¿Xiñee maʼ qué gapa binni respetu xcaadxi?
XIÑEE NABÉ RISACA GUNI RESPETARNU XCAADXI
Ora runi respetarnu binni racaneni para cadi tindenenu laacaʼ ne para cadi guiroobaʼ xiixa guendanagana.
-
Ti proverbio zeeda lu Biblia ná: «Ora ricabi binni né diidxaʼ nadóʼ la? rindeteʼ xiana, peru ora guiníʼ ti diidxaʼ ni runiná la? guizáʼ ruchiichi» (Proverbios 15:1). Riroobaʼ ti guendanagana ora rininu o rúninu xiixa ni qué rusihuinni runi respetarnu tuuxa. Ne ora runi tuuxa nga la? feu modo riluxe ca cosa ca.
-
Jesús guníʼ: «Ni nuu ndaaniʼ ladxidóʼ binni nga riníʼ» (Mateo 12:34). Pa guinínenu xcaadxi binni sin respetu la? zándaca rúninu ni purtiʼ nápanu ti problema jma naroʼbaʼ. Zándaca cusihuínninu xi peʼ runi sentirnu pur ca binni gadxé peʼ de laanu o pur ca binni de sti raza, ni napa gadxé costumbre o de sti guidxi. Nga rusihuinni laanu nga napa xidé guchaʼnu modo riníʼ íquenu.
Lu ti encuesta ni cadi xadxí guca, ni bíʼnicabe jma de 32,000 binni de 28 guidxi, 65% de laacaʼ guniʼcaʼ maʼ qué runi respetarsaa binni ca dxi riʼ.
XI ZANDA GÚNILUʼ
Gupa respetu tutiica guiníʼneluʼ, dede né ca ni qué riníʼ ique casi riníʼ íqueluʼ. Biyubi xiixa ni chuulaʼdxiʼ guirópatu, zacá qué zuni juzgarluʼ xcaadxi ne qué zaniʼluʼ mal de laacaʼ.
Biʼniʼ tratar xcaadxi modo ñuuláʼdxiluʼ ñuni tratárcabe lii. Pa gácaluʼ nachaʼhuiʼ ne guni tratarluʼ binni jneza la? zándaca zaqueca zuni tratárcabe lii.
Guyuu dispuestu guni perdonarluʼ. Cadi guiníʼ íqueluʼ biʼniʼ o guníʼ tuuxa xiixa para si guniná lii, ne pa bíʼnibe ni la? bisiaandaʼ ni.
NI RUNI CA TESTIGU STIʼ JEHOVÁ
Ra tiica si nabézadu o rúnidu dxiiñaʼ, laadu, ca testigu stiʼ Jehová, runi respetardu binni ne riguʼdu gana laacaʼ gúnicaʼ zaqueca.
Rábidu guiráʼ xixé binni zanda guiziidicaʼ de lu Biblia sin quíxecaʼ, peru qué runi obligardu laacaʼ guiníʼ íquecaʼ modo riníʼ íquedu nin guni crecaʼ ni runi credu. Sínuque rinínedu laacaʼ de ca ni runi credu «né diidxaʼ nadóʼ ne stale respetu», casi ná Biblia naquiiñeʼ gaca ni (1 Pedro 3:15; 2 Timoteo 2:24).
Qué rúnidu menu nin ti binni. Lu ca reunión stidu, nabé nayecheʼ ridxaagaludu guiráʼ ca binni ni racalaʼdxiʼ guiziidiʼ ni rusiidiʼ Biblia, gastiʼ naca ximodo nabánicaʼ o modo biniisicaʼ. Rúnidu stipa cadi guni juzgardu laacaʼ ne runi respetardu guiracaʼ (1 Pedro 2:17).
Runi respetardu autoridad ni napa gobiernu ni nuu ra nabézadu (Romanos 13:1). Rúnidu ni ná ley ne riguíxedu impuestu. Ne neca qué riuʼdu lu política, peru runi respetardu ca decisión ni ricaa binni lu política.
