que guiá hombre que. b Biluxe guníʼsibe bizulú juez que cayuunaʼ ne guníʼ: «Maʼ 25 iza de nacaʼ juez ne qué huayuu dxi gunadiagaʼ guiníʼ tuuxa zacá nezaluáʼ ne guuyaʼ guinabaʼ familia stiʼ ni gucaná ca guiaʼyaʼ binni ni cayaca juzgar ca. Ndiʼ nga primé biaje gunadiagaʼ guiníʼcabe nadxiicabe tuuxa ni cayaca juzgar ne maʼ biʼniʼ perdonárcabe laa».
3. ¿Xi gucané Denise guni perdonar?
3 ¿Xi gucané Denise guni perdonar? Guníʼ íquebe modo runi perdonar Jehová (Miq. 7:18). Pa de guidubi ladxidoʼno gusisácanu modo runi perdonar Jehová laanu, zucaani laanu guni perdonarnu xcaadxi.
4. ¿Xi racalaʼdxiʼ Jehová gúninu? (Efesios 4:32).
4 Racalaʼdxiʼ Jehová guni perdonarnu xcaadxi binni cásica runi perdonarbe (biindaʼ Efesios 4:32). Ribézabe chuʼnu listu para guni perdonarnu ca binni ni runiná laanu (Sal. 86:5; Luc. 17:4). Lu artículo riʼ chiguidúʼyanu chonna cosa ni zacané laanu guni perdonarnu.
CADI GUCUEEZALUʼ NI RUNI SENTIRLUʼ
5. ¿Ximodo zándaca guni sentirnu ora guniná tuuxa laanu? (Proverbios 12:18).
5 Zándaca guiníʼ o guni tuuxa xiixa ni guniná laanu ne jmaruʼ si naná rácani pa ti xhamígunu o ti familia stinu gúnini laanu (Sal. 55:12-14). Nuu biaje ca yuubaʼ ni rápanu ca zanda guchaaganu cani casi ti golpe stiʼ ti espada (biindaʼ Proverbios 12:18). Zándaca nuu biaje gacaláʼdxinu gucueezanu o cadi gulábinu ni runi sentirnu peru pa gúninu zacá la? zeeda gácani casi ñaca nutaabicabe ti puñal laanu ne qué ñúninu gastiʼ para ñáxhanu ni. Zaqueca nga zazaaca pa qué guininu ni runi sentirnu, qué zianda herida stinu.
6. Ora guniná tuuxa laanu, ¿xii nga ni zándaca primé gúninu?
6 Ora guniná tuuxa laanu zándaca primé ni gúninu nga guidxiichinu ne nga nga ni ruzeeteʼ Biblia zanda guizaacanu. Peru laaca rudiini laanu conseju ti cadi guidaʼnu xiana (Sal. 4:4; Efes. 4:26). ¿Xiñee yaʼ? Purtiʼ stale biaje ni runi sentirnu ca rucaani laanu gúninu xiixa ne ora cadxiichinu qué ribeendunu ni galán (Sant. 1:20). Cadi guiaandaʼ lii: ziuu ora zadxiichiluʼ peru maʼ lu naluʼ riaana pa guidaaluʼ xiana.
Ziuu ora zadxiichiluʼ peru maʼ lu naluʼ riaana pa guidaaluʼ xiana
7. ¿Xi xcaadxi cosa zándaca guni sentirnu ora guniná tuuxa laanu?
7 Ora guninácabe laanu laaca zándaca guni sentirnu xcaadxi cosa ni guniná laanu. Guzéʼtenu ni bizaacaʼ ti hermana láʼ Ann. Laa guníʼ: «Dxi nahuiineʼ bisaana bixhozeʼ jñaaʼ ne bichaganabe gunaa ni gupa naa, bineʼ sentir nuaaʼ stubeʼ ne dxi maʼ gúpacabe xiiñicabe bineʼ sentir maʼ cadi de familia que naa ne bineʼ sentir guirutiʼ nadxii naa ne zaqué biniiseʼ, guníʼ iqueʼ guirutiʼ nadxii naa». Ti hermana láʼ Georgette guníʼ xi biʼniʼ sentir ora gunna bicheené xheelaʼ laa: «Gucadé ladxiduáʼ, amigu ndaʼ laadu dede dxi nahuiinidu. ¡Guirópadu gúcadu precursor ne laabe nga gúcabe compañeru stinneʼ!». Sti hermana láʼ Naomi guníʼ: «Qué ñuu dxi niníʼ iqueʼ pa zuniná xheelaʼ naa ora gúdxibe naa ruuyabe pornografía nagaʼchiʼ, bineʼ sentir bicheenebe naa ne bisiguiibe naa».
