1, 2. a) Ximodo cayaca cumplir ni na Isaías 60:22 yanna ra mayaca gueeda fin. b) Xi caquiiñeʼ xquidxi Jiobá ni nuu lu Guidxilayú yanna riʼ.

«GUIDXI huiiniʼ riʼ zaca ni ti mil, ne zaca ni ti guidxi nadipaʼ» (Isaías 60:22). Maʼ cayaca cumplir profecía ca yanna, tiempu cabézanu gueeda fin riʼ. Guidúʼyanu ti ejemplu. Lu iza 2015 que nuu 8,220,105 testigu stiʼ Jiobá ni cayuni predicar lu guidubi Guidxilayú. Sicaríʼ guníʼ Jiobá modo zadale ca xpinni: «Naa, Jiobá, naa chigutaleʼ ni ora maʼ guidxiña dxi». Nga riníʼ zeʼ ora jma zápanu dxiiñaʼ. Ñee maʼ cayúninu stipa pur guni predicarnu ne gusíʼdinu binni stiidxaʼ Reinu la? Stale hermanu ne hermana nácacaʼ precursor regular o auxiliar. Ne nuu tu maʼ yendeza sti lugar para gacanecaʼ gaca predicar. Ne xcaadxi cayúnicaʼ dxiiñaʼ ra cabí ca Yoo stiʼ Reinu.

² Guiráʼ iza ruzulú biaʼ 2,000 congregación nacubi. Nga rusihuinni caquiiñeruʼ jma ancianu ne siervu ministerial para guni tender ca congregación riʼ. Cada iza, stale mil de hermanu caquiiñeʼ gácacaʼ siervu ministerial ne stale mil de siervu ministerial caquiiñeʼ gácacaʼ ancianu. Nga runi, cásica hombre ne zaqueca gunaa, rihuinni dxíchica naquiiñeʼ guni guiranu  «xhiiña Señor biaʼ ra ganda tiʼ» (1 Corintios 15:58).

3, 4. Xi zanda quixhe íquenu ugaandanu ndaaniʼ xquidxi Dios.

³ (Biindaʼ 1 Timoteo 3:1). Apóstol Pablu guníʼ jneza guni tuuxa pa «cá ique» ugaanda xiixa puestu ndaaniʼ congregación. Ni guníʼ Pablu ca rucaa laanu guiníʼ íquenu de tuuxa ni cayuni stipa o dede rusigaanáʼ para ugaanda xiixa ni cadi nuu gaxha. Guiníʼ íquenu de ti hermanu ni naguixhe ique gaca siervu ministerial. Zándaca gudii hermanu riʼ cuenta caquiiñeʼ guni stipa ti gapa caadxi cualidad. Ora maʼ gápabe ca cualidad riʼ ne gácabe siervu ministerial la? naquiiñeʼ gúnirube stipa para ganda gácabe ancianu.

⁴ Nuu hermanu cuchaa caadxi cosa lu xquendanabani ti ganda guni jma lu xhiiñaʼ Jiobá. Zándaca racaláʼdxicabe gácacabe precursor, gúnicabe dxiiñaʼ Betel o gacanécabe ra cabí Yoo stiʼ Reinu. Guidúʼyanu ximodo zanda gacané Biblia laanu guiniisinu jma lu stiidxaʼ Dios.

5. Ximodo zanda iquiiñeʼ ca joven stipa sticaʼ para gúnicaʼ xhiiñaʼ Reinu.

⁵ Cumu nazaaca nuu ca joven ne nápacaʼ stipa la? zanda gúnicaʼ stale cosa lu xhiiñaʼ Jiobá. Biblia na: «Stipa stiʼ cani nahuiiniʼ ca nga ni rusisaca laacaʼ, ne guicha toope stiʼ ca binnigola ca nga ni galán sticaʼ» (Proverbios 20:29). Nuu caadxi joven Betel cayúnicaʼ dxiiñaʼ ra raca imprimir libru. Ne stale de laacabe cayacané ra cabí o cayaca chaahuiʼ Yoo stiʼ Reinu. Xcaadxi racané ca lugar ra runiná xiixa desastre natural. Ne nuu stale precursor ni caziidiʼ sti diidxaʼ o rindézacaʼ sti lugar para guni predicarcaʼ.

