«Laguni perdonar de guidubi ladxidoʼto ni guni stobi laatu» (COLOSENSES 3:13).

Cumu binni ruchee laanu la? nuu biaje ruchiichinu tuuxa ne ruchiichicabe laanu, nga runi caquiiñeʼ guni perdonársaanu. Ora runi perdonarnu stobi la? maʼ qué ridaʼnu xiana né laabe, qué ruquíxenu ni rúnicabe laanu ne laaca qué rábinu laacaʼ paraa cucheecaʼ (Romanos 12:17). Peru ¿xi zanda gúniluʼ pa bíʼnibe lii xiixa ni nabé bininá lii ne qué ganda guni perdonarluʼ laabe yaʼ? Óraca jma galán nga guiníʼneluʼ binni ca stúbisitu ne guiniʼtu né respetu, cadi guiaandaʼ lii ni racaláʼdxiluʼ nga gaca chaahuiʼ guendanagana ni nápatu ne cadi guihuinni tu laa napa razón (Romanos 12:18).

«Lagusihuinni humilde laatu ora guiníʼ íquetu jma risaca xcaadxi que laatu» (FILIPENSES 2:3).

Ziuulaʼdxiʼ binni guidxaaga laanu pa gácanu humilde ne guni respetarnu laacaʼ. Pa gácanu nachaʼhuiʼ né laacabe la? zudiicabe cuenta qué zúninu xiixa para si guninanu laacabe. Peru pa guiníʼ íquenu jma risácanu que  xcaadxi ne guyúbinu gaca puru si ni rábinu la? qué ziuʼnu tobi si ne zadinde diidxanu. Laaca qué zaná binni guidxaaga laanu ne qué zápanu xhamígunu.

«Biaʼca risaca guiráʼ binni nezalú Dios, ne runi aceptar ca ni ridxibi laa ne rúnicaʼ ni jneza, intiica guidxi laacaʼ» (HECHOS 10:34, 35).

Biaʼca risaca guiráʼ binni para Dios ne qué rúnibe menu laacaʼ purtiʼ si de sti guidxi, sti raza o riniʼcaʼ sti idioma. Biblia ná: «De ti hombre si biree guiráʼ binni ni nuu ndaaniʼ guiráʼ guidxi» (Hechos 17:26). Guiráʼ binni nuu lu guidubi Guidxilayú ti familia si laanu. Nga runi, ora qué rúninu menu binni ne runi tratarnu laacaʼ galán, riuunenu laacaʼ nayecheʼ ne laaca riecheʼ Dios ni bizáʼ laanu.

«Lagaca nadóʼ» (COLOSENSES 3:12).

Pa gácanu nadóʼ, qué zadxiichinu nagueenda, ziuulaʼdxiʼ binni guidxaaga laanu, zápacaʼ confianza laanu ne zaguu jnézacaʼ laanu purtiʼ nánnacaʼ qué ridxiichinu nagueenda. Ne pa guidxiichi tuuxa né laanu, guicábinu laa né diidxaʼ nadóʼ ti cadi gaca xiroo guendanagana ca. Proverbios 15:1 ná: «Ora ricabi tuuxa né diidxaʼ nadóʼ la? rindeteʼ xiana, peru ora guiníʼ ti diidxaʼ ni runiná la? guizáʼ ruchiichi».

«Jma nayecheʼ riuu binni ora rudii que ora ricaa» (HECHOS 20:35).

Stale binni ruyubi puru si para laa ne racalaʼdxiʼ gapa stale cosa, peru pa gudiʼnu de ni nápanu, ziuʼnu jma nayecheʼ (Lucas 6:38). Ca binni ni rudii de ni napa ribánicaʼ jma nayecheʼ purtiʼ nadxiicaʼ binni jma que ca cosa ni nápacaʼ, nga runi rudiicabe xquixe peʼ ora rudii tuuxa laacabe xiixa (Colosenses 3:15). Guníʼ ique ndiʼ: «¿Tu ñuuladxeʼ nidxaagaʼ? ¿Tuuxa ni ruyubi puru si para laa ne qué rudii xquixe peʼ la? o ti binni ni rudii de ni napa ne rudii xquixe peʼ?». Cadi guiaandaʼ laanu ni jma risaca nga gúninu xiixa ni ñuuláʼdxinu ñuni tuuxa pur laanu (Mateo 7:12).