XIÑEE RISACA GUNI RESPETAR BINNI LACA LAA

• Maʼ bisihuinni ca investigación ni huayaca, ca binni ni riníʼ ique qué risaca la? jma nagueenda rápacaʼ ansiedad, depresión ne rusaana de gocaʼ o rocaʼ stale. Laaca ruyúbicaʼ gué xhaatacaʼ alcohol, gábicaʼ stale medicina ne cúbacaʼ droga.

• Ti binni ni runi respetar laca laa la? qué ruchaaga laa né xcaadxi, ne pur nga qué raca nagana para laa gaca llevar xcaadxi ne gapa buen amigu. Peru ca ni huaxiéʼ napa respetu laca laa la? jma nga riniʼcaʼ mal de xcaadxi. Ne pur nga maʼ qué rápacaʼ tu gaca xhamígucaʼ.

• Ca binni ni runi respetar laca laa, neca guidxaagalucaʼ guendanagana jma runi huantarcaʼ; qué rudiicaʼ lugar gucueeza ca guendanagana ca laaca para ugaandacaʼ ni maʼ gudixhe íquecaʼ. Peru ca ni huaxiéʼ runi respetar laca laa la? ruuyacaʼ ca problemahuiiniʼ sticaʼ casi xiixa nabé naroʼbaʼ; ne jma nagueenda rireecaʼ gana.

 XI ZANDA GÚNILUʼ

Biyubi xhamíguluʼ ni zanda gacané lii. Bidxaaga binni ni napa respetu xcaadxi, ni guizaalaʼdxiʼ lii ne ni gusiidiʼ lii xiixa ni zacané lii.

Gucané xcaadxi binni. Pa nacháʼhuiluʼ ne rúniluʼ cosa galán pur xcaadxi, ne pur ca binni ni qué zanda gudxiguetaʼ ni lii, jma nayecheʼ zabániluʼ ne zuni sentirluʼ caquiiñeluʼ xquendanabániluʼ jneza. Ne dxandíʼ zacá ni neca guirutiʼ gudii xquixe peʼ lii pur cosa galán ni bíʼniluʼ.

Gucané ca xiiñiluʼ guiziidicaʼ guni respetarcaʼ laca laacaʼ. Ti modo zanda gúniluʼ ni nga ra gudiiluʼ lugar stubi ca xiiñiluʼ guni chaahuicaʼ xiixa guendanagana ni gápacaʼ. Ndiʼ zacané laacabe gudxiilúcabe guendanagana jma naroʼbaʼ ne guni chaahuicabe cani. Laaca zacané nga laacabe gápacabe respetu laca laacabe ne zacaneni laacabe ora guiniisicabe.