Conseju rudii Biblia: «Cadi ibani tu para gapa si tu bidxichi, sínuque laguieche né biaʼ tiica napa tu» (Hebreos 13:5).

Dxaʼ guidxilayú riʼ de stale cosa ni ná binni caquiiñeʼ gápanu. Peru Biblia rusiidiʼ zanda chuʼnu nayecheʼ né ni nápasinu. ¿Ximodo yaʼ?

Cadi gannaxhiinu bueltu. «Enda ranaxhii bidxichi» rucaani binni cadi guizaalaʼdxiʼ pa gaca huará, guixeleʼ de familia stiʼ, ca xhamigu, guni ni cadi jneza ne maʼ qué guizaalaʼdxiʼ xi guiníʼcabe de laa (1 Timoteo 6:10). ¡Aque stale nga ni runiti binni ora gannaxhii bueltu! Ne clase binni riʼ «qué zadxá neca gapa stale» (Eclesiastés 5:10).

Guietenaláʼdxinu jma risaca binni que guiráʼ cosa nuu. Dxandíʼ nuu stale cosa ni caquiiñenu, peru laacani qué zanda gannaxhiicani ne gápacani laanu casi runi ti binni. Peru, pa gápanu ti xhamígunu la? ziuʼnu nayecheʼ (Proverbios 17:17).

Conseju rudii Biblia: «Ti ladxidóʼ nayecheʼ la? racané para guianda ra gucaná» (Proverbios 17:22).

Chuʼnu nayecheʼ ora huaranu zacané ni laanu guni huantarnu. Peru ¿xi zacané laanu chuʼnu nayecheʼ neca huaranu yaʼ?

Gudiʼnu xquíxepeʼ. Ora guiníʼ íquenu ca guendanagana si stinu «guiráʼ dxi feu» para laanu (Proverbios 15:15). Peru Biblia rusiidiʼ laanu: «Laudii diuxquixe» (Colosenses 3:15). Caquiiñeʼ guizíʼdinu gudiʼnu xquíxepeʼ pur guiráʼ cosa galán ni nápanu, dede né cani ruluíʼ huaxiéʼ risaca. Guzéʼtenu caadxi ejemplu, casi guidúʼyanu ora ziyaaziʼ Gubidxa, guni sentirnu bi nisa o guidúʼyanu nayecheʼ nuu tuuxa ni nadxiinu racané ni laanu chuʼnu nayecheʼ.

Gacanenu binni. «Jma nayeche ni rudii que ni ricaa», neca huaranu dxandíʼ ni ná ca diidxaʼ riʼ (Hechos 20:35). Ora rudiicabe xquíxepeʼ laanu pur xiixa ni bíninu, runi sentirnu nayecheʼ ne rusiáʼndanu ca guendanagana stinu. Pa gacanenu xcaadxi ziuʼnu galán.

Conseju rudii Biblia: Laganna gunáʼ nga «ni dxandí risaca» (Filipenses 1:10).

Ca guendaxheelaʼ ni huaxiéʼ runi cosa juntu jma rapa guendanagana. Nga runi, galán guʼyaʼ binni xquendaxheelaʼ casi tobi de ca cosa ni jma risaca lu xquendanabani.

Laguni cosa juntu. Biblia ná: «Jma galán chuʼ chupa binni que tobi» (Eclesiastés 4:9). Lugar de gúniluʼ xiixa stúbiluʼ guníʼ ique xi ca cosa zanda gúnitu juntu. Guzéʼtenu caadxi ejemplu, casi gúnitu guendaró, chititu ra parque, chiguetu ti nagaʼndaʼ o gúnitu sti cosa ni riuuláʼdxitu.

Lagusihuinni nadxiisaatu. Biblia rusiidiʼ caquiiñeʼ gannaxhiisaa cani maʼ bichaganáʼ ne guni respetarsaacaʼ (Efesios 5:28, 33). Nuu caadxi cosa ni zanda gacané xquendaxheelatu chuʼ naguidxi casi guxidxihuiiniluʼ lú xheelaluʼ, quiidxiluʼ laabe o gusigáʼdeluʼ laabe xiixa. Peru bietenalaʼdxiʼ, xheelasiouʼ nga naquiiñeʼ gapaneluʼ relación sexual (Hebreos 13:4).