LU IZA 2004, 26 de diciembre, guca ti xu nadipaʼ biaʼ 9,1 ni bininá isla Simeulue ni nuu ladu noroeste stiʼ Sumatra (Indonesia). Cani nuu guriá nisadóʼ que biiyacaʼ pabiáʼ ziyete lu nisa que biaʼ qué huayaca ni. Oraqueca bixooñeʼ guiráʼ binni que lu ca dani que, ne cucaacaʼ ridxi: «¡Smong! ¡Smong!», lu stiidxacabe riníʼ ni «tsunami». Nin media hora caʼruʼ guizáʼ málasi bihuinni zeeda caadxi ola ngola ne binitilúcani ca yoo ne ca ranchuhuiiniʼ ni nuu guriá nisadóʼ que.

Isla Simeulue que nga primé guidxihuiiniʼ ni bininá tsunami que. Peru de lade 78,000 binni de isla que, gadxe si guti. Xiñee biaʼ que si guti yaʼ. * Sicaríʼ na ti refrán nabé runibiáʼ ca binni de lu isla que: «Pa gaca ti xu ne guʼyuʼ guiete lu nisadóʼ, bixooñeʼ lu ca dani ca, purtiʼ jma nadipaʼ zabiguetaʼ ni». Bilabi ca binni que ni biziidicaʼ de ca bixhozególacaʼ: ora gúʼyacabe guihuinni xiixa ni qué huayuuyacabe lu nisadóʼ que la? zazaaca ti tsunami. Bilácabe purtiʼ bizuubacabe diidxaʼ.

Biblia na chiguizaaca ti cosa lu Guidxilayú riʼ ni qué huayuu dxi guizaaca, «nabé naná zaca ni ca dxi que. Qué huayuu dxi gaca ni naná biaʼ qué, dede dxi bizáʼ Dios guidxilayú, ne ma qué ziuu ru dxi aca ni sti tiru» (Mateo 24:21). Cadi caníʼ diʼ ni chiguinitilú Guidxilayú riʼ pur donda stiʼ binni o pur xiixa desastre guizaaca; purtiʼ cadi para guinitilú Guidxilayú riʼ nga bizáʼ Dios ni (Eclesiastés 1:4). Sicaríʼ na Biblia chiguni Dios: «Zunitilú lu cani binitilú guidxilayú». Racá nga guiluxe guiráʼ cosa malu ne yuubaʼ stiʼ binni (Apocalipsis 11:18; Proverbios 2:22). ¡Nabé sicarú ndaayaʼ ca!

Cadi casi ca tsunami, xu ne erupción stiʼ ca volcán ca nga ni chigaca riʼ, purtiʼ qué zati diʼ binni ni qué gapa donda luni. Biblia na «de Dios nga reeda enda ranaxhii», ne laani ruzeeteni «cani runi jneza zudii Dios laacaʼ guidxilayú, ne qué ziuu dxi gusaana de guibánicaʼ lu ni» (1 Juan 4:8; Salmo 37:29). Xi zanda guʼnuʼ para guilaluʼ lu ca dxi nagana ca ne guicaaluʼ ca ndaayaʼ cudii stiidxaʼ Jiobá Dios laanu ca yaʼ. Bilabi cani cayábibe lii.

Qué zanda cuáquinu fecha guiluxe ca cosa malu ne ca yuubaʼ riʼ, purtiʼ Jesús guníʼ: «Peru padxí ne pora la? iruti ganna, nin ca ángel ni nuu ibáʼ, dede nin naa qué gannaʼ sínuque Bixhoze siaʼ nga nanna». Nga runi gudxi Jesús laanu gatananu (Mateo 24:36; 25:13). Xidé nga naquiiñeʼ gatananu yaʼ. Biblia rusiene ximodo zaca guidxilayú riʼ ante guedané Dios fin. Cásica modo biʼyaʼ ca binni de Simeulue que bichaa nisadóʼ que ne bicaani laaca guiníʼ íquecaʼ zeeda ti tsunami, laaca zuchaa modo nabani binni ne nga naquiiñeʼ gucaa laanu  guiníʼ íquenu mayaca zeeda fin ca. Lu cuadru zeeda lu ca yaza riʼ zuuyaluʼ caadxi cosa ruzeeteʼ Biblia ni maʼ bichaa ca dxi stinu riʼ.

