«GUIRÁʼ guendanagana ni guyuu dxiqué qué zanda guchaaganu cani né guerra naroʼbaʼ ni cayaca Europa yanna». Zacá bizeeteʼ revista The Watch Tower 1 de septiembre 1915 de Primera Guerra Mundial, ra gudinde biaʼ treinta guidxi roʼ. Lu sti revista que bieeteʼ pur ca guendanagana que guyuu ora guca nagana guireeche stiidxaʼ Reinu. Ne ndaaniʼ guidxi Alemania ne Francia jma nagana guca guireeche diidxaʼ.

Ora bizulú guerra mundial que, caʼruʼ guiene chaahuiʼ ca Binni Ruundaʼ Biblia ca principiu zeeda lu Biblia ni caníʼ gaca ca xpinni Cristu neutral. Peru gudixhe íquecabe guiníʼcabe de ca diidxaʼ nacubi ne galán que. Wilhelm Hildebrandt racalaʼdxiʼ guni xhiiñaʼ Reinu ngue runi gunabaʼ lu diidxaʼ francés tratadu The Bible Students Monthly (Mensuario de los Estudiantes de la Biblia). Peru cadi zédibe Francia casi colportor (ni rucheeche diidxaʼ de tiempu completu), sínuque casi soldadu. Guizáʼ ridxagayaa ca francés laabe ora gúʼyacaʼ ti alemán ni nacu lari militar, ti enemigu, gusiidiʼ laacabe ziuu guendariuudxi.

Caadxi carta ni biree lu The Watch Tower bisihuinni cani laaca gucalaʼdxiʼ xcaadxi de ca Binni Ruundaʼ Biblia de Alemania niniʼcaʼ de ca diidxaʼ nacubi ne galán stiʼ Reinu dxi guyuucaʼ lade armada. Lemke, ti hermanu ni guyuu lu Marina, guniʼ gaayuʼ de ca hombre ni rusá barcu ra zebe que laaca guyuuláʼdxicaʼ guiziidicaʼ. Sicaríʼ bicaabe: «Dede ndaaniʼ barcu riʼ cayacaniáʼ binni para gusisaca Jiobá».

Georg Kayser guyuu lu guerra casi soldadu ne guca ti xpinni Dios ni dxandíʼ. Ximodo yaʼ. Qué gánnanu ximodo gucuaabe ti publicación stiʼ ca Binni Ruundaʼ Biblia, peru yendá ni dxandíʼ de Reinu dede ladxidoʼbe ne maʼ qué ñaasaʼ guiibaʼ nabe. Lugar de nidíndebe maʼ bíʼnibe gadxé dxiiñaʼ lu ejércitu, ne despué de guerra que maʼ gúcabe precursor stale iza.

Neca qué ñene chaahuiʼ ca Binni Ruundaʼ Biblia tema de neutralidad que la? modo laacabe ne ni rúnicabe rusihuinni maʼ gadxé laacabe de ca binni ni nuu pur guerra que. Ca políticu ne ca xaíque stiʼ ca religión guyuucaʼ pur guerra que peru ca Binni Ruundaʼ Biblia guyuucaʼ pur «Príncipe ni rudii  Guendariuudxi» (Isaías 9:6). «Dxandíʼ nga guyuu tu qué ñácapeʼ neutral, peru guníʼ íquecabe cásica Konrad Mörtter, laa guníʼ: «Biblia gucané naa guieneʼ chaahueʼ cadi naquiiñeʼ guuti ti xpinni Cristu» (Éxodo 20:13). *

Gastiʼ ti ley ndaaniʼ guidxi Alemania ni guiníʼ zanda guni binni ni na xconciencia, jma de gande Binni Ruundaʼ Biblia qué ninacaʼ ñuucaʼ lu ejércitu. Nuu tu guníʼcabe cayaca ique, casi Gustav Kujath, biseguyoocabe laabe ndaaniʼ ti hospital ra riuu binni cayaca ique ne bicaacabe aguxaʼ laabe para gásibe. Hans Hölterhoff biseguyoocabe laa purtiʼ qué niná ñe lu guerra. Dxi nuube cárcel que, ti dxi qué ninabe ñúnibe nin ti dxiiñaʼ para guerra que. Ca guardia que bindiibicaʼ laabe né ni rábicabe camisa de fuerza dede ra guti guiropaʼ chu nabe. Neca bíʼnicabe laabe zaqué, qué ninabe ñebe lu guerra ne pur ngue biʼniʼ búrlacabe laabe modo chigátibe. Neca bizaacabe guiráʼ nga, qué nucheebe dede ra biluxe guerra que.

Xcaadxi hermanu qué ninacaʼ ninaazecaʼ guiibaʼ dxi gulídxicabe laacaʼ checaʼ lu guerra ne gunábacabe gúnicabe gadxé dxiiñaʼ. * Zacá biʼniʼ Johannes Rauthe, ne biseendacaacabe laabe chigúnibe dxiiñaʼ lu biá tren. Konrad Mörtter guca camilleru ne Reinhold Weber guca enfermeru. August Krafzig biecheʼ biʼniʼ gadxé dxiiñaʼ ne qué ñe lu guerra. Ca Binni Ruundaʼ Biblia, ne cani riníʼ ique casi laacabe, gudixhe íquecaʼ gúnicaʼ xhiiñaʼ Jiobá ra gusihuínnicaʼ nadxiicaʼ laabe ne qué zusaanacabe laabe, ne bíʼnicabe ni modo biénecabe naquiiñeʼ gúnicabe ni.

Cani runi mandar ndaaniʼ guidxi Alemania bindaachicaʼ ximodo nga ca Binni Ruundaʼ Biblia ca dxi guca guerra que. Ne xcaadxi iza despué, mil biaje yenecaʼ laacabe nezalú ca tribunal purtiʼ rucheechecabe diidxaʼ. Ngue runi, sucursal de Alemania biʼniʼ ti departamentu legal ndaaniʼ Betel de Magdeburgo para gacanecaʼ ca hermanu que.

Zeʼ dxi jma biene ca testigu stiʼ Jiobá ximodo naquiiñeʼ gácacaʼ neutral. Ora bizulú Segunda Guerra Mundial que, maʼ qué lica ñuninécabe ejércitu dxiiñaʼ zaqué gúcacabe neutral. Ngue runi, gobiernu alemán biiyaʼ laacabe casi enemigu, guzananda laacabe ne bininacaʼ laacabe. Peru nga maʼ sti tema ni zaree lu sti revista. (Cani naguu chaahuiʼ xquidxi Dios ndaaniʼ sucursal de Europa central).