6-8. a) Xi gucané ti joven ti ganda chuʼ nayecheʼ ora guni xhiiñaʼ Dios, ne xi guleendube. b) Ximodo zanda guidúʼyanu «pabiáʼ nachaʼhuiʼ Jiobá».

⁶ Neca nadxiinu Jiobá ne racaláʼdxinu gudiʼnu laabe ni jma galán nápanu la? zándaca guni sentirnu cásica biʼniʼ sentir ti hermanu láʼ Aaron. Racaláʼdxibe guni sentirbe galán ora gúnibe xhiiñaʼ Jiobá, peru cadi nayecheʼ diʼ nuube. Maca riebe reunión ne runi predicarbe dede dxi nahuiinibe, peru qué riuuláʼdxibe chebe. Xi biʼniʼ Aaron yaʼ.

⁷ Bíʼnibe stipa pur gúʼndabe Biblia guiráʼ dxi, gaca prepararbe para reunión ne guni comentarbe. Ne laaca bizulú biʼniʼ orarbe jma seguidu. Gucané guiráʼ ndiʼ laabe guiniisibe lu stiidxaʼ Dios. Binibiáʼ chaahuibe Jiobá ne jma gunnaxhiibe laa. Oraqueruʼ nga biʼniʼ sentirbe nayecheʼ. Gúcabe precursor, yegacanebe ra bininá xiixa desastre natural ne yeguni predicarbe ndaaniʼ sti guidxi roʼ. Yanna maʼ ancianu laabe ne nuube Betel. Ximodo runi sentirbe yanna yaʼ. Nabe maʼ biiyabe «nachaʼhuiʼ Jiobá». Ne runi sentirbe casi ora nuzaabibe Jiobá ne racaláʼdxibe gúnibe jma lu xhiiñaʼ. Nánnabe jma zacaabe ndaayaʼ pur cani gúnibe.

⁸ Sicaríʼ guníʼ tobi hombre ni bicaa ti salmo: «Lagudii cuenta ne laguuyaʼ pabiáʼ nachaʼhuiʼ Jiobá». Ne laaca guniʼbe: «Ca binni ni ruyubi Jiobá la? qué riaadxaʼ gastiʼ ni galán laacaʼ». Biblia na: «Lagudii cuenta ne laguuyaʼ pabiáʼ nachaʼhuiʼ Jiobá; nayecheʼ nga riuu hombre ni guyubi laabe para guilá. Laguidxibi Jiobá, laatu ca binni ni maʼ gulibe, purtiʼ qué riaadxaʼ gastiʼ cani ridxibi laabe. Ca lionhuiiniʼ qué gápapecaʼ ni gocaʼ ne rindaanacaʼ; peru ca binni ni ruyubi Jiobá la? qué riaadxaʼ gastiʼ ni galán laacaʼ» (Salmo 34:8-10). Ora gudiʼnu Jiobá ni jma galán  nápanu la? runi sentirnu nayecheʼ purtiʼ nánnanu ngapeʼ nga ni riuuláʼdxibe. Ne zápabe laanu casi maʼ bidii stiidxabe gúnibe.

9, 10. Xiñee naquiiñeʼ cuézanu sin guireʼnu gana.

⁹ Zándaca racaláʼdxinu gúninu xcaadxi cosa lu xhiiñaʼ Jiobá. Peru pa maʼ xadxí de cabézanu guicaanu xiixa privilegiu ndaaniʼ congregación o maʼ xadxíʼ de cabézanu guchaa caadxi cosa lu xquendanabáninu yaʼ. Zándaca caquiiñeʼ gápanu paciencia (Miqueas 7:7). Zándaca cudii Jiobá lugar chuʼnu zacá ti tiempu. Peru naquiiñeʼ gápanu confianza zacanebe laanu ora tiica si. Guiníʼ íquenu ejemplu stiʼ Abrahán. Biʼniʼ prometer Jiobá laabe zápabe ti xiiñibe, peru gudiʼdiʼ stale iza para gule Isaac. Qué nireebe gana laga cabézabe ne qué lica nusaana de ñápabe fe Jiobá (Génesis 15:3, 4; 21:5; Hebreos 6:12-15).

