¿ÑEE huayápaluʼ guendanagana ne huayuni sentirluʼ qué gápaluʼ tu gacané lii la? Zándaca chuʼ biaje guni sentirnu nuunu stúbinu o chuʼnu triste, purtiʼ nabáninu ti tiempu nagana. Peru laasinu qué zanda gudxíʼlunu ca guendanagana ca (2 Tim. 3:1). Biblia ná galán gápanu xhamígunu ni dxandíʼ zacané laanu ora gápanu «xiixa guendananá» (Prov. 17:17).

Gupa apóstol Pablo xhamigu ni yené lu ca viaje ni biʼniʼ ne nabé gucanecaʼ laabe (Col. 4:​7-11). Dxi bideguyoobe Roma gucané ca xhamígube laabe lu caadxi cosa ni qué ñanda ñúnibe. Casi Epafrodito la? yené caadxi cosa ni caquiiñebe ni biseendaʼ ca hermanu de Filipos para laabe (Filip. 4:18). Ne Tíquico yesaana ca carta ni bicaabe ra nuu ca congregación que (Col. 4:7). a Neca biseguyoocabe Pablo ra lidxi ne despué yenécabe laabe cárcel, peru gunda gucanebe ca congregación que purtiʼ gucané ca xhamígube laabe. Yanna, ¿laanu yaʼ? ¿Ximodo zanda gusihuínninu dxandíʼ xhamígunu tuuxa?

Tiempu riʼ nuu stale hermanu ni dxandíʼ xhamígunu ne nuucaʼ listu para gacanecaʼ laanu. Guidúʼyanu ni bizaaca Elísabet, ti precursora regular ni nabeza España. Dxi gúnnacabe napa jñaabe cáncer ne maʼ qué zanda guianda, guyuu ti hermana ni bisihuinni dxandíʼ xhamiga laabe ne qué nusaana laabe stúbibe. Stale biaje ruseendaʼ mensaje ra nuube ra cá caadxi textu ni uguu gana laabe. Sicaríʼ guníʼ Elísabet: «Gucané ca mensaje que naa cadi guneʼ sentir nuaaʼ stubeʼ ne bidiicani stipa naa para gudxieeluáʼ guendanagana que» (Prov. 18:24).

Jma zaca xhamígunu ca hermanu pa gacanenu laacaʼ gúnicaʼ xhiiñaʼ Jehová. Ti cosa ni zanda gúninu nga gacanenu ti hermanu ni maʼ huaniisi para cheʼ reunión o chiguni predicar. Nga zacané laanu para ugúʼsaanu gana laanu (Rom. 1:12). Peru laaca nuu hermanu ni qué randa riree de ra lidxi purtiʼ huará. ¿Ximodo zanda gusihuínninu dxandíʼ xhamígunu laacabe yaʼ?

Nuu hermanu qué randa riecaʼ reunión purtiʼ huaracaʼ. Ne nga peʼ nga ni bizaaca David, gudxi doctor laabe nápabe cáncer ne pur ngue gucuaabe quimioterapia jma de xhoopaʼ beeu. Ne biaʼ tiempu que, laabe ne xheelabe guca conectárcabe ca reunión que pur videollamada.

 ¿Ximodo gucané ca hermanu que David ne Lidia yaʼ? Ora riluxe ca reunión que ridxiña ca hermanu que para ugapadiuxi laacabe pur videollamada. Ne laaca nuu hermanu ruseendaʼ mensaje ra nuucabe ra cayuni felicitarcaʼ laacabe pur comentariu ni rudiicabe lu reunión. Zaqué biʼniʼ sentir David ne Lidia nadxii ca xhamígucaʼ laacaʼ.

¿Xiñee qué gúninu stipa guni predicarnenu ti hermanu ni qué zanda guiree de ra lidxi yaʼ? Pa gúninu ni, zucaʼnu laacabe guni sentírcabe nadxiinu laacabe (Prov. 3:27). Zanda guni predicarnenu laacabe pur teléfono o pur carta. Laaca zanda quixhe ique ca ancianu iquiiñecaʼ videollamada ora gaca reunión para predicación ti ganda gaca conectar ca hermanu. Guizáʼ gucané ndiʼ David ne Lidia. Sicaríʼ guníʼ David: «Neca gaca conectarsidu ne grupu de predicación ra nuudu para gucaʼdiágadu ca sugerencia ni rudiicabe ne gucaʼdiágadu oración ni rúnicabe, guizáʼ riguuni gana laadu». Pa nápanu ti estudiu, galán guidúʼyanu pa zanda chinenu laabe ra lidxi tuuxa hermanu ni qué randa riree para guidúʼndanenu laabe né hermanu ca.

Ora ribeenu tiempu para guni predicarnenu ca hermanu riʼ randa ridúʼyanu ca cualidad galán ni nápacabe ne jma raca xhamígunu laacabe. Ora ridúʼyanu modo riquiiñecabe Stiidxaʼ Dios para chindácabe ndaaniʼ ladxidóʼ tuuxa, rucaani laanu guidxagayaanu ni rúnicabe. Pa guyúbinu gacanenu ca hermanu riʼ, jma zápanu xhamígunu (2 Cor. 6:13).

Guizáʼ biecheʼ Pablo purtiʼ qué nusaana Tito laa ora gupa guendanagana (2 Cor. 7:​5-7). Rusiidini laanu zanda quixhedxinu ladxidóʼ ca xhamígunu né ni gábinu laacaʼ ne zaqueca ra chuʼnu gaxha de laacabe ne gacanenu laacabe lu xiixa ni caquiiñecabe (1 Juan 3:18).

Naca ca hermanu ne ca hermana de Rusia ti ejemplu galán para laanu purtiʼ nabé racanésaacaʼ. Guidúʼyanu ni bizaaca Serguéi ne xheelaʼ, Tatiana. Ti dxi yechuu policía ra nuucabe ne bidxieenacaʼ ra lídxicabe ne despué yenecaʼ laacabe para cueecaʼ diidxaʼ laacabe. Primé bindaacabe Tatiana ne biguetaʼ ra lidxi. Serguéi guníʼ: «Casi peʼ yendá Tatiana ra lídxidu, guyé ti hermana nadxibalú yeganna laabe. Ne maʼ despué guyé xcaadxi hermanu para gacanecaʼ laabe guidopa guiráʼ ni bicheeche ca policía que».

Laaca guníʼ Serguéi: «Tobi de ca textu ni riuuladxeʼ nga Proverbios 17:17 ni ná: “Ni dxandíʼ xhamígunu la? guiráʼ ora nadxii laanu, ne zácabe bíchinu o ti bizánanu ora nápanu xiixa guendananá”. Yanna huaxa maʼ bidieeʼ cuenta dxandíʼ ni ná ca diidxaʼ riʼ. Nannaʼ stubeʼ siaʼ qué ñanda ñuneʼ huantar guendanagana riʼ. Maʼ bidii Jehová naa stale xhamiguaʼ ni guizáʼ nadxibalú ne qué huayuu dxi gusaanacaʼ naa». b

Lu ca dxi nagana riʼ, caquiiñeʼ gápanu xhamígunu ni dxandíʼ zacané laanu. Ne lu gran tribulación, jma zaquíʼñenu laacabe. Nga runi, dede ca yanna, gúninu stipa gusihuínninu nácanu ti amigu ni dxandíʼ racané (1 Ped. 4:​7, 8).