¿Paraa zanda guidxélanu esperanza?

Bixuiʼlú málasi gulezadxí reló stiluʼ ne cuyúbiluʼ tu guni chaahuini. Maʼ bíʼyaluʼ nuu stale anunciu ne gadxé gadxé ni riníʼ cada tobi de laacani, peru málasi gúnnaluʼ tobi de ca vecinu stiluʼ nga bizáʼ reló ni nápaluʼ ca, ne maʼ gúdxibe lii zanda guni chaahuibe ni sin quíxeluʼ laabe gastiʼ. Yanna huaxa maʼ nánnaluʼ paraa ndiʼ chineluʼ reló stiluʼ, ¿njaʼ?

Zeeda gaca reló ca casi esperanza ni nápaluʼ, pa gúʼyaluʼ maʼ cará esperanza stiluʼ casi rizaaca né stale binni tiempu riʼ, ¿tu ra nuu zanda cheluʼ para gacané lii yaʼ? Stale binni riníʼ zanda gacanecaʼ lii guni chaahuiluʼ ca guendanagana stiluʼ, peru qué randa racanecaʼ binni ne gadxé gadxé ni riniʼcaʼ. ¿Xiñee qué guidxíñaluʼ ra nuu ni bizáʼ binni para gapa esperanza yaʼ? Biblia ná «cadi zitu diʼ nuube de cada tobi de laanu» ne nuube listu para gacanebe laanu (Hechos 17:27; 1 Pedro 5:7).

¿Xi riníʼ gapa binni esperanza?

Maʼ gadxé esperanza ni riete lu Biblia de esperanza ni napa ca doctor, ca científicu ne ca psicólogo tiempu riʼ. Ora riete diidxaʼ esperanza lu Biblia caniʼni gacalaʼdxiʼ o cueza tuuxa guizaaca xiixa nabé galán. Ora napa tuuxa esperanza racalaʼdxiʼ guizaaca xiixa galán ne runi cré dxandíʼ zazaaca ni. Laaca nuu prueba ni rusihuinni dxandíʼ esperanza ni riete lu Biblia ne cadi ti bacaandaʼ ni.

Casi ngueca nga esperanza ne fe purtiʼ laaca naquiiñeʼ gápanu prueba ni gusihuinni dxandíʼ ni (Hebreos 11:1). Peru Biblia ná maʼ gadxé nga fe ne esperanza (1 Corintios 13:13).

Guzéʼtenu ti ejemplu, ora rinábanu ti xhamígunu ni nápanu confianza gacané laanu la? nápanu esperanza zúnibe ni ne nápanu fe xhamígunu purtiʼ runibiaʼnu laabe, nacháʼhuibe ne maruʼ huayacanebe laanu. Casi ngueca nga fe ne esperanza peru gadxé cani. Yanna, ¿xi gúninu para gápanu esperanza zacané Dios laanu yaʼ?

Ni zacané laanu gápanu esperanza

Zanda gápanu confianza Jehová Dios. Tiempu gucuá Biblia binibiáʼcabe laabe casi esperanza stiʼ Israel (Jeremías 14:8). Gucané Jehová guidxi Israel gápacaʼ confianza laabe ne pur ngue beeda gácabe esperanza sticaʼ. Gucanebe guidxi riʼ gaca esperanza sticaʼ naguidxi ne bíʼnibe ni ra biʼniʼ cumplirbe guiráʼ ca promesa bíʼnibe laacaʼ. Ne Josué, ni gulí Jehová para gaca xaíque stiʼ guidxi Israel guníʼ: «Laatu nanna dxíchitu de guidubi ladxidoʼto ne guidubi xhiálmatu huayaca cumplir guiráʼ ca promesa ni huayabi Jehová, Dios stitu laatu. Maʼ guca cumplir guirácani para laatu. Nin tobi de laacani qué lica huachee» (Josué 23:14).

Dede yanna qué huachaa Jehová neca maʼ gudiʼdiʼ stale iza. Lu Biblia zeeda ca promesa stibe ne laaca riete ximodo huayaca cumplir cani. Ora ridúʼndanu ca promesa stibe lu Biblia, nuu tiru ridúʼyanu casi ora maʼ guca cumplir cani.

Ni bizéʼtenu riʼ zacané ni laanu gápanu confianza guiráʼ ni riete lu Biblia. Ora guidúʼndanu xi racalaʼdxiʼ Dios guni pur binni, zaca esperanza stinu jma naguidxi. Apóstol Pablo bicaa: «Guiráʼ ni gucuá dxiqué, gucuá ni para gusiidiʼ ni laanu, ti ora guni huantarnu ne quixhedxí Stiidxaʼ Dios ladxidoʼno la? gápanu esperanza» (Romanos 15:4).

¿Xi esperanza cudii Dios laanu?

