1, 2. Xiñee naquiiñeʼ gusíʼdinu xcaadxi gapa xiixa dxiiñaʼ ndaaniʼ congregación.

JESÚS biʼniʼ stipa para gucheeche stiidxaʼ Reinu né gana. Laaca guleebe tiempu para bisiidibe ca discípulo stibe. Gucanebe laacaʼ gusiidicaʼ jneza ne gácacaʼ pastor ni gapa ca xpinni Dios (Mateo 10:5-7). Ti xpinni Cristu láʼ Felipe, laaca nabé biʼniʼ predicar. Peru laaca bisiidibe ca xiiñidxaapabe gucheechecaʼ diidxaʼ (Hechos 21:8, 9). Yanna riʼ, laaca naquiiñeʼ gusíʼdinu xcaadxi. Xiñee yaʼ.

² Ndaaniʼ ca congregación ni nuu lu guidubi Guidxilayú nuu stale binni ni nacubi biziidiʼ ni dxandíʼ zeeda lu Biblia ne caʼruʼ chúʼnisa. Caquiiñecabe gusíʼdinu laacabe xcaadxi cosa. Naquiiñeʼ gacanenu laacabe guiénecabe xiñee galán nga guiziidicabe gúʼndacabe Biblia ne guni estudiárcabe ni stúbicabe. Laaca naquiiñeʼ gusíʼdinu laacabe gucheechecabe diidxaʼ ne ximodo gusiidicabe xcaadxi binni de Reinu. Ne ca hermanu ni nacubi guyuunisa laaca caquiiñecaʼ gusiidicabe laacaʼ para gácacaʼ siervu ministerial ne ancianu. Guidubi congregación laaca zanda gacanecaʼ cani nacubi (Proverbios 4:2).

3, 4. a) Ximodo bisihuinni ca diidxaʼ guníʼ Pablu que zanda guni predicarnu jma jneza pa guni estudiarnu Stiidxaʼ Dios. b) Xi naquiiñeʼ gúninu ante gábinu xcaadxi naquiiñeʼ guni estudiar Biblia stubi.

³ Guiráʼ ca xpinni Jiobá caquiiñeʼ guidúʼndanu Biblia ne guni estudiarnu ni ti gánnanu xii nga racalaʼdxiʼ Dios gúninu. Ne ngapeʼ nga ni bisiene apóstol Pablu ca xpinni Cristu ni guleza ndaaniʼ guidxi Colosas. Laabe gúdxibe laacaʼ: «Qué huayaana dxí du de iní né du Dios pur laatu. Rinaba du laabe udii Espíritu Santu enda biaani laatu ne usiene laatu ti ganna pe tu xi racalaʼdxi be guni tu». Xiñee risaca ngue guʼndaʼ ca xpinni Cristu que Stiidxaʼ Dios ne guni estudiarcaʼ ni yaʼ. Purtiʼ zacané ni laacabe gácacabe binni nuu xpiaaniʼ ne «para ganda sa[cabe] modo naquiiñe sa ca xpinni Señor ne guni[cabe] ni jma chuʼlaʼdxiʼ». Laaca zacané ni laacabe gúnicabe ca cosa ni racalaʼdxiʼ Jiobá, ne jmaruʼ si para guni predicárcabe stiidxaʼ Reinu (Colosenses 1:9, 10). Nga runi ora gusíʼdinu binni de Biblia, gacanenu laacabe guiénecabe zacané Biblia laacabe gúnicabe ni na Jiobá pa gatigá gúʼndacabe ni ne guni estudiárcabe ni.

