Peru pa qué iquiiñeʼ ca guendaxheelaʼ ca tecnología jneza la? zanda gápacaʼ guendanagana casi ca ni chiguzéʼtenu riʼ:

• Maʼ huaxiéʼ tiempu zápacaʼ para chuʼcaʼ juntu.

• Qué zalúxecaʼ dxiiñaʼ sticaʼ ne zúnicaʼ ni ra lídxicaʼ.

• Qué zápacaʼ confianza xheelacaʼ ne dede zucheenecaʼ laacabe.

CUEECAʼ TIEMPU PARA CHUʼCAʼ JUNTU

Ti hombre láʼ Michael guníʼ: «Nuu biaje ora nuaaʼ stubeʼ né xheelaʼ casi ñaca para laabe cadi nuaaʼ racá. Cumu jma nuube lu teléfono stibe la? nuu biaje rábibe naa “biʼniʼ disculpar naa qué huacabeʼ ca mensaje ni biseendacabe ra nuaaʼ”». Sicaríʼ guníʼ Jonathan, ti hombre ni maʼ bichaganáʼ: «Zándaca chuʼ ti guendaxheelaʼ ti lugar si, peru guni sentircaʼ casi ñaca nuucaʼ gadxé gadxé ladu».

GUNÍʼ IQUE NDIʼ: ¿Pabiáʼ tiempu rinieeʼ teléfono o ruseendaʼ mensaje lugar de niquiiñeʼ tiempu stinneʼ para ñuaaʼ juntu né xheelaʼ? (EFESIOS 5:33).

DXIIÑAʼ STICAʼ

Nuu binni runi dxiiñaʼ guidubi dxi ne nuu xcaadxi la? nápacaʼ tiempu para gúnicaʼ sti cosa, peru neca zacá, maʼ cá íquecaʼ dxiiñaʼ sticaʼ neca maʼ nuucaʼ ra lídxicaʼ. Ti hombre láʼ Lee guníʼ: «Neca maʼ guleeʼ tiempu para chuaaʼ juntu né xheelaʼ, nabé raca nagana para naa gusaanaʼ teléfono stinneʼ purtiʼ racalaʼdxeʼ gannaʼ tu guniʼné naa o tu biseendaʼ mensaje ra nuaaʼ». Ne ti gunaa láʼ Joy, guníʼ: «Runeʼ dxiiñaʼ ra lidxeʼ ne pur nga racá nagana para naa gannaʼ pora gusaanaʼ de guneʼ ni. Nga runi runeʼ stipa quixheʼ chaahueʼ tiempu stinneʼ».

GUNÍʼ IQUE NDIʼ: Ora caniʼné xheelaluʼ lii, ¿ñee rucaadiaga chaahuiluʼ laabe la? (LUCAS 8:18).

CADI GUCHEENECAʼ XHEELACAʼ

Según ti encuesta ná stale guendaxheelaʼ ridinde diidxacaʼ pur ni rudxiibaʼ xheelacaʼ lu ca red social. Ne 10% de ca guendaxheelaʼ riʼ guniʼcaʼ bidxiibacaʼ xiixa lu ca red social sin ñanna xheelacabe ni.

Stale binni riníʼ ti peligru ca red social ca purtiʼ zanda gucaa ca ni binni ni maʼ bichaganáʼ gapa jnadxii. Nga runi, stale abogadu nacaʼ nabé raca divorciar binni pur ni runi xheelacaʼ lu ca red social.

GUNÍʼ IQUE NDIʼ: ¿Ñee rucaachiluʼ ca mensaje ni ruseendaluʼ ra nuu sti binni ni cadi xheelaluʼ la? (PROVERBIOS 4:23).

BIIYAʼ XII NGA NI JMA RISACA

Ti binni ni qué ró guendaró ni gacané laa la? jma nagueenda raca huará. Ngaca nga rizaaca né ti binni ni qué ribee tiempu para chuʼ juntu né xheelaʼ, rápacaʼ guendanagana lu xquendaxheelacaʼ (Efesios 5:28, 29).

Laguuyaʼ ca sugerencia ni ñuuláʼdxitu ñúnitu o lagucaa ni rábitu zanda gúnitu ti cadi guniná tecnología xquendaxheelatu.

• Goto juntu neca ti biaje lu ti dxi.

• Gusaanatu ca dispositivu electrónicu stitu ti lugar ti guiniʼtu diidxaʼ.

• Cueetu tiempu para gúnitu xiixa especial para laatu.

• Gusuiʼtu ca dispositivu electrónicu stitu huaxhinni ne cadi iquiiñetu ca ni.

• Cueetu neca 15 minutu guiráʼ dxi para guiniʼtu diidxaʼ sin iquiiñetu ca dispositivu electrónicu stitu.

• Quíxhetu ti hora gusuiʼtu Internet stitu.