Stale binni rucaanáʼ Dios purtiʼ runi crecaʼ laabe nápabe donda pur ca sufrimientu stinu.

Pur ca ni rusiidiʼ ca xaíque yuʼduʼ la? casi xa ñaca niniʼcaʼ Dios nga napa donda pur cayuni sufrir binni. Guzéʼtenu caadxi ejemplu, nuu de laacaʼ riniʼcaʼ...

• ... riquiiñeʼ Dios ca desastre natural para guni castigar binni.

• ... rati ca xcuidihuiiniʼ purtiʼ caquiiñeʼ Dios xcaadxi ángel huiiniʼ guibáʼ.

• ... riuu Dios lu ca guerra ca.

Peru ¿pa cadi dxandíʼ guiráʼ ni rusiidiʼ ca xaíque yuʼduʼ ca de Dios yaʼ? ¿Laga pa qué riuulaʼdxiʼ Dios ni rusiidicabe yaʼ?

Cadi Dios diʼ napa donda pur cayuni sufrirnu

Qué runinabe binni purtiʼ cadi malu laabe. Sicaríʼ ná Biblia naca Dios:

«Jneza guiráʼ neza stibe. [...] Rúnibe ni jneza ne qué rucheebe» (DEUTERONOMIO 32:4).

«¡Qué ziuu dxi guiníʼ íquenu zuni Dios ni dxandíʼ cosa malu, ne guni ni jma napa poder cosa ni cadi jneza!» (JOB 34:10).

«Dios ni jma napa poder siempre runi ni jneza» (JOB 34:12).

Rucaanáʼ Dios ca religión ni rusiidiʼ cosa ni cadi dxandíʼ de laa

Rucaanabe ca religión ni rusiidiʼ napa Dios donda pur runi sufrir binni ne laaca rucaanabe ca religión ni runi apoyar ca guerra ne xcaadxi tipu guendaridinde.

«Caquiiñeʼ ca profeta laʼyaʼ para guni profetizarcaʼ cosa ni cadi dxandíʼ. Cadi naa diaʼ biseendaʼ laacaʼ ne cadi naa diaʼ bineʼ mandar laacaʼ ne nin qué huayabeʼ laacaʼ gastiʼ. Cadi dxandíʼ visión ni cayuni profetizárcabe [...] ne de ndaaniʼ ladxidóʼcabe caree cosa ni cadi dxandíʼ» (JEREMÍAS 14:14).

Qué ñuulaʼdxiʼ Jesús ca cosa cadi jneza ni runi ca religión

«Cadi guiráʼ diʼ ni gabi naa “Señor, Señor” ziuu lu Reinu ni nuu guibáʼ. Ziuu ca ni guni si ni ná Bixhozeʼ ni nuu guibáʼ. Stale tu zabi naa dxi que “Señor, Señor, ¿ñee cadi pur nombre stiluʼ biʼniʼ profetizardu ne pur nombre stiluʼ guleedu demonio ne pur nombre stiluʼ bínidu stale milagru la?”. Peru óraque zabeʼ laacaʼ: “¡Qué ñuu dxi ñunebiaʼyaʼ laatu! ¡Laguixeleʼ de naa, binni qué iquiiñeʼ caʼ!”» (MATEO 7:21-23).