Normal nga guidxiichinu ora chuʼ tu guniná laanu, peru qué racalaʼdxiʼ diʼ Dios guquíxenu ni. Ni cayabibe laanu nga gusaananu ni lu nabe, purtiʼ maʼ biʼniʼ prometerbe laanu zabeebe guiráʼ binni ni runi cosa ni cadi jneza (Salmo 37:7, 10).

Ora guquíxenu ni bíʼnicabe laanu jmaruʼ si raca nanaláʼdxinu binni ca, ne binni ca laaca raca nanalaʼdxiʼ laanu. Nga runi, pa chuʼ tuuxa guniná lii o gabi lii xiixa diidxaʼ naná la? cadi guquíxeluʼ ni laabe. Bicueeza laca lii ne cadi nagueendaca guicábiluʼ laabe. Nuu tiru jma galán cadi gúninu gastiʼ (Proverbios 19:11). Nuu biaje la? zadxaagalunu xiixa guendanagana ni caquiiñeʼ guni chaahuinu. Casi pa chuʼ tuuxa ni guniná lii purtiʼ qué ninanda ni ná ley la? zándaca guiníʼ íqueluʼ guchíñaluʼ laabe nezalú tuuxa autoridad.

¿Peru pa rábiluʼ qué zanda gaca chaahuiʼ guendanagana stiluʼ né diidxaʼ nadóʼ yaʼ? ¿O pa maʼ bíʼniluʼ guiráʼ ni nuu lu naluʼ para ñaca chaahuiʼ guendanagana ca yaʼ? Neca zacá, cadi guquíxeluʼ ni cayúnicabe lii, purtiʼ pa gúniluʼ ni la? jmaruʼ si zaroobaʼ guendanagana ca. Cadi gudiiluʼ lugar guiroobaʼ xiana nápatu, biziidiʼ gápaluʼ confianza zuni chaahuiʼ Dios guendanagana stiluʼ. Salmo 37:3-5 ná: «Gupa confianza laabe ne laabe zacanebe lii».