¿Xiñee riuulaʼdxiʼ binni guibani sin qué chuʼ dxi gatiʼ yaʼ? Biblia ná guluu Dios deseu ca ndaaniʼ ladxidóʼ binni (Eclesiastés 3:11). Ne laaca ruzeeteʼ ni «Dios nga guendarannaxhii» (1 Juan 4:8, TNM). Yanna, pa nadxii Dios laanu, ¿ñee niguube deseu ca ndaaniʼ ladxidoʼno pa qué ziuu dxi gaca ni la?

¿Huaníʼ íqueluʼ ndiʼ la?: qué ñuu dxi niguixhe Dios ñati binni. Ti libru ni zeeda lu Biblia ni láʼ Génesis racané laanu guiénenu gucalaʼdxiʼ Jiobá * nibáninu sin qué ñuu dxi ñátinu ndaaniʼ Guidxilayú riʼ. Ora bizaʼbe Guidxilayú riʼ guluube guiráʼ ni caquiiñeʼ binni para guibani nayecheʼ. Bizáʼsibe Adán, primé hombre, guluube laa ndaaniʼ ti paraísu ni guyuu ti lugar láʼ Edén. De raqué, «biiyaʼ Dios guiráʼ ni biʼniʼ ne, ¡biaguʼyuʼ!, nabé galán cani» (Génesis 1:26, 31).

Bizáʼ Dios Adán casi laa, ti hombre sin donda  (Deuteronomio 32:4). Xheelabe, Eva, guca ti gunaa sicarú ne sin donda. Gudxi Jiobá laacabe: «Lagapa xiiñitu ne lagaca stale, laguchá guidxilayú riʼ ne laguni dxiiñaʼ luni, ne lagapa ca benda nuu ndaaniʼ nisadóʼ ne ca maniʼ ripapa guibáʼ ne guiráʼ maniʼ nuu lu guidxilayú» (Génesis 1:28).

Para ganda guchácabe Guidxilayú riʼ de xiiñicabe la? caquiiñeʼ stale tiempu. Para gaca ni ná Dios caquiiñeʼ gapa Eva xiiñiʼ ne ca xiiñibe gápacaʼ jma xiiñicaʼ dede guidxá Guidxilayú riʼ de binni (Isaías 45:18). ¿Ñabi xa Dios Adán ne Eva nuchacaʼ Guidxilayú riʼ de xiiñicaʼ pa nánnabe chupa chonna si iza chiguibánicaʼ ne maʼ qué zuuyacaʼ gaca ni nabe?

Guníʼ ique pabiáʼ naroʼbaʼ dxiiñaʼ nga gápacabe ca manihuiiniʼ que. Napa xidé cuee Adán stale tiempu para quixhe lá ca maniʼ que (Génesis 2:19). Peru para gápabe guiráʼ ca maniʼ ne ca cosa ni nabani la? caquiiñeʼ cueebe stale tiempu para gunibiáʼ chaahuibe laacaʼ.

Nga runi, guiropaʼ cosa ni biʼniʼ mandar Dios guni Adán ne Eva —gápacaʼ guiráʼ ca maniʼ ne guchacaʼ Guidxilayú de xiiñicaʼ— rusihuínnicani bizaʼbe laacaʼ para guibánicaʼ xadxí. Ne dxandíʼ zacá guca ni purtiʼ Adán bibani stale iza.

Biblia ruzeeteʼ ante gueeda Diluvio que, guyuu binni ni bibani jma xadxí que biaʼ ribani binni yanna. Génesis 5:5 ná: «Biaʼsi gaʼ gayuaa treinta iza nga bibani Adán». Laaca riete de xhoopaʼ hombre ni bibani jma de gaʼ gayuaa iza, laacabe nga: Set, Enós, Quenán, Jared, Matusalén ne Noé, últimu riʼ napa xhoopaʼ gayuaa iza dxi bedandá Diluvio que (Génesis 5:6-27; 7:6; 9:29). ¿Xiñee gunda bibánicabe xadxí yaʼ?

Cadi xadxí de bichee Adán ne Eva nga gule ca hombre bizéʼtenu riʼ. Zándaca pur nga bibánicabe jma xadxí. Peru ¿xiñee caquiiñeʼ gácanu binni sin donda para ganda guibáninu jma yaʼ? Ne ¿ximodo zanda guni ganarnu guendaguti? Para ganda guicábinu ca pregunta riʼ, primeru naquiiñeʼ gánnanu xiñee rióxhonu ne rátinu.