GUYUU guendaruchee ne guendaguti pur bichee Adán ne Eva, peru cadi pur nga nuchaa Dios ni gudixhe ique para binni. Stale biaje riete lu Stiidxaʼ Dios qué huachaa ni gudixhe ique Dios para binni.

• «Cani runi ni jneza zacaacaʼ guidxilayú, ne qué ziuu dxi gusaana de guibánicaʼ luni» (Salmo 37:29).

• «Zábibe guendaguti ne maʼ qué ziuu dxi chuʼ ni, ne Jiobá, Señor ni jma nandxóʼ, zuchaa nisa riete lú guiráʼ binni» (Isaías 25:8).

• «Ne ni unitilú be últimu nga enda guti» (1 Corintios 15:26).

• «Ma qué ziuu ru enda guti nin enda ruuna nin enda racaná ladxidóʼ nin yuubaʼ» (Apocalipsis 21:4).

¿Ximodo zunitilú Dios guendaguti yaʼ? Casi maʼ bizéʼtenu, Biblia ná: «Cani runi ni jneza [...] qué ziuu dxi gusaana de guibánicaʼ» lu Guidxilayú. Peru laaca ruzeeteʼ ni «nin ti hombre qué randa runi puru si ni jneza sin guchee ndaaniʼ guidxilayú» (Eclesiastés 7:20). Yanna, ¿ñee zuchaa Dios ca ley stiʼ para guicaa guiráʼ binni guendanabani ni qué zaluxe la? Coʼ, qué ziuu dxi gúnibe ni purtiʼ laabe «qué rusiguii be» (Tito 1:2). ¿Xi chiguni Dios para gaca ni maʼ gudixhe ique para binni guidxilayú yaʼ?

Pur nadxii Jiobá laanu nga gudixe para guilanu de lu náʼ guendaguti. Ora riete lu Biblia guiaxa pur tuuxa, laani nga ni riguíxecabe pur guninácabe laa. Ni guiaxa ca caquiiñeʼ gaca ni biaʼ bininácabe. Guiranu nácanu binni ruchee ne cabeza guendaguti laanu, nga runi Biblia ná: «Pa gacalaʼdxiʼ tobi de laacabe gulá neca ti biʼchiʼ la? nin nga qué zanda guni, nin quixe Dios para ganda guilabe (biaʼ caquiiñeʼ guiaxa para guilácabe nabé caru ni ne guirutiʼ qué zanda quixe ni)» (Salmo 49:7, 8).

Ora gatiʼ ti binni ruchee, riaxa ca pecadu si stibe. Qué zanda gulabe laca laabe ne nin qué zanda quíxebe pecadu stiʼ stobi (Romanos 6:7). Caquiiñenu tuuxa sin donda para gudii xquendanabani, cadi para quixe donda stiʼ, sínuque donda stinu (Hebreos 10:1-4).

Ngapeʼ nga ni biʼniʼ Dios. Biseendabe Jesús, Xiiñibe ni nuu guibáʼ, lu Guidxilayú para gaca ti binni sin donda (1 Pedro 2:22). Jesús peʼ guníʼ: «Benda cadi para gacané cabe naa sínuque para gacaniá laacabe ne para gudiee xpida ti ganda ilá stale binni» (Marcos 10:45). Gútibe para quíxebe ca pecadu stinu ne ganda guicaanu guendanabani ni qué zaluxe (Juan 3:16).

Nabé nagana ca dxi nabáninu riʼ, ndiʼ rusihuinni maʼ nabáninu «lu ca últimu dxi» stiʼ guidxilayú malu riʼ casi maca ruzeeteʼ Biblia (2 Timoteo 3:1, TNM). Ca últimu dxi riʼ zaluxe cani «dxi gueeda juiciu ne dxi guinitilú ca binni ni qué runi respetar Dios» (2 Pedro 3:3, 7, TNM). Peru zalá ca binni ni nadxii Dios ne «zapa ca enda nabani ni qué zaluxe» (Mateo 25:46).

Laaca zusibani Dios stale binni ne maʼ qué ziuu dxi gáticaʼ. Bisihuinni Jesús zanda gusibani gueʼtuʼ, bizaaca ndiʼ dxi zidíʼdibe ndaaniʼ guidxi Naín. Biabe  ti viuda ni gutiʼ tobi lucha xiiñiʼ ne bisibánibe hombrehuiiniʼ que (Lucas 7:11-15). Apóstol Pablo bicaa: «Naa rune cre zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ». Ni cabézanu riʼ rusihuinni ni pabiáʼ nadxii Dios binni guidxilayú (Hechos 24:15).

Millón de binni cabeza guibani sin qué chuʼ dxi gatiʼ. Biblia ná: «Cani runi ni jneza zacaacaʼ guidxilayú, ne qué ziuu dxi gusaana de guibánicaʼ luni» (Salmo 37:29). Dxi ca ziuucabe nayecheʼ ne zaníʼcabe casi guníʼ apóstol Pablo raca biaʼ chupa mil iza: «Ma qué zanda guniná ru enda guti, ne ma qué zanda guni ganar ni» (1 Corintios 15:55). Dxi ca nga guinitilú enemigu stiʼ binni guidxilayú.