¹⁰ Dxandíʼ nga nagana cueza binni dede ora gaca xiixa (Proverbios 13:12). Peru pa nisi guicá íquenu ni cazaacanu la? zareʼnu gana. Nga runi, jma galán iquiiñenu tiempu stinu para gápanu xcaadxi cualidad ni caquiiñeʼ para gúninu xiixa dxiiñaʼ ndaaniʼ congregación. Guidúʼyanu chonna cosa ni zanda gúninu laga cabézanu.

11. a) Xii nga ca cualidad naquiiñeʼ gúninu stipa pur gápanu. b) Xiñee risaca gúninu ni.

¹¹ Gúninu stipa pur gápanu ca cualidad ni caquiiñeʼ gápanu. Pa guidúʼndanu Biblia ne guiníʼ íquenu ni ridúʼndanu la? zazíʼdinu gácanu binni nuu xpiaaniʼ, zaníʼ íquenu jneza ne zaguixhe íquenu gúninu ni galán. Nabé risaca guni ca hermanu stipa pur gápacaʼ ca cualidad casi cani bizéʼtenu riʼ para gápacaʼ congregación (Proverbios 1:1-4; Tito 1:7-9).  Ora guni estudiarnu Biblia, zudiʼnu cuenta xi riníʼ ique Jiobá de stale cosa. Ne guiráʼ dxi zanda iquiiñenu ni guizíʼdinu para quixhe íquenu gúninu ni riuulaʼdxiʼ Jiobá. Zánnanu ximodo guni tratarnu xcaadxi binni, ximodo iquiiñenu bueltu ne zánnanu ximodo gácunu lari jneza ne ximodo gaca divertirnu.

12. Ximodo zanda gusihuinni cada tobi de cani nuu ndaaniʼ ti congregación zanda gápacabe confianza laa zuni dxiiñaʼ guicaa.

¹² Gúninu stipa pur guni cumplirnu né ca dxiiñaʼ gudiicabe laanu. Dxi bicuí xquidxi Dios yuʼduʼ que sti biaje la? biquiiñeʼ Nehemías hombre ni gacané laa guni caadxi dxiiñaʼ. Tu ca hombre gulibe yaʼ. Cani riníʼ binni bien de laacaʼ. Nánnabe nadxii ca hombre que Dios ne zúnicaʼ intiica dxiiñaʼ gudiibe laacaʼ (Nehemías 7:2; 13:12, 13). Laaca zacá ni yanna. Ora runi ti hermanu dxiiñaʼ né gana la? riníʼ xcaadxi bien de laabe ne zanda guicaabe xcaadxi privilegiu ndaaniʼ congregación (1 Corintios 4:2). Cásica hombre zaqueca gunaa, naquiiñeʼ gúninu dxiiñaʼ ni guicaanu né stale gana (biindaʼ 1 Timoteo 5:25).