8. a) ¿Xiñee caquiiñeʼ guni perdonarnu? b) ¿Xi ndaayaʼ ricaanu ora guni perdonarnu? (Laaca zanda gúʼyaluʼ cuadru ni láʼ « ¿Laga pa bíʼnicabe lii xiixa ne dede yanna cayuniná ni lii yaʼ?»).
8 Qué zanda diʼ gucueezanu ni guiníʼ o ni guni xcaadxi peru ni zanda gúninu nga guiníʼ íquenu xi guicábinu o xi gúninu. Ni jma galán zanda gúninu nga guni perdonarnu. ¿Xiñee yaʼ? Purtiʼ nadxiinu Jehová ne racaláʼdxibe gúninu ni. Pa qué gusaana de guidxiichinu ne pa qué guni perdonarnu, zándaca gúninu xiixa guendahuati ne dede zanda guni huará ni laanu (Prov. 14:17, 29, 30). Guidúʼyanu ni guníʼ ti hermana láʼ Christine: «Ora gudieeʼ lugar guniná yuubaʼ ni napa naa maʼ huaxiéʼ ruxidxeʼ, maʼ intiica ni rahuaʼ ne huaxiéʼ raseʼ. Laaca raca nagana para naa gucueezaʼ ni runeʼ sentir ne pur laani maʼ huaxiéʼ galán runeʼ tratar xheelaʼ ne zaqueca xcaadxi binni».
9. ¿Xiñee naquiiñeʼ gusaana de guidaʼnu xiana?
9 Neca qué guinabaʼ binni ni bininá laanu ca guni perdonarnu laa. Peru zanda gúninu xiixa para maʼ cadi guniná ni bizaaca ca laanu. Georgette hermana ni bizeʼtenu lu párrafo 7 que guníʼ: «Neca gupa xidé gudiʼdiʼ tiempu, peru gunda bisaanaʼ de guidaa xiana ne cadi guidxiicheniáʼ binni ni guca xheelaʼ que ne despué gutadxí ladxiduáʼ». Ora gusaana de guidaʼnu xiana jma galán runi sentirnu ne zeeda gácani casi ti regalu ni rudiʼnu laca laanu, ne racaneni laanu cadi guiníʼ íquenu ni bizaaca ne guibiguetaʼ chuʼnu nayecheʼ (Prov. 11:17). Yanna, zándaca maʼ guniʼluʼ xi cayuni sentirluʼ peru caʼruʼ chuʼluʼ listu para guni perdonarluʼ. Guidúʼyanu guiropa cosa ni zanda gacané laanu guni perdonarnu.
BISIAANDAʼ NI BIZAACA
10. ¿Xiñee caquiiñeʼ tidiʼ tiempu para guianda ra gucananu? (Laaca zanda gúʼyaluʼ ca imagen ca).
10 ¿Xi zacané lii gusiaandaluʼ ni bizaaca ne maʼ cadi guniná ni lii? Primé, gudiʼnu lugar tidiʼ tiempu. Guzéʼtenu ti ejemplu. Guníʼ ique ti binni ni gupa ti accidente ne nabé gucaná, neca maʼ guyebe ra nuu doctor peru caquiiñeʼ tidiʼ tiempu para guiándabe. Zacaca nga caquiiñeʼ tidiʼ tiempu para guianda ra gucananu ne chuʼnu listu para guni perdonarnu de guidubi ladxidoʼno (Ecl. 3:3; 1 Ped. 1:22).
Ora rapa tuuxa ti accidente naquiiñeʼ chuʼ tu gapa laa ne laaca caquiiñeʼ tidiʼ tiempu para guianda. Ne ngaca nga rizaaca ora racaná ladxidóʼ tuuxa. (Biiyaʼ párrafo 10).
11. ¿Ximodo racané oración laanu guni perdonarnu?
