• Zabí Dios laabe. «Maʼ gulieeʼ rey stinneʼ [...;] zudieeʼ lii ca nación ne guidubi Guidxilayú casi herencia» (Salmo 2:6, 8).

• Zabibe lu trono stiʼ rey David. «Maʼ gule ti baʼduhuiiniʼ, tuuxa bidii laanu xiiñiʼ [...]. Jma stale lugar zuni mandarbe, ne qué ziuu dxi guirá guendariuudxi, lu trono stiʼ David ne lu reinu stiʼ, ti guzuhuaa ni dxiichiʼ» (Isaías 9:6, 7).

• Zálebe Belén. «Lii, Belén [...], de lii zabeeʼ tobi ni guni mandar [...,] purtiʼ zuni mandarbe lu guidubi naca Guidxilayú» (Miqueas 5:2, 4).

• Zucaanacaʼ ne zuuticaʼ laabe. «Bíʼnicabe menu laabe ne biiyacabe laabe casi ti binni ni qué risaca [...], bininácabe laabe pur ca donda stinu; pur guiráʼ ni maʼ bicheʼnu» (Isaías 53:3, 5).

• Zabánibe sti biaje ne zusisácacabe laabe. «Qué zusaanaluʼ naa ndaaniʼ baʼ. Qué zudiiluʼ lugar guiaana ni qué rusaana lii ndaaniʼ baʼ [...]; qué ziuu dxi guirá guendanayecheʼ lu naluʼ ladu derechu» (Salmo 16:10, 11).

Binni ni bizaaca guiráʼ ni bizéʼtenu riʼ nga Jesucristu. Ne sicaríʼ gudxi ti ángel María, jñaabe: «Dios zudii laabe trono stiʼ David, bixhózebe [...]. Qué zapa Reinu stibe fin» (Lucas 1:31-33).

Qué ñuni mandar Jesús biaʼ tiempu guyuu ndaaniʼ Guidxilayú. Peru, dede guibáʼ zuni mandarbe binni guidxilayú purtiʼ laabe nga Rey lu Reinu stiʼ Dios. ¿Xiñee laabe nga Rey ni jma jneza guni mandar yaʼ? Guidúʼyanu xi bíʼnibe dxi guyuube ndaaniʼ Guidxilayú.

•   Bizaalaʼdxiʼ Jesús binni. Gucanebe hombre ne gunaa, ni nahuiiniʼ ne ni huaniisi. Gastiʼ naca padé laacaʼ, pa nápacaʼ o pa qué gápacaʼ bueltu (Mateo 9:36; Marcos 10:16). Ora gudxi ti hombre ni napa lepra laabe: «Nanna zanda gusiándaluʼ naa pa gacaláʼdxiluʼ», biá Jesús laabe ne bisianda laabe (Marcos 1:40-42).

• Bisiidiʼ Jesús laanu xi gúninu para chuulaʼdxiʼ Dios ni rúninu. Sicaríʼ guniʼbe: «Qué zanda gácatu esclavu stiʼ Dios ne laaca gácatu esclavu stiʼ Bidxiichi». Laaca guniʼbe naquiiñeʼ guni tratarnu xcaadxi modo ñuuláʼdxinu ñuni tratárcabe laanu, laani nga ni runibiaʼnu casi Regla de Oro. Laaca bisiidibe laanu rizaalaʼdxiʼ Dios ni rúninu, ni riníʼ íquenu ne ni runi sentirnu. Nga runi, para chuulaʼdxiʼ Dios ni rúninu, caquiiñeʼ chuʼnu cuidadu né guiráʼ ni riguʼnu ndaaniʼ ladxidoʼno (Mateo 5:28; 6:24; 7:12). Jesús guníʼ para guibáninu nayecheʼ, caquiiñeʼ gánnanu xi racalaʼdxiʼ Dios ne gúninu ni (Lucas 11:28).

• Bisiidiʼ Jesús laanu ximodo gannaxhiinu. Rindá ni riniʼbe ne ni rúnibe ndaaniʼ ladxidóʼ binni. Biblia ná: «Nabé bidxagayaa guiráʼ ca binni que pur modo rusiidibe, purtiʼ rusiidibe laacaʼ casi ti binni ni napa autoridad» (Mateo 7:28, 29). Guzéʼtenu ti ejemplu, biʼniʼ mandarbe laacaʼ «gannaxhiicaʼ ca enemigu sticaʼ». Ne ora mayaca gátibe, sicaríʼ biʼniʼ orarbe pur ca binni ni biiti laabe: «Bixhozeʼ, biʼniʼ perdonar laacabe purtiʼ qué gánnacabe xi cayúnicabe» (Mateo 5:44; Lucas 23:34).

Jesús nga Rey ni jma jneza guni mandar. Maʼ biziidiʼ chaahuibe ximodo gúnibe ni, nadxiibe laanu ne racaláʼdxibe gacanebe laanu. Peru ¿padxí guzulú guni mandarbe yaʼ?