13. Ximodo zanda gúninu cásica biʼniʼ José ora cadi jneza modo guni tratar tuuxa laanu.

¹³ Gápanu confianza Jiobá. Xi zanda gúninu pa guni tuuxa laanu xiixa ni cadi jneza yaʼ. Zanda gábinu laabe xi cayuni sentirnu. Peru, pa gacaláʼdxinu gusihuínninu laanu nga nápanu razón la? zándaca jma naroʼbaʼ zaca problema napanenu laabe. Guiníʼ íquenu ejemplu stiʼ José. Nabé feu modo biʼniʼ tratar ca bíʼchibe laabe, despué bigaanicaʼ donda laabe pur ti cosa ni qué ñúnibe ne biseguyoocaʼ laabe. Peru gúpabe confianza Jiobá. Guníʼ íquebe promesa biʼniʼ Dios ne qué nucheenebe laa (Salmo 105:19). Ora gudíʼdibe ra jma nagana la? gúpabe xcaadxi cualidad ni gucané laabe lu ti dxiiñaʼ nabé risaca gucuaabe (Génesis 41:37-44; 45:4-8). Pa cadi jneza modo biʼniʼ tratar tuuxa laanu la? guinábanu Jiobá gacané laanu gácanu binni nuu xpiaaniʼ. Laabe zacanebe laanu gatadxí ladxidoʼno ne gácanu nachaʼhuiʼ ora guinínenu binni ni bicheené laanu (biindaʼ 1 Pedro 5:10).

14, 15. a) Xiñee naquiiñeʼ guidúʼyanu pa runi predicarnu jneza. b) Xi zanda guʼnuʼ para guiníʼneluʼ binni ni qué randa riníʼneluʼ laa ra puertaʼ lidxi. (Biiyaʼ foto ni zeeda ra ruzulú tema riʼ, ne biiyaʼ cuadru « Ñee zanda guneʼ predicar xcaadxi modo la?»).

¹⁴ Pablu gudxi Timoteu gucaa ique gusiene Stiidxaʼ Dios jma jneza. Ne laaca gudxi Pablu laabe: «Biiya ibani lu jneza ne zaqueca biiya usiidi lu ni jneza» (1 Timoteo 4:13, 16). Maʼ stale iza de runi predicar Timoteu. Peru, xiñee caquiiñeʼ gúnibe ni jma jneza yaʼ. Purtiʼ ruchaa binni modo laa ne ruchaa modo nabani. Pa racaláʼdxiruʼ Timoteu gucaadiaga binni laa la? naquiiñeʼ guni predicar jma jneza ne guchaa modo rusiidiʼ. Zacaca naquiiñeʼ gúninu ora guni predicarnu.

¹⁵ Ora maʼ ziguni predicarnu la? zándaca nuu lugar qué ridxélanu binni ra lidxi. Ne nuu lugar nuu binni ra lidxi, peru qué zanda chuʼnu ndaaniʼ edificiu stícabe. Pa zacá ni lu territorio stinu, xiñee qué guyúbinu xcaadxi modo guinínenu binni yaʼ.

16. Ximodo zanda guni predicarnu ra nuu stale binni.

¹⁶ Riuulaʼdxiʼ stale hermanu guni predicar ra nuu stale binni, ra nuu ca estacionamientu stiʼ tren ne carru, ndaaniʼ luguiaa ne ra parque. Ximodo ruzulú riniʼnécabe binni yaʼ. Nuu tu ruzeeteʼ xiixa noticia. Nuu tu rabi binni xiixa ni galán  de xiiñiʼ o rinabadiidxaʼ laabe de dxiiñaʼ stibe. Pa gúʼyacabe cayuulaʼdxiʼ binni ca modo cayuíʼcabe diidxaʼ la? rusiénecabe laa xiná Biblia ne rinabadiidxacabe laa xi riníʼ ique de laani. Ora rúnicabe zacá randa riniʼnécabe stale binni de Biblia.

17, 18. a) Xi zacané laanu gápanu confianza ora guni predicarnu ra nuu stale binni. b) Nabé guyuulaʼdxiʼ David gusisaca Dios, ximodo zacané ejemplu stibe laanu ora guni predicarnu.

¹⁷ Zándaca raca nagana para laanu guinínenu binni zidiʼdiʼ lu calle purtiʼ qué runibiaʼnu laa. Zacá biʼniʼ sentir Eddie, ti precursor de Nueva York. Xi gucané laabe gápabe confianza gúnibe ni yaʼ. Ora rápacabe adoración en familia la? laabe ne xheelabe ruyúbicabe xi información zacané laacabe gánnacabe xi guiníʼcabe ora guinabadiidxaʼ binni laacabe xiixa ne ora gabi laacabe xi riníʼ ique. Laaca rinabadiidxacabe xcaadxi Testigu ximodo rúnicaʼ. Yanna guizáʼ maʼ riuulaʼdxiʼ Eddie guni predicar ra nuu stale binni.