⁴ Pa racaláʼdxinu gacanenu ca estudiante stinu guni estudiarcaʼ Biblia stúbicaʼ la? naquiiñeʼ gúninu ni primeru. Zacané Biblia laanu lu xquendanabáninu ne ora guni predicarnu pa gatigá guidúʼndanu ni ne guiníʼ íquenu ni bidúʼndanu. Casi pa guinabadiidxaʼ tuuxa laanu xiixa ni nagana la? zanda guicábinu laabe né Biblia. Ne ora guidúʼndanu de Jesús, de Pablu ne de xcaadxi ni qué niree gana de ñuni predicar la? zacané relatu stícabe laanu ne qué zusaana de guni predicarnu neca nuu guendanagana. Ora gábinu xcaadxi ni bizíʼdinu ora biʼniʼ estudiarnu Biblia ne ximodo gucané ni laanu la? zándaca gucaʼnu xcaadxi guni estudiar chaahuicaʼ Biblia para gacané ni laacaʼ.

5. Bizeeteʼ ti modo zanda gacanenu ca estudiante stinu guiaacaʼ guni estudiarcaʼ Biblia stúbicaʼ.

⁵ Zándaca guinabadiidxanu ximodo zanda gacanenu estudiante stinu guiaa guni estudiar Biblia stubi. Zanda guluinu laabe ximodo gaca prepararbe dede ante né publicación ni chigúʼndanenu laabe. Ne laaca zanda gábinu laabe guyúbibe ca versículo ni zeeda lu ca párrafo stini. Pa cayúʼndanenu laabe libru Xipeʼ ndiʼ cusiidiʼ Biblia la? zanda gábinu laabe gúʼndabe ni zeeda lu apéndice stiʼ libru ca. Despué maʼ zanda gusíʼdinu laabe gaca prepararbe para ca reunión ne quixhe íquebe guicábibe lu cani. Laaca zanda gábinu laabe gúʼndabe revista Torre stiʼ ni rapa ne ¡Despertad! Ne zanda gacanenu laabe guidxélabe cani rinabadiidxaʼ binni de Biblia, zanda iquiiñenu programa Watchtower Library o BIBLIOTECA NI NUU LU INTERNET Watchtower. Ora guʼyaʼ  estudiante riʼ nuu ca programa riʼ la? jma ziuulaʼdxiʼ guni estudiar stubi ne ziuulaʼdxiʼ ganna jma.

6. a) Ximodo zanda gacaneluʼ estudiante stiluʼ chuulaʼdxiʼ guni estudiar Stiidxaʼ Dios. b) Xi zándaca gacalaʼdxiʼ estudiante stinu guni pa gannaxhii Stiidxaʼ Dios.

⁶ Ora ridúʼndanenu tuuxa binni Biblia, racaláʼdxinu gudiibe cuenta nabé risaca Biblia purtiʼ zacané ni laabe para gunibiaʼbe Jiobá jma. Lugar de gucaʼnu laabe guni estudiarbe la? gusíʼdinu laabe modo chuuláʼdxibe gúnibe ni. Ora jma maʼ ziziidibe de Biblia, jma ziuuláʼdxibe guni estudiarbe ni. Óraca zándaca guni sentirbe casi hombre bicaa salmo riʼ: «Guizáʼ galán runeʼ sentir chuaaʼ gaxha de Dios. Runeʼ cré zanda gapa Jiobá naa» (Salmo 73:28). Nanna dxíchinu zacané espíritu stiʼ Jiobá estudiante ni racalaʼdxiʼ gaca xhamigu laabe.

7. Ximodo bisiidiʼ Jesús ca discípulo stiʼ para guni predicarcaʼ stiidxaʼ Reinu. (Biiyaʼ foto ni zeeda ra ruzulú tema riʼ).

⁷ Zanda guizíʼdinu stale de modo bisiidiʼ Jesús ca apóstol stiʼ. Biʼniʼ predicarné Jesús laacabe, zaqué biiyacabe ximodo rusiidibe binni. Laaca bisiene chaahuiʼ Jesús laacabe ximódopeʼ guni predicárcabe (Mateo, capítulo 10). ^[1] Qué nindaa maʼ biziidiʼ ca apóstol que ximodo gusiidicaʼ ni dxandíʼ de Dios (Mateo 11:1). Guidúʼyanu chupa cosa ni zanda gusíʼdinu cani nacubi ora guni predicarnu.

