Ndiʼ nga remediu stini
Millón de binni rinanda ca conseju zeeda lu Biblia ni maʼ bidúʼyanu raríʼ ne maʼ gucaneni laacaʼ cueecaʼ prejuiciu ndaaniʼ ladxidoʼcaʼ. Ni dxandíʼ la? stúbisinu qué zanda diʼ gusaananu guiráʼ prejuiciu nápanu. ¿Nuu ti remediu para laani la?
Ti gobiernu ni que ruchee
Biaʼ tiempu ni maʼ gudiʼdiʼ, qué huayanda cuee gobiernu guiráʼ prejuiciu ni nuu. ¿Ñee riníʼ nga guirutiʼ zanda guni ni la?
Para ganda guiree ca prejuiciu ca la? naquiiñeʼ guni ti gobiernu ndiʼ:
-
1. Cuʼni gana binni gapa deseu de guchaa ni riníʼ ique ne ni runi sentir pur xcaadxi.
-
2. Gacaneni laanu gusiáʼndanu guiráʼ ni rucaa laanu guni tratarnu xcaadxi mal.
-
3. Gápani xaíque ni guni tratar binni sin prejuiciu.
-
4. Gacaneni binni de guidubi guidxilayú chuʼ tobi si.
Cayabi Biblia laanu maʼ gudixhe Dios ti gobiernu ni zuni de guiráʼ nga. Laani nga «Reinu stiʼ Dios» (Lucas 4:43).
Ndiʼ nga ni chigudii gobiernu riʼ laanu.
1. Galán ni zusiidini laanu
Zaziidiʼ binni ni cueza lu Guidxilayú xii nga ni jneza (ISAÍAS 26:9).
«Ora runi tuuxa ni jneza zatadxí ladxidóʼ, ne ora dxandíʼ peʼ runi tuuxa ni jneza gastiʼ zuchiiñaʼ laa ne qué ziuu dxi guidxibi» (ISAÍAS 32:17).
¿Xi riníʼ ni? Zusiidiʼ Reinu stiʼ Dios binni xii nga ni jneza. Ora nánnanu xii nga ni jneza ne ni cadi jneza ruchaa modo ridúʼyanu xcaadxi. Guiráʼ binni zudii cuenta ni jma jneza nga gannaxhiinu guiráʼ xixé binni.
2. Zabee Reinu stiʼ Dios guiráʼ injusticia
Zuchaa Dios «nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ. Maʼ gudiʼdiʼ guiráʼ ni guyuu dxiqué» (APOCALIPSIS 21:4).
¿Xi riníʼ ni? Zunduuxe Reinu sti Dios guiráʼ yuubaʼ ni nuu pur injusticia. Ne guiráʼ ca ni maʼ bininácabe laacaʼ maʼ qué zápacaʼ xi pur guni sentircaʼ xiana.
3. Ti buen líder
«Qué zuni juzgarbe binni pur cani gúʼyasibe, qué zuni corregirbe pur ca ni gunadiágasibe. Jneza zuni juzgarbe ca pobre, ne jneza zuni corregirbe binni guidxilayú» (ISAÍAS 11:3, 4).
¿Xi riníʼ ni? Zuni mandar Jesucristu, Rey stiʼ Reinu stiʼ Dios, Guidxilayú riʼ dede guibáʼ ne zúnibe ni né justicia ne sin gúnibe menu xcaadxi. Qué rusisaca Jesús ti nación jma que stobi, ne guiráʼ binni guidxilayú zuzuuba stiidxabe.
4. Chuʼnu tobi si
Cayacané Reinu stiʼ Dios chuʼ binni tobi si ora quixhe íquecaʼ gúnicaʼ xiixa, gannaxhiisaacaʼ, cadi chuʼcaʼ divididu ne chuʼcaʼ tobi si lu ni riníʼ íquecaʼ (FILIPENSES 2:2).
¿Xi riníʼ ni? Qué zaníʼ si ca binni ni chiguni mandar Reinu stiʼ Dios nuucaʼ tobi si. Dxandíʼ peʼ ziuucabe tobi si purtiʼ zannaxhiisaacabe.
Laaca zándaca ziuuláʼdxiluʼ ca ndiʼ
TORRE STIʼ NI RAPA
Ñee zadxiña dxi gusaana binni de guni menu stobi la?
Cayacané Biblia binni de gadxé gadxé guidxi cadi gúnicabe menu xcaadxi, guidúʼyanu chonna ejemplu. Peru ¿padxí zusaana binni de guni menu xcaadxi yaʼ?
