Racalaʼdxiʼ Naciones Unidas gucaa guiráʼ binni gacanésaacaʼ, guni respetarsaacaʼ derechu napa binni ne gápacaʼ medio ambiente. ¿Xiñee yaʼ? Purtiʼ «ruchaa clima sti Guidxilayú, nuu delincuencia organizada, desigualdad de guiráʼ clase, guendaridinde ni qué ganda gaca chaahuiʼ, cadale binni ni cusaana xquidxi, nuu terrorismo lu guidubi Guidxilayú, nuu guendahuará ni ricá binni, ne xcaadxi cosa casi laacani, runiná cani binni de guiráʼ guidxi», zacá guníʼ Maher Nasser lu revista Crónica ONU.

Ne nuu tu laa rié jma zitu ora riníʼ ique chuʼ ti gobiernu para guidubi Guidxilayú. Zacá nga bizaaca né filósofo, poeta ne políticu italiano láʼ Dante (1265-1321) ne físico Albert Einstein (1879-1955). Dante guníʼ qué ziuu dxi guibáninu en paz ndaaniʼ ti guidxilayú ni nuu divididu pur política. Ne bizeetebe caadxi diidxaʼ guníʼ Jesús, ora guniʼbe: «Guiráʼ reinu ni nuu divididu, zanitilú» (Lucas 11:17, TNM).

Cadi xadxí de bindaacabe chupa bomba atómica lu Segunda Guerra Mundial que, bicaa Einstein ti carta para Asamblea General de las Naciones Unidas, peru laaca zanda ganna binni xi ná ni. Luni bicaabe: «Naciones Unidas naquiiñeʼ guni xiixa nagueenda para guzulú quixheʼ ti base ti ganda chuʼ ti gobiernu guni mandar lu guidubi Guidxilayú ne ni dxandíʼ gacané chuʼ seguridad ndaaniʼ stale país».

Peru ¿ximodo gánnanu pa qué zaca ca políticu stiʼ gobiernu riʼ corrupto, pa zudiicabe guiráʼ ni caquiiñeʼ binni o qué zucaacabe binni guni ni nácabe yaʼ? ¿Ñee qué zápacabe ca debilidad ni napa xcaadxi la? Ca pregunta riʼ, rusietenalaʼdxiʼ cani laanu ca diidxaʼ guníʼ historiador británico Lord Acton, ra guníʼ: «Ora guicaa binni poder runitilú ni laa, ne ora guicaa poder lu guiráʼ cosa jmaruʼ si runitilú ni laa».

Peru pa racalaʼdxiʼ binni chuʼ en paz la? naquiiñeʼ chuʼcaʼ tobi si. Yanna ¿ximodo zanda gaca ni yaʼ? ¿Ñee dxandíʼ zanda gaca ni la? Biblia rabi laanu zanda, ne zaca ni. ¿Ximodo yaʼ? Qué zaca ni pur mediu de ti gobiernu ra chuʼ políticu ni naca imperfectu, sínuque zaca ni pur mediu de ti gobiernu ni Dios peʼ gudixhe chuʼ. Zusihuinni gobiernu riʼ, Dios si nga napa derechu guni mandar guiráʼ ni bizáʼ. Ne Biblia ribee lá gobiernu riʼ «Reinu stiʼ Dios» (Lucas 4:43, TNM).

De gobiernu riʼ nga cuzeeteʼ Jesús ora guníʼ ca diidxaʼ riʼ lu padrenuestro: «Gueeda Reinu stiluʼ. Gaca ni naluʼ ndaaniʼ guidxilayú» (Mateo 6:9, 10, TNM). Zacá nga laani, Reinu stiʼ Dios ca zuni guiráʼ ni ganda para gaca cumplir ni ná Dios ndaaniʼ Guidxilayú, ne cadi ni ná ca binni egoísta ne ni rachelú gapa jma poder.

Reinu stiʼ Dios riʼ laaca riénecabe ni casi «Reinu ni nuu guibáʼ» (Mateo 5:3, TNM). ¿Xiñee yaʼ? Purtiʼ neca lu Guidxilayú riʼ nga chiguni mandar ni, peru cadi ndaaniʼ Guidxilayú chichuu ni, sínuque guibáʼ. Bixuiʼlú pabiáʼ galán ora gaca cumplir ndiʼ. Gobiernu ni chiguni mandar guidubi Guidxilayú riʼ qué zaquiiñeʼ ni bueltu stiʼ binni, casi impuestu. ¡Pabiáʼ galán zuni sentir ca binni ni guni mandar Reinu ca!

Né diidxaʼ reinu ca riénenu naquiiñeʼ gapa Reinu stiʼ Dios riʼ ti rey, ne Rey riʼ nga Jesucristu. Maʼ bidii Dios laabe autoridad para guni mandarbe. Sicaríʼ ruzeeteʼ Biblia de Jesús:

• «Ne maʼ bidiicabe laabe poder para guni mandarbe. [...] Ne zuni mandarbe guiráʼ  ladu, ne qué ziuu dxi guirá guendariuudxi» (Isaías 9:6, 7, Dios habla hoy).

• «Bidiicabe laabe guni mandarbe, bisisácacabe laabe ne gucuaabe reinu, ti guni guiráʼ binni, guiráʼ guidxi ne binni riníʼ gadxé gadxé diidxaʼ ni nabe [...] ne qué zanitilú reinu stibe» (Daniel 7:14).

• «Maʼ beeda gaca reinu stiʼ guidxilayú riʼ Reinu stiʼ Señor stinu ne stiʼ Cristu stibe, ne zuni mandar Dios para siempre» (Apocalipsis 11:15, TNM).

Últimu la?, zuni Reinu stiʼ Dios riʼ guiráʼ ni ganda para gaca ni ná Dios lu Guidxilayú ti gaca cumplir ca diidxaʼ ni zeeda lu padrenuestro. Ne óraca, zadxá Guidxilayú riʼ de vida purtiʼ maʼ biziidiʼ ca binni guibani ndaaniʼ ni gapa chaahuiʼ ni.

Ne ni jma risaca nga, Reinu riʼ zuni educar ni ca binni ni guni mandar ni. Guirácabe zaziidicabe guni respetárcabe ngueca norma. Qué zadinde binni ne qué ziuu ni guni dividir laacaʼ. Isaías 11:9 ná: «Guirutiʼ tu zuniná ne zunitilú [...] purtiʼ guidxilayú riʼ zadxá tipa ni de guiráʼ ni rusiidiʼ Jiobá cásica dxátipa nisadóʼ».

Guiráʼ ca binni nuu lu Guidxilayú ziuucaʼ tobi si ne ziuucaʼ en paz, ti cosa ni qué huayanda guni Naciones Unidas. Salmo 37:11 ná: «Zabánicaʼ nayecheʼ purtiʼ ziuu stale guendariuudxi». Ra tiidiʼ tiempu, zusaananu de iquiiñenu ca diidxaʼ casi delincuencia, contaminación, guendapobre ne guerra. Peru ¿padxí gaca nga yaʼ? ¿Padxí guzulú guni mandar Reinu stiʼ Dios Guidxilayú riʼ yaʼ? ¿Ximodo chigúnibe ni? ¿Ximodo zanda gacané Reinu riʼ lii yaʼ? Guidúʼyanu ni lu stiʼ artículo ca.