8, 9. a) Ximodo guniʼné Jesús binni. b) Ximodo zanda gacanenu ca publicador nacubi para guiníʼnecaʼ binni, casi biʼniʼ Jesús.

⁸ Ora güínenu binni diidxaʼ. Cadi guiráʼ diʼ ora nga guniʼné Jesús stale binni. Stale biaje bisiidibe binni ora nuu stubi. Ne galán modo biʼniʼ sentir binni ora byuíʼnebe laacaʼ diidxaʼ. Casi dxi guníʼnebe ti gunaa ni zindee nisa ra ti bizé ndaaniʼ guidxi Sicar que la? nabé guyuulaʼdxiʼ gunaa que modo guníʼnebe laa (Juan 4:5-30). Sti dxi guníʼnebe Mateo Leví, ti hombre ni ruquixe impuestu. Guca hombre riʼ discípulo stiʼ Jesús ora biʼniʼ invitar laabe gácabe ni. Despué biʼniʼ invitarbe Jesús ne xcaadxi binni chitocaʼ ra lídxibe. Raqué guniʼné Jesús stale binni (Mateo 9:9; Lucas 5:27-39).

⁹ Ti biaje guníʼ ti hombre láʼ Natanael caadxi cosa ni cadi galán de ca binni de Nazaret, xquidxi Jesús. Peru guca Jesús nachaʼhuiʼ ora guniʼné laabe. Ne pur ngue bichaa Natanael modo riníʼ ique de Jesús ne guyuulaʼdxiʼ guiziidiʼ jma de laabe (Juan 1:46-51). Xi rusiidiʼ ejemplu stiʼ Jesús riʼ laanu yaʼ. Pa galán modo guinínenu binni ne gácanu nachaʼhuiʼ né laacaʼ la? zándaca jma ziuuláʼdxicaʼ gucaadiágacaʼ laanu. ^[2] Gusíʼdinu cani nacubi guníʼnecaʼ binni galán ne gácacaʼ nachaʼhuiʼ né laacabe. Zacá jma ziuuláʼdxicabe guni predicárcabe.

10-12. a) Xi biʼniʼ Jesús para guyuulaʼdxiʼ binni gucaadiaga stiidxaʼ Reinu. b) Ximodo zanda gacanenu ca publicador ni nacubi para gusiidicaʼ ni dxandíʼ de Dios jma jneza.

¹⁰ Gusíʼdinu cani racalaʼdxiʼ gucaadiaga. Nabé guyuu xhiiñaʼ Jesús. Peru ora racalaʼdxiʼ binni gucaadiaga laabe la? guleebe tiempu para bisiidibe laacaʼ stale cosa. Casi ti dxi, bidxiña ti grupu binni ruaa ti lago para gucaadiaga laabe. Gudxiʼbaʼ Jesús ndaaniʼ ti canuá ne laaca gudxiʼbaʼ Pedru, ne de raqué nga bisiidicabe binni. Biluxesícabe la? laaca bisiidibe Pedru xiixa. Bíʼnibe ti milagru para gucanebe laa guinaazeʼ stale benda. De raqué gúdxibe laa: «Dede yanadxí cásica rinaaze lu benda, zacaca zeda neu stale binni ra nuaaʼ». Biblia na gulee si Pedru ne xcaadxi hombre «ca canuá que lu yuxi, bisaana cabe irá ni raqué» ne yenándacabe Jesús (Lucas 5:1-11).

 ¹¹ Ti hombre láʼ Nicodemo laaca nabé racalaʼdxiʼ gusiidiʼ Jesús laa jma. Peru nácabe tobi de ca hombre ni nuu lu tribunal ni nabé risaca stiʼ ca judíu. Ngue runi cadxíbibe xi guiníʼ ique binni ora guʼyaʼ caníʼnebe Jesús. Pur ngue yegánnabe Jesús huaxhinni. Galán modo bidxaagalú Jesús laabe, gulee Jesús tiempu para guniʼné laabe ne bisiene laabe cani dxandíʼ risaca zeeda lu Stiidxaʼ Dios (Juan 3:1, 2). Guiráʼ ora gulee Jesús tiempu para gusiidiʼ binni ni dxandíʼ de Dios ne gucané laacabe iguidxi fe stícabe. Laanu laaca naquiiñeʼ guibiguétanu ra nuu binni hora quíxhecabe chuunu ne cueenu tiempu para gacanenu laacabe guiénecabe Biblia.