¿Cadi dxandíʼ ora gatiʼ ti familia stinu nga jma caquiiñenu esperanza la? Peru stale binni ora gatiʼ ti familia stiʼ jma raca nagana para laacaʼ gápacaʼ esperanza. Nabé feu guendaguti purtiʼ neca guxóʼñenu de laani, ziuu dxi zugaandani laanu. Nga runi, Biblia ná laani nga «últimu enemigu» stinu (1 Corintios 15:26).

Yanna, ¿xi esperanza napa ca ni maʼ gutiʼ? Lu versículo riʼ ná guendaguti nga «últimu enemigu» stiʼ binni, peru laaca ruzeeteʼ zedandá dxi zanitilú enemigu riʼ. Jma napa Jehová poder que guendaguti ne stale biaje maʼ bisihuínnibe ni. ¿Ximodo yaʼ? Ra maʼ gundísabe binni de lade gueʼtuʼ. Lu Biblia ná biquiiñeʼ Dios poder stiʼ para gundisaʼ gaʼ binni de lade gueʼtuʼ.

Ti biaje bidii Jehová poder Jesús para gundisaʼ Lázaro, xhamigu ni nabe nadxii, ni maʼ ziné tapa gubidxa de guti. Qué ñuni Jesús milagru riʼ nagaʼchiʼ, sínuque bíʼnibe ni nezalú stale binni (Juan 11:38-48, 53; 12:9, 10).

Zándaca guinabadiidxaluʼ xiñee gundísacabe ca binni que de lade gueʼtuʼ pa despué bióʼxhocaʼ ne gúticaʼ. Peru racané ca relatu riʼ laanu chuʼnu seguru dxandíʼ zusibani Dios ca familia stinu ni maʼ gutiʼ ne laani nga tobi de ca esperanza jma galán nápanu.

Jesús guníʼ: «Naa nga rusibaneʼ gueʼtuʼ, ne naa nga guendanabani» (Juan 11:25). Chigudii Jehová poder laabe para gusibánibe guiráʼ xixé binni ni maʼ guti. Laaca guníʼ Jehová: «Zedandá dxi zunadiaga guiráʼ ca ni nuu ndaaniʼ baʼ voz stibe [stiʼ Cristu] ne zareecaʼ» (Juan 5:28, 29). Nga runi, guiráʼ ca ni maʼ guti, nápacaʼ esperanza guiásacaʼ de lade gueʼtuʼ para guibánicaʼ ndaaniʼ Guidxilayú riʼ dxi gácani ti Paraísu.

Guníʼ profeta Isaías ca diidxaʼ riʼ para gusiene ximodo nga guiasa binni de lade gueʼtuʼ: «Zabani ca gue’tu’ stiluʼ. Ziasa ca gueʼtuʼ stinneʼ. ¡Laguibani ne lagucaa ridxi tantu cayéchetu, laatu ca ni nuu ndaaniʼ yu! Purtiʼ gupa stiluʼ zeeda gaca casi gupa stiʼ siadóʼ, ne guidxilayú zudii lugar guiree ca gue’tu’ para guibánicaʼ» (Isaías 26:19).

¿Cadi dxandíʼ guizáʼ galán promesa riʼ la? Cadi cayuni sufrir ca binni ni maʼ guti, sínuque caziiláʼdxicaʼ ndaaniʼ baʼ sticaʼ ne nuucaʼ ndaaniʼ xquendabiaaniʼ Jehová (Lucas 20:37, 38). Cásica riecheʼ ti familia ora maʼ chigale ti baʼduhuiiniʼ, zacaca ziecheʼ binni ora gúʼyacaʼ guiasa ca familia sticaʼ de lade gueʼtuʼ. Nga runi, neca gatiʼ binni, nuu ti esperanza galán para laacaʼ.

¿Ximodo racané esperanza stiʼ Dios laanu?

Pablo bisiidiʼ pabiáʼ risaca esperanza stinu. Guniʼbe ti parte nabé risaca de armadura stinu nga cascu (1 Tesalonicenses 5:8). ¿Xiñee guniʼbe zacá yaʼ? Purtiʼ tiempu gucuá Biblia, ora rié ca soldadu que lu guerra, primeru riguu íquecaʼ ti gorro de guidi ne despué ti cascu de guiibaʼ. Racané cascu riʼ laacabe para cadi gacaná íquecabe ora chinécabe xiixa golpe. Cásica rapa ti cascu ique ti soldadu, zacaca zapa esperanza stinu xquendabiaaninu ne modo riníʼ íquenu. Pa gaca esperanza stinu naguidxi zuni cumplir Jehová guiráʼ ca promesa stiʼ la? qué zadxíbinu ne qué ziuʼnu xizaa, sínuque zudxíʼlunu ca guendanagana stinu. ¿Cadi dxandíʼ guiranu racaláʼdxinu cuʼ íquenu cascu riʼ la?

