CA BINNI runi estudiar Biblia zeeda gácacaʼ casi ca binni ni ruyubi oro, purtiʼ naquiiñeʼ gúnicabe stale stipa ne guni investigárcabe para guidxélacabe guendanuuxpiaaniʼ stiʼ Dios ni zeeda lu Biblia. Guidúʼyanu chonna modo rúnicabe para guidxélacabe oro ne ximodo zanda guchaaganu cani né ni guni estudiarnu lu Biblia.

Bixuiʼlú laga canazaluʼ guriá guiiguʼ málasi biiyuʼ ti guiéhuiiniʼ ne cuzaaniʼ gubidxa luni. Guta gudaaluʼ para guindisuʼ ni ne guizáʼ biécheluʼ ora biiyuʼ naca si ni ti ndaa oro. Jma nahuiiniʼ ni que ique ti cerillu ne jma nagana para guidxélacabe ni que ti diamante ni jma risaca. Ne cuyúbiluʼ pa nuuruʼ oro neza bidxeʼluʼ ti ndaa que.

Ngaca nga ni bizaaca dxi nacubi yeganna ca testigu stiʼ Jiobá lii para gusiidicaʼ lii de esperanza ni zeeda lu Stiidxaʼ Dios. Zándaca rietenalaʼdxuʼ dxi primé bidxeʼluʼ ti ndaa oro lu Biblia: casi dxi biiyuʼ cá la Dios luni o dxi gúnnaluʼ zanda gaca xhamíguluʼ laabe (Salmo 83:18; Santiago 2:23). Oraqueca bidiiluʼ cuenta bidxélaluʼ xiixa ni jma risaca que oro. Ne racalaʼdxuʼ guidxeʼluʼ jma.

Nuu biaje, chupa chonna beeu si rutopa ca binni ruyubi oro chupa chonna kilu oro aluvial, ne risaca ni stale mil de dólar. Zacá rábicabe oro ni ricasaa casi bolahuiiniʼ o laza ruaa guiiguʼ ne arroyo.

Dxi bizulú biindané ca testigu stiʼ Jiobá lii de Biblia, zándaca biʼniʼ sentirluʼ casi binni ni ruyubi oro, ruchácabe yuxi ndaaniʼ ti bandeja ne rigaacabe nisa ique ni para guyúbicabe pa nuu oro lade ni. Xiixa ni gucané lii gannuʼ jma ne guidxíñaluʼ gaxha de Jiobá nga guníʼ íqueluʼ xiná ca versículo ni ruundaluʼ lu Biblia. Ra maʼ ziyéneluʼ cani dxandíʼ zeeda lu Biblia, jma biziidiluʼ ximodo guidxíñaluʼ Jiobá ne ximodo cadi gusaanabe de gannaxhiibe lii, ne nannuʼ zanda guibániluʼ sin qué chuʼ dxi gátiluʼ (Santiago 4: 8; Judas 20, 21).

Cásica runi binni ni ruyubi oro runi stipa pur guidxelaʼ ti ndaa ni ndaaniʼ guiiguʼ, zándaca lii  laaca né gana biyubuʼ ca tesoro ni zeeda lu Biblia. Ne nánnadu pur nga biziidiluʼ cani dxandíʼ zeeda lu Biblia ne bicaa cani lii gudiiluʼ xquendanabániluʼ Dios ne guyuunísaluʼ (Mateo 28:19, 20).

Nuu biaje ridxélacabe oro ndahui lu ca guié ndaa ni riree xagueteʼ Guidxilayú. Nuu de laacani napa stale oro dede zanda gunidécabe cani para cueecabe oro napa cani. Cadi casi zécabe zuuyacabe ni. Xiñee yaʼ. Purtiʼ lu ti tonelada guié ribeecabe 10 gramu si de oro. Neca rudii dxiiñaʼ cueecabe oro ca la? rúnicabe ni purtiʼ nánnacabe galán ni zabeendúcabe.

Laaca naquiiñeʼ gúninu stipa ti «cadi guiaana nu casi cani deru cuzulú caziidi de Cristu» (Hebreos 6:1, 2). Naquiiñeʼ gúninu stipa ora guni estudiarnu Stiidxaʼ Dios ti guizíʼdinu xiixa nacubi ne ni gacané laanu lu xquendanabáninu. Xi zanda guʼnuʼ ti cueenduluʼ stale ni galán ora guni estudiarluʼ Biblia neca maʼ xadxí de cayuʼnuʼ ni yaʼ.

Cadi gusaanuʼ de chuuláʼdxiluʼ guiziidiluʼ jma. Biiyaʼ dede né ca cosa ni rábiluʼ huaxiéʼ risaca. Cadi gusaanuʼ de gúniluʼ stipa ne zacá zadxélaluʼ guendanuuxpiaaniʼ stiʼ Dios ne modo guibániluʼ jneza, ne nga nga ca cosa jma risaca que oro (Romanos 11:33). Ora iquiiñeluʼ ca herramienta ni nápaluʼ lu stiidxaluʼ, jma zaziidiluʼ de cani zeeda lu Stiidxaʼ Dios. Biyubi ni gacané lii gannuʼ xi naquiiñeʼ guʼnuʼ ne biyubi gannuʼ ximodo ricabi Biblia cani rinabadiidxaluʼ. Gunabadiidxaʼ xcaadxi hermanu xi textu de lu Biblia ne xi tema huayacané laacaʼ chuʼcaʼ gana, ne guniʼné laacabe xi nacubi biziidiluʼ lu Stiidxaʼ Dios ora biʼniʼ estudiarluʼ.

Dxandíʼ, cadi pur gánnasinu stale cosa nga ridúʼndanu. Purtiʼ apóstol Pablu guníʼ pa racaláʼdxisinu gánnanu la? «para uchá nu enda naróʼ stinu» nga cayúninu ni (1 Corintios 8:1). Nga runi, biʼniʼ stipa para cadi gudxiibaluʼ laca lii ne biʼniʼ stipa para iguidxi fe stiluʼ. Ni zacané lii nga gápaluʼ adoración en familia ne gúʼndaluʼ stúbiluʼ para guibániluʼ modo na ca ley stiʼ Jiobá ne zucaaluʼ xcaadxi guni zaqueca. Ne jma ziécheluʼ purtiʼ maʼ bidxélaluʼ xiixa ni jma risaca que oro (Proverbios 3:13, 14).