Dxandíʼ maca huayaca caadxi de ca cosa riʼ, peru nagabaʼ si guca cani dxiqué. Peru Jesús guníʼ ora guidúʼyanu guizaaca cani guniʼbe que, naquiiñeʼ gánnanu maʼ gaxha nuu fin que (Mateo 24:33). Guníʼ ique biaʼ tiempu huabani binni padxí maʼ bihuinni ca cosa ni guníʼ Jesús que 1) lu guidubi Guidxilayú, 2) cayaca cani lu ti tiempu si ne 3) zeʼ dxi jma naroʼbaʼ cayaca cani. Guiráʼ ndiʼ rusihuinni maʼ nabáninu tiempu ca.

Ti hombre ni guca presidente stiʼ Estados Unidos guníʼ: «Ora xhidxi alarma ante guizaaca xiixa [...] randa rilá binni». Guca si tsunami que lu iza 2004, bicaacabe caadxi alarma guidubi gudxi que para cadi gátiruʼ jma binni. Zacaca nga maʼ biʼniʼ Dios, bidiibe laanu ti alarma ni gacané laanu gánnanu ora maʼ gueeda fin ca. Biblia na: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mateo 24:14).

Iza gudiʼdiʼ ca, jma de 1,900 millón de hora bicheeche ca testigu stiʼ Jiobá diidxaʼ lu 240 guidxi ne territorio lu jma de 700 diidxaʼ. Dxiiñaʼ riʼ nga tobi de ca prueba ni nuu para gánnanu mayaca zeeda fin ca. Tantu nadxii ca testigu sti Jiobá binni, rúnicaʼ stipa pur quixhenacaʼ laacabe maʼ gaxha nuu dxi cuidxi Dios cuenta binni (Mateo 22:39). Pa maʼ nánnaluʼ ndiʼ, nga rusihuinni nadxii Jiobá lii. Cadi guiaandaʼ lii xi racalaʼdxiʼ Dios: «Cabeza be inaba irá binni perdón laabe, purti  qué racalaʼdxi be initilú nin tobi» (2 Pedro 3:9). Yanna lii yaʼ. Ñee zuzuubaluʼ stiidxaʼ Dios ni nadxii lii la?

Bietenalaʼdxiʼ xi biʼniʼ ca binni de Simeulue ora bíʼyacaʼ ziyete lu nisa que, bixooñecabe lu ca dani que, qué nibézacabe dede ora nibiguetaʼ ni para nuxooñecabe. Pur bixooñecabe nagueenda nga runi bilácabe. Zacagá nga naquiiñeʼ guʼnuʼ, laaca naquiiñeʼ guyubuʼ ti lugar nasoo para guilaluʼ. Nabé sicarú ti invitación gudxi Dios profeta Isaías gucaa ne dede nagasi, ra «mayaca guiluxe ca dxi» riʼ, nápanu ni. Ndiʼ nga invitación ca: «Latáʼ, ne quíbanu lu dani stiʼ Jiobá [...]. Laabe zusiidibe laanu ca neza stibe, ne zazanu lu ca nezahuiiniʼ stibe» (Isaías 2:2, 3).

Ora quíbanu lu ti dani, jma xiroobaʼ de ra rugaanda ridúʼyanu ne runi sentirnu jma seguru. Zacaca nga rizaaca ora gunibiaʼnu ca neza stiʼ Dios, ni ca lu Biblia, huayacané cani millón de binni guni chaahuiʼ xquendanabani (2 Timoteo 3:16, 17). Ndiʼ racané laacabe sácabe lu «ca nezahuiiniʼ» stiʼ Dios ne zacá riuuláʼdxibe ni rúnicaʼ ne rápabe laacaʼ.

Ñee zacaaluʼ invitación ni cudii Dios lii lu ca dxi nagana riʼ ne zudiiluʼ lugar gápabe lii la? Biiyaʼ cuadru ni zeeda lu tema riʼ ra zeeda ca seña ni rusiidiʼ Biblia zahuinni lu ca últimu dxi (2 Timoteo 3:1). Ziuulaʼdxiʼ ca testigu stiʼ Jiobá ni runi predicar neza ra nabezuʼ gacanecaʼ lii guiéneluʼ ne gúniluʼ cani rusiidiʼ Biblia. Zándaca ziuuláʼdxiluʼ gúʼyaluʼ ximodo ricabi Biblia cani rinabadiidxaluʼ lu sitiu jw.org.