Rosi guníʼ: «Guizáʼ gucuá iqueʼ caadxi guendanagana gupaʼ ne puru si cosa feu guníʼ iqueʼ». ¿Xi textu de lu Biblia gucané laabe yaʼ? Tobi de laacani nga Mateo 6:34: «Cadi chuʼ tu xizaa de ni chi gaca ixíʼ, purti ixí ru nga guʼya tu xi gacaʼ. Lagucaa ique si de ni naquiiñe tu yanadxí». Rosi ná ca diidxaʼ ni guníʼ Jesús riʼ gucané ni laabe para cadi chúʼpebe xizaa pur ca cosa ni zándaca chigaca sti dxi. Ne nabe: «Maʼ stale guendanagana napaʼ para gacaʼ preocupar pur ca cosa ni caʼruʼ gaca ne zándaca nin qué zazaaca».

Yasmín laaca biʼniʼ sentir maʼ qué ganda gucueeza ansiedad stiʼ. Guniʼbe: «Guiráʼ semana biinaʼ ne guyuu gueelaʼ dede qué ñanda ñaseʼ pur guiráʼ ca guendanagana cadideʼ». ¿Xi versículo de lu Biblia gucané laabe yaʼ? Laabe guniʼbe 1 Pedro 5:7, ra ná: «Cadi chuʼ tu xizaa, sínuque laquixhe irá ni lu ná be, purti laabe cayapa be laatu». Yasmín laaca guníʼ: «Qué nusaanaʼ de ñuneʼ orar Jiobá ne gudiʼdiʼ si tiempu bicábibe ca oración stinneʼ. Bineʼ sentir casi ora nibeecabe ti cosa nanaa luguiaʼyaʼ. Riuu ru ora riuaaʼ xizaa pur ca guendanagana stinneʼ, peru yanna maʼ nannaʼ xi guneʼ».

Ti baʼdudxaapaʼ láʼ Isabella ná: «Zuluaʼsiaʼ gusaana binni ca cosa ca para despué hereditario ni, purtiʼ bixhozeʼ laaca runi ni. Nuu biaje rusaanaʼ ca cosa risaca ca para cadi guneʼ gastiʼ ne maʼ ziguuyaʼ televisión o maʼ ziguiziiladxeʼ. Feu costumbre riʼ purtiʼ jmaruʼ si runi estresar ni, pa dede últimu gusaananu ca cosa ca maʼ qué zúninu cani jneza». Ti principiu de lu Biblia ni gucané laabe nga 2 Timoteo 2:15, ni ná: «Bicaalaʼdxi guʼnu dxiiña modo chuʼlaʼdxi Dios ti qué gapu xi pur ituí lú lu nezalú». Isabella bisiene: «Qué racalaʼdxeʼ guituilú Jiobá pur dxiiñaʼ stinneʼ purtiʼ bisaanaʼ ni dede últimu».

Ngaca bizaaca Kelly, laa guníʼ: «Ora gapaʼ ti dxiiñaʼ ni chiguneʼ entregar, ni runeʼ nga rusaanaʼ ni dede últimu. Despué maʼ guzuluáʼ guunaʼ ne nisi laani maʼ cá iqueʼ. Qué lica ñacané nga naa». Conseju stiʼ Proverbios 13:16 gucané ni laabe stale: «Binni nuu xpiaaniʼ riníʼ ique ante guni xiixa, peru ti binni huati qué rusihuinni nuu xpiaaniʼ pur guiráʼ guendahuati stiʼ». Laabe guniʼbe xi biziidibe ora biʼniʼ meditarbe lu versículo riʼ: «Galán nga quixhe chaahuinu ca cosa stinu dede ante. Yanna maʼ napaʼ ti agenda lu escritorio stinneʼ ra rucaaʼ guiráʼ ni chiguneʼ; nga racané naa para quixheʼ chaahueʼ tiempu stinneʼ ne cadi gusaanaʼ ca cosa ca dede últimu».

Cristina guníʼ: «Zeʼ xheelaʼ ne bisaanané naa tapa baʼduhuiiniʼ». ¿Xi principiu zeeda lu Biblia gucané laabe yaʼ? Proverbios 17:17 ná: «Ni dxandíʼ xhamígunu la? guiráʼ ora nadxii laanu, ne zácabe ti bíchinu o ti bizánanu ora nápanu xiixa guendananá». Biyúbibe gacané xcaadxi xpinni Dios laabe. ¿Xi bizaaca yaʼ? «Guizáʼ gucané ca xhamigaʼ ne ca xhamiguaʼ naa de stale modo. Nuu de laacaʼ yegánnacaʼ laadu ne bidiicaʼ laadu guendaró ne guieʼ. Biaʼ chonna biaje stale xhamiguaʼ beeda gacanecaʼ laadu para bidxaʼdu de yoo. Ne tobi de laacaʼ gucané naa para guidxelaʼ dxiiñaʼ. Qué nusaana ca xhamigaʼ ne xhamiguaʼ naa stubeʼ».

Diana, gunaa maca bizéʼtenu que laaca biʼniʼ sentir nuu stubi. Bietenaláʼdxibe ximodo biʼniʼ sentirbe pur guiráʼ guendanagana gudíʼdibe: «Casi ñaca ñuuyaʼ guiráʼ binni nuuca nayecheʼ ne tobi si peru naa nuaaʼ stubeʼ». Ti textu de lu Biblia ni gucané laabe nga Salmo 68:6: «Rudii Dios cani nuu stubi ti yoo ra cuézacaʼ». Laabe bisiénebe: «Nannaʼ versículo riʼ cadi caníʼ ni de ti yoo ra ribeza binni, bieneʼ caníʼ Dios de ti yoo espiritual, ti lugar ra guni sentirnu cayápacabe laanu, ra nadxiicabe laanu ne zanda chuʼnu tobi si ne ca binni ni nadxii Jiobá. Peru nannaʼ para ganda chuaaʼ gaxha de ca binni riʼ naquiiñeʼ chuaaʼ gaxha de Dios primeru. Salmo 37:4 gucané naa gudieeʼ cuenta xi caquiiñeʼ guneʼ. Purtiʼ racá ná: “Guyuu nayecheʼ ora guʼnuʼ ni na Jiobá, ne laa zudii lii guiráʼ ni guinabaʼ ladxidoʼloʼ”».

Últimu guníʼ Diana: «Bidieeʼ cuenta naquiiñeʼ chuaaʼ jma gaxha de Jiobá purtiʼ gástiruʼ stobi casi laabe. Para ganda gapaʼ xhamigaʼ ne xhamiguaʼ ni nadxii Jiobá cásica naa, bineʼ ti lista de cosa ni zanda gúnidu juntu. Biziideʼ guuyaʼ ca cosa galán ni napa cada binni ne cadi guuyaʼ ca defectu stícabe».

Cani runi ni ná Dios laaca binni ruchee laacaʼ. Ca testigu stiʼ Jiobá laaca ridxaagalucaʼ guendanagana cásica guiráʼ binni. Peru cani rinanda cani rusiidiʼ Biblia rúnicaʼ stipa pur gacanecaʼ xcaadxi binni. Guizáʼ galán nga gápanu xhamígunu zacá. Peru ¿ñee zanda gacané ca principiu stiʼ Biblia laanu gudxíʼlunu ca guendanagana ni yanna qué gapa solución, casi ti guendahuará ni qué rianda o gatiʼ tuuxa binni ni nadxiinu la?