«Ra nuuluʼ, ni rucaadiaga oración, zadxiña guiráʼ clase binni ra nuuluʼ» (Salmo 65:2).

Nuu binni runi orar purtiʼ nga racané laacaʼ guni sentircaʼ galán, neca riníʼ íquecaʼ guirutiʼ rucaadiaga laacaʼ. Peru qué runi orarnu para si guni sentirnu galán ne ganda gudxíʼlunu ca guendanagana nápanu. Biblia ná «nuu Jehová * gaxha de guiráʼ ca ni rucaa ridxi laa, de guiráʼ ca ni dxandíʼ rucaa ridxi laabe [...]; rucaadiágabe ora guinábacaʼ gacanebe laacaʼ» (Salmo 145:18, 19).

Nga runi zanda chuʼnu seguru rucaadiaga Jehová ca oración stiʼ ca binni ni runi adorar laabe. Cumu nadxiibe laanu la? cayábibe laanu: «Zucaarídxitu naa, zeedatu para guni orartu naa, ne naa zucaadiagaʼ laatu» (Jeremías 29:12).

«Cadi gusaana de guni orartu» (Romanos 12:12).

Biblia cayabi laanu cadi gusaana de guni orarnu ne gúninu ni ora tiica si. Rihuinni dxichi racalaʼdxiʼ Jehová guni orarnu laa (Mateo 26:41; Efesios 6:18).

¿Xiñee racalaʼdxiʼ Dios guni orarluʼ laa yaʼ? Guníʼ ique ndiʼ: ¿cadi dxandíʼ riuulaʼdxiʼ binni guinabaʼ xiiñiʼ laa gacanebe laa la? Zándaca maʼ nanna ti padre xi caquiiñeʼ o xi cayuni sentir xiiñiʼ, peru óraruʼ rucaadiágabe ni gabi xiiñibe laabe, rudiibe cuenta nadxii ne napa confianza laabe. Ngaca rizaaca ora runi orarnu Jehová, rusihuínninu nápanu confianza laabe ne racaláʼdxinu guidxíñanu laabe (Proverbios 15:8; Santiago 4:8).

Lagulaa «guiráʼ ni riguu xizaa laatu luguiabe, purtiʼ rizaaláʼdxibe laatu» (1 Pedro 5:7).

Racalaʼdxiʼ Dios guni orarnu laa purtiʼ nadxiibe ne rizaaláʼdxibe laanu. Ruuyabe ca guendanagana nápanu ne racaláʼdxibe gacanebe laanu.

Biaʼ dxi bibani rey David la? gunábabe Jehová gacané laabe ne gúdxibe laa xi riníʼ íquebe ne xi runi sentirbe (Salmo 23:1-6). ¿Ximodo biʼniʼ sentir Dios pur David yaʼ? Gunnaxhii ne bicaadiaga guiráʼ ca oración stibe (Hechos 13:22). Laaca rucaadiaga Dios laanu purtiʼ rizaaláʼdxibe laanu.

Zeeda ca diidxaʼ riʼ lu ti salmo ni cá lu Biblia. Hombre bicaani gunna dxichi rucaadiaga Jehová ca oración stiʼ, ne ngue guizáʼ gucané laa. Biʼniʼ sentirbe nuube gaxha de Dios ne gúpabe stipa para gudxiilube ca yuubaʼ ni cadíʼdibe (Salmo 116:1-9).

Pa nuunu seguru rucaadiaga Dios laanu, qué zusaana de guni orarnu. Guidúʼyanu ni bizaaca Pedro, ti hombre ni nabeza ladu guiaʼ de España. Gutiʼ xiiñibe ni napa 19 iza lu ti accidente lu carru. Ora cadíʼdibe ra nagana que, gúdxibe Dios ximodo cayuni sentirbe ne stale biaje gunábabe laa quixhedxí ladxidoʼbe ne gacané laabe. ¿Xi bizaaca yaʼ? Sicaríʼ guníʼ Pedro: «Bicabi Jehová ca oración stinneʼ. Biquiiñeʼ Dios ca hermanu para quixhedxí ladxiduáʼ ne ladxidóʼ xheelaʼ ne gucané laadu».

Neca qué nibani xiiñibe sti biaje pur biʼniʼ orarbe la? gucaneni Pedro ne familia stiʼ. Sicaríʼ guníʼ María del Carmen, xheelaʼ Pedro: «Gucané oración naa para cadi chuaaʼ xhaataʼ xizaa. Nannaʼ riene Jehová naa, purtiʼ ora rinieeʼ niaʼ laabe ratadxí ladxiduáʼ ne runeʼ sentir paz stibe».

Racané ni cá lu Biblia ne ni maʼ gudiʼdiʼ stale binni gudiʼnu cuenta rucaadiaga Dios ca oración ni rúninu. Neca zacá, qué ricabi Dios guiráʼ oración. ¿Xiñee nuu oración rucaadiaga Dios ne xcaadxi coʼ yaʼ?