Ora maʼ nanna binni tu laluʼ, qué riníʼ diʼ nga maʼ runibiaʼbe lii, sínuque zunibiaʼbe lii ora gúʼyabe ca cosa galán ni rúniluʼ, ni runi creluʼ ne modo lii.

Ora maʼ runibiáʼ chaahuiluʼ lii la? rúniluʼ ni jneza ne qué rudiiluʼ lugar gabi xcaadxi joven lii xi gúniluʼ.

Adrian guníʼ: «Stale binni qué gánnacaʼ tu laacaʼ, nga runi laaca qué gánnacaʼ guicaacaʼ decisión stúbicaʼ».

Courtney bizeeteʼ: «Runeʼ stipa cadi guneʼ ca cosa ni runi ca xhamiguaʼ, nannaʼ ximodo laacabe, peru naa qué zacaʼ casi laacabe».

CONSEJU ZEEDA LU BIBLIA: «Cadi chinándatu modo nabani binni tiempu riʼ, sínuque laguchaa modo riníʼ íquetu» (Romanos 12:2).

Biiyaʼ ximodo nácaluʼ yanna ne ximodo racaláʼdxiluʼ gácaluʼ despué, laaca risaca gánnaluʼ xi runi creluʼ, gunáʼ nga ca cosa jneza rúniluʼ ne xi ca cosa raca nagana para lii guni cumplirluʼ. Galán guiníʼ íqueluʼ ca pregunta riʼ.

Ca cosa galán rúniluʼ: «¿Xi gracia o habilidad napaʼ? ¿Xi nannaʼ guneʼ? ¿Ñee rucueezaʼ laca naa la? ¿Ñee puntual naa, nannaʼ guneʼ dxiiñaʼ ne rudieeʼ de ni napaʼ laa? ¿Xi ca cosa galán runeʼ?».

NI CAQUIIÑEʼ GÚNILUʼ: Pa raca nagana para lii gúʼyaluʼ gunáʼ nga ca cosa galán ni rúniluʼ, gunabaʼ bixhózeluʼ, jñaaluʼ o ti xhamíguluʼ gacané lii.

CONSEJU ZEEDA LU BIBLIA: «Cada tobi guʼyaʼ xi cayuni, zacá zapa razón para chuʼ nayecheʼ pur ni maʼ biʼniʼ, sin guchaaga laa né sti binni» (Gálatas 6:4).

Ca cosa ni raca nagana para lii: «¿Paraa caquiiñeʼ guchaaʼ? ¿Pora nga jma raca nagana para naa guneʼ ni jneza? ¿Pora jma caquiiñeʼ gucueezaʼ naa?».

CONSEJU ZEEDA LU BIBLIA: «Pa guininu “Qué rucheʼnu”, caguítenu laca laanu ne gastiʼ ni dxandíʼ luguianu» (1 Juan 1:8).

Ni runi crenu: «¿Xi conseju galán rinanda, ne xiñee? ¿Ñee runeʼ cré Dios la? ¿Xi prueba napaʼ dxandíʼ nuu Dios yaʼ? ¿Gunáʼ nga ca cosa ni rabeʼ cadi jneza raca, ne xiñee? ¿Ximodo riníʼ iqueʼ zabaneʼ despué?».

CONSEJU ZEEDA LU BIBLIA: «Gánnaluʼ guiníʼ íqueluʼ zapa ni lii, ne zapa guendariene lii» (Proverbios 2:11).