11 Guiropa, biʼniʼ orar Jehová ne gunabaʼ laabe gacanebe lii guni perdonarluʼ. c Ann, hermana ni bizéʼtenu lu párrafo 7 que guníʼ ximodo gucané oración laa. Laabe guniʼbe: «Gunabaʼ Jehová guni perdonar laadu pur ca cosa ni gúnidu o ni qué ñúnidu jneza, ne despué bicaaʼ ti carta para bixhozeʼ ne xheelaʼ ra bicaaʼ maʼ bineʼ perdonar laacaʼ». Guníʼ Ann nagana ngue ni biʼniʼ peru bizeetebe: «Bineʼ stipa chinandaʼ ejemplu stiʼ Jehová ne ribezaʼ ganda gacané nga bixhozeʼ ne xheelaʼ para guiziidicaʼ de Jehová».
12. ¿Xiñee caquiiñeʼ gápanu confianza Jehová ne cadi ni runi sentirnu? (Proverbios 3:5, 6).
12 Guionna, gupa confianza Jehová ne cadi guiníʼ íqueluʼ jma jneza nga ni runi sentirluʼ (biindaʼ Proverbios 3:5, 6). Jehová nga jma nanna xii nga ni jma galán para laanu (Is. 55:8, 9). Qué zanábabe laanu gúninu xiixa ni guniná laanu. Nga runi rinábabe laanu guni perdonarnu, pa gúninu ni zanda chuʼnu seguru zabeendunu ni galán (Sal. 40:4; Is. 48:17, 18). Peru pa guiníʼ íquenu jma jneza ni runi sentirnu zándaca qué ziuu dxi guni perdonarnu (Prov. 14:12; Jer. 17:9). Naomi, hermana ni bizéʼtenu lu párrafo 7 que guníʼ: «Nacubi ga que guníʼ iqueʼ napaʼ razón para cadi guneʼ perdonar xheelaʼ pur biiyaʼ pornografía, ridxibeʼ guninabe naa sti biaje o gusiaandabe pabiáʼ bininabe naa ne riníʼ iqueʼ napaʼ razón para guneʼ sentir zaqué purtiʼ riene Jehová naa, bidieeʼ cuenta neca riene Jehová ni runeʼ sentir peru qué riníʼ nga riuuláʼdxibe ni. Nánnabe xi cayuneʼ sentir ne nánnabe caquiiñeʼ tidiʼ tiempu para tidiʼ yuubaʼ ni napaʼ peru racaláʼdxibe guneʼ perdonar». d
BICHAA NI RUNI SENTIRLUʼ PUR XIIXA GALÁN
13. Casi ná Romanos 12:18-21, ¿xi caquiiñeʼ gúninu?
13 Ora guni perdonarnu tuuxa ni nabé bininá laanu cadi caquiiñeʼ si guicaanu decisión maʼ cadi guininu de ni bizaaca, sínuque caquiiñeʼ gúnirunu xiixa. Pa ti hermanu nga ni bininá laanu la? ni racaláʼdxinu nga guni chaahuinu guendanagana ni napanenu laabe (Mat. 5:23, 24). Lugar de guidxiichinu la? guianu ne lugar de guidaʼnu xiana guni perdonarnu (biindaʼ Romanos 12:18-21; 1 Ped. 3:9). Yanna, ¿xi zanda gacané laanu yaʼ?
14. ¿Xi caquiiñeʼ gúninu stipa gúninu, ne xiñee?
14 Gúninu stipa guidúʼyanu binni ni bininá laanu ca casi ruuyaʼ Jehová laa, laabe ruuyabe ca cualidad galán ni napa binni ca (2 Crón. 16:9; Sal. 130:3). Dxandíʼ, pa guyúbinu cualidad galán ni napa tuuxa la? zadxélanu ni, peru pa guyúbinu ra cuchee la? Puru nga si nga zadúʼyanu. Pa guidúʼyanu ca cualidad ni napa xcaadxi la? qué zaca nagana para laanu guni perdonarnu laacaʼ. Guzéʼtenu ni bizaaca Jarrod, laa guníʼ: «Qué raca nagana para naa guneʼ perdonar ti hermanu ora guiníʼ iqueʼ guiráʼ ca cosa galán ni runi lugar de guiníʼ iqueʼ ra bicheebe».
15. ¿Xiñee galán gábinu tuuxa maʼ biʼniʼ perdonarnu laa?
