Lu tobi de ca viaje ni biʼniʼ organizar ti scuela, guyuu tu biʼniʼ acusar caadxi jovenhuiiniʼ, purtiʼ biʼniʼ agredircaʼ sexualmente ti xcompañérucaʼ. Guirácabe runi estudiárcabe ndaaniʼ ti scuela privada ni napa stale prestigiu ni nuu Canadá. Guca si nga, ti hombre láʼ Leonard Stern bicaa lu periódicu Ottawa Citizen: «Cadi tiisi nuu xpiaaniʼ ca joven, o purtiʼ biʼniʼ estudiarcaʼ stale o pur nápacaʼ bueltu qué riníʼ nga qué zúnicaʼ cosa malu».

Ne bicaaruʼ Stern: «Ni jma jneza ne ni jma risaca ñuni ca padre nga nusiidicaʼ xiiñicaʼ xii nga ni jneza ne ni cadi jneza. Peru, ni dxandíʼ nga zuluáʼ stale tu laa jma riuu xizaa pur cuee ca xiiñiʼ ti calificación galán ne gápacaʼ ti dxiiñaʼ ra guiáxacaʼ stale».

Dxandíʼ, nabé risaca nga guni estudiar binni, peru educación ni rudii ca scuela ca, neca galán ni, qué zanda diʼ gacané ni ti binni para gudxiilú ca deseu malu o gucaanáʼ ca cosa malu ni nuu ndaaniʼ ladxidóʼ. ¿Xi rusiidiʼ laanu gúninu ni jneza lu xquendanabáninu o gápanu guía moral yaʼ?

Biblia zeeda gaca casi ti espeju. Ora ridúʼndanu ni, racané ni laanu guidúʼyanu gunáʼ ca debilidad stinu ne ca cosa ni qué randa rúninu (Santiago 1:23-25). Laaca racané Biblia laanu guchaʼnu modo laanu ne gúninu stipa pur gápanu cualidad ni racané para cadi tinde binni ne chuʼcaʼ tobi si, laaca ni nga gácanu nachaʼhuiʼ, gácanu amable, gápanu paciencia, gucueezanu laca laanu ne gápanu amor. Ne Biblia peʼ rabi laanu amor ca nga ni jma racané binni chuʼ tobi si (Colosenses 3:14). De lade ca cualidad ca, ¿xiñee nabé especial amor ca yaʼ? Biiyaʼ xi ná Biblia de laani.

• «Ti binni ni napa amor la? napa paciencia ne nachaʼhuiʼ. Ti binni ni napa amor la? qué rapa envidia, cadi presumidu laa, cadi orgulloso laa, cadi groseru laa, qué ruyubi puru para laasi, qué ridxiichi nagueenda. Qué rugabaʼ panda biaje guninácabe laa. Qué riecheʼ ora qué raca ni jneza, sínuque riecheʼ ora riníʼcabe ni dxandíʼ. Runi soportar guiráʼ cosa, [...] runi huantar guiráʼ cosa. Qué ziuu dxi guirá guendarannaxhii» (1 Corintios 13:4-8, TNM).

• «Pa nadxii lu stobi la? qué zuchee neu laa» (Romanos 13:10).

• «Ne ni jma naquiiñe la? ganaxhii saa tu, purti pa nadxii tu stobi la? neca uchee né laatu qué zuquixe tu ni laa» (1 Pedro 4:8).

¿Cadi dxandíʼ ora maʼ nuunu ra nuu ca binni ni nadxiinu runi sentirnu tranquilu ne riuʼnu seguru la? Runi sentirnu zacá, purtiʼ nánnanu racaláʼdxicabe chuʼnu galán ne qué ziuu dxi guiníʼ íquecabe guninácabe laanu.

Laaca pur amor nuunu dispuestu gúninu sacrificiu ne guchaʼnu ca hábitu nápanu. Guzéʼtenu ti ejemplu, ti hombre ni chindee lanu George guizáʼ rapa gana chuʼ ra nuu nietu stiʼ ni deruʼ gule. Peru qué naʼ xpigúdxibe chuʼbe gaxha de baʼduhuiiniʼ que, purtiʼ nabé rigúʼbabe gueza. ¿Xi biʼniʼ George yaʼ? Neca maʼ zinebe cincuenta iza de rigúʼbabe gueza, peru bisaanabe viciu que para chuʼbe ra nuu nietu stibe. ¡Biaa guiráʼ ni runi binni pur amor, njaʼ!

 Amor ca nácani ti cualidad ni riziidiʼ binni, ne ca padre nga ni jma zanda gusiidiʼ xiiñiʼ gannaxhii. Rudiicaʼ ni gócabe, rápacaʼ ne racanecaʼ laacabe ora gacanácabe o gaca huarácabe. Ca padre ni rizaalaʼdxiʼ xiiñiʼ, riníʼnecaʼ ne runi educarcaʼ laacabe. Laacaʼ runi corregir ca padre ca xiiñicaʼ ne rusiidicaʼ laacabe gudiicabe cuenta gunáʼ nga ni jneza ne ni cadi jneza. Ne laaca rudiicaʼ ti ejemplu galán laacabe.

Triste guininu ni, peru nuu padre qué runi cumplircaʼ né responsabilidad sticaʼ. Peru ¿ñee pur nga qué zanda gaca ca xiiñicabe binni ni guni ni jneza la? Coʼ. Purtiʼ nuu stale binni huaniisi, huayúnicaʼ cambiu naroʼbaʼ lu xquendanabánicaʼ ne huayácacaʼ binni cariñoso ne responsable, neca bixhózecaʼ ne jñaacaʼ qué ñácacaʼ responsable né obligación sticaʼ. Dede né ca binni ni nácabe maʼ qué zaca chaahuiʼ, huayúnicaʼ stipa pur guchaacaʼ modo laacaʼ, casi chiguidúʼyanu lu sti artículo ca.