Biquiiñeʼ Pablo stiʼ ejemplu para gusiene ximodo racané esperanza stiʼ Dios laanu. Sicaríʼ bicaabe: «Naaze dxiichiʼ esperanza riʼ xpídanu, cásica rinaaze dxiichiʼ ti ancla barcu» (Hebreos 6:19). Stale biaje bilahua barcu ra zeʼ Pablo, ngue runi gúnnabe pabiáʼ risaca ti ancla. Ora nadipaʼ peʼ ti tormenta, rusábacabe ancla que ndaaniʼ nisadóʼ ne ora maʼ nuuni de xagueteʼ la? rinaaze dxichi ni barcu que, nga racané cadi cheʼ barcu que guriá nisadóʼ, guidxelasaani guié ne gaca dé ni.

Pa guni crenu dxandíʼ zuni cumplir Dios ca promesa stiʼ, zacané esperanza stinu laanu gudxíʼlunu ca tiempu nagana riʼ. Maʼ biʼniʼ prometer Jehová laanu zedandá dxi maʼ qué zuni sufrir binni, maʼ qué ziuu guerra, cosa malu ne maʼ qué zati binni (biiyaʼ recuadru ni zeeda lu yaza 10). Pa guinaazeʼ dxíchinu esperanza stinu, zacaneni laanu cadi guireʼnu gana, gúninu ni riuulaʼdxiʼ Dios ne cadi gúninu ca cosa cadi jneza runi binni.

Lii laaca zanda gápaluʼ esperanza ni cudii Jehová, laaca racaláʼdxibe guibániluʼ casi maca gudixhe íquebe ne nápabe gana guilá «guiráʼ xixé binni». ¿Xi naquiiñeʼ gúninu para guilanu yaʼ? Primé cosa ni naquiiñeʼ guni binni nga «guiziidiʼ chaahuicaʼ ni dxandíʼ» (1 Timoteo 2:4). Runi invitardu lii guiziidiluʼ jma de ni rusiidiʼ Stiidxaʼ Dios. Esperanza cudii Dios laanu, jma risácani que intiica esperanza ni rudii binni guidxilayú.

Cadi guireʼnu, zanda gudii esperanza ni cudii Dios laanu stipa para ugaandanu guiráʼ ni racaláʼdxinu, peru gaca si ni ni riuulaʼdxiʼ Dios (2 Corintios 4:7; Filipenses 4:13). ¿Cadi nga nga esperanza ni jma racaláʼdxinu la? Nga runi, pa guni sentirluʼ caquiiñeʼ gápaluʼ ti esperanza ne cuyúbiluʼ ni la? cadi guireeluʼ gana, zanda guidxélaluʼ ni.

[Imagen ne cuadru]

Nuu razón para gápanu esperanza

Ca textu zeeda lu Biblia riʼ, zacanécani laanu gápanu esperanza:

◼ Cayuni prometer Dios laanu zabáninu nayecheʼ

Lu Stiidxabe ná zaca Guidxilayú riʼ ti paraísu, zabani binni tobi si ne nayecheʼ (Salmo 37:11, 29; Isaías 25:8; Apocalipsis 21:3, 4).

◼ Qué rusiguii Dios.

Nanaláʼdxibe guiráʼ tipu guendarusiguii. Cumu naca Jehová ti Dios nayá la? nga runi qué rusiguii (Proverbios 6:16-19; Isaías 6:2, 3; Tito 1:2; Hebreos 6:18).

◼ Napa Dios stale poder.

Jehová nga Dios ni jma napa poder, nga runi gastiʼ qué zanda gucueeza laabe para guni cumplirbe guiráʼ ca promesa stibe (Éxodo 15:11; Isaías 40:25, 26).

◼ Racalaʼdxiʼ Dios guibáninu sin qué chuʼ dxi gátinu.

(Juan 3:16; 1 Timoteo 2:3, 4.)

◼ Nanna Dios zúninu ni jneza.

Ruuyabe ca cualidad ne ca cosa galán ni rúninu, ne qué ruuyasibe ca cosa cadi jneza rúninu ne ra rucheʼnu (Salmo 103:12-14; 130:3; Hebreos 6:10). Nanna Dios zanda gúninu ni jneza ne riéchebe ora rúninu ni (Proverbios 27:11).

◼ Racané Dios laanu ugaandanu ni maʼ gudixhe íquenu.

Cadi guidxíbinu purtiʼ cudii Dios laanu espíritu santu, stipa jma nadipaʼ ni nuu (Filipenses 4:13).

◼ Dios si nga naquiiñeʼ gápanu esperanza.

Caquiiñeʼ gápanu confianza Jehová purtiʼ qué ziuu dxi uguube laanu triste (Salmo 25:3).

[Imagen]

Cásica rapa ti cascu ique binni, zacaca rapa esperanza ca xquendabiaaninu

[Imagen]

Cásica ti ancla, pa naaze dxíchinu esperanza stinu, zabáninu galán

[Ra gucuaacabe imagen]

Por gentileza de René Seindal/Su concessione del Museo Archeologico Regionale A. Salinas di Palermo