15 Nuu sti cosa ni zanda gúniluʼ. Gudxi binni ca maʼ biʼniʼ perdonarluʼ laa. ¿Xiñee risaca gúninu ndiʼ? Guidúʼyanu ni guníʼ Naomi, laabe nabe: «Gunabadiidxaʼ xheelaʼ naa, “¿Ñee maʼ biʼniʼ perdonarluʼ naa la?”. Ora gucalaʼdxeʼ ñabeʼ laabe “Maʼ bineʼ perdonar lii”, guʼgaʼ ti bola yanneʼ ne qué ñanda ninieeʼ ni. Bidieeʼ cuenta caʼruʼ guneʼ perdonar laabe de guidubi ladxiduáʼ. Ra gudiʼdiʼ tiempu maʼ gunda gudxeʼ laabe “Maʼ bineʼ perdonar lii”. Qué ñuu dxi niníʼ iqueʼ pabiáʼ zacané ca diidxaʼ que naa ne xheelaʼ. Laabe biʼniʼ sentirbe casi ora nibeecabe xiixa nanaa lu guiabe, dede bidá nisa lube ne naa guizáʼ gutadxí ladxiduáʼ ne gupa confianza laabe sti biaje ne dede dxi que beeda gaca xhamígudu sti biaje».
16. ¿Xi maʼ biziidiluʼ lu artículo riʼ?
16 Racalaʼdxiʼ Jehová guni perdonarnu (Col. 3:13). Neca zacá, zándaca gaca nagana para laanu gúninu ni. Peru zanda gúninu ni pa chinándanu guionnaʼ cosa ni maʼ bidúʼyanu. Primé, cadi gucueezanu ni runi sentirnu. Guiropa, gusiáʼndanu ni bizaaca. Ne guionna, guchaʼnu ni runi sentirnu pur xiixa galán. (Laaca zanda gúʼyaluʼ cuadru ni láʼ: « Chonna cosa ni zacané lii guni perdonarluʼ»).
GUNÍʼ IQUE XI NDAAYAʼ RICAALUʼ PUR RUNI PERDONARLUʼ
17. ¿Xi ndaayaʼ ricaanu ora runi perdonarnu?
17 Nápanu stale razón para guni perdonarnu. Guidúʼyanu caadxi de laacani. Primé, rinándanu ejemplu stiʼ Bixhózenu Jehová ne rusiéchenu laa purtiʼ laa nabé riá binni (Luc. 6:36). Guiropa, rusihuínninu rudiʼnu xquixe peʼ Jehová purtiʼ runi perdonar laanu (Mat. 6:12). Ne guionna, jma qué zaca huaranu ne zápanu xhamígunu ni nadxii laanu.
18, 19. ¿Xi zándaca guizaaca pa guni perdonarnu?
18 Ora runi perdonarnu, zanda guizaaca cosa ni cadi cabézanu. Guidúʼyanu ni bizaaca Denise, hermana ni bizéʼtenu ra bizulú artículo riʼ. Qué gánnabe pa gudixhe ique hombre bidxelasaa laacabe que guuti laca laa despué de juiciu que. Peru guizáʼ bidxagayaa hombre que modo biʼniʼ perdonar Denise laa. Ngue runi bizulú biʼniʼ estudiarbe Biblia né ca Testigu.
19 Zándaca ni jma nagana gúninu lu xquendanabáninu nga guni perdonarnu tuuxa. Peru laaca zanda gácani tobi de ca cosa ni jma gusiecheʼ laanu (Mat. 5:7). Nga runi gúninu stipa chinándanu ejemplu stiʼ Jehová ne dxandíʼ peʼ guni perdonarnu.
CANCIÓN 125 «Dichoso ni riá stobi»
a Maʼ bidxaa lá caadxi binni.
b Ora guizaaca xiixa casi ni bizéʼtenu riʼ cada xpinni Cristu naquiiñeʼ guicaa decisión xi naquiiñeʼ guni.
c Biiyaʼ ca videu stiʼ ca canción Hay que perdonar, Gusiaandaʼ ne ¡Sti biaje maʼ xhamígunu! ni nuu lu jw.org.
d Ti pecadu nga guʼyaʼ tuuxa pornografía ne zándaca nabé guninani xheelabe peru qué ruzeeteʼ diʼ Biblia nácani ti razón para gaca divorciar tuuxa de xheelaʼ.
