Gunibiaʼnu Dios racané ni laanu guidxíñanu laabe
Dios ni bizáʼ laanu cadi ti stipa si laabe, sínuque dxandíʼ nuube, racaláʼdxibe gunibiaʼnu ne gaca xhamígunu laabe, laaca maʼ gúdxibe laanu ximodo nácabe (Juan 17:3; Santiago 4:8).
Napa Dios ni bizáʼ laanu lá
«Ti ganna binni laluʼ nga Jehová, lii si nga ni nuu jma luguiáʼ lu guidubi naca guidxilayú» (SALMO 83:18).
Rusiidiʼ Biblia Jehová nga tobi lucha Dios ni dxandíʼ, laa bizáʼ universu ne guendanabani, nga runi laasibe nga naquiiñeʼ guni adorarnu (Apocalipsis 4:11).
Naca Jehová ti Dios ni rannaxhii
«Dios nga guendarannaxhii» (1 JUAN 4:8).
Riquiiñeʼ Jehová Biblia ne guiráʼ ca cosa ni maʼ bizáʼ para gusiidiʼ laanu ximodo naca, tobi de ca cualidad ni jma rusihuinni Jehová nga guendarannaxhii, ne guiráʼ ni rúnibe, rúnibe ni né guendarannaxhii, nga runi, ra jma gunibiaʼnu Jehová, jma zannaxhiinu laa.
Runi perdonar Jehová
«Lii nácaluʼ ti Dios ni nuu dispuestu guni perdonar» (NEHEMÍAS 9:17).
Nanna Jehová binni ruchee laanu ne nuu dispuestu guni perdonar laanu, pa guinábanu perdón laabe ne gúninu stipa pur gusaana de gúninu ca cosa ni qué riuuláʼdxibe, zuni perdonarbe ne qué zuni castigarbe laanu (Salmo 103:12, 13).
Racalaʼdxiʼ Jehová guni orarnu laa
«Nuu Jehová gaxha de guiráʼ ca ni rucaa ridxi laa [...]; rucaadiágabe ora guinábacaʼ gacanebe laacaʼ» (SALMO 145:18, 19).
Qué racalaʼdxiʼ Jehová gúninu xiixa ritual o iquiiñenu xiixa cosa para guni adorarnu laa, rucaadiágabe ca oración stinu cásica rucaadiaga ti padre ca xiiñiʼ.