¹² Ora chiguni predicarnu né ti publicador nacubi la? zanda gusíʼdinu laacabe guibiguétacabe chigánnacabe binni ni chuulaʼdxiʼ guiziidiʼ jma. Laaca zanda guni invitarnu laacabe chinécabe laanu ora chigúninu ca revisita ne ca estudiu stinu. Zacá zánnacabe gusiidicabe de Biblia ne ziuucabe nayecheʼ ora gacanécabe xcaadxi gunibiaʼcaʼ Jiobá. Despué ziuuláʼdxicabe guibiguétacabe chigánnacabe binni ne gusiidicabe laacaʼ de Biblia. Laaca zaziidicabe gápacabe paciencia ne cadi guireecabe gana nagueendaca pa qué guidxélacabe binni ra lidxi (Gálatas 5:22) (biiyaʼ cuadru « Qué nireebe gana»).

13, 14. a) Xi rizíʼdinu de ca xpinni Jiobá ni runi sacrificiu pur xcaadxi. b) Ximodo zanda gusíʼdinu ca joven ne cani nacubi gusihuínnicaʼ nadxiicaʼ xcaadxi hermanu.

¹³ Jiobá racalaʼdxiʼ gannaxhiisaa guiráʼ ca xpinni casi hermanu ne gacanésaanu (biindaʼ Lucas 22:24-27 ne 1 Pedro 1:22). Biblia na biʼniʼ Jesús dede biaʼ gúndatiʼ pur gucané binni. Dede bidiibe xquendanabánibe para guilá binni (Mateo 20:28). Ti gunaa xpinni Cristu láʼ Dorcas nabé gucané binni (Hechos 9:36, 39). Ne sti gunaa xpinni Cristu láʼ María, nabé biʼniʼ dxiiñaʼ para gucané ca hermanu de Roma (Romanos 16:6). Ximodo zanda gacanenu cani nacubi guiénecaʼ risaca gacanenu ca hermanu stinu yaʼ.

¹⁴ Zanda guni invitarnu cani nacubi chinenu laacaʼ ora chigánnanu cani maʼ nagola o cani huará. Cani napa xiiñiʼ galán chinecaʼ laacabe ora chigánnacaʼ ca binni ca, pa zanda cheʼ xiiñicabe ra nuu ca binni riʼ. Ca ancianu zanda guinábacaʼ ca joven o cani nacubi gacanecaʼ laacabe chinecaʼ guendaró para cani maʼ nagola o para gaca chaahuiʼ ra lídxicaʼ. Pa guʼyaʼ ca joven ne cani nacubi rapasaa ca hermanu laacaʼ la? zaziidicabe gúnicabe zaqueca. Guidúʼyanu ni runi ti ancianu. Ora riguni predicarbe ndaaniʼ xiixa guidxihuiiniʼ la? rigánnabe ca hermanu ni nabeza raqué para gúʼyabe ximodo nuucaʼ. Pur ni rúnibe que biziidiʼ ti joven ni riné laabe que guiníʼ ique ximodo gacané ca hermanu (Romanos 12:10).

15. Xiñee risaca guizaalaʼdxiʼ ca ancianu guiziidiʼ chaahuiʼ ca hermanu ni nuu ndaaniʼ congregación.

¹⁵ Riquiiñeʼ Jiobá hombre para gusiidiʼ Stiidxabe ndaaniʼ congregación. Nga runi naquiiñeʼ guiziidiʼ ca hermanu gusiidicaʼ jneza lu ca discursu sticaʼ. Ti ancianu zanda gucaadiaga ti siervu ministerial ora guni ensayar discursu stiʼ ne gacané laabe gúnibe ni jma jneza (Nehemías 8:8). ^[3]

16, 17. a) Ximodo bisihuinni Pablu racalaʼdxiʼ guiziidiʼ chaahuiʼ Timoteu. b) Ximodo zanda gusiidiʼ ca ancianu ca siervu ministerial gácacaʼ pastor ndaaniʼ congregación.