¹⁸ Pa riuuláʼdxinu guni predicarnu ne cayúninu ni jma jneza la? zuuyaʼ xcaadxi caniisinu lu stiidxaʼ Dios (biindaʼ 1 Timoteo 4:15). Ne zándaca dede zacanenu tuuxa gaca testigu stiʼ Jiobá. David guníʼ sicaríʼ: «Dxandipeʼ zusisacaʼ Jiobá guiráʼ ora; ruaaʼ qué zusaana de gusisaca laabe. Zuneʼ sentir naa naróʼ pur Jiobá; cani nadóʼ zucaadiágacaʼ ne ziéchecaʼ» (Salmo 34:1, 2).

19. Xiñee zanda guibani ca xpinni Jiobá nayecheʼ neca maʼ qué zanda guni predicarcaʼ casi modo ñuuláʼdxicaʼ.

¹⁹ Laaca guníʼ David sicaríʼ: «Guiráʼ ni bizaʼluʼ zaguu nandxóʼ stiluʼ, Jiobá, ne cani qué rusaana lii zusisácacaʼ lii. Zaníʼcabe nandxóʼ modo runi mandarluʼ, ne zaníʼcabe de poder stiluʼ, ti ganna binni pabiáʼ nandxóʼ guiráʼ ni rúniluʼ ne pabiáʼ galán modo runi mandarluʼ» (Salmo 145:10-12). Guiráʼ cani nadxii Jiobá ne qué racalaʼdxiʼ gusaana laabe, de guidubi ladxidoʼcaʼ racaláʼdxicaʼ guiníʼnecaʼ binni de laabe. Peru pa maʼ nagólanu o pa huaranu la? zándaca maʼ qué zanda guni predicarnu de yoo pur yoo casi modo ñuuláʼdxinu. Xi zanda gúninu yaʼ. Cadi guiaandaʼ lii, rusisácanu Jiobá guiráʼ ora guininu de laabe né ca binni nuu gaxha de laanu, casi ca enfermera o ca doctor. Yanna, pa nuseguyoocabe laanu pur cani runi crenu yaʼ. Laaca zanda guinínenu xcaadxi binni de Jiobá. Rusiéchenu laabe ora rúninu zacá (Proverbios 27:11). Laaca riecheʼ Jiobá ora rúninu ni na neca binnilídxinu qué gúnicaʼ ni (1 Pedro 3:1-4). Dede né ora cadídinu ra nagana zanda gusisácanu Jiobá, jma zanda gaca xhamígunu laabe ne zanda guiniisinu lu stiidxabe.

20, 21. Pa guiniisinu jma lu stiidxaʼ Dios, ximodo zanda gacanenu xcaadxi.

²⁰ Naquiiñeʼ gánnanu zaguu Jiobá ndaayaʼ laanu pa qué gusaana de gaca xhamígunu laa ne pa qué gusaana de gúninu ni na dede biaʼ gándatiʼ. Pa guchaʼnu horariu stinu o pa guchaʼnu caadxi cosa lu xquendanabáninu la? zándaca jma zacanenu binni ganna de ca promesa sicarú stiʼ Dios. Ne laaca zándaca jma zacaneluʼ xcaadxi hermanu. Ora gúʼyacabe cayúninu stipa pur gúninu dxiiñaʼ ndaaniʼ congregación la? jma zannaxhiicabe laanu.

²¹ Biaʼ tiica iza nápanu de cayúninu xhiiñaʼ Jiobá, guiranu zanda gaca xhamígunu Jiobá jma ne guiniisirunu lu stiidxabe. Lu sti tema ca zadúʼyanu ximodo gacanenu xcaadxi guiniisicaʼ lu stiidxa Dios.