Guni disciplinar binni xiiñiʼ riniʼni guni guiar, gusiidiʼ ne nuu biaje uguu jneza laacabe. Peru laaca riniʼni gusiidiluʼ ca xiiñiluʼ guicaacaʼ decisión jneza ne cadi gúnicaʼ cosa malu.

Lu ca últimu iza riʼ, maʼ huaxiéʼ binni runi disciplinar xiiñiʼ purtiʼ ridxíbicaʼ guninacaʼ laacabe. Ca padre ni nadxii ca xiiñiʼ riguíxhecaʼ ni guni ca xiiñicaʼ ne rusiidicaʼ laacabe ximodo gúnicabe ca ni.

Pamela guníʼ: «Naquiiñeʼ gusíʼdinu ca xiiñinu xi naquiiñeʼ gúnicaʼ ti cheni laacaʼ galán ora guiniisicaʼ. Purtiʼ pa coʼ la? zeeda gácacabe casi ti barcu ni qué gapa timón ni zándaca guireechú ne guiniti».

Cadi tindeneluʼ xiiñiluʼ. Bisiene laabe pa gueeda gúnibe xiixa ni cadi jneza zanda gápabe guendanagana, peru ora guzuubabe diidxaʼ la? biʼniʼ felicitar laabe.

Christine ná: «Cumu maʼ huaxiéʼ tu ruzuubaʼ diidxaʼ la? nga runi nabé runeʼ felicitar ca xiiñeʼ ora guzuubacaʼ diidxaʼ, zacá qué zaca nagana para laacabe gucaadiágacabe ora gabeʼ laacabe paraa cucheecabe».

CONSEJU ZEEDA LU BIBLIA: «Cadi quítetu laca laatu: guirutiʼ qué zanda quite Dios. Purtiʼ ni gudxiibaʼ binni la? ngaca guni cosechar» (Gálatas 6:7).

Biʼniʼ stipa guiéneluʼ xiiñiluʼ. Ora cuʼ jnézaluʼ xiiñiluʼ, cadi guiaandaʼ lii panda iza nápabe, xi zanda gúnibe ne pabiáʼ malu ni bíʼnibe. Jma stale biaje riguu jneza binni xiiñiʼ ora runi xiixa ni cadi jneza. Guzéʼtenu ti ejemplu, pa qué nuzuubabe diidxaʼ de biaʼ tiempu gudíxheluʼ quítebe celular, zándaca gáxhaluʼ ni laabe pur ti tiempu si. Biʼniʼ stipa cadi guni xirooloʼ ti guendanagana.

Wendell bizeeteʼ: «Siempre ruyubeʼ gannaʼ pa xiiñeʼ piaʼ biʼniʼ ti cosa ni cadi jneza o pa bíʼnibe ni sin ñánnabe. Cadi ngueca nga uguaaʼ jneza xiiñeʼ pur biʼniʼ xiixa ni cadi jneza que gacaniaʼ laabe gudiibe cuenta paraa ndiʼ bicheebe».

CONSEJU ZEEDA LU BIBLIA: «Ne laatu ca padre, cadi guchiichitu ca xiiñitu, ti cadi guireecaʼ gana» (Colosenses 3:21).

Gunnaxhii ca xiiñiluʼ. Pa cuʼ jnézaluʼ ca xiiñiluʼ né guendarannaxhii, ziénecabe ni ne qué zaca nagana para laacabe gúnicabe ni cayábiluʼ laacabe.

Daniel guníʼ: «Dxiqué, ora runi xiiñidu xiixa ni cadi jneza, rábidu laa rusisácadu guiráʼ ca cosa galán ni huayuni, laaca rábidu laabe cadi racá diʼ nga biluxe guidxilayú, sínuque zanda guchaabe ne laapedu zacanedu laabe gúnibe ni».

CONSEJU ZEEDA LU BIBLIA: «Ti binni ni napa amor la? napa paciencia ne nachaʼhuiʼ» (1 Corintios 13:4).