Guni controlarnu laanu
Laaca ruzeeteʼ Biblia de ni runi sentirnu, nuu de laacani zanda gacané laanu ne nuu xcaadxi, ni naquiiñeʼ guni controlarnu.
CADI GUIDXIICHINU NAGUEENDA
CONSEJU ZEEDA LU BIBLIA: «Jma risaca ti binni ni rindaa para guidxiichi que ti binni ni napa poder» (Proverbios 16:32).
XI RINÍʼ NI. Nabé galán guizíʼdinu guni controlarnu ni runi sentirnu. Neca nuu tiru nápanu razón para guidxiichinu, peru pa qué guni controlarnu xiana stinu zanda guninani laanu. Ora cadxiichi ti binni zanda guiníʼ o guni xiixa ni zucaa laa guni sentir mal despué.
XI ZANDA GÚNINU. Guizíʼdinu guni controlarnu xiana stinu, pacaa zucaani laanu gúninu cosa ni cadi jneza. Nuu binni riníʼ ique naca tuuxa nadipaʼ ora rusihuinni cadxiichi, peru cadi dxandíʼ ni. Biblia ná: «Cásica zanda chúʼcabe ndaaniʼ ti guidxi ni qué gapa muralla, zacaca nga ti hombre ni qué rucueeza laca laa» (Proverbios 25:28). Ora guizaaca xiixa, jma galán ganna chaahuinu xi guiráʼ bizaaca, nga zacané guni controlarnu xiana stinu. «Ti hombre ni riene qué ridxiichi nagueenda» (Proverbios 19:11). Ti binni ni rucaadiaga chaahuiʼ ni gábicabe laa, ziene xi guiráʼ cazaaca ne nga zacané gucueeza laca laa.
GUDIʼNU XQUIXE PEʼ
CONSEJU ZEEDA LU BIBLIA: «Laudii diuxquixe» (Colosenses 3:15).
XI RINÍʼ NI. Nácabe jma nayecheʼ riuu ca binni ni rudii xquixe peʼ. Dede ca binni ni maʼ biniti xiixa nabé risaca huadiicaʼ cuenta dxandíʼ ni. Nácabe ni gucané laacabe nga gudiicabe xquixe peʼ pur ni nápacabe, lugar de guicá íquecabe ni biníticabe.
XI ZANDA GÚNINU. Guiráʼ dxi gudiʼnu xquixe peʼ pur ca cosa galán nápanu. Dede ca cosa jma nahuiiniʼ, casi guidúʼyanu ra zirá gueelaʼ, güínenu ti binni nadxiinu diidxaʼ o gudiʼnu xquixe peʼ pur nabáninu sti dxi. Pa gúninu ni bizéʼtenu riʼ, ziuʼnu jma nayecheʼ.
Sti cosa ni nabé zacané laanu nga gudiʼnu xquixe peʼ familia stinu ne ca xhamígunu. Guiníʼ íquenu ca cosa galán riuuláʼdxinu de laacabe ne despué gábinu ni laacabe o zanda gucaʼnu ni runi sentirnu lu ti carta, ti correu o ti mensaje ne guséʼndanu ni ra nuucabe. Nga zacané laanu para ganda gannaxhiinu laacabe jma ne ziuʼnu nayecheʼ purtiʼ nánnanu cayúninu xiixa galán pur xcaadxi (Hechos 20:35).
XCAADXI CONSEJU ZEEDA LU BIBLIA
Zanda guni descargarluʼ Biblia lu audio, nuu ni lu jw.org lu 40 idioma.
CADI TINDENENU BINNI
«Ora guzulú tinde tuuxa zeeda gácani casi ora nuxhélecabe ti presa para guixii nisa stiʼ, nga runi, ante guzulú tíndetu la? laguixeleʼ» (PROVERBIOS 17:14).
CADI CHUʼNU XIZAA PUR NI GUIZAACA DESPUÉ
«Nga runi cadi chuʼ tu xizaa de ni chi gaca ixíʼ, purti ixí ru nga guʼya tu xi gacaʼ. Lagucaa ique si de ni naquiiñe tu yanadxí» (MATEO 6:34).
GUINÍʼ ÍQUENU ANTE GÚNINU XIIXA
«Gánnaluʼ guiníʼ íqueluʼ zapa ni lii, ne zapa guendariene lii» (PROVERBIOS 2:11).
Laaca zándaca ziuuláʼdxiluʼ ca ndiʼ
¡GUTANÁ!
Ni zanda gúniluʼ ora nápaluʼ estrés
Biiyaʼ caadxi conseju ni zacané lii guni controlarluʼ estrés nápaluʼ ne cadi tan guninani lii.
