Ti amigu falsu

Nápaluʼ ti «xhamíguluʼ» ni binibiaʼluʼ dxi nácaluʼ joven. Cadi gucanésibe lii guni sentirluʼ maʼ huaniisiluʼ, sínuque laaca gucanebe lii guidxaaguʼ xcaadxi binni, racanebe lii ora nuuluʼ estresadu, nga runi cada gápaluʼ guendanagana ruyúbiluʼ laabe.

Peru ra gudiʼdiʼ tiempu bidiiluʼ cuenta xi guiráʼ cosa malu rúnibe. Guiráʼ ra chebe riuuláʼdxibe chinebe lii, neca pur laabe nuu lugar qué rinácabe chuʼluʼ. Zándaca pur laabe ruluíʼ maʼ huaniisiluʼ, peru pur laabe raca huaraluʼ. Ne ni jma feu nga laapebe huabá’nabe xpuéltuluʼ.

Ma’ gucaláʼdxiluʼ gusaanaluʼ laabe, peru laabe qué nabe. Ma’ ruluíʼ laabe nga xpixuaanaluʼ. Ne yanna riʼ, pa ñanda si maʼ qué ñunibiaʼluʼ laabe.

NGA PEʼ nga ni rizaaca stale binni ni riguʼbaʼ gueza. Guidúʼyanu ejemplu stiʼ Earline, ti gunaa ni guduʼbaʼ gueza cincuenta iza. Laabe gúnibe: «Ma’ galán runeʼ sentir guinaazeʼ ti gueza, que chuʼ binni ra nuaaʼ. Biiyaʼ ni casi xhamiguaʼ ne ruluíʼ laasi ni nga amigu ni gupaʼ». Peru despué bidiibe cuenta cadi ti amigu falsu si nga gueza, sínuque peligroso ni. Bizaaca Earline casi ni bizéʼtenu ra bizulú artículo riʼ, peru despué biziidibe qué riuulaʼdxiʼ diʼ Dios cubaʼ binni gueza, purtiʼ runi biidiʼ ni cuerpu stinu ni bidii Dios laanu, ngue runi bisaanabe de cúbabe ni (2 Corintios 7:1).

Zacaca biʼniʼ ti hombre ni láʼ Frank, bisaanabe de cúbabe gueza para gusiéchebe Dios. Peru chupa gubidxa de bisaanabe de cúbabe ni, guyuube xagueteʼ yoo stibe ne canayúbibe ca cabu gueza ni biaba ra zuxeleʼ pisu de tabla ni napa yoo stibe. Laabe gúnibe: «Ora bidieeʼ cuenta cagaañeʼ layú ne cuyubeʼ ca cabu gueza ni qué lica gannaʼ padxí bizaabeʼ, laaca naa bibixhila’dxeʼ ni cayuneʼ. Ngue bicaaʼ naa gusaana ni, ne maʼ qué ñuuruʼ dxi niguʼbaʼ gueza».

¿Xiñee guizáʼ nagana nga gusaana binni de cubaʼ gueza yaʼ? Guidúʼyanu xi caadxi razón rudii ca investigador ca. 1) Ca sustancia ni napa gueza ca rucaacani binni gapa viciu cubaʼ ni, casi ca droga ca. 2) Gadxe si segundu rindaa para chindá nicotina ni rigúʼbacabe ca lu cerebru stícabe. 3) Ti binni ni riguʼbaʼ gueza nabé risácani para laa, nga runi rigúʼbabe ni ora tiica si, casi ora cayobe, ora cayeʼbe, ora cayuiʼbe diidxaʼ, ora nápabe estrés o lu xcaadxi cosa ni rúnibe.

Neca zacá, zanda gusaana de cúbaluʼ gueza, casi biʼniʼ Earline ne Frank ni. Nga runi, pa racaláʼdxiluʼ gusaanaluʼ de cúbaluʼ ni la? biindaʼ ca artículo riʼ purtiʼ laacani zacané ca ni lii guchaaluʼ modo nabániluʼ.