¹⁶ Caquiiñeʼ guiziidiʼ ca hermanu para gácacaʼ pastor ndaaniʼ congregación. Bisiidiʼ Pablu Timoteu ne gúdxibe laa gusiidiʼ xcaadxi. Bidii Pablu conseju riʼ laabe: «Nuu Dios para acané cani nuu né Cristu Jesús  tobi si. Bidii lugar acané be lii. Irá ni biʼyu bisiide binni, bisiidi ni cani nannu zanda usiidi ni stobi» (2 Timoteo 2:1, 2). Stale nga ni biziidiʼ Timoteu de Pablu, purtiʼ Pablu guca ancianu ne apóstol. Caadxi de cani biziidiʼ Timoteu nga guni predicar jma jneza ne gacané xcaadxi ndaaniʼ congregación (2 Timoteo 3:10-12).

¹⁷ Gulee Pablu stale tiempu para bisiidiʼ Timoteu purtiʼ racalaʼdxiʼ guni Timoteu xhiiñaʼ jma jneza (Hechos 16:1-5). Ximodo zanda chinanda ca ancianu ejemplu stiʼ Pablu. Ra guni invitárcabe ca siervu ministerial chinecaʼ laacabe ora chigúnicabe visita de pastoreu. Zacá zaziidiʼ ca siervu ministerial ximodo gusiidicaʼ xcaadxi ne gápacaʼ paciencia ne gannaxhiicaʼ guiráʼ hermanu. Laacaʼ zaziidicabe guyúbicabe gusiene Jiobá laacabe ximodo gápacabe ca xpinni (1 Pedro 5:2).

18. Xiñee nabé risaca gusíʼdinu xcaadxi guni xhiiñaʼ Jiobá.

¹⁸ Ca dxi mayaca gueeda fin riʼ, stale ni nacubi caquiiñeʼ guiziidicaʼ guni predicarcaʼ jma jneza. Laaca caquiiñeʼ hermanu ni guiziidiʼ modo gapa congregación. Racalaʼdxiʼ Jiobá guiziidiʼ guiráʼ ca xpinni, ne maʼ bidiibe laanu dxiiñaʼ de gusíʼdinu cani nacubi. Nga runi, naquiiñeʼ gúninu stipa pur gusíʼdinu xcaadxi, casi biʼniʼ Jesús ne Pablu ni. Caquiiñeʼ gusíʼdinu guiráʼ cani ganda gusíʼdinu laacaʼ, purtiʼ caquiiñeruʼ gaca stale dxiiñaʼ para guireeche diidxaʼ ante gueeda fin.

19. Xiñee naquiiñeʼ chuʼnu seguru zabeendunu ni galán pa gúninu stipa pur gusíʼdinu ca hermanu stinu.

¹⁹ Para gusíʼdinu xcaadxi riquiiñeʼ tiempu ne stipa. Peru galán gánnanu zacané Jiobá ne Jesús laanu ximodo gusiidiʼ chaahuinu cani nacubi. Nabé ziéchenu guidúʼyanu laacabe cayúnicabe stipa pur gúnicabe dxiiñaʼ ndaaniʼ congregación ne ora guni predicárcabe (1 Timoteo 4:10). Laaca naquiiñeʼ gúninu biaʼ gándatiʼ pur cadi gusaananu de guiniisinu lu stiidxaʼ Dios, guiziidiʼ chaahuinu modo gusihuínninu ca cualidad ni naquiiñeʼ gapa ca xpinni Cristu ne gaca xhamígunu Jiobá jma.