Peru stale binni riníʼ ique qué zanda guibani galán. ¿Xiñee yaʼ? Purtiʼ málasi zanda guchaa xquendanabánicaʼ. Casi ni cazaaca pur pandemia COVID-19, maʼ gadxé modo nabani binni purtiʼ maʼ huaxiéʼ dxiiñaʼ nuu ne stale tu laa maʼ guti. Nga runi nuu tu riníʼ ique maʼ qué zanda guibani nayecheʼ.

Cumu nuu binni xizaa ne qué ridxela xi guni la? ruyubi xi gacané laa. Nga runi, runi crécabe nuu ti stipa ni qué rihuinni ni zanda gacané laacabe, casi destinu o suerte. Xcaadxi ná pa guni estudiarcaʼ ne gápacaʼ bueltu zápacaʼ guiráʼ ni gacaláʼdxicaʼ. Ne nuu tu riníʼ para ganda guibánicaʼ galán la? caquiiñeʼ gácacaʼ binni nachaʼhuiʼ.

¿Peru ñee zanda gacané ca ni bizéʼtenu riʼ lii guibániluʼ galán casi racaláʼdxiluʼ la? Para gánnaluʼ ni, guníʼ ique ca pregunta riʼ:

• ¿Xi zacané lii guibániluʼ nayecheʼ?

• ¿Ñee zabániluʼ nayecheʼ pa guni estudiarluʼ ne gápaluʼ bueltu la?

• ¿Ñee zabániluʼ nayecheʼ pa gácaluʼ ti binni nachaʼhuiʼ la?

• ¿Paraa zanda guidxélaluʼ ni zacané lii guibániluʼ nayecheʼ?

Zacané revista riʼ lii guidxélaluʼ respuesta stiʼ